THILNGIAT (DEMAND) NGAHNA DI'N BANG KISAM HI HIAM? – II

~ R. Sanga

Thupatna:

Khovel Leitung Nuntakna leh Khosakna pen anuam leh haksa (ups and downs) toh kikimhel gige ahihna ah pilvangtak a kalsuan a pai khiankhian kisinsiam kisam mahmah diing bang hi. Zan a thilhoih lua bang a i koih pen tuni a diing a phatuam ngel lou zong om zel a; zingchiang a diing a houh hoih lou lua leh gahsuang het lou diing zong hithei zawmah lai hi. Tulel dinmun thei kilkel a kalsuan zia ah i nuntakna diing khualna toh mailam nawt a i kalsuanna ah koilam nga a pai diing chih pen lunggel hun ahi hi. Suahlam maw, Tumlam maw, Mallam ahihke'h Simlam nga a pai diing maw: Koilam nga a pai diing? Mainawtna lam ahihke'h ngimna leh tup kichian kiteltak nei loupi a tuni a diing kia ngaihsutna leh neektawm vai leltak lunggel a nei a kalsuan i hih mawkleh bel hihkhial hithet diing hi hangh...!! Khangsawn-nawnsawnte a diing khualna zong lungsimtawng a i neih a, gel detdet diing kisam hi.

Nuntakna Paizia Kichian:

Gam vai leh Ki-ukna toh kisai Zo suante Nuntakdan tulel dinmun (Manipur context ah) mailam i galdot chiang in thu-le-la tuamtuam kigen vingveng a, koilam zuan a mainawt diing chih kichian lou a, lungbuai leh hamhaih a lampi kathuam ah kiding hileh kilawm bang a ngaihsut theih in om hi. Zuih diing kichian lamsialtu di'a heutu dinmun aluah lellel mite: Inpi Heutute leh Zo suan sung a Makaitu tuamtuam in alampi sialsa uh ngatna lam kichian anei, mipite a di'a zuihtheih diing ahih ngei i lamen hi. Tua lampi pianzia leh omdan ageltute in koilam hon ngatpih uh hi hiam chih pen ngaihsuthuai mahmah asuak hi. Zo suante Nuntakna pen 'asuakta nuntakna' ahihtheihna diing kideih a kilunggulh chiat ahihna ah khepi ngatna lam kibang ahih diing kisam hi. Khepi ngatna lam pen atuam chiat ahihsungteng i tunnopna mun kitung ngei lou diing ahihman in, tuni a gelkhawm leh sutkhawm a pilsiamtak a kikupkhawm hun petmahta hi. Tua lampi Zo suante zuih diing a sialsa om lel pen mah zuihtuak hi lou hiam chih heutu dinmun a dingthei chiang beek in ngaihsuthuai petmah hi.

Pawlpi lian nih: UPF & KNO in pangkhawm a lampi asial uh, 'separate state' mipite toh pangkhawm a sepkhiak leh zuun ahih peuhmahleh lohchinna chikhat bang hiam beek hong piangkhe ngei diing in i lamen tinten hi. Mipite in zuihtuak ahi i chihtheih uh deihhuai i sa mahmah hi. Aziak bel Manipur State pen "Tribal Movement" ziak a naktak a kisawiling a; State Sorkar in koilam nga a kalsuan diing chih ageel laitak ahihman in, Zo suante in, eimah a di'a hoihpen bang hi peuhmah diing hiam chih ngaihsun vengveng a, 'pangkhawm' a pheiphung khaikhat a, pilvangtak a mailam nawt a kalsuan kisam khol diak hi. State piching ngahlian diing chih pen sa-ikhuai zong hikha inchin; himahleh Phualpi Sorkar toh kilemna leh kithukimna aom theihna diing a kituaktak a mipite akipan aw-ging suahkhiak theih kisam in poimoh mahmah hi. Paunak khat in, "Tupna asanleh kiatna asaang," achih mahbang in, asaangzaw akipan aniamzaw deuh ngah diing ahita zong in –Aw-suak Khat a kikoukhia a, lampi sialtute in mipite toh pangkhawm a; pilvangtak a mailam hon manohpih uh i deih petmah hi.

Pankhawm Hatna:

Inkuan amah leh amah kidou dingsuah ngeingei lou diing hi. Suangtu khat, unau Tunsung khat pan apiang, Zo suante kipumkhat a, i pankhawm taktak masiah uh gam vai leh ki-ukna tuam toh kisai bangmah himhim kingah ngei lou diing ahihman in, aneu-alian kivelthak chiat in khuang betdan kibang in laamkhawm peuhmah phot le'ng i deih ngahtheih diing hi hangh...!! Louma kikhat bangziak a pangkhawm thei lou diing i hi ua? Tupdan leh deihdan kibang ahih ngalleh i pankhawm theih diing uh hi lou hiam? Banghang a thutuam sat om teitei diing hiam?

India Daan Bupi Khenpi 244A-na nuai ah "Autonomous State" kichi UPF in Phualpi Sorkar ah Memorandum ana pelut khinta hi. Hiai, Daan khenpi 244A-na nuai ah Council of Ministers atuam neihtheihna diing (provision) piak in om hi. Tulel a District Councils 6 omsate pen Sixth Schedule nuai ah koihlut a, tuateng khaikhawmtu diing a Daan Bupi Khenpi 244A-na a kigen 'Autonomous State' pen India Daan Bupi Khenpi 371C-na pen Bawlphatna nei in, Hill Areas Committee Order, 1972 toh khuikhawm a dinmun saangtak ngahtheih ahi chih kiteltak a theichian kawm a UPF in lampi asial pen mipite'n zuihpih diamdiam in nungthuap peuhmah le'ng Zo suante a diing a thilhoih leh phatuam law petmah diing ahi hi. Mi kimkhatte in Sixth Schedule baihlam zaw diing ahi, hiai pen mah i nget tinten diing hizaw ahi chih ngaihdan nei zong om kha inchin, huchibang ngaihdan pen theihna leh theihkakna taksap ziak hikha zaw diing hi... Bangteng hileh India Daan Bupi bawlphatna (Amendment) om masa lou a Sixth Schedule zong kingah thei tuan lou diing ahihlam theihchetna neih ngeingei kisam masa hi. Ngaihtuah thak chiat in athak in panla le'ng India Daan Bupi, Khenpi 244A-na leh 371C-na toh akiton a bawlphat (amended) ahih masiah 'Political Solution' om thei lou diing hi. Tua ahihman in, sia-le-pha theihna siang zangchiat in, theihna tanlet ah kinga mai lou in; theihkaakna kichian neikawm in mailam nawt peuhmah phot le'ng bang hiam khat hong piang ngei di'n i gingta tinten hi. Kiselna haihuai ah pang lou in, sia-le-pha theihna siang zangsiam chiat le'ng i kideihsak mahmah hi.

Thukhupna:

Mihing nuntakna pen GamDaan in hon kaankhawm vek ahi. Daan dungzui a kivaihawmna nuai ah gam vai ki-ukna om a, Daan in thuneihna apiak dungzui a thuneihna tawitu-vaihawmtute in mipite tung ah vaihawm zel uhi. Daan kalh a gamta khempeuh mite in akituahpih Daan dungzui in gawtna tuak zel uhi.

Zo suante Nuntakna hoihzaw leh dinmun kipzaw ngahna diing in gam vai leh ki-ukna toh kisai Daan dungzui a atuam kivaihawmna ngahtheih ahihlam kichiantak a theihna leh theihkakna neih kisam hi. Tua diing in India Daan nuai a kigente; Khenpi 244A & 371C pansan a Kivaihawmna tuam (Autonomous State within the State) ngahtheih ahihman in ngaihtuah thak in pangkhawm peuhmah le'ng, tua aom lel Manipur (Hill Areas) District Councils Act, 1971 & Rules, 1972 akizatna gamleitang huapsung (Jurisdiction) teng ah India Daan Bupi Bawlphatna (Amendment) Parliament Innpi ah Vaihawmtute in abawl uh chiang in 'Sixth Schedule Provisions' nuai ah dopsangkhawm ngal diing chih pen thil hithei lua ahi hi. Atak a ahong piankhiak theihna di'n bel mipite leh pawlpite, inpite, khotang a pawl tuamtuam baan ah saptuam a heutute tengteng pankhawm diing kisam hi. Pangkhawmta mahmah ni chi in avel vel in i kichial thakthak hi.