Hiai Kahneh Mahmah Le! (Nute’ Ni A Mittui)
By Vz Siam

Ka khote uh papi kahneh a a gen uh khat a om a, Meiteite’ lila khawng radio a ngai a kidiik duupduup zel in a gen uhi. Huchih hial di le ahi dia hia chih mawk ding lah mihing zetuamtuam a bawl kihi zel a.

Tuzing ka thohma in ka veng ua pipi khat a hong vaak a, ‘Naute hong tung uhia?’ chi’n a hong kan a, lupna a pan ka na za vek hi. Awl in ka thoukhia a, ka va kilaak leh honna chibai a, ka lim ngaihsut leh tuni Nute’ ni a pipi in kei hong veh chih mawk kisuanlahhuai ka sa hi. Ke’n ahihleh amah ka thei geihkei a, himahleh huaite’ pi hi’n teh chih bel ka ummoh a om hi. A painung a sungte’ kia ka kan leh ka upmoh pipi mahzaw ana hi. Paunuam tak ahi a, nidang a a vompi mat thu khawng uh a gen a, huchia sawtlou ka kihoulim nung un an neek bang leng hun ding ahihtak ziak in pai ding in a kisa hi. Huchih lai in, ‘A tuibuk man ding beek hop thil kilawm hitah e,’ chi in ka kimai a, teng zakhat ka kimaikhia hi. ‘Hi in pi, na tuibuk man ding,’ ka chi a, khaih, tuibuk va chih hial sang in singpi hileh kilawmzaw ve’n teh aw, chi in, ‘Na singpi dawnna ding,’ ka chi thak hi. Tuma deuh khawng a tuh tanau lak a upa deuh bang toh i kimuh a hichi bang a zakhat-zanih i kipiak leh, ‘Na laizial man di, na dummuan man di,’ chia deihsak tak a kipia hang a, tu chiang in bel thil kilawmlua hinawnlou hileh a kilawm a, singpi man ding chih mah hong kilawmzawta hileh kilawm.

Pipi’n leng a hon sang a, kipak mahmah ahi ding a, ‘Singpi bang i duh hun om zelsam mah e. Tute’ neek bang hon hawm le uh i chihsim hun bang om mawkmawk a, pitek leh putekte a lungsim uh naupang thak a chihchih uzaw diklaw maimah aka,’ chi’n a hon gen hi. A tanaute numei khat in leng tua bang a zakhat-zanih a hop zelzeldan bang a hon gen a, kipaak mahmah in innlam a zuan biambiam hi. Ka entum vungvung a, a sungte ka ngaihsun a, Pathian a kipezou mahmah ahi ua, tua bangte’ nute leng huchia tute’ thilneek duhgoh vungvung a omthei ahihmawk leh nu leh pa teektakte lungkim tak a koih baihlam hetlou ding hitah e chih in a om hi. Ei gilkiallouh ziak a gilkial hetlou ding bang ua koih in omkha thei ua, ei dangtaklouh ziak a dangtak hetlou ding bang ua koih in omkha thei uhi. Ahihkaleh neihzohlouh himhim ziak bang. Huchih lai a amau tute’ thil neek peuh ana duhgoh vungvung khathei uh hitah hon chisak hi.

An ka ne ua, kikhawm ding in ka kuan hi. Kikhopna ah Dorka President nu’n Nute’ thukhah a hon simkhia a, mittui pawt neelnuul in ka na ngaikhia hi. ‘Bawite aw, ka vaanglai bangzou nawnlou ding ka hihziak in theihsiamna leh dohzohna thuuk tak toh hon enkol gige un aw, polhteh leh kihhuai tak a ka neek ka dawn hun a hong tung ding a, huai hun chiang in hon kihbawl mailou in, na neulai ua k’on hahsiang a, na nek leh dawn ding uh a siangthoupen a k’on bawlsak a, a lim chichi k’on piaklai khawng thei gige un aw,... sim thei nawnlou, muchian thei nawnlou, zachian thei nawnlou tan a ka damlai leh, ka theihnop leh zaknopte thukan-thuduh chimailou in hon hilhchian tiautiau un aw. Ke’n le na neulai ua n’on thil dotte uh chimtaaklou hial a k’on hilh dante thei gige un aw....’ A tawplam in tuh nullouh theihlouh ahihman in utlou pipi in ka kinul tuautuau hi.

Huchia hun di i sakleh huaizoh in saptuam sung a kum sawmgiat tunglamte zahtakna leh pahtakna thilpiak a hon pe nawn ua, pi leh pu teek mahmah leh hatnawn hetloute hong pai kheikhei a tua thilpiak hong sangte ka muh in ka mittui leng a hong kithalawp mahmah zel hi. Bang toh a na ngaihsun khawm ka hia, bangchi laak ka hia chih leng ka theikei. Ka mittui a luang mawk hi. Huai sung teng tuh mittui nul ka na sikhop mahmah hi. Hai le haihuai veh, chi’n ka zumsim a, lah luan a tawpkei. Kei kia di kisa a mittui bang le nuul tatak ngamlou a ka omsim leh Upate’ lam a khat, upa huntawk khat leng ana kinuai nimnim sam a, keikia hilou kei ve chi’n ka ngaih a hong phadeuh hi. Huchi’n tua hun a hong bei a, mittui leng khawlta i chih leh a denlam chiang in den a kipahman ngahte’ lak a pupu khat, a kiang a tuu a tunu nu kiphin hiam a’ihkaleh zunsuak hiam ziak a konglam a pawtpih dia kisa diaidiai khat ka mu a, den a Dorka-te’n a thilpiak uh dakbawm a khut langkhat a sim tiipteep in a khut langkhat in a tunu nu a baankaih a, huai ka muh leh ka khitui a hong luang zel hi. A bang a nilouh a, chi’n ka utkei sim a, lah mittui in luan a sawm leh mawk a khamtheih ana hikei. Tua naupang nu’ nu-le-pa ahihleh kikhopna a tannei a tut tuam deuh ngai ahihman un nau tutpih bang leng lemlou hi. Huchia a pu’n pawtpih dia a kisaklai in naupang’ pa a tutna a pan a hong diangdok a, nau a hong la a, inn konglam ah a pawtpih hi. Pupu ahihleh a tutna mah a a tukiik hi.

Hatnawnlou, teek pipi, khauh tak a le pai thei nawnlou a ling deldel tan hial a a omlai un leng a tute uh enkai a din a ngaih leh ding a, pai a ngaih leh pai a, puak a ngaih uleh pua a a tute natan uh it lailai pi leh pute ana hi uhi. Nu leh pate’n a don peihlouh leh manlouh hun ua leng peihlou ngam hetlou a don biambiamte ahi uhi. Huchih lai a i deihsaklouh ziak leng hilou, i itlouhziak leng hilou, hile leng piteek-puteek hinkhua i theihsiamlouh ziak a a poimoh leh kuul uh i got khaklouh tampi om ding hitah chih hon ngaihsunsak a, piteek-puteek kol tuh baihlam hetlou hial ding chih hon ngaihsunsak hi. Amau’ ziak a a tate hiaitan tung a, loh tampipi loh himahle uh a sep zoh nawnlouh zek chiang ua kisuanglah pah a, teng sawm-sawmnih nanawng leng tate’ kiang a ngenngam mengmengloute ahi uhi. Huaiziak mah a tute’ neek leh dawn peuh lunggulh tuntun a a om ton uh na omthei hi. Ei ngaihsutna tan a a kuul leh poimoh teng uh guan i kisaklai a leng a lungsim guk ua thawmhau leh kial kisa a khava thei uh chih hon ngaihsunsak hi.

Huchia kikhopna paitou zel a, hunzekte a kizat touh zel lai in Esau in a pa’ vualzualna deih a a kisak bemten lai a a nau in a na tuh a, vualzawlna tanglou Esau mangbang a a kah ngoihngoih lamlam bang ka na ngaihsun toupek hi. Mi’n a pate’ vualzawlna a manphatdan thei a, ngah ut a a phiat tettet lai un nu leh pate’ vualzawlna a manphatdan theilou a, lunggulh nadan leng theilou bangzah i om taphet ding ua chih hon ngaihsunsak hi. Esau-te’ hunlai in bel tua bang a pa in tate vualzawlna ngetsak ngiatngiat a chiindan uh leng hikha ding hi. Tulai in ei lak ah huchidan chiin a leng kinei khollou hikha’n teh. Hitamahleh nu-le-pa’n bel tate deihsak gige a, thumsak in vualzawlna ngetsak ngitnget hi. Ei Zomite’ paidan ah bel nu-le-pa’ sangmah in leng pute’ vualzawlna kingaithupi zaw a, huaiziak a pute zu khol den mah i na hi a, pute’ akmit-etna bang kivualzawlna thupipen a nei hi hang.

Kivualzawl sapsap di’n leng huchia a langtang a thu-le-la sam a kivualzawl ngeekngeek sang mah in piteek-puteekte lungkim, kipaktak leh khamuang tak a koih vualzawlhuai zaw hi a theih in a om hi. A kam un hon vualzawl ngeekngeek tasekei le uh a lungkimna un vualzawlna tampi hon tun ding in ka lam-en hi. Huaiziak in piteek leh puteekte kipak tak a koih tuh thil kithalawphuai hi in ka sep. Huaiziak hi’n teh zan a ka khua ua an nekkhawmna khat ah YPA phutkhe tute lak a khat Pu Gousiam a hong tel a, ‘Hong in, lem i kila di, heutu masate na thupi ua,’ chi’n lem ka na kilakpih hi. Bangchi pai ding na hi ua, chia ka dotleh auto kho paisawm a hihdan a hon hilh hi. Ka kingaihsun a, heutu masate pahtawi theihna omsun, chi’n YPA tak in, ‘Hong un ke’n kong kha di,’ ka chi a, ka va kha hi. A kipak mahmah a, singpi dawnlou in a hon paisak nuamkei. An nekhin phet chilou in singpisan nou khat ka va dawn hi. Ama’n tuh singpipuang a hon awm ut a, himahleh ke’n a san ka duhzawk ziak in a san ka teelzaw hi. Lamka a hong lut tuung khawng, khopi hong khandan khawng, YPA-te’n pahtawina lai a piakte khawng ka houlim ua, huchi’n ka kiik phet hi. MLA-te’n le neu chikchik a sepkhiatte ule a tangkou pih ve ua le maw. Ei le kiphat zezeuh le bang a poi a!

Pathian hehpihna ziak in chih di adiam ah, lah sihna khawng a Pathian in a itte ama’ kiang ah lazel chia kihehnem zel hang a, a gen didan le ka theikei. Bangteng hileh kei leng nu-le-pa’n a hon dampih lai uhi. Ka pichin nung, ‘Nu aw k’on it,’ ka chih ngutngut lam ka theikei. Ka pa’ kiang ah leng ka chi tuansamkei. Huchi bang a kichih ngutngut khawng kuul le ka sa kholkei. Kuullou chileng lah ka nungak it hiam, ka zi hiam in hon chi ngeikei leh bel ka uttuan samkei ding. Huchi hinapi in mailam ah chih le ka sawm tuan samkei. Ka it zohlouh ziak hia, ka ngaih zohlouh ziak hia, ahihkaleh a kamtawm himhim ka hi hia lah ka theikei. A Kamtawm chih di’n lah nungak ka ngaih mahmahte khawng amau a hon ngaih hetlouh lai un leng, ‘K’on ngai law v’oi, k’on it law v’oi,’ chi teitei peih lah ka hizel a.

Lawmte’ lak ah chiamnuih ka haat mahmah a, lawmte’ sunuitu pen leng ka hi. Chiamnuih lou in ka hizou himhim kei. Khenchiang in a uanglawlam ka hikha pahpah. Himahleh ka nu leh pa mai ah, tang zawdeuh a gen in, kiang ah, bel chiamnuih hiam ka gen ngei kholkei. Kholkei chih phetlouh ka genlam leng ka theikei. Nu leh pate toh chiamnui khawm mi ka hi kholkei. Lem ka sakei. Ka zahtaak ziak hia, ahihkaleh nuihpih taak hi ua ka theihlouh ziak hia ka theikei. A ma uah chiamnuih ka bawl ngamkei.

Leitung ngeinadan a thil a hong paizel leh kei sang in a hon ihmutsan masa zaw ding uhi. Huai hun chiang in ka kam a, ‘Nu aw, pa aw k’on itlua,’ ka chih ngutngut khaaklouh ziak in ka kisiik de aw? Tu leh tu in bel kisiik ding in ka kigingta kholkei. Himahleh sihna i chih khawng hong tun hial chiang in gintak sa thuakhak zaw khatkhat ahi ding a, kisiikna chiang bel om maithei. Himahleh khitui pawtna hial ding in ka gingtakei. A ziak bel ka kam a ka chih ngutngut louh hang in ka omdan a ka chih gige ziak in.

Hun teng in bel a lung ka tuak gige zousamkei hi. Himahleh piching ka hih nung a hithei tan a a lungtuah ding ka tum tinten hi. Pathian makaihna in tu in amau thakheek thei ding dinmun in ka omta a, ka kha a muang mahmah. A hatlai ua guhtui kangzen a sepsa uh ka neek nung a tu a a upat hun ua tawldam tak a ka tha a neek theih utuh leitung a lohchinna thupipen hi in ka thei hi. Kei tha kia ne uh bel ahi samkei. A hatlai ua a sepsa uh a kholkhawmte uh leng a omlai hi.

A gil uh akial leh neek ding ka lui dia, a khua uh a dam leh puanlum in ka tuam dia, thawmhau a kisak uleh a kiang uah ka om dia, natna-satna a tuah uleh ka keem dia, huai teng kaan ‘K’on itlua,’ chihdan kilawmzaw dang a omtuan dia hia? Kam suak mahmah zaak a nopdan theilou ka hikei. Ka nungak it mahmah in a hon itdan lam chiteng in langsak in ‘Ka hon itlua,’ hon chingeikei leh ka lung a kim hetkei ding chih ka thei. Himahleh tua bang a kam a gen ngutngut pen ka hithei himhim bikbekkei. Ahon paisan hun chiang ua ka kisiik lelah kisiik ka hi mai ding. Himahleh huai hun chiang a ka kisiikna a neep theipen ahih theihna ding in tu in kam chihlouh lam chiteng ah amaute itdan ka langsak ding hi. Amaute'n kei' ziak in khasiatna khitui nulkei peuh le uh ke'n leng kisiikna khitui nul hial di'n ka kigintakei.

Bangteng hileh i tuah ngeilouh, a lunggulh uleh a ut uh i theihpihlouh nuteek-pateek kep tuh thil baihlam hetlou ahi chih i haihkei. Ei teek masa in, teekte’ lungsim thei masa le’ng tuh a kep leng nuamdeuh kha na ve. Huchi lah hilou ahihchiang in theihsiam bukim leng haksa kha in teh. Bangteng hileh nuteek-pateek lungkimna leh khamuanna ah vualzawlna tampi om a, nuteek-pateek khasiatna ah hamsiatna om hi chih bel upna ka nei hi.

Ahi a, Nute’ Ni chiang a zaw Pi Evi ka iplahna puang naak in chin, ka kipah ding bang a kipakzoulou khanaak hi ve’ng aw. Huailai in Adam in thumanglou a zi Evi ana vo ek leh zaw tua nupa kivua chih khawng omlou di hia! Chile lah sihna le omlou dia, piteek-puteek kep di a tamlaw diam maw! Ah, ka theikei!