“Zum leh Sailii a si omlou” chi’n laigelh a piak mai chu sih-le-sih; dam-le-dam, khapet zen a sawmta. Love Guru leh Buaina Khuukpi ten le na itna chu pasal huai deuh a na gen tep di ahi chi deuh zut uh. Huai Adam leh Evi apat a hon suut tou zeente bang alah kigelh siamlou zawmah dia chiin zou dia kigingta theilou. Ngaihtuah chia pasal khat a piang khesam ka hihleh bang dia ngamlou vial di la? Pasal te’n a Traih di uh mah hilou hia? chi’n mahni tha kiguan. A chihleh bang chi gelh di? Bang chi pat di? Buai ta geet!!! Hiai hun chiah in chu William Shakespeare ka mamoh khop mai. Ka Pupu Kumpi Sholomo damlai hileh chu ‘Pu hon gelh sak mai in’ va chi di hi ing a…

Nikhat keleu muh kei lehle ki-om theilou hita, zingkal a khatvei bang imuh khak cheuh leh i mood nileng a fuh top lah aw; i muhkei a leh chu “Nikhat kong muhloh kum kivei bang” huiha! Zawlla teng bang na kipiak bawl, kituak leh dik khong asak asa neunau. Kei adia hon phuah sak uh ahi chi nuam phial. A skul uniform toh bang kimeh salua himai, a changchang in a Puanten ka mu kha, fuhsa semsem, apuan ten ziak a Aung San Suu Kyi bang a nunneem dia khoih. ‘Zolia pal aw hong baat nuam veng’ ka chi ut. A silh pepeuh bang nalh sa, a favorite color di bang na hi sapsap mawk, a meh duh di tanpha ngaihsun- bang phatuam di le a diam ah! A nini in a hoihna pung dedeuh a deh aw chih theih hial leh kilawm, a ngaihna om non mahmah lou asun a zan in mitkha ah hong kilang denta mai. Mitsi lelah kimu; Hak lelah kimu -Gim huaina khemkhem e. Zingkar i thoh chia lungsim ah elektik bulb bang mai in anuih mai etlawm tak mai a hong vak kuau a.

Huai kia le hilou a Nu le melhoih kisagop mai ahi. Upa te'n a aaktuam sia nasan uh hoih kisa achih chet uh himai. Mi tengteng inle hoih sa dia gingta in tanlouh khak di laugu tenten. Meltheihte khat ngial bang in chu a st*r nu fuh salua petmah ek le a neikei di, a neih khak zenzen lehle a uihkei di chi zozen. Vei veve kisa gopta, gim le kisa ta hinteh lawmpa taget inlah chu ‘Muani toh bang na pieng dah mai le uh’ chi ziah mai. Ruotmawi ral taktak lai bang le khat vei luppih a sih zuam kha tam mahmah hiin maw, mi khat bang in Ruotmawi favorite color toh a inn pum zut hi sese. Hichih zah dong a ki ngaihsun, kigeel ngitnget na in a samzang khat lel le ling seihlou di chihtel~ ‘Love hurts but not the one you love’ chih kha muh gige theih dia gelh ngat ahi.

Table tung a pen tampi om na zeenpi a thak va lei hial, gelh dia kisata. Notebook a a first page lam a gelh ngam zenlou, a siang theipen di notebook page laita pen teel khe ngat. Pen bang hoih let kisa a ulsuak zeen. Damsung adia Handwriting hoih thei pen di leh a neem theipen din gelh panta. A bang chidan ahi diam ah lapau ngen hon pot zungzung mok. Sim thak chia fuhsa zoulou(ki zahpih teutau). “Kon ngailaw petmah, ka om tentun” chih gen/gelh di lel ni thum ni li bang kisual; sawm vei zavei gelh tuantuan hilai. Tha leh Zung chih zok di adiam? Hun leh Ngaihtuahna kiseng sa thou ka hih chia Lawmpa Mangpi kia “Khitui Naptui toh ka Gelh a ahon dawnkei ngeingei leh akhan khiam di ahi” chih chiamnuih a kagen leh a nuihza law mahmah, maibei zen in a nui aka. Toptawp in sawmvei bang Draft nung in hoih sakna lailai kai khom in FINAL THELNAH zeemzou khongkhong.

Sim veel lumlet munlua ihih chia i byheart kia phetlou a fullstop leh punctuation teng nasan toh byheart hita. Envelope di bang chu duhtui khekha tel e, Love Sign leh Rose lim tamtam kha Officer Choice eh ka zuau First Choice. Johnson’s Baby Paudal soh cheuh in khep nih a dawi zen a khep khin, naak ngamlou hial in a bawm di ah ihon thunlut hianhian bang zaw aw i chiling sim mai ahi.

Eh! genkhalou dek, ka skul uh kibang ahi a Sports lai khat vei group photo kilak nang om. Salah! agei a om a dok khak teitei kon som a kon target taktak chu a buaihuai tel. A kiang ut selua lah va naih taktak ngamlou ki-om leiluai aka. A single lim deih tenten, Yashica Camera Roll Film te khat puan kom a selgu thenthan zezen in alawm te toh tukhom lai va gem phei khenkhen, Sakei Baknei in Sakhi bawh dek bang mai in. A siiklam kia va meek lauh in kipak mahmah kihali vive lai. A mel dawkchian in vala le hon thei di, chi'n huchia la suk mai. Chihleh a lim result mu ut ta lawzok zel, chi bang thak tettet hial. Ni thum zoh in huai ka lim guklak chu melmuh thei in omta, a lim maimai le ka duat tel mai. Frame ahoih thei bang pen a ka neih zawh sunsun ah ka koih ngat hi. Zingkal ka thoh teng leh lai ka sim dek chia enen mai. Khat veivei bang kantha kom a light toh en keukau se chitchait. Ni khat ka Hostel Room a night visit a ka teacher te uh nih hon lutthut mawk, lim sel di lamlam le na ngaihsun khalou. Ka table tung a ka koih hiai kua lim e hon chi ta, tannau te khat dan in gen le ngaisia kei di uh chiin- “She is my Mother's elder brother's wife's elder brother's daughter” ka chih le kamka heuhou maila aw, hamhaih mahmah sam. Ok, whoever she may be, she is someone to you chi in a nui naknak aka. A Ken lah chu “very suretedly she is my veritedfully my someone: not only that I truly, deeply, madly love her” ka chi lungsim a.

Hiai ma neng khah gensau lai di, alim sawp la dia ka kuanna thu uh. Alim sawp la ding in lawmpa Songkhai(name changed) toh kuan suk chenchen. Ka kiik lam ua ken Malta meh kiduhsek hiven chiin Ngari lei dia ka lut leh Songkhai in “swas’ kenle van poimoh lei di ka nei kana paitou dia hon manoh tou in aw sak zek ahi” chi. Ka lei khit a lawmpa’n koi a van lei dek ahia chin dawrte ka bat et touhtouh leh Hardware Store ah na om hiveh aw. Dendrite lei dek chu hipeuh mah in- teep leh muam, khamtheih chih lam a kisiangthou vanglak in alei di hon gen utlou, kisuanglah a na mapai zenpi va tuak khadan kei vele. A lei dek thei zenpi “bang e na leidek” chia ka dot leh “SIIKKILH” hon chi tazen, nuih bang za lehlam -Presents of Mind neina e chi sim kom in keile ahihi a gen pawl khat ka hih chia “SIIKKILH HIIP theih hia?” chi kom in ka nuai tuah seusau ua.

Awle, i thupi ah chuang kai kik non di uhchuu! Ka Tongluan Thelnah piak theih maidia ready sa, kingaih tuah thakthak zel. Zoukei zawmah laile maizum huai lawtel di chih khong ngaihtuah chia pum nalvas gop hita. Hoih asak mahmah va heel pat dek ni a- sam sathau gim namtui toh kipum zuut chih Upa D.K Samte, Dorcas Road gen bang phawk khe tualtual. Thil hi theilaw didan eimah ve chih phet in om. Khaw ul bang kaikhin malam ahi. Taaksap beidot tawp khok in chu idea khat om, huai tuh Lohchin khak leh and a Impact haatdeuh khak leh chi'n Bible kaal khawng ale koih masa hileng kilawm.