Zattawm Theih Ziau Eingal Ve..!!
( Nak Eng Phattuam Lua )
Written By: K Lianthansang

Ann nezou phet, kuva hai kawmin nungak hel hun ding ka ngak hi. Kuva hai 'zei' hetlou ka hihman in, ka puan-ak ang ah kuva tui ka bangsak kha nenung hial hi. Ke'n leng, huai puan-ak suah in, adang khat ka silh ngal mai. Kei kia innluah a om ka hihman in, van ka nei thulim het kei. Ann leh meh khawng bang le akhing sen-mun mahmah pawl ka hiphial di. Ka inluahna a miksi tamlua a hihman in, steel kuangte a mehkhing tamlou ka lui deidai pen aboh louhna dingin, a taw kimvel ah 'VASELINE' ka nuh hi.

Thoukang in lah, bilbuk tektek khawng a zaila hon oih uh hun salou a, hon tawp souhsouh hial uhi. Luck dan chituam biik bang ka sa zozen a, thuak haksa leng ka sa mahmah. Pawtna a thoukang in hon keihna thaksa a va kikhuat nilouh ka utlouh ziakin, hon keihna mun-te a 'HALOU (toothpaste)' tamlou ka nuh cheuh leh, athak hong dai pahpah vanglak hi. Halou neih sunsun lah, thildang daih a dia kizang hita. Nungak hel a kuan di, ha san gemgum a va om sangin chi'n, ' CHI, ANKAMTHAU leh MEIHOL' gawivui in ha ka nawt muatmuat a, avak setsot zozen aka!

Ankhing peuh nene chih mahtak, sungkhoh hideuh gige sim in ka om sek hi. Nungak helna mun a, dailen suak a va om nepnup ding ka utlouh man in, ' CHI-TUI leh SIING' ka nekhawm suk ziau a, phatuam mahmah dingin ka gingta. Gil nasim ngeingei a om khak ding venna dan in leng, ' CHI leh PHULUN' ka zial lutsuk miatmiat lel hi. Kipaunuam zomah ahihna ah, gawl khawng taak sesu a, hong natkhak ding venna in, ' CHI SIKKEU KHAT leh TUI NOU KHAT' helkhawm in, gawl peuh ka khuah siang vilvel hi. Huai kia a kisakkhawlna hun di hileh phave! Nak bing kihideuh gige ahihna ah, ' ANKAMTHAU' in ka naak ka zuut zol kilkel hi.
Bangchik kal a ka Jean khekol natan, pen tui ana nuhkha ka laizang diam ah, ana gial belbual zozen hi. Baltin khat ah, 'BAWNGNAWI' tamlou ka koih a, a pentui banna teng diahsa in ka koih hi. Ka puan-ak, kuva tui ka siatkhumkhak pen bel, 'CHAMPRA TUI' nuh zek a, nuaikhiat hiau dingin ka limsiit lai hi. Thousi-thouvai lah leng zulzul maimah. Tuangtung peuh khawng a boh souhsouh ahih man un, 'CHI leh TUI' tokpolh a, inn tuangtung thehkawt mualmual in, nungak hel dingin ka pawtsan hi. Huai in, thou tampi a hawlmang ngei leng ka gingta.

Ka nungak helte ahihleh mihausa mahmah ahi uh. Himahleh, inn a ka thil 'apply' tuamtuam-te hilh leng amau leng kipak mahmah ding uh ahihdan ka haih kei. A fridge sung uh namsia salua uh ahi ngei ding ua, a hahsiang didan tuan theilou in etthoh mai uhi. Ke'n leng awlmohhuai sa in, ' SODA VUI (baking soda)' in asung teng zuut le uh, a gimsia teng bei hiau ding ahihdan ka hilh ngal hi. Ann nehak lawi ahi ua, meh ana huan litlit lai uhi. Bawngsa duaideuh huan uh chu a hingei ding; minhak salua uh ahihdan hon genkhak tak un, ' SINGTANGMAI' helzek dingin ka sawl a, huai a hel uleh, a sahuan uh minpah hi. Aktui pumhuan leng asawm ua, asiat leh siatlouh a thei tuan kei uh. Kei leng kipan nawn in, ' CHITUI' a diah dingin ka sawl a; a kilap leh sia hidia, a tum leh selou hiding ahihdan ka hilh zuingal hi.
Huchih sungin, inteekpa'n a car limlang ua niin bangte hahkhiat sawmin, ' SEKTHUK TUI A NEWSPAPER' diahkawt in nuul zauzau a, siangpah duamduam zozen hi. Window glass telawi leng, huaite mah in nuul lehang, a gial belbual-te khawng kepah zungzung dingin ka gingta. Tui in vazut lehang lah, akeu chianga gial semsem maimah dia! Huailou in, anaupa uh, naupang lai chih mahtak, a puan ah 'chewing gum' ana bangsak laizang hi. Sahbon in sawp lehang a kepah khol kei ding. Himahleh, 'AKTUI SUNG-NGOU' nuh in, nuaikhepah zungzung ua; hiai tungtang ah sahbon in panna a nei kei.

Ann nehak lua ahihman un, sang (bread) duh in naupangpa hong kiphin man hi. Leikholhsa nei mahle uh, avek in pekhe nuamlou ua; gas a ' TEMTA HAISA' masa in, neen zengzung louhial in hon atkhe hiau zel uhi. Thilteng zaw, a hih didan ana omvek sam ahihdan ka musuah zungzung hial. Huai nungin, a form khedap lui asak luat ziakin hong kiphin nawn leuleu hi. Savun khedap ahihman in, athak bangbang suahsak nawn a haksa het kei. A theihlouh kal in, 'ALLU PUM' in ka zuut sak ua, athak bangmai in om siksek lel hi. Hiai telawi I theih thakthak leh - zattawm theih ziau ngal inchin; nak eng phattuam lua!

Ann a nekzoh un, midang le hong lengla ua; nungak khat, mi 5 hiam in ka helkhawm neinai uhi. Ka nungak helnu un, a mai maam di deih ahihdan hon gen takin, khat in ' CHAMPRA HAWNGKEU GAWIVUI LEH BAWNGNAWI HELKHAWM' nuh dingin sawl hi. Tuadan ana nuhkha pah hileh bel, a mai maam tuam mahmah ding a, aheel leng tamtuan mahmah dingin ka gingta sawnsawn. Huailou in leng, ' AKTUINGOU NUH MASAK DI, AZOH ACHIIK NUHNAWN A, AKEU CHIANG A TUILUM A SILKHIAT' leng mai mamna dia hoih mahmah ahi hi. Banah, I chipum khawng anou ngiingei di I deih leh bel, ' TANGMAI' a zuut hoih hidan a gen leng om uhi. Hiai teng kia zuizou lehang leng, 'beauty parlour' khawng a valut a, sum tampi va butkhiat sangin leng a kiman zawtham lai ding ee!

Laigelhtu' Lungsung Pan:
Hiai tangthu paidan phuahtawm siang sitset ahi. Phuahtawm himahleh, a paidan hoihtak in thei chai dimdem lehang, sum senluat ngailou in thil tuamtuam baihlam takin kipal galkai thei ding hi. Hiai thugelh sung ah, thil zattawm theih ngal leh phatuam mahmah 20 khawng kigenkha hi. Hoihtak a chiamteh in, ahun leh amun zil in zangthei lehang, nak eng phattuam law mahmah di ahi.
2002 – Ka Kipak – 2016