SAKMIN NGAIH TUUNNU
By Pastor Rawna Kopsiam

Ka ute nupa anih un Doctor ahi ua, a kiteen nung uh kum nga bang hita mahleh nau nei nailou uhi. Doctor tuak ahihman un a mau theihdan leh hihtheih khawmkhawm in ki en kawl mahleuh uh lohching tuan lou uhi. Siamzou lou leh a mau theihna in daihlou hinteh chi'n hiai lam ah specialist bang zah hiam leng ki en sak uhi. Hilehleng a phatuam tuan kei. Lungke gawp leh naunei nawn ding dan in leng kikoih lou in ki etsak leng khawlsan mai uhi. A inn ua nnasem a om nupi khat in ahihleh ta nga nei a, tun khat pailel hi. A nupa un nektawm zawng ahi ua, khosak haksa a sa mahmah uhi. A tate uh school leng kai sak zoulou kia leng hilou in silh leh teen hoihtak leng guan zou lou uhi. Huai ban ah a pasal ahihleh zudawn mi ahia, a ma sepsuah atam zaw zudawn man a zang gaite ahi. Amah ahihleh michitak leh kuhkal mahmah ban ah mihoih mahmah ahi. Ka utte nupa inleng a deihsak mahmah ua, a loh gentak louh in silh leh teen ban ah nekdi tuamtuam a piak hun bang uh leng tam mahmah hi.

Nikhat ka u pasal in ka u kiang ah minau lak mai a, a mau ta taktak bang a etkawl a utdan gen hi. Ka u in leng hoihsak pih in nau lak ding in kithu kim uhi. Kei kiang ah hon gen ua, kenle huchia nau la di na hih uhleh a piantung apan la unla, neuchik ahih apan in enkawl le uchin na ta taktak bang un na koih thei zaw di uh.

Naungek in leng a nu leh pa leh a sanggamte thei dah maileh ka chi hi. Huchi ahihleh ka nna semnu un naupai hia amah kihoupih leh a hoih ding chi uhi. A nnasemnu uh kiang ah khosak lah haksa sa thou china, ta lah nei hun tawk thou na hih chiah, tua na pai lel pen a pian chiah kou non pia mai diam chi'n ngen uhi. Amah kia a thutanna la ngam lou ahih dan gen in ka pasal toh kon gen khawm phot ding uh chi hi. Ka ute nupa mai etna in a phallouhpi uh phal lou chingam lou a aom khak ding uh ka lauh man in, na pasal toh hoihtak in hong kihou unla na phal kei uhleh leng kisuanglah het lou in phallou chi un, hiaiziak a na sepna leh hon panpihna uh tawpsan ding ahi zenzen kei uh, hiai toh kisai ken a mawh ka pawna ding ka va chi hial hi.

Karkhat nung in ka houpih thak nawn ua, a pasal in leng lemsa ahih dan hon gen hi. A zingchiang in a pasal leh theihpitu bangzah hiam toh nau kipiak khiak ding dan ka gen khawm uhi. Ka kihouna dan uh ahihleh nau a pian phet chiang a kou la ngal di chi in laigelh ah suai ka kai uhi. Tua ban ah a naupai sung ka ute nupa in a ki etkawl man teng seng vek ding in leng ka kithukim uhi. Tua dungzui in ka ute nupa in leng nidang sang mah a leng deihsak zaw in nek ding hoih leh lim zaw zaw bang a pe gige uhi.

Kha bangzah hiam nung in nau ahong piang a, ka ute nupa toh nau la ding in ka va kuan ua, ka tun tak un a nun kou hon muhleh a kap mawk hi. A nau a en a, kou hon en zel in khasia tak in a kap zel hi. Kou lah gen ding leng theituan lou in ka ki en tuah zel uhi, " Ka khosak haksat dan uh ka thei, neklim leh hoih leng ka pia zou kei ding chih ka haih kei, nou kiang ah omleh a kiduat dingdan leh a hoih theipen leh nek leh tak hoih theipen toh ki enkawl ding ahi chih leng ka thei, hilehleng hiai nau zaw kon pia khia phal dah mai ding. Ka neihsun sun leh hihtheih khawmkhawm in ka en kawl mai ding, Amah lou a ka hin ding zaw ka ngai ngam mahmah kei " kap kawmkawm in hon chi hi. Huchi hial ahihleh chi'n kou leng nau etna leh panpihna dan in sum tamlou pia in, nau la lou in ka kik uhi. TUUNNU itna a thupi dan hichi khawp ahi chi in ka thugen ka zou hi.

Mipi hong kikhawmten lamdang a sathei mahmah ua, thutak hiding a gingta lou bangzah hiam leng om uhi. Lawmte leh khenkhatten kikhop tawp in hong dong thakthak zezen uhi. Ken leng a taktak ahihdan ka na hilh chiang in lamdang sa deuhdeuh uhi. Kikhawm tawp innlam zuan a ka pai leh lampi ah tagah khawina a sem nungak khat ka tuak kha hi. Amah leng hiai khawmpi a hongtel ahia, ka meltheihsa ahihziakin a kiang ka tun in gari khawl sak in, hong tuang in na inn tan uh kon kha ding chi in ka tuang khawm uhi. Thu tuamtuam gen a bangtan hiam ka houlim nung un, tuni a ka thugen bang chi na sa a, mikhenkhatten lamdang salua ua hong dong thakthak uh ahi ka chih leh, Lamdang ka sa kei. Ka gingta thei kei chi in hon dawng tan leuh mawk hi. Bang achia e, phuahtawm sang a leng thutak khenkhat lamdang zaw ahi, ka chi nawn hi. Himah e phuahtawm sang in thutak a lamdan zawk hun om mah e. Ken leng phuahtawm sang a lamdang zaw thutak kon gen ding na ngai awle.

Nupa nektawm zongkhat in ta thum nei uhi. A tanu uh a neu pen a pian apat in a mit hatlou a, khua muchiang lou hi. A neihkhawm khawm un ki ensak sek mahle uh phatuam lou hi. Khatvei a va etsak nawn uhleh Doctorpan na nau uh a mit at ahihkeileh alet dungzui in a mial deuhdeuh dia kum 10 aphakma in khua a mu thei nawn kei ding a na chi hi. Amau leng a atman bangzah bei ding, nang at thei ding maw chi in dong pah uhi. Sum a lakh a sim bei ding ahi, ken ka hih thei kei ding a Doctor dang kiang ah kon sawl ding chi in dawng hi. Kong hoh thak ding uh chi'n inn ah pai ua, lungkham leh mangbang takin om uhi. Niteng nek ding sutuah zou hamham in koi a sum a lakh a sim nei di la. Atsak lou dia lah a tanu uh maban ding ngaihngam huai lou, At nang sum lah nei zou lou in lungkham mahmah uhi.

Nibang zah hiam nung in a nu leh pan hiai numei naupang Doctor kiang ah hoh ding chi in pawt khiak pih uhi. Bus in saupi tuanpih ua, huai zawh in khe in bangtan hiam paipih nawn uhi. Bus khawlna mun dang ah Bus dang ngak pih ua, Biscuit bawm khat lei sak uhi. A pian apat biscuit a kileisak masak ni ahihman in kipak mahmah mai hi. A nun kon sap ma uh huai ah va kimawl in chi in mun tuam deuh ah sawl khia hi. Amah kia ahi na a, biscuit kipahpih lua ahihman in a nu leh pa phawk khawl lou hi. A biscuit hong beita a, khua leng hong mial dekta hi. A nun lah sam ngeita himhim lou. A tawp in a mah leng beidong gawp in kap kawmkawm in: he nu he nu chi in hong pai khia hi. A nu puansilh bangbang silh nupi khat mu a, a mit hatlouh toh a nu sa in kap kawm in zui nilouh hi. He Nu chi in sam zel mah leh tua nupi in a mah sam dan a theilou a diam ngaihsak ban lou hi. A tawp in a paina ding lam thei tuan lou in mun khat a tu in: he nu he nu he nu chi in kap keuhkeuh mai hi. Bangtan hiam mangbang tak a a om nung in papi khat in va tuak kha a, pikhia in tagah khoina ah va koih hi chih hon gen khit in a mit apan khitui kham zawh vuallouh in hong luang khe zungzung mai hi. Tua na thugen a tak ahih leh hihlouh bang chi'n na gen chian thei a eita ka chih leh, Huai numei naupang pen kei ka hi. Nu itna chi a na gen ka nun neilou ahi diam ? chi in hon dawng hi.

Note: Hiai thu ahihleh kum bangzah hiam paita a, Social Activist khat in Women's Day zatna khawmpi khat a a gen, Hyderabad Bugle Weekly News Paper 2 Aug 2009 Sunday a kigelh ka simkhak ka thei lai dandan a kon gelhkhiak thak ahi.