Car Ka Nei Teisam A
By Vz Siam

Mi’n car khawng a neih uleh ahi didan mah hi a, kipahluatna ding leng omlou hileh kilawm. Va kipahpihluat le kuullou mah bang. Ei leuleu in car khawng i hon neih hial le bel tagah sialnei mah kibang in chin, kipah a om diak, mi’n leng hon kipahpih diak uh hileh kilawm. Huaiziak hi’n teh tanau-laina gamla sim a omte bang in leng hong etsak khiukheu uh. Nau nei mah bat in om.

Solkal a sepna lian lawtellou nei a sawtlou nung a gari peili nei leipah i chihte khawng zaw a neekguuk, eh thahah laizang, tulai neekguuk kigentamlua a, a hun-hunlou chilou in a hong pawt phuphut a; a pate’ khang ua leng leizou dite ahi uh. Huchiloute a dia gari peili nei va lei bang le haksapi ahi. Batlaak ding hita him lele. Huaiziak hi’n teh ei bang in leng batlaak sapsap dia le kum tampi i sep nung a kibatlaak zoupan. Guwahati a va la in inn ka hon tun ua, a nunglam niik (bumper) bang k’on tatheek malam uhi.

Tuailai khawmpi bang a hong naisim toh khawmpi hoh kal ka ngaklah gusim hi. A hong tung peetmah a, car in ka kuan hanhan a, nungakte’n a hon muh deuhna ding uh chi’n mi tamdeuhna ah ah ka sial (park) hi. Ka kumdek laitak in nidang a ka nungak heelheel nu kongpi a hong luut ka galmuh a, awl a kum in ka mitsiik in tua minu ka en gige a, a hon naih sim tak in a chahbi ka meekging gaih hi. Ka heelna kum tampi ahita a, himahleh ka zouzou mahmahkei. Lam-et om mahmahlou chia ka tawpsanna leng kum tamsim ahita.

A hon mu petmah a, ‘Eh, nang le hong kikhawm chio, kimuhlouhna le a sawtta e maw. Koi ve i kichibai kei dia,’ hon chi samsam a, ni dang a le hichi kamsiamlua le hilou, tuni tuh a kamsiam mahmah a, ‘Hmm... huamkha khong ing e...’ ka chisim hi. ‘I tukhawm kei di ua maw, lapawl sa di na hihkei leh,’ hon chi behlap a, ei bel i ut gige mah ahihchia kinial hetlou tuh eive. Kikhop tawp in ka va kikha thepthup uhi. ‘Na phone number le nei nawnlou ing a, hon pe ve maw,’ hon chi behlap bang zaw aw lungphu a haat zozot ve. Huai nung tuh ka kihou hoih viau ua, pawt bang leng ka va pawt zezeuh hi. Car khawng a nungak hel a kuan tuh khe hiam kho kuan sang in a na nuamzaw himhim. A veng lampi a a selaw zen a hive’n.

Ahi a, car i hon neih leh thil i muhdan a hong kilehbulh gaih hi. Ni dang in khe a pai in kipang a, tu in gari a taite a hong kihita a, huai in i lungput a hon lehbulh sak hi. Khe a pai a i pan lai a gari hong tai leh ki-awlmoh khollou, lamlai simsim bang a kipekzuih dandan. Tua a hektu a i hong pan leh tuh huchite bang phuutsuk a uthuai maimah. Paupu auto-te tageet lah, mi ma a taitai lai khawng lamlai kho khawl phutphut thang a thangsak uh, a nawl deuh a kikhin phot le sawmlou uh. Khat vei bang houh huchia khawl dedaw, a nung a ei le khawl maimah ngai. Peelzou na ning chia ka pelh teitei leh a mailam niik (bumper) kil in auto taw va liak teitei a ka. Gari heek tuh midohzou mahmahte’ a di hitah chih muh khiat in om. Ei khe a i pai a gari’n hawktui hon theh leh kiheh mahmah. Ei a hektu a i pan hial leh pilvan bang le haksapi ana hi. I heektam nailouh mah toh. Huchi liimliam khawng ana hi.

Hinkhua tuh tua bangdan ana hilim veh aw. Ei etdan apan a mi mohsak baih a baihlam ana hi. A lehlampang in en lele huchi mah. Tuma kum sawm chih laivel hi veh aw. Bank kho va hoh, i hoh patna khawng ahihchia gamtat diden kithei mahmahlou, ‘hiai koilak a hihsak di a,’ i va chih chia, ‘pam ah aw,’ hiam, ahihkaleh khut kho kawkzauh un chin, a kawknalam uh i etphei chia lah counter tampi om phei zengzung, koipen tak a va dot nawn di a diam ah. Graduate toupi in saving account khat i hong dek a, a form hukdim di bang lung a lungzin huai. Koi teng hukdim a koiteng huklouh ding! Banghiam hihdan khat i theikei a, i va kan a, hoihtak a kidawn chih bang vaang sim. Nuam tellou. A nung sawtlou in bank ah i hon sem a, amau sa kikhawkzaw hileh kilawm. Huai tel bang theihlouh chia mi iplah tuntun a om. En a hihdan theilaw maimah i hihchia a theiloute iplah a omkha naak. Ni khat a a kibang ngen sawmli-sawmnga vei gen chih bang zaw chimtakhuai law khong mah ana hi. Huchi kawm a kamdam gige le haksa simpi ana hilim hitah chih phawkkhiat a om.

Damdawi inn a nurse-te bang leng kihah gen mahmah. Pathian’ veenna ziak a amaute toh kinawkkha a ki-omlaw nai tadihlou. Migen tuh kiza vengvung gige. Kum tamkuam khawng bank a i sepnung a tuh, ‘Kei zaw nurse-te’n a honna hih vavauh ua, a hansan uh lele ka theisiam di,’ kichi nuamsim maidan ahi. Ei theihpihlouh a mi’n haksatna bangzah pal a ei a dia nnasem ahi ua chih va kingaihsun khalou a, a kamneem pen, a thanuam pen ana kilunggulh gige kha ana hi. A thadah leh hansawk himhim le zaw om lawtel in teh. Ahi a, bank hi hen aw, damdawi inn hi hen aw, ofis tuamtuam hitaleh, mite panpih ding mah a sumloh a guaih a om kihi ahihna ah lungduai gige tuh ahi ding him ahi. Hinkhua ei etna lampang apan kia kimu khanaak a, a pang langkhatlam kimu baanlou khanaak hiveh aw. Huaiziak a kimohsak baihlam pahpah. Hinkho pang langkhatlam mubaan chiat le hang tuh i haksatna chiat kitheihpih di hang a, kitheisiam chiat ding hang a, hinkhua tawldam tuan mahmah ding hi.

Khatvei tua ka lawmnu’n, ‘gari lopna a n’on pawtpih di hilou di,’ a hon chi laizang a, i ut gige sa hizel ahih chiang a hoh ngei nailouh deuhna chi in Gelmual lam ah ka va hoh uhi. I nungak deihpen toh hichia va pawtkhawm leenlaan bangzaw naak noplua in chin kisaktheih sim bang a om maimah. Leitung a ei kia mihing om mah kibang. Meltheihte khawng toh kimu a, hon dembawl chiang bang ua i kam a ki-utlou sak sim zezen hang a, i lung lah kim a ana kim maimah. Pailam in baihlai na, Tamneem i va hoh di, ka kichi ua, ka va baangtou uhi. Huchia nek di bangbang ne khin, a man pe dia ka kisak leh ka lawmnu’n, ‘Gari lopna in ke’n k’on pe di aw,’ chi’n a hon piak khalh a, pia ahi mai ve. Huchi’n ka pai ua, amah ka va khak zoh a innlam ka pai bang zaw aw, inn tun tan nui ka hi mai ve. Upatlam bang kimanoh simta, lawm-le-vualte’ chiamnuih bang leng khamhuai simta, nu-le-pate bang in leng tu’ meel mu utta ahih chiang in tukum tuh thawn nawnlou ding eive ka chi lungsim hi. Mi’n zi neita in chia hon chiamnuih tuung khawng ua bel zaaknop simna in chin, a hong sawt chia tuh chimtakhuai zou thoudan ahi.

Gari kha khat a hong ching a, servicing bawlsak di a hon chi ua, a servicing na taktak lah Guwahati pek a hih chiang a kinaih baanlou. Lamka a huai mun a le hihsak theih di, chi uh ahih chia, va hoh pah leenlaan. A gari laibu honna ngen uh, pia. Bangbang hiam hon gelh ua, seal hon tahsak ua, zou hi mai. ‘Eh, a gari enlou di maw,’ i chih leh, ‘Nou a noplouhna gen na neihkei uleh et ngailou,’ hon chihsan maimah uh. Ei gari kha khat lel hekkha pante’n tuh a noplouhna gen di kithei hetlou. Nuam kisa vek suk mai. En tuh a khawlbu siin khawng hon hong di ua, a nuai kho kitholh luut hanhan didan khawng ua a na suangtuah. Ana hi deklou. A khawlbu siin bang leem khemkhem uh henla, sawk zazalh khemkhem le ule ei tuh lungkim lawtel di kihi. Piteek khat ki-ensak dia hoh a, doctor pa’n a bil a ngaihna a ana ngaihlouh ziak a lungkimloute mah va bat in a omsim hi. A online achi uh hiam ah, huai a ‘servicing bawl hita’ chih chiamtehna beek ana koihthei le utuh hi di hia, huai le koih theilou nalai seet uh, a munpilam ate’n, ‘Na gari a hun chingta, servicing na bawlkei,’ hon chitou thithe uh. A nawn chiah tuh Phai bek ah va kihihsakta heh ka chi numnum phet hi.

Hinkhua a lam-etna a tamluat chia khasiatna di tam ana hi maimah aka. Nungak leh tangval khawng i hong kingai a, tua bang a lam-etna tamlua leh hinkho pang langkhat muhlouh ziak bang a kitheihsiamlouhna lian pipi piangthei ana hi leuleu. Khatte’n bangpi a a ngaihlouh uh leng khatte’ a dia thu lianpi ana hithei. Huaite ziak a kikhen-kibal bang ana baihlam mahmah. A pang lang nih mukhawm gige ding in pilvang le tuh i zawlkaal, i nupa kaal, i lawmta kaal bang leng ana nuamlawtel di hitah chih a om. A kikheel nung khawng peuh a theihsiamna kineipan. A tuung in hiai bang in ana mukim leng ka zawl kaal, nupa kaal, lawmta kaal uh nuam mah ding hive’n chih a om. Mihingte gintaksa hoih hetlou ana kihizaw lim in chin. Hoih i kisaksim chiang bang a leng i hoihlouhna i muhlouh man ana hizawlim in chin. Mahni hoihlouhna kimuh chih bangzaw thil haksapi ana hi. Mi’n ahon kawkmuh chiang ua lah chiang a chiang kelkul maimah, haihvual ding ana hilou. Ba hiai tel ana mulou ka hia chih tuntun a om. Bangteng hileh tua bang a i chitlahna in i lawmta kaal, zawl kaal, nupa kaal ahihkaleh akua-akua toh i kaal a na nuamsaklou a, kikhen-kimakna tanpha ana tunta a hih in leng theihsiamna i neih nini a pan kibawlphat a kikheelkei. Khente’n hichi bang lungkhamna a tuah hun ua zu peuh a puuk in a hinkhua uh kiselai a sesak deuhdeuh ua, huai di tuh ana hi hetlou. Mihingte’ hinkhua hoihkimlou hoihlouh sak deuhdeuh a dawnna ahikei a, a hoihlousa hoihsak sawm a panlak tuh a dawnna ahizaw. I hun paisa a bawlhoih thei nawnkeita zong in, mailam a mi tampi toh kinawktou lai ding i hihman in huai ah hong phatuamtou pek ding hi. Hun paisa a mi lungsim nasaktu i na hihleh, hun hong tung zel ding ah mi kipaksaktu hih i sawm ding uh ahi.

Huchi’n tua minu toh ka kihou touzel ua, ni khat tuh, ‘Thil khat k’on gen aw... Ah, hilele ka kisuanglah...’ a hon chi a, ke’n tuh, ‘Hmm... Petmah aw. Ni dang in a hon deihkei law na a, tu in tuh a imzou nawntakei maw...’ ka chi lungsim hi. Ke’n bel ama kiang a itna thu gen ka sawm nawnkei. Huai tan vei ka heel nung a ka heel zohlouh, tua aman hon deihta ahihleh hon gen na ve, ka chi a, a pantu in ka pang ut nawnkei. A langkhatlam ah mi’n lawm bang a hon bawl sawmlai ua ei ana kilam-et pah popop a zawlthu va gen teitei le thil haihuaipi ahihna ah ama’ hon thuah dandan a thuah lel ka sawm hi. ‘Kisuanlahna di omlou pi, bangthu-bangthu hi lele hon gen ou,’ chi in dip kisai litlit leh kithalawp kisa a chiliing pepelh in a hon thugen di ka na ngak hi. A gen di lah ka theihsa ahi a.

Whatsap a a sut sung ka na ngak dide a, sawt bang ka sa sim hi. A tawp in thu sausim a hong luut a, ka sim zoh in, ‘Kisuanlah huailou e. Pan theihna a om leh i pang houh ke. A ni di khawng kithuzak touzel le maw,’ chi in ka thuk a, ni dang a ka nuulmang ngamlouh, a kallak a nui heuhau kawm a ka sim thakthak whatsap kihounate nulmang dia kisa lai den a ahon khak ka va simthak a, ‘Tukum tawplam chia pasal nei dek ing a, ka lawmpa’n lah gari zat di khawng theih nei khollou chih khawng hon gen a, pasalte’ sai deuh tuh ahi na a, hilele nang i lawm hoihpen om thou na hih chia, moupina a di’n na car hon zangsak le teh chi ut hi’ng a, hilele kisuanlahhuai ka sa zel a....’

A inn vengte un, ‘hiai a car hong khawl gige le hong khawl nawnkei na e,’chi’n a hong zezen di uh e, chih khawng ngaihsun in ka kahnuih veivuai a, theihlouh kaal in lukham bang a na nom dek nenalh vial hi. Ahi a, lampi kochiik tak a dongkholh pi a khawl beembuum di a om nawnkei dia, thoveng a sa zaw mai di uh ka chi a, a hoihlam ka kipe himhim hi. Mi’n ninhuai leh dongkholh a sak ua om bang zaw thil uthuailoupi hilim a.