Naupang chik hih lai apana Zomi lia leh tangte ngaihsang leh zaila tawh a lungsim uh sutaitu Zogam Artist Association kum 24 pha theichiang in a theihvek ka gingta a, himahleh khangthakten bel kum 24/25 phakhinte sanga a ngaihnat ua, a ngaihsang uh ka lamen kei ahi.
A hong function taktak tunglai 94/95 vel lai khawnga Lamka mawltual a "Zogam Rock Concert" chia Concert thupitak kibawl zuazuate khawng mitkha in a mang thei nawnkei hi. Hiai hunlai in Zomi khangnouten khovel ah ZAA te lou lasiam omlam kiphawk khalou phial hi.
A album masa uh "TUNNU ZOGAM Vol. I" hon khahkhiat bang un pawtna, lampi dung teng ah tape record nei teng inn ah a kikhah zaak ahiden mai a, mipite lungsim ah Zogam itna chi ahoih tuh zoh mahmah uh hi in ka thei hi.
A kum chet zaw ka theikei, New Lamka YPA Hall ah "Aw Zogam it aw selungphwng lo aw, gam leh nam ittu tangvual zatam te'n, saunuam laikhun pan silpuan zial uh a, gamdai ah sawlbuk bel uh.." chih laa hong kikhah a, gam leh nam it tangval hunkhop gamdai zuan din avan uh pua in hon kuankhia bang uh zaw naupang neuchik nasan mittui a luangzou mai hi..
Zogam Artist ngaihsangna hong uang deuhdeuh mai a, a lasakte un mi lungsim tawng dengkha mahmah mai a, aneupen apan alianpen tan "Buh-al khuang e..", "Zogam etlawm huihkhi hong laang...", "Sianmang in..", "Khua kiim ah.." chih laate ngaikhalou leh theilou aom kei ding hi.
Hiai bang hunlai in i kiim ate ZAA bangtuka ki-organise a haat aom kei hi. Huaibanah, lasiamte gam leh nam adia mi kaihuaitu, mi thathousak leh khuam poimawhtak ahihlam uh theih in hong om panpanta hi. ZAAte telna program bangchu mite a lunglut thei mahmah mai uhi.
Hunte hong paizel a, i kiim aten ei paidan hon enzui in hong kiphutkhe thak zungzung ua, eite hong dem sawm in pan nakpitak in hong latou zungzung tamai uhi. ZAA te hoihtaka ana ki-organise lou hileh i kiim a pau tuamtuamte leng hong hichi pan ding uhiam kachi lungsim hi. Gam leh nam goumanpha i Artistte uh ahihlam mite theisuahsak ZAA ahihngei leng ka um hi.
Zomite a bulpat siam, a nasep uh a kuitungzou omlou miten hong chi a, hong dem nop laitak un ZAA in a phaktawp phata ahi de aw....chih vungvung theih ding in a thawm ahong daai hiaihiai maimah ta a, nidanga ZAA te market bang i kiim a miten market hong suahta uh bang kasa a, puaknat huai kasa thei mahmah mai hi.
Hunte hongpaitou zel a, Album bang hong bawltou zelsam uhi. Himahleh Tunnu Zogam I, II, chih khawng abawllai ua aki-organise bang ua ki-organise zoulou ahi diuh de aw chih theihkhop in mite lungsim aluite bangin a dengpha zou nawnta kei a, a bawllam uh nasan ana theilou adim in aom ta a, poilua chihlouh gen ding aomkei hi.
Tuni chiang in Zomi Namni om nawnlou hileh ZAA chih min a kizapha lai de aw...chih theih ding abangta. Mi maimaiten i lungsim ah nidanga ZAA akigen chia lasiam dohsang tunglama adim a kivual uh hia, tua mi 10 kan le pha zoulou uh, bangchidan ade aw chih khawng ngaihtuah in ki-lungbuai mahmah theizel hi.
Achang in ZAA hat henla, tua i lasiamte uh genlouh i music siamte uh, ets. Thanlian, Steve Kid, etc te khawng a poimawh leh foreign tan ah sponsore zoule uh, amaute siamna in Zomite suminthang tuan mahmah lai ding hia chih bang lungsim ah aom mahmah hi. Ngaina selua ZAA bang hehsan hun atam mahmah mai hi.
Ka ngaihnat mahmah manin leh ka thuduh ziak adiam ZAA bangtan tungta a chih bang kana kan chia athei leng aom tuan kholkei ua, poi kasa petmah mai hi. Tun Vaiphei Artist a kakhia bang omta chih thu bang kaza a, ahuchihle Paite, Zou, Simte, etc Artist Association leng hong omlai diam chih theih mawka, poi petmah mai hi.
Huaiziakin, heututen pan hon lathak un, na mi nasate uh laa lam ah gilkial mahmah lai kahi uh. Kumteng bang in i niteng thukizakna ah ZAA vaipaw thak, ZAAten album thak bawlkhia, Zomi sunga lasiamteng ZAA ah tuibang luangkhawm in hiai nna a semsuah uh chih zak ding hong om theita leh a uthuai telmai...
Tui bangle sawt a vung luat leh uih chihdan deuh in hong daai sawtlaw mawkle hong bei maimah ding lauhuai kasa mahmah a, huaiziakin a thak in pan hongla thak uhenla, tulai hun tawh kituakin nna hong semtou uh henla, Zomite goumanpha ahihdan uh hong kiphawkthak uh henla, I gam adin zaila oihsiamte athakin zaila tawh pan hong lathak mahmah le uh kachi vungvung ahi.
"Sian aw, ka zaila saksiamte uh ZAA te kituaksem a hong om ua, amite uh hong suktai sem ua, dialdial leh diamdiam a pheiphung hong suankhawm theihna ding un nangman vualzawl inla, amaute makaih inla, muvanlai bang thahatna hong guansak nawn in... aw..."
.