Gam-le-Nam Tun Ding leh Bawl Hoih Lunggulh Takpi I Hihleh
By N.Suanmang Phaipi

"What is needed now is not mere declarations or promises, but actions..actions to fulfill the promises already made."

Khovel ah hinkhua i zatna ah KUMLUI leh KUMTHAK chihbang ina nei a, akovel pen athak hong piang hilou in i kum simna ah kumpi dang khat zang ding akisa i hilel hi. Akikheng taktpenpen bel mihingte kum hilel a, upatlam manoh hiai kihizaw hi. I kum hong uptoh kiton in i ngaihsutna lungsim bamgleng hong piching hiai hiai hi. Tua bang ahih man in khovel kum akhan bang in ei tenleng ngaihtuahna ah pichin lam i mahmah uh deih huai petmah kasa hi.

Leitung hinkhua i zattouhna ah, lungkham-mangbatna in (Azawng-ahau) khenlou in huihpi-vuahpi bang in hon nawk hun omsek hi. Huchibang hun in ngaihtuahna asaupai thei khop mai. Hon siamtu tung Pathian' thil hihtheihna muanzohlouh, gintak zohlouh ziakle hisamlou napi in ; A changin ei mihingte mahmah ban inle hihtheihna kineilua, thil khempeuh eilam apanle hong piang ding , i sep khiat ding , i bawl suah ding , i panna diing tamlua hina tel lawmlawm e aw , tuabang ei mohpuakna , i sep dingte seem in i bawl dingte bawl takpi hile mi bangzahta haksatna, lungkhamna, buaina neuhneuh te dawn zangkhai in a omtel dia aw chih ngaihtuahna lungsim ah hong lang veusek hi.

Ka naupan chik lai in 'Lamka Khopi' a zin ding 'Khristmas' van lei akuan ding chihbang kana phur theipetmah hi (Singtang Dawn a kiteng hiven). Lamka tunna din, akar ah Lampi kisedeuhmai , khudeuhmai totkhak teitei angai boksi a, ut-in-utkeile lamkar ah haksatna chuh pumpelh theih ahi kei. Thilnuam lou, thilhaksa , lungzinna , beidotna i chihte i phutkhak taktak keile zaw mi gen in i lungsim adeng keihial . Haksatna leh buaina tuamtuam tuah i chihte khawng atak a i hon phutchiang in achiang huntawk aka! Kua hon hilh hilh le angai nawn thahkei ! Kenbel tuabang te khawng miteng in ana thuak kha ding kasakleh ana hidek keilua! Pathian' zar in mi dang ngam bangzah hiam kava tuan khateisam hi. Eh ! maimah mi hinkhua leh ei hinkhua , mi haksatna leh ei haksatna kikhia hinatel chih ka mu chiang in ka kei chihmah tak chuh thil pona baih ka hihna toh 'Ei tenna gam bang chihtuam sese 'adia aw chihtoh kana puaknatna alian tel mai aka .

Akoi-abang hileh i hun mualliamsa sutsut hihpen masawn huai lou hi. Hun paisa-paisa hisak ni in, kingaihdamna ding omte kingaidam ding, bawl thaktuak omte bawl thak ding, tun diing thak ding omte tung ding diing, mailam sawn taktak ni, khantouhlam ma nawt ni i chih taktak intuh ; mimal in i hihtheih lam chi tuamtuam omte hihni in, i sep ding , diktakmah semkhe ding in iki chial tak pi hi.

Gam-le-nam khang tou ding, tung ding diing , ma sawn taktak na di'n michih in mohpuakna neitham mahle ; mohpuakna taktak bel mipi sik leh tang a ding 'Palai' te liangkou ah kinga lian mahmah ahihdan kuapeuh in thei di'n i kilam en hi. Atheichian nailou om zenzen leh tua athei dingte i hihman in kipah huai lokhin hita. Tuabang ahihna ah amasapen in 'Heutu Hoih, Palai Hoih, Heutu Muanhuai ' telkhiat , zonzuah na ah i kipat masak ngai ding hi. Mipi 'Heutu/Palai ' ding na teldek chiang in na lungsim ah hiaite ana saikhak kawm in na thutawpna ana bawl jelmah dih.

•Heutu na tel chiang in mi nautang , daikilkal kuamah phawk louhte phawk, khual leh vei a neite telmah in; Mi hau te kia mai et anei mite tel in neikei in . Aziak bel Gam leh Nam akan touhna ding in, ahaute vukbeh hilou in azawng te dopkang a, phawk phak louhte phawk ahong hihchiang in gam khangtou pan phet ding hi. Mipi te haksatna kong bangkim a theihtawp suah a panlak pih, huh leh theihpih mite tel in nei in.

• Lemna leh muanna deih mi, mite khenzaaktu hilou a huai khawm dan siammi, tawndan leh ngeina dan te kepbit lunggulh a neimi, kidouna a vaihawm sawm hilou a thudik zang a vaihawm ut mi, Siamsinna lam tun ding tup anei mi, siangthouna awlmoh gige mi, diktatna lunggulh leh michitak agenkhiat uh sepsuah anei mi, khentuam neilou a vaihawm mi , agen chauh a tagah meithai it mi hilo a, atak a it mi. Tua bang heutu ding tel chiang in na gam leh nam in khanlam ma noh ding hi.

•Palai leh mipi kal a bang(walls) bawl tu hilo a, mipi leh pailai kal a lei(bridges) bawl mi, kihuatna hilou a itna lunggulh mi, thau leh galvan hilou a Laibu ngaina mi ( Public Library) bang tun khiat demdom khawng tup anei mi ( midangte i phak tak tak na di'n Lailam pilna mah kiphamoh hive'n ).Hiai bangte tup anei leh semsuah Heutu na tel khiat hun hun in gengen ngailou in i gam khangtou mai ding hi.

Bangteng genmahle, heutu inbel ami leh sa poimoh pen a angaih a, ami leh asa adia akipum piak teitei ding ahi. Heutu hihna ding a mi hinna lak chih himhim chin a neihlouh ding ahi. Huan heutu khat in tuh mite demna, soiselna tuak ding sa a akikoih a , tuabang atuah hun ale zaidam tak a thuakdan siam akisin kul ding hi. Heutu khat mite demna leh soiselna pomtheilou bel heutu dia chitna neilou chihna hipah hi. Huan heutu nekguk -takguk a kibuallou nana intuh chihlaipeuh in etchetna omleh zong etchet a om din akiman a, lauhthawn na anei kei himhim ding. Tuabang etchetna phallou heutu bel nekguk -takguk ah akibual a, heutu lauhuai ahi chihna ahi.

Atawpna in, heutu na telchiang in mipi lungsim dawp theimi, ami-asa ngaihdan leng la mi leh ami leh asia adia kisaktheih pihtham thei ding mite tel in. Tuabang mite'n, amau tungtawn in khang hong omtou zel ding ah Heutu hoihmah hong sek khe ding ahihna uah.

Genlai zual le, Gam khangtou sate ahbel mite'n midang ading eng goigoi lou, duh goh lou , etlah sakloh ua . Bang chileh keiziak in midangte a kipak theidia , mi bangzah ka panpih theih om a chih lungsim put nei uhi. Tuabang din mun ading ngeilou ding chihna omlou pi. Eileng tua din mun ah kiding theitak pi hi. Huai ding in , kua dang hilou in mimal chiat in mohpuakna liantak kinei ahihlam phawkthak ni. Lei tung i damsung a i kim leh kiang a mite i it a, i khual keileh tuabang hun om nawn lou ding hi. It thei, khotuah thei, sem thei na hihlai in na mohpuakna sepkhiat thupi leh manpha salou na
hiam ?

Huchi'n ngaihtuahna asau paithei khop mai, ka duhthusam te bang tangtung hileh Siamsin na dia neilou sasa a mingam va zot ngai doidoi lou dia, mi gam a sum leh pai tam pipi i va invest te eilak a leng dia, i gam adia pumna hong hiding . Lamka sung aleng damlouhna serious deuh omte bangle mundang va naih doidoi lou a hihveng theih mai ding, mi gam a leivui akhut vengvung louh bang a eigam ale khulou theisam ding hi a, chihte ka ngaihtuah nilouh alah kabol theih omkei. Lam-etna toh ka leitung hinkhua houh beimai ding adia aw ka chijel alah lam-etna mah in hon kalsuansak theizel a, ahoih lam chuh kana kipe teitei sek hi. Banteng hileh duhthusam chuh khatvei bek hon melmusak ding 'Heutu Muanhuai' hong piang ngei ding ahi chihtoh ka zoumai di.

Deihsiatluat ziak a genval omleh kingaidam ni !

Lungdam