Guite Road toh kisai a Ngetna
Guite Road, ei Zo-suan unaute adia kikomtuahna poimohpen in khua 30+ tawn a, km 127 khong in sau hi. Dr. Chaudhary, Minister of State in Feb 20, 2014 a Rajya Sabha dotna a dawnna ah: ‘CCpur-Singngat-Sinzawl-Tuivai road 2012 in National Highway (NH102B) a puan ahi a, development and maintenance BRO khut a piak ahi’ ci hi. April 2010 apan in BRO in lampi restoration & upgradation na ding in Rs.62 crore zang ta a, June 2013 cloud brust jiakin lampi sia ci hi. National Highway (NH) i chih gamkhat a lampite lak a dinmun sangpen ahi. Central solkal directive dungjui in lampi khatpeuh bawl na’ng in specification kichian tak om in km 1 ah a tawmpen in Rs.85-100 lakh bei dia tuat ahi. Lampi pen bawlzoh ahihnung in maintenance piak hilai hi. NH102B Guite Road official record status ‘completed’ cih ahi. Govt in Singngat-Mualnuam kal 68.6 km ‘rehabilitate’ na ding tender called na ah Bhartia Infra ten L1 (lowest bidder) hihna toh na hon sem pah dia lamet ahi. Huai ban ah, consultancy and supervission (third party) din ‘Request for Proposal’ (February 2016) Rs. 45.10 crore (i.e Rs.65.7 lakh per km) ‘assignment period 84 months’ ading NHIDCL in sam lel hi.
Ahihleh, bangchi dan a hichi tel a sia a kum hiaizah bangchi dan a I lampi uh omthei ahi dia? Dotna dawn ding tamlua hilou hiam? Suanghum suangnou, piaunel, alkatara bang quality zat hipeuhmah hi din i ngaihtuah ua? Kua contract, kua quality control, kua approved na a bill ki pass, kuan certify ahi dia?
Atak in bel Guite Road tuh luahlouh gammang lampi bang mai hi a, mun khenkhat ngakul bang hial in kuak a, Guite Road tuh mimal/ pawl kuate hiam sumbawlna ana hi den hi. Hichi khop a sia lampi tuh mimal/ pawl kuate hiam sumbawlna ana hi a, alou theilou ziak a khualzin mipi te bang bahara leh thil dangdang a naktak a neksiat hilai. Guite Road Transport Co-operative Society (GRTCS) ki chi leng dinsuah ahi hi. ‘GRTCS a ki-registered hilou Gari te in June 16, 2009 akipan in Guite Road tawn in sing-le-gua puak phal hilou chih thu puang uh a, a thupuan uh bawhsia a om a action lak ahihleh kuamah khasia om theilou ding’ chih thusuah hong om hi. Guite Road a gari lut ding himhim Guite Road Information Centre a ki-report chiat dingin leng theisak uhi’ chih hi leuleu. GRTCS in mimal khat in commercial vehicle service Guite Road a abawl theihna dingin Rs.50,000/- vel sum la chih ahi.
Dan dungjui in, Guite Road tuh NH, 100% mipi sum (i.e. taxpayers’ money – sales tax, VAT, custom, excise, cess) jang a solkal in a bawl ahi a, kuaman siah (toll tax) dong theilo a, mipin lampi zat man pia chih om theilou himhim hi. Public Private Partnership (PPP) nuai a kibawl lampite ah bel solkal dan dungjui in construction zohchiang in toll tax la thei ua, maintenance leng amau khut ah om hi. GRTCS in Guite Road bawl hoihna dia apanlakna uh kithei lou a; hiaibang a monopoly leh taxation bawlmawk le diklou hi.
GRTCS permit neilou gari in Guite Road a van pawtheilou ahihman in, Sinzawl apan nahtang leh lengtheite Lamka tan puaktung na dingin Tipaimukh Road, lampi sau leh gamla zawtham tawn sek uhi. Sinzawl-Mualnuam lam apan lou hai te a market Lamka tut na dingin ni 3 tha ban ah bahara in Rs.500/- leh nekman Rs.200/- (kuan-le-pai) honseng uhi. Tuni a kilou anteh-louhing te a jingchiang in puaktheih hipan a, a jinghal a Lamka a zuaktheih hilel ahihman in zuaktak nonlou in seman jel hi. A puakna a sum-le-hun sen jiakin singtang apiang anteh-louhing sumsuah hithei vual lou hi.
GRTCS in bahara leh Guite Road toh kisai himhim ah thuneihna tawi ua, mipi adingin haksatna huaise tak leng na tun hi. December 2014 in Guite kual mipi’n, bahara 30-100% a khansak (50 te 100, 100 te 150, 150 te 200,..) ahih thu ah Singngat apan lampi honjui in naktakin ‘aw’ honsuah uhi. Himahleh, thau toh betdaih mai hilou in khutlum jiaka zawngkhal loh hial in unaute na om uhi. A kisaikhakpih Department leh Pawlpi apan mipi nungthuapna ‘aw’ bangmah zak hilou a, Guite kual mipi khase mahmah uhi. Lampi siat paulap a bahara khangsak GRTCS in lampi puah a, abawl lam theih hilou hi. Guite Road i gam nek-tak-zonna (economy) a ding a sigui (artery) pen, mimal leh pawl khenkhat sumnak asuakta.
Hiai atung a thu te phuahtawm hilou hi. Nang, singtangmi officer/ student/ tuailai khat in hiai thu na sim in bang na ngaihtuah? Bangjiaka hiai thu a tutan ‘aw’ suahngamlou - saptuam, civil society, philanthropic body ten amau kisawk jen a lampi bawl hong kipat ngai? Singtang a i unau te i it, i hehpih ichi a, tuni tan in amau nekkang a omsak hilou i hiam? Bangjiaka, tu 21st century a, km 100 a gamla a khuajinna dia nikhat bei lailai ahia? Sinzawl-Songtal-Mualnuam apan Lamka dakkal 3 a hongtungthei ua, kileh thei uh hileh, a nekzonna uah tungzanna bangzahta om ding ahia? Bangjiaka, ata-anau te uh poimoh laibu, silh-le-ten kitoudelh haksa a om nilouh ding uh ahia? Amau lou-le-huan hai sum suahtheih kumtawn a nei hilou uhiam? Mipi leh saptuam in NH bawl nadia sumdong a social work neih chihtel! Kua ngoh a, dai lai ding i diam?
Maban ah, Guite Road toh kisai in hiai anuai a ngetna te a kisaipih thunei leh pawl te kiang ah kon bawl uhi:
(i) GRTCS in hiai public property Guite Road hon opkhum nonlou dingin kon ngen uhi. GRTCS in Guite Road tawn a khualzin mite soisa (harass) non kei uh henla, a van puak ding uh leh tuanna ding gari ah thuneihkhum nonkei uhen.
(ii) MSRTC service ichihte lah tunding nawn tu dinmun a kinep huailou ahihchiang in, Public Private Parnetship (PPP) tungtawnin appropriate ADCC/ State Govt’ Fund zangin bus 3/4 lei khia in, solkal mah or entrepreneur/ SHG zanga operate didan ngaihtuah hihen. Fund ditkik ngai te diktak a ditkik dingin. Tuabang a, public bus service honghih chiangin bahara Rs.10-30 in no-profit, no-loss a operate hihen. Public/ Govt sum tuh a mipi’ poimohna leh panpihna a zat hita henla, mimal leh pawl sumbawlna in zat hinonkei hen.
(iii) Tua Government apan Guite Road adia fund ki bikhiah te hongpai chiang in, tutan a sepgah muhtheih om nailou pawl/ NGO himhim in monitor in gen honnei kei uhen. Bhartia Infra ten third party supervision na ah na hon sep chiang un, ei a mipi (stakeholder) te mah in panla in, alert tak in a project specification leh quality te etkai pih ni. Sanction a om zatna leh nasepna JAC tungtawn in Numeite (AMTWU) etkaina ah, transparency and accountability ensure ahithei diam? Zattak a bawlhoih ahih matan monthly/ quarterly work/ audit report mipi kiang ah bawl hijel hen.
Alert Zone member-te sik-le-tang in,
1. Lian Suantak, Delhi; 2. Siampu Thomte, Delhi
3. Son Ngaihte, Mumbai; 4. Chinngaihlian, Mumbai
For communications, please feel free to contact us at our e-mail address: This email address is being protected from spambots. You need JavaScript enabled to view it.
