HENU KAKIPAH'E
By Jampa Lhungdim

"Minlien, na hoilai na-thuohlel'em bawi?" ti'a hung kisei thucheng chu ka-ja mang thiu-theu in, hahdoh lel sasa'n kamit kahin hahdoh in, kavet leh ka-kom'a ka-nu ana tou chu ka-mu tobang in kahe'e. Avel in "Bawi, nahoilai na-thuohlel'em?" ahung kiti kit'e. Ka-nu ahichu kahe'n, ka-dawnbut guot leh paodoh theilou in ka um in, ka-lungthim in vang thucheng khat beh hizong leh ka-nu thudoh chu dawnbut tei ding kati'n, hinla ka-kam'a kuon'a thucheng suodoh sahna ding tha ka-neizou tapoi.

Tahsa damlouna jieh in Imphal khopi ninglam'a um Koirengei mun'a um CMC Hospital'ah operation ding in ka-lum'e. Operation ki-bawl khalou kahi jieh chun ka-dib adam in, ka-tija lheh jieng in ahi. Hospital ka-lud masang lhakhat chun ka-chanu ahung pieng in, lhakhat alhin masang in kei operation ding in hospital'ah ka-umtai.

Hospital'a chun ka-ji'n ka-chanu ahin puiyin, amelsuo kave'n, "ka-nao lhani alhin ka-mu ding hinam?" ti'n kei-le-kei ka-kidong in, guhthim in ka-lhi ana luongji'e. Houpi theila ahi hihlaiyin, ka-tha nei zouse seng in ka-phei chung'ah ka-pomji'e. Nurse ho'n hospital'a naosen umding pha asahlou jieh uvin jaankhat bou ka-gieh khom uve.

Operation ding ni ahung lhungta'n, ei-ngailu'a ei-hung taopiehho jal in lungmuonna ka-neiyin ahi. Operation Theatre lam'a ding in eihin tollud uvin, ka-nu kaholleh ana um tapoi. Hospital campus sung'a hou-inn sung'a chun keiya ding lele in kanu'n mitlhi luong in taona eihin man pieh'e. Kading'a ka-nu mitlhi luong'a ataona hi akhatveina ahipuon, achaina ahikhah ding ka-laidib adam'e.

Nidan 14 sung khuo helou in ka-lum in, ka-hung khahdoh leh ka-kom'ah ka-nu ana tou'e. Khuo ka-hin hedthei chun ICU sung'a um kahi ka-hedoh thei bep'e. 'Houpi thei ahung hinadem?' ti'n ka-nu'n adib kidop pum in jaan khovah in mitkhat jieng zong singlou hiel in keiya ding in lunggim genthei athuoh'e. Hiche jaan'a ka-nu ka-chung'a alunggim chu keijieh'a alunggim apatna ahipoi. Genthei hahsatna ka-tuo'a, lhakaang louhiel'a eihin umpi zing ka-nu ahi kahe'n, ka-ngailu lheh'e.

Kanu'n eihin ngailudna hi sang kasa'n, hinla ama'a ding in ken thilpha khatbeh cha zong ka-bawldoh pieh ka-geldoh thei hihlaiye. Lunggimna ka-pieh zing hizong leh eihin ngailudna adaai chuom diehpoi. Phad chiesaho ka-gel in, ka-nu'n ei-hin ngailudna hohi athahbeh in ka-mu chien zep-zep'e. Tu'n ama ahad zou tapuon, atha alhasam lheh jiengtai. Athahad sungse'n ka-nu'n keiya ding nna ana tong zing in, kei ei-ngailud jieh'a nna atoh ahilam ka-na geldoh khapoi. Minu'n acha avah ding mong'a ka-na ngaituo chu ka-kisih tave! Sum-le-pai anei ham neilou ham helou'a sum deicha'a kana kiphinji laiho chu ka-ngaituo'n, alungthim in apuohlel ding dan tuhin kageldoh thei bep'e.

Itobang'a ka-phatmo lai jieng in zong ka-nu'n kamse le kam phalou in eihin samse khapuon, ama'a ding zong hilou, kei phatchuomna ding thil ka-kibawldoh aum leh keisang in ama akipahjo'n, phatthei eihin buohkitji nalaiye. Pathien thu tamtah eina hil in, hinla donse in ka-na koipiehji poi. Housiet leh voh sang in ka-lungludna ding lampi joh'ah kanu'n eihin khoukhah kiguo ham-ham'e. Lekha helou ahijieh in ki-phatlamna anei zing in, hinla ahed kham-kham in eina tilkhouji'n, ken kana ngailhah pieh nuom jipoi. Hibang'a kanu'n ei-na ngailud kana geldoh vahlouhi phamo kasa lheh'e.

Lhakhat school ka-kailou ding sang in innsung maicham khatvei seh-seh ka-jaolou ding aponajo'n, akhohsajo'e. Leisiet chihna le thepna kana ngaisang in, hiche chu ka-nu alhahsamna lam ahijieh in ama'n Pathien thu in eina tilkhouji'n, hiche chu kei kana lungludji poi. Hiti tobang dinmunho ahung lhun tieng leh kanu'n mitlhi luong in Pathien thu'a lungludna ka-nei theina ding in taona eihin man piehji'e. Nu-le-pa thu ka-ngailou jieh'a Pathien in ka-chung'a godna ahin lhunsah ding kanu ana tija'n, ama suhkhiel aumlou vang in kei khel in keiya ding in kanu'n Pathien kom'ah ngaidam eina thum piehji'n ahi.

A-oisung'a lha-ko ving-veng eina puoh'a, a nawi-tui'a eihin vahkhang'a, gim-le-chol khohsalou'a a-tungtun'a eina puoh'a, malphot hiel-hiel'a apheichung'a eina pom'a, lungsietna bulhingsel'a eihin lungsiet'a, ngailudna sangpen'a eihin ngailud'a, ahivang'a ken ama aw-cheng ka-na niel piehji chu thiemmo kaki chan lheh'e. Ahed kham-kham'a lekha eina hil'a, A-B-C sut ding daan ama khuttah'a ka-khut atuh'a eihin hil'a, lekha sangtah eihin simdohsah kanu ahi'n, ama sang'a lekha kasim sang joh jieh in eihin hilnu chu kana nuoise joji'e.

Minu tamtah in achate'u alungdei bang'a aumlou tieng leh agaosap uvin, asamse uvin, kampao ki-lawm lou tah-tah in ahou jiuvin ahi. Kanu achutipoi. Itobang in phamo zong leng kamse in eihin hou khapoi. Ka phatmona zouse ama'n Pathien kom'a ngaidam eina thum pieh zing jieh in tuni geiyin hinna damna ka-nei nalaiye. Pathien in thina thei ding dinmun'a ka-din'a, melmate khut'a ka-taanlai jieng in zong eina huhdoh'e. Kei hadna jieh'a ki-vengdoh'a ka-ki gel chu ka-kigel khiel lheh'e. Gaal hadmi ho zong ama-le-ama akivengdoh zou pouve. Pathien in ka-nu taona asan'a, eina vendoh ahi chu ka-geldoh vaigei behseh'e.

Tahsa damlouna in ei-hin tuom in, ka-nu ka-lhangai in, ama'n zong eihin dalha ngaipoi. Innmun'a aum leh itoh abang dem ti'n alungtheh in, ihmu theilou in hinkhuo amang'e. Hospital'ah eihin dellud in, eihin gepi'n, khatvei seh-seh ka-khud zong leh keisang in kanu'n athuohlel joji. Ka-hai akisuhlou leh adib adam in, 'kanaohi i-toh abang nadem?' ti'n ihmu theilou in aumkitji'e. Ka-chung'a alunggel asan behseh jieh in amelsuo aki khel in, atahsa'n adouzou puon, agob lha tul-tul jieng in, hinla eihin ngailudna chu achul diehpoi.

Minu zouse achate'u ngailu chieh-chieh zong leh kei kanu'n ei-hin ngailudna hi sang diehset ding in kagel'e. Nikhat nini eihin mulou zong leh 'ipiti ahidem' ti'n alungphamo'e. Mun chuom-chuom'a ka-um lhon tieng leh keiya ding'a alunggelhi tuni geiyin aki khel nai diehpoi. Hibanglom'a eihin ngailu ding Pathien in nu ei-hin pieh hi keiya ding in pienlo aum'e. Kanu'n hichan'a ei-hin ngailud vang in ken ama ding in bawldoh pieh kanei khapoi. Khatvei beh zong eihin ngailud jieh in kipathu zong kaga seikha puon, hinla ama alungphamo diehpoi. Ka-khuo hed akuon'a ka-nu ka-na suh gentheina ho zouse hi ka-damsung'a ka-puohlel ding ki-sihna ka-ki siemdoh ahi bepseu'e. Ka-ding'a alhi luongdohho zouse ka-damsung'a kakiledoh sah zou ding ahi tapoi. Ijad vei keijieh'a a-ann neh tuimo ahitadem? Ijad vei keijieh in a i-mut akisuhmo'n ihmu theilou in aum tadem? Hiche ho zouse hin thiem eihin chan theipoi. Kanu'n eihin ngailudna hi mitin in ahedding kanuom in, hiche jieh chun kenzong hiche hi kahin sun'e. Nute nikhuo tamtah vei kana mangta'n, hinla ka-nu'a ding in imacha bawl pieh ka-neikha hihlaiye. Bawlthei dang zong imacha ka-nei diehpoi. Ka-bawlthei chun kanu'n eihin ngailudna thusimhi mi'n asim'a, keibang'a anu ngailudna ana ki-heddoh theilou khat-le-ni beh in ki-geldoh theina'a anei leh hiche chu ka-bawl theisun hiding in ka-gel'e.

Henu, nang in zong hiche thusim hi na-na simdoh khah leh, neihin ngailudna hohi ka-sumil puon, kahin suh gentheina ho kakisih in, keiya ding'a tahsa kieh hiel'a genthei na-nathuohna ho zouse tuni'n ngaidam kahin thum'e. Neihin ngailudna ho zouse jieh in kakipah'e. Neihin ngailudna hohi adit kitna ding imacha ka-neipoi. Keijieh'a zum-le-ja nathuoh'a, genthei nathuohnaho zouse neihin ngaidam in'o. Kumdang'a sang'a kipahjo leh thanuomjo'a NUTE NIKHUO namanna ding in kahin taopieh'e. Henu, neihin ngaidam in! Kaphatna le kaphatmona tekah louhiel'a neihin lungsiet'a, neihin ngailud zing jieh in.... Henu, Kakipah'e!

Published in Laijon Digest, May, 2013