MAINAWT: KHANGTOU DIAM – II
Dr Sanga R Laingek

Thupatna:

'Mainawt: Khangtou Diam' chih thulu a nei in sehkhen khatna, Social Networking baan ah, niteng tanchinbu, "The Lamka Post" ah March 29, 2016 ni in hong suak hi. Tua thugelh ana simkha kuapeuh in Manipur Singtang (Tribals) mite State Sorkar nuai ah bangchi a khosa a, Daan dungzui a hamphatna angah diing uh piak in aom uh hia, om lou, chih leh a dinmun uh diktak bangtan hiam theihna aneih ngei uh i lamen hi. Ih thugelh sehkhen khatna na simkhaak keileh bel hiai sehkhen nihna pen theihsiam haksa kha maithei hi. Sehkhen khatna abaan sutzopna in hiai anuai a bang in gelhbeh le'ng i chi ahi.

Dinmun haksatak akipan ahaksazaw seem manoh a paitou lellel in tualsuak mite, 'Kua'n hon bumhai amaizen a' chih diing khop a lauthawnghuai, delthawng, kip lou, piaunel tung a inn lam toh kibang, nawmvalh a om thei gige leh siikden a om in; Khat-le-khat kikeituah nilouh hile'ng kilawm maimah; 'Kipumkhatna' adeih lou lah om lou hinapi, pangkhawm thei het lou chitchiat a om, Zosuante nuntakdan: Alamdang hi...Alamdang petmah mai hi....!! Manipur Sorkar paizia ngenteltak a sui detdet a, Singtang mite dinmun diktak ahihna bang geih a phoukhiak ahih a, mipite in zong tuabang geih dinmun pen kiteltak a theihna kichian neih kul-le-poimoh lua ahita hi.

Zosuante Mainawt:

Khosakna leh neekzonna ahaksat luat tel ziak in leitungbup ah Zosuante kithehdalh nasa mahmah uhi. USA ah Zomi akichite kia zong siingkhat val kimlak tulel in khosa uhi. Gamdang mun tuamtuam ah Zomi Innkuan USA kipawlna khazaak nuai ah, gambung tamtak ah Zomi Innkuan kiphuan in om tiltel uhi. Abiktak in Myanmar (Burma) akipan Zomi tampi gambung mun tuamtuam ah kithehzaak in khosakna detdou leh kingakna thamching nuntakna ngah in leitung gam munchih-mualchih ah Zosuante niteng neekzonna baihlamzaw leh dinmun saangzaw ah Toupa'n domkang in laamtou hi. Siamsinna lam ah siamna saang ngah in mi hunkhop USA kia hi lou, Australia, Singapore, Japan, Malaysia, United Kingdom, etc., etc., gamte ah angtangtak in nungta uhi. India gambup sung a Zomite pen huchi lawmlawm a pawpawt tamlua kei mahle uh Delhi, Mumbai, Bangalore, Chennai, Hyderabad, Kolkata, Guwahati, Shillong baan ah, khopi dang mun poimohte ah Phualpi Sorkar leh Private Company, BPO, Call Centres chihte ah sepna nei bangzah hiam om uh ahihman in lam tuamtuam ah 'Mainawt, Khangtou Diam in nungta uhi.

Gamdang ahihke'h mundang a mi a pawpawt uh chiang in gam-le-nam veina leh itna khanglian semsem ahihdan theihtheih in om hi. Banghang hiam chihleh, melmakte in a pianna uh gam it lua chiat uh ahihman in, Zosuante in zong mite khosakdan leh nuntak zia mit ngei a mu a, niteng hinkhua a atuahkhak uh chiang in, pianna Zogam nuam ngaihnatna, veina, itna leh humbit utna amaute lungsung tawng ah apiangkhia khat om ahih ngei i gingta hi. Hiai pen pianken a thilhithei leh ahi diing him asuak hi. Aziak bel midangte amau gam chiat a adinmun uh detdoudan leh feltak a kivaihawm uh ahihdan atheih uh chiang in, pianna Zogam liangvai lua sakna lungsimtawng ah chiibang a tuhkip a hong piangkhia ahi hi. Zosuante in masawn leh mainawt zel ahi chih muhtheih in om hi. Himahleh, deihthusam ching zou nai lou ahihman in mailam hun ah sep-le-bawl kong bangkim ah zil diing leh sinsiam a sep diing tampi mahmah om lai veve hi.

India – Zosuante:

Siatna lam tuamtuam ah India – Zosuante lak ah khang haat petmah, mulkimhuai khop a siatna, numei-pasal kaal a thangtaatna uang tektek; Siamsinna lam ah niamkiak houh ahi kha zenpeuh de aw chih sim in om mawk hi. Zosuante nungchang, hindan kilawm mite muhdan leh theihdan a niamkiak lam manoh houh ahi mai diam...!! Thadahna, thangtatna, mahni saang a upazawte zahlouhna, huhamna, ngongtatna, etc., etc., tuailaite lak ah pung hulhul ahihman in nidang a Zosuante nundan mawi leh omdan kilawm ana omsa gige pen niteng in niamkiak hiaihiai abang maimah hi.

Neekzonna leh khosakna toh kisai a mi kimkhatte in khantouhna nasatak ngah in siamsinna lam ah kaal saang tawi in, siamsinna munhoih leh manpha zuan in atuailaite uh gamdang ah sawllut in siamna saang taktak angah mi tampi kumteng in pawtkhe gige uhi. Zosuante lak ah tua chibang a lohchinna leh siamna saang angah mi tam lou akipan neekzonna kizenzaw, hoihzaw leh detdouzaw tunung sawt lou in Zodawn ah hon puaklut ngei uh i lamen hi...!! Siamsinna toh kisai Zosuante lak ah kivelthak diing hunkhop om diing in uphuai i sa hi. Banghang a niamkiak hi hiam chih leh siamsin tuailaite dinmun etkai diing kisam takpi asuak hi. Leitung khosakna ah khovel mite lak ah siamsinna lam a nasatak a kitaitehna saangtak a apaitouh lai in Zosuante pen mainawt a apaitouh nilouh diing uh hinapi, Zodawn lam Siansinna Inn lawih a om in, Bawngbuuk peuh suak gawp a; Sinsaktute atamzaw khopi ah kibendim netnot maimah uhi.

GuiteKual (Manipur) Siamsinna:

Siamsinna, School hoih leh kingakna thamching poimohdan michih in thei vek hinapi, banghang a hichi lawmlawm a Zodawn, GuiteKual siamsinna munte vuaksuak hitazen hiam...? GuiteKual ah tunitan Higher Secondary School khat lel leng om lou chih tel lawmlawm, zumhuai lua ahihlam khangthakte in i phawk chiat uh hoih diing hi. High School omsate nasan muihlam manoh deuhdeuh maimah, laisiamna lou a lah tuhun a bangmah kihih taktak thei lou, neekzonna hi in, kivaihawmna leh niteng nuntakna hitaleh siamna leh pilna apoimoh pipen ahi tawntung hi.

March 23, 2016 ni in Imphal akipan Zodawn manoh in Lamka ah ka giaklut a; March 24, 2016 06:00 AM in Mualnuam Grace English School, Managing Board Members, Headmaster leh Teaching Staff teng toh houlimna nei diing in Socio-Economic and Educational Trust (SEET) a ka seppih lawmte mi li (4) toh ka kizui uhi. 10:45 AM in Mualnuam ka tung ua, Nengdouthang Tangpua, Headmaster Inn ah ka lut masa uhi. Zing-an ne nai lou ka hihlam uh atheihtak un kintak a neek-le-dawn diing singpi leh puri Dorcas-te in zintun siamtak in hon pia ua, huchih laitak in Pastor Chinkhansuan Tombing zong koute toh kimu diing in hong tailutpah tingteng hi. Hiai, Grace English School ahihleh EBCC HQs in February, 1991 a aphuhkhiat ahi a, tunitan Class VIII tan Results hoih thei mahmah ahihdan Headmaster in hon zasak hi.

School Managing Board, Teaching Staffs baan ah, Students teng toh houlimna nei diing in School lam manoh in ka paiphei chiat uhi. Students teng School kongtual ah 'Assembly' nei in, muamkhum hawmna neikawm a hasotna thute geen in, naupangte hampha lua uh ahihdan leh SEET in Classes VIII & VII simlel, "Top Three" tan Scholarship piak a omte toh limlakna neikhawm in hun nuamtak ka mangzou uhi. Huchi in Library Hall ah Houlimna hun manphatak daakkal nih vaal vengveng ka neihkhit un Headmaster Inn ah Ankuangluina hon neihpih ua hampha ka kisa petmah uhi. Ka houlimna uh bel Classes IX & X bangchileh Mualnuam khua a om, Grace English School ahihke'h Tualkhohau Government High School akipan ziltheih a hong om thei diing hi hiam chih ahipen mai hi.

Class VIII sim lel naupangte nu-le-pa teng toh nitaak daak 08:00 PM akipan daak 10:15 PM tan Headmaster Inn ah Grace English School Managing Board Members bangzah hiam toh SEET Members-te in houlimna ka sunzomnawn leuleu uhi. Kumthak, 2017 a Class IX sutzoptheih ahih diing aleh bel sinlai naupangte mundang a koihkhiak louh deihtel a neizaw uh ahihdan hon gen chiat uhi. Hiai omzia bel sum-le-pai tawm beizaw diing a, sinlai naupangte nu-le-pa toh mahni inn lum pansan a Class X zohtheih diing ahihchiang in kipak petmah uh ahihdan thukup hon bawlbeh uhi. Chiklaipeuh a SEET in a kul-le-poimoh kong tuamtuam ah panpihna khut taklam piak kihuam gige ahihdan ka gen uh chiang in nu-le-pate (guardians) lungmuang mahmah uhi. Lam chiteng a khantouhna aom theihna diing a kibulphuhna diktak ahihleh Siamsinna (Education) suangphum hoih mah kul-le-poimoh ahihman in Zodawn siamsinna puahphat kiphamoh petmah ahi chih hon suangtuahsak pha mahmah hi. Zosuante 'Mainawt a Khangtou Diam' diing in bel ih Zodawn siamsinnate uh kivelthak a, nasatak a panlaak diing kisam petmah hi.

Mimal Kivelthakna Poimoh:

Leitung khosakna detdou leh a chidamhuai Khantouhna bangchileh Zosuante lak a hong piangkhe thei diing hi hiam chih mihing nuntakna paitou zel ah thil poimohtak ahi. Diktatlouhna leh Neekgukna eite lak nangawn ah uang lua ahi chi in mi tamtakte in i tangkoupih zel ua, bangziak a hichibang thilhoih lou niteng a pung hulhul hi hiam chih leh sualna uang deuhdeuh hi hiam chih i geel vengveng chiang in amhaihuai leh luaksuahhuai asuak hi. Sia-le-pha theihna siang, ngaihtuahna chiim deuh a geel detdet hun lua hi. Thil bangkim 'politicised' vek hile'ng kilawm maimah hi. Kineksiatna uang deuhdeuh, ih pianna gam in azilta lou, kua pat hiam aw, "Akpi pat" chihdan asuak maimah hi. Eipawl pat bel hi sam lou in, tanglai akipan hiai neekgukna kichi ana om khin ahi chih haihvual ahi kei; himahleh, hiai bang chiindan hoih lou akipan, 'Kristian ka hi' i kichihnop ngal aleh bel pilvantuak lua hi lou hiam...!! Ginglou mite chiindan in koihthei chiat le'ng bel vaiveng mahmah lel diing in um ingh.

Mimal kivelthakna poimoh lua sa ingh; Zodawn khua a teeng diing tawm hiaihiai, gam lah keu deuhdeuh, kumkhat sung a sing-le-gua kihaltum tamlaw petmah, guuktaakna lah uang deuhdeuh mai, kimohsakna ngen, kimohsakna ngen a pumdim, Zosuante lak ah mi diktat khat lel leng om lou ahita a hia le...? Mahni mimal hinkhua kivelchian in, niteng in kihihsiang in kivengsiam in siangthou peuhleh kong bangkim ah eimah, mimal hinkhua a diing baan ah, tangpi-tangta a diing in ahoih in anuam mahmah diing hi.

Zodawn siamsinna Inn vuaksuakte tundingnawnna diing in kua pen in mohpuakna nei in na ngaihsun a: Sorkar/Mipite/School Teachers...? Mainawt a khantouhna leh masawnna diing a thil kul-le-poimoh penpen lah "Education" ahi ngal a.

State Kivaihawmna Mumallouh Luat Ziak in thil bangkim nawngkai vek asuak hi. Mi nautaang ahihke'h mipite lak ah: Khamuanna leh lungmuanna om lou, thawmhauna ngen a pumdim, kong bangkim ah inntekpan a nasep-silbawl chih himhim om lou; Thaloukuan pan vek maimah. Chief Minister akipan Peon tan ki-ui-ek bat vek hi le'ng kilawm maimah tel ei voi...!! Hill Districts teng a Office om sunsunte leh Deputy Commissioner (DC) Office a semtute: aneupen akipan alianpen tan – mahni mimal kivelphathak chiat in, abiiktak in Education Department (ZEO) bang in: "Khaile Lawm aw, Masuan ni, Lungke lou in pang ve ni, chi in inntekpan chiat le'ng bel Zodawn Siamsinna hoihtuan mahmah diing hi. School Teacher (Sikulpu) hi ngal a, sepna mun a om lou, Lamka ahihke'h District HQs akipan gaalsep, Sunday School bel hoihkai law mahmah in, kaitampen lawman bang saang kha zawzen zel; Kristian sabiakna toh kituak ahi i chithei diam? Kimkhatte bang Saptuam Upa chih khawng hizaw mah; Bangchi a, 'Mainawt: Khangtou Diam' thei mahmah diing i hi ua?

Thukhupna:

Apilpi a mainawt a khangtou diamdiam thei diing in bel mi khat kia'n sepzoh vual ahi kei; pankhawm petmah kisam hi. Huaiziak in, Zosuante beek pangkhawm siam le'ng uthuai i sa petmah hi. "Mainawt: Khangtou Diam" diing a thil kul-le-poimoh tam lou hiai anuai ah i taklangh diing:

1. Siamsinna mun (Educational Institution) puahphatna diing toh kisai michih in mohpuakna i nei chiat uhi. Khawbing khat a teengkhawm mite leh sinsaktu (teachers) pangkhawm a, kihasuantuah kisam petmah hi. Sinlai naupangte itna diktak toh nu-le-pa hi in, khawsung mite hitaleh naktak a pankhawm diing kisam hi.
2. Neekzonna leh niteng khosakna toh kisai in, singtangpa Lou neihdan ngeina (Jhum Cultivation) pen kham piangnawn lou ahihman in, Hausa leh mipite pangkhawm a, Community Farming (Zohuan) akinlam a patkhiak poimoh petmah asuak hi. Phualpi Sorkar akipan sum-le-pai hong pai khempeuhte phatuamtak a zatdan diing Village Authority in azeeksiam kul-le-poimoh mahmah khat ahi. Milip in aphattuampih theihna diing geel a, mahni kitoudelh theihna diing Zohuan bawlkhiak diing kisam hi.
3. Mahni mimal chiat kivelthakna neih diing, hindan siangthou leh thudik gum gige a; Diktatna hinkhua niteng a zuih tawntung diing kisam hi.
4. Ih mihinpihte khotuah diing; Meithai, genthei-tagahte dopkang a panpihngaite kam kia a panpih mai lou a, thilhih leh nasep a panpihna chiklaipeuh a apetute lak a khat a pangthei gige di'a kisakkholhna hoihtak neih chiat diing ahi.
5. Zuaugen tawpsan a, ih lei (tongue) vengbit a thudik ih kam a pawtsak gige diing ahi.
6. Mahni angmasialna tel het lou a gam-le-nam a di'a kipezou a, theihtawpsuah a panla tawntung thei di'a lungsim a kimanna neih gige diing ahi.
7. Innpi Vaihawmna (Assembly) a Palai diing kiteelna aom chiang a Mipite in pilvang theitawp leh pilsiamtak a lungpi geel a hih diing; Sesum a kizuak het louh diing, kuamah sesum a leitheih di'a om vet louh diing ahi chih michih in bilbah a neih chiat diing kisam ahi.