Nu! Hon Ngaidam Ve Maw?
(Time Waits For No Man)
By K Lianthansang

Nidang banglou takin Damdawi Inn a daai zozen a, thawmhauna khat ka nei mawk. Nidang khawng hileh zaw, Morgue gei a hun zang mipi dim d'uh hi a chih khawng ka ngaihtuah zel a; huihpi leh vuahpi kituah in Damdawi Inn leng hon nuai zouphet ahih zawkmah ziakin ka thawmhauna alian deuhdeuh hi. Leiliing in Damdawi Inn a sawichip di lauh ziaka ka chi a liing leng a bei nai kei. April kha ahi a, khua vot nawnlou himahleh, ka chi-huum khawng asuak dek thepthup mawk hi.

Ka omna 'Nurse Room' (first floor) ahi a, ka khut a sana(wrist watch) ka etleh nitak dak 8:00 bang ana gingman hi. Stethoscope (Doctorte'n mi china' sunglam gindan a ngaihna ) ka ngawng a baat zok in, damloute omna lam ka zuan ngal hi. Ka lutna room ah ahihleh, damlou hong lutthak khat ana om a - etmai in leng chizauhuai hial hi. Kei valut hun in amah kia ana om a, a mai (face) leng a et-hak mahmah. A omdan apan in, a natna kia thuaklah hilou a, a lungsim leng tawl mahmah ahihdan ka musuah ngal hi.

A kiang a ka vapai leh honna en zual a( hon entheilou sasa in), sawtlou nungin a a lu a heikhe nawn pah hi. Nidang a adamdawi lai-te khawng ka etsak a, 'Hepatitis - C' ahi chih ka thei hi. A mai lak a liamna ma omte bel Hepatitis ziak a om dingin ka gingta kei. A chi a bawk mahmah mai a, agil leng vah zomah hi. A gil leh awm lak khawng stethoscope a dapkual in ka ngai hi. A lungphu leng ka en a, a normal het kei. Lungtang kikham zou di hial khop a lungkhamna leh lungngaihna nei ahihdan ka musuah semsem hi.

A ompihte numei nih hong pai ua, damdawi lei dingin ka sawl ngal hi. Ama' a di damdawi vaang mahmah ahihman in a va muhzohlouh mel uh leng theih a hikei lai. Hun sawtlou nungin, hong kihei zek a, aw suakzoulou sasa in, " Sister, i maw...." chih teng hon gen a, aban a gennawn ma in a mittui hong luangkhe zungzung hi. Aban a gen nawn himhim kei. Agenzoh ma a alungsim kiheithak(kikheng thak) hiam leng a hikha moh kei ding. Akhut ka letsak a, awl-awl in ka meksak hi. Kidiik kawm hithit in, " Sister, i maw....ka tapa na hon sapsak mai diam? Banah, hehpihtakin lungtang lam buai ka hihdan leng hon hilhsak ngal ve maw? " chi'n, a niik kawng apan in laithem khat a kigelh phone number hon pia hi.

Ka lungsim in, ' den a pawtkhe tegel lah a ta leh sanggam numeite hihtuak ua, a tapa sapsak di chih mawk, a ngaihtuahna lam leng buaikha zek hidi hiveh aw' chih khawng ka ngaihtuah sungin a naak hong kin deuhdeuh mawk hi. Akhen chiangin naaklou bangin hong om a, nurse dangte khawng sam in, amah kia ka buaipih tamai uhi. A naak ah Oxygen ka thuah ua, minute khat a huihsiang liter 8 paithei di tan ah ka hek(turned) hi. Huai nungin, a bil bul a kuunsuk leh a mai enkawm in, " Lungkham ken, na tapa hon sapsak law mahmah di ka hi. Dam di na hi aw..." ka chi hi.

Bed-sheet khawng akhut in a ham ( man ) a, a tha neihteng zang in a kai zel hi. A mel etmai in, a lungsim thawmhau leh kinoh mahmah ahihdan a kilang. Adan omdeuh takin Oxygen ka lakhia uhi. A naak thuthu kawm in," Tu mahmah in hon sapsak ve maw...." hon chi hi. Ken leng, " Awle, Nurse room a ka paikik chiangin ka hon sapsak pah ding " chi a aliang ka khoihsak kauhkauh sungin a ompihte hong tung chet ua, kei leng awl in room lam ah ka paikik hi. Ka pianpih leng hilou, ka meltheihsa leng hilou napi in, huai nupinu kum 57vel ding a upa' mel ka mitkha ah a dawkden a, room ka tunphet in a tapa number hon piak ka en ngal hi.

Hon number piak ka gelhkhe ngal a, ka call ngal hi. Aw kilawm mahmah khat in, " Hallo..." hon chi a, ke'n leng " Damdawi Inn apan ahi. Nurse ka hi a, na nu' damlouh lam hon hilhdek ka hi. Tunitak a hong kipawlut ahi a, lungsim lam leh......" ka chih kimlai in, " No..no..no..a si nai hial kei maw ka nu..." hon chi hi. " Na nu' condition gentheih a hikei. Nang hon muanuam mahmah ahihdan hon gen a, sam dia hon sawl ziaka k'on hilh ahi..." chi'n ka dawng hi. Ka neh bang kei(pet) tenton kawmin, dai sipsip in ka om a; ka aw liingsaklouh teitei ka sawm hi. " Ka Nu' hinna nikhat sung bek a khamkhawl theih lai diam? Zingchiang in honghoh leng a zekai law diam, Sister " hon chi hi. Ken leng a lungnopna didan in, " Hoihtak a ka etkol uh ahi...himahleh bangmah genlawk theih hilou.." ka chi lel hi.

Register (gelhlutna laibu) khawng veel in room ah ka om a, ka thilhih ah ka lungsim a om tuan kei. Huchih sungin ka phone ah message hong lut a ka etleh, " Sister, hehpihtak in ka nu' hinna honna humbitsak lai hamham un aw. Na hihtheihna tawp uh ana suah hamham ve ua maw? Ka nu' damlai in amel khatvei bek ka munuam. Kei thulimlouh ziak a, Inn apan ka pawtkhiat nung ka nu' aw ka zakha nawn kei a; amel leng ka mukha nawn kei. Kei ziak a ka nu' lungtang lam tanpha leng na ahihdan ka thei. Akiang ah, ' Nu! Ngaihdam Aw? Na hon ngaidam zou lai diam? Hon Ngaidam Ve Maw, Nu? K'on ngailua Nu' chi'n, ngaihdam bek ka ngen nuam. Na hihtheih tawp uh ana suah hamham un aw....." chih teng kigelh hi. Huai message ka simzoh in, ke'n leng ka Nu' kiang a ' K'on ngailua..'chih naksang a, ka tangvalpa toh hon deihsaklouh luat ziakin, 'Kon haw-lua. Na huathuai lua ' chih toh inn apan taikhiat ka thuah lai khawng ka phawksuah hi. Hiai Nuta-te leng kamkhat bek a kihoukhak man na ding un thuumna khawng ka nei hi. Ke'n leng maban 'Mother's Day ( Nute Ni)' bek a ka nu' kiang a, " Nu, K'on Ngailua " chi dingin thupukna ka la hi.

Zinglam dak. 12 leh akim vel in damlou ompihten hong sam ua, ka lauhthawngsa mah ahihman in kintakin a room lam uh ka delh pah hi. A souphu( pulse) ka en a, bangmah muh di a om nawn kei. A awm (chest) ka neng a, a phatuam tuan kei. Sawtlou nungin mi bangzah hiam hong tunbeh ua, sai di tuamtuam ka saifel zoh un a kipawkhia uhi. Huai ni ahihleh, May ni 1, 2016 ahi a, zinglam dak 2:00 vel ging dingin a kisata hi. Ka lungsim in, ' hun in kuamah ngaak neilou hitel a maw? Nupi nu'n a tapa a itna lian hina tel e! Atapa in lah, a nu' sihnung in a kisiikdan leh a ngaihdan 1000vei gen leh leng phatuam nawnlou hita maimah a maw. Hehpihhuai hina maizen uh e. Ke'n leng, ka nu' kiang a ngaihdam nget leh ngailua ka hihdan ka hilh ni di'n Nute Ni ka ngak sese kei dia tu'n, mobile apan ka gensuk mai di. Atak in, Nute Ni chiangin akiang ah ka va hoj dia, ka gen na di..' chih khawng ka ngaihtuah a; ka nu ihmulai houpih in - ngaihdam ngen kawmin ngailua ka hihdan ka hilh hi.

Laigelhtu' Lungsung Pan:
Nute' hon itna thupi lua ahi. Nu leh pate lungkhamsak kha i om uleh ana kingaihtuah thak ni. Ei ziaka i nu leh pa'n leng taksa leh khalam tanpha a damlouh loh thei uh ahi. Tuisik na hih apan honna keemden na 'NU' kamsia in na houpih kha ngei hia? Na nu' tungah khut kha in thagum na zatkhum ngei hia? Nu neilaite adia tu ahunlai tak hikha thei ahi. Nute Ni in na nu lallukhu khusak(pahtawi) in la, Nute Ni sese lou in leng na Nu, iit leh ngailua na hihdan theisak in - atung a tangthu phuahtawm bangin na omkha ding!

0105 - Ka Kipak - 2016