I PAWLPI THAKTE ETKIKNA

By : Lawm Tangpua
Pearsonmun
Email : This email address is being protected from spambots. You need JavaScript enabled to view it.

Tulai I bouruak uh I ngaihtuah chiangin ei PAITE namsung ki tokling nasa petmah a khenkhatte ngial in Paite nam kekzak in niamkiak lam manoh ahihdan leh awlmoh huai sakthu I tangkou uhi. Adikna chiang le om kha ding hi. Himahleh, khovel khangthu I etchiang in kua nam/gam hitaleh khangtouhna dingin hamhaihna ana tuakvek ua, tua hamhaihna tungtawn in maban hoihzaw ding ngaihtuahna hon nei ua, tuate tungtawn in Nam khangtou hongsuak uhi.Tuabang deuh in ei Paite sungah leng tulel dinmun ah I hamhaih mahmah ua, heutu leh naupang chih omlou in Kam(Mouth) neiteng in I gam maban ding I gen ua, Social media khawngah iom vengvung mai uhi. Hiai bang vingveng a iom pen Niamkiakna hizawlou in I masawnna ding bulpan kihilel zaw ahi chih ngaihdan I neih poimoh mahmah hi. Tunai zek in I Paite sunga Pawlpi omngei nailou Pawlpi bangzah hiam heutute leh phatuam ngai leh awlmohte ziakin phuhkhiak in hong om hi. Tulel dinmun in ei Paite sung mahmah ah leng a poimohna theilou leh kua pawlte hiam douna dan a lakha omngei ihi dinga, gen leh sak tam mahmah mai hi. Himahleh, tuate I ngaihtuah khelh/lakkhelh ziak hizaw ding hi. I nam in I Pawlpi neihthak bang pawlpi hi hiam, bangziak a poimoh hiam chihte enni.

• Paite Organization for Literary Research and Development(POLRD) : Paite Laimal sinna leh sin dingdan awlmohna toh Paite Organization for Literary Research and Development(POLRD) kichi phutkhia a Pu Nengzachin in agelh Paite SINTUNG BU (Paite Laithak), 18^th Edition, 2018 hon bawlkhia heutute phat huai petmah uh a, I laipau khansak nadia a kipiakna uh thupi mahmah hi. Hiai POLRD kiphuhkhiak na tungtang gen leh sak om neuhneuh in Paite Literature Society(PLS) ngei in leng kuama’n POLRD theihpihlou leh pompih lou dingin thupuan bawl hi. Hiai bang vingveng a iom mawkpen theihsiamna I taksap ziak hikha ding ahi. POLRD kiphuhsan leh a tup uh Paite Literature Society(PLS) Paite laimal toh kisai a a dinmun uh tuhkhiak ding chih ahih gintak huailou hi. A Pawl min ua kipan inleng I Paite laimal suitu leh khansakna ding awlmohna toh hong kibawlkhia ahih uh gintak huai a, Paite nam in I kipahpih ua I tawsawn phu uh ahi. I khangtouh semna dingin laipau toh kisai Pawlpi/lunglut tamsem hong om beh poimoh zaw mah mah ihi. Tulel I dinmun uh et in Laipau lam ah ei Paite I niam mahmah lai ua SINTUNG BU a buai theilai te ihihman un mi tamsem I lunglut ua, bawlhoih tuakte I bawlhoih uh I mohpuak him uh leng ahi. Paite Literature Society(PLS)toh ki tuam koih ding hizaw hilou in Paite laimal toh kisai a pangkhawm a semkhawm dingte hizaw uhi. Theisiam hileng PLS panpihtu ding POLRD hongpiang kipahpih huai banah khangtou ihi chih chetna ahi. Nam hihna taklang tu leh chiamtehna diktak pau leh laimal te banah I Nampuante ahihziak in tuate hihna diktak toh I zuih I nam hihna ahi. Tuate mai hilou a, I tu dinmun uh theikawm a pan I lak zomzel uh leng poimoh hi. Pawlpi/Mimal Panla theiteng in panla tou khawm in Skul a Primary level apan in I laimal leh I pupa tangthu(thugousiah te)omte a sinsakna pe leng i pau leh laigelhdan in naktak in masawn toulai ding hi.

• Paite Numei Pawl(PNP) : 23^rd June 2018 a Hiangtam Lamka, YPA GHQ Hall a hongkhiak a ana omta PAITE NUMEI PAWL(PNP) leh PAITE ZAIAWI PAWL(PZP) pawlte kiphuhkhiak in ngaihdan tamtak piangsak hi. Himahleh, PNP leh PZP piangkhiak na ziak a ngaihdan tamtak apiang mawk thilmak hizaw ahi. Paite leng namkhat ahih dungzui in poimoh kibawltheih leh neithei ahi. I kim leh kianga Namte’n le aneihvek uh Nupi Pawl leh Lasa pawl piangkhiak lamdang hilou zaw in a zekai ihihziak ua lamdang banga hong kilang hizaw ahi. Hiai PNP leh Zomi Mothers Association(ZMA) kikal I chiang poimoh mah mah hi. ZMA ahihleh Zomi pom a kigawmkhawm, Namteng in I kikop uh ahi a, ei Paite kia a hilou hi. Namkhat ihihna ah a Nambing vai ah Numei leh Nute poimoh hunte leh ZMA vai a hih gige theihlouh nate a zat ding Paite Numei Pawl(PNP) alou theilou hizaw hi. Numei Pawl zatna ding I buai leh I theihlouh man hikha dinga, Pawlthak bawl ut ziak I sakleh Paite Nam in Numei pawl I neih patna ding uh ahi a, ZMA toh PNP kikalh leh dou banga I ngaihtuah khak leh ZMA, ei Paite namte kia a hilou, ei Zomi tengin I kikop uh ahi chih I chet thak poimoh mahmah hi.

• Paite Zaiawi Pawl(PZP) : Nam piching khat ihi a, Pathian late, ki itna late, Gamngaih late leh adang dang I kineih hi. Tuate a vanglai chiat un mite theih leh deih himahleh kemtu, enkaitu leh zuuntu omlouh leh mangthang sa ahihziakin tuatoh kisai Paite Zaizawi Pawl(PZP) poimoh leh alou theilou ahi. Paite Zaiawi Pawl(PNP) gen-baang a hong omziak I Zomi a Lasasiam te kipawlkhawmna, Zogam Artiste Association(ZAA) omsa ahihman leh adang ngai nawnlou sakziak hi tangpi hi. Himahleh, I theihsiamlouh hia theihsiam utlouh ahihleh ZAA pen Namkhat pawlpi hi mawklou hi. Ei Paite sunga I late kembit a hihkhang sem ding Pawl chikmah in kinei nailou a, tua PZP hongpiang khiak theih ei Paite namte dingin ‘New Beginning’ leh chiamtehtham ahi. A poi mahmah, I khanmohbawk uh leng hi gige khat ahihleh I thil lakdan leh I na ngaihtuah dan ahi. Abikin, hiai Paite Zaiawi Pawl(PZP) hongpiang khiak leh khenkhat in theisiamlou leh pomlou kisa in chiltang mek mah I bang uhi. I theihthak dia poimoh mahmah bel I Zomi sunga Nam omte lak a La toh kisai pawl bawl/nei masapen I himawk kei a, I Zomi pih mahmah bangzah hiamte’n leng amau nambing a ding kineih tiltel uhi. Tuaziakin, tua Paite Zaiawi Pawlpi(PZP) phuhkhiak a hong om thilmak leh lamdang hilou in namdang te’n tuabang a neih/bawllai ua a hiding him a pomthei, Paite in neih theihlouh ding bangsak te lamdang zaw suak uhi.

Hiai atunga Pawlthak I nam adia kibawlkhia te gen-baang sak teitei pawl te’n I theihsiam louh ziak/utlouh ziak hikha ding hi. Khenkhatte ngaihdan ah ZOMI kalhna/tuampai tupna dan in ngaihtuah mah le uh diklou ahi. Zomi toh Paite tehkhin theih ahikei a, tehkhin chi leng hilou himhim hi. Apaita 9^th August, 1993 a Zomi Re-Unification Organisation(ZRO) in Appeal(Truth and Freedom) abawl na ah chiangtak in hichi’n gelh hi. “Come and join ZRO with your identity for it is ZRO alone which give equal respect to all Zomi tribes, big or small. It is ZRO which guarantees to protect, safeguard and preserved every tone of language. Unity in diversity is the guiding principle of ZRO”. Hiai apan chiangtak in I Pawlpi(ZRO) namte humbittu ding ahi chih leh a Nam humbit dingte kipuahthak na nei lel kipahpih mah mah ding ahi chih I gingta hi. Tulai a mi khenkhatte’n I Pawlpi toh Paite nam suktuah leh kinaksak teitei sawm mah banga I I thuvek te’n I Nam meima sak hizaw kha ding hi. I Namsung damlou hilou ahi, kituaklou leng hisamlou ihi. Nidang toh teh in kithuzak tuahna nuamta a I social media te a hunnei i tamlai deuh banah a zatdan I siam nailou deuh ziak lel hikha ding ahi.