Papa! Pang Teitei Mai Ve Maw ?
( Thudik Pansan A Kigelh )
Written By: K Lianthansang

Chiang tak in gensuk pah mai ni. Kou unau Pasal 2 ka hi ua, kei a lianpen ka hi. Ka nau ahihleh, kum 20 ahih in sappau – Overdose in a sikhinta!. Ka neulai un, ka pa sepaih pang a; ka nu toh mi' inn-kil khat luah in ka khawsa likliak uhi. Ka pa sepaih a panna lam a sawt pipi va om sek ahihman in, ka nu'n tangval dang khawng ana sai san thepthup hi. Ka nu lah naupang lai thou ahih chiang a, achang a hon pawt sansan mai. Akhenchiang a lah, ka pute' inn khawng a hon giaksak thepthup; inn a amah, kuakua toh ana giak zel adiam ah. Ka pa'n haksatak in a sepaih panna ah sum va loh keuhkeuh mai a, ka nu'n tui zat in ana zangbei sek hihtuak hi. Banah, ka pa'n a training lai ua 'Training Center' a neih bangbang in, ka nu leng pasal tampi-te a dia a 'Training Center' neihsun uh hiding in ka gingta tinten.

Nuamsa takin hinkhua ka zang tou ua, lawm-le-vual toh leng ka pawtkhe mun mahmah uhi. Ka pawtlouh sunsun chiang un leng, ka nu'n pawt dingin hon sawl sek a; ka naupa toh kholak ka kizul nalnal sek uhi. Pathianni chiang bangin, ka inn uah 'carom' kimawl adim in hong om sek ua, achang in sa khawng lei in ka nekhawm nainai uhi. Himahleh, huai carom board leh sa ka nekte uh koi a kipan a chih ka ngaihtuah sese kei. Ka nau in leng ngaihtuah dingin ka gingta kei. Achang in, ka lenglate' uh ZU bang, ka nau in ana dawnsak thei thepthup zel hi. Ke'n bel, huailamte lungsim ah ka koihkha kei vanglak.

Ka khawsakdan uh, ka pa'n a theih chiangin, pawna lua a hiding a, phone tungtawn in nitak khat ka nu houpih hi. Huai nitak in hong kisel ua, ka om alemthei het kei a; ka ihmutlouh loh hial. Suun-le-zaan chih omlou a, innsung a ka lenglate uh om uh a hipen mai. Ka lupna room lam uah leng a maingal mahmah ua, akhamsia khenkhat toh lupna khat a ka giahkhawm hun uh leng a tam mahmah. Kum 9 lak khawng hipan ka hihman in, thil ka theisiam taktak nai kei a; kuva lei di khawng a hon sawl ua, cheng 1 khawng hon piak chiang bang un ka kipak zawsop uhi.

Hunte hong pailiam zel in, ka pa' sih thu lawibang hong thang mawk hi. Huai hun in kum 16 vel ka hi a, ka pa ka it mahmah. Kum khat a 1vei suty hong paizel ahihman in, ka thawmhau mahmah hi. Ka pa bel, a duty na mun a, a thau tawilai a amah-leh-amah kikaplum ahi hi. Inn lam ah hon pua ua, khelahtak in ka vuiliam uhi. Amak mahmah ahihleh, ka pa' omlouh hun in, ka nu' mittui malkhat leng ka mu kei. Mittui neilou hial dingin bel ka gingta sam kei. Hong gaal di bang atam mahmah ua, a khawnung a hong siatvat ding pasal hon bang tamdiak abang!

Ka pa' sihnung in, tangval upa mahmah khat ka inn uah hong lengla den hi. Amah ahihleh, nidang a ka muh ngei a hikei. Bangalore lam a nasem a kiloh a om, ka nu toh facebook tungtawn a kitheikha ua, Lamka hong pai apan kou inn hong zual mahmah ahihdan tan ka thei lel hi. Ka nu'n, bang ana pekha a hong hichi zual tel adiam chih bel ka thei kei. A sepna lam a zinnawn di bang kikhelsak hial in, ka inn uah hong maingal hiaihiai hi. Huchih kawmkawm in, Shaktiman driver khawng a pang in, sum loh a; a hun tamzaw ah ka inn uh hong tung khial ngei kei.

Huchi vengvung kal ah, Class – X bang ka na passed sam hi. Ka nau bel School a khamtheih toh a kimat ziakin, school kai tawp liuleu a; a lungkimna bang takin niteng hunte zangzel hi. Kou inn a teng ka kisak leh, ka nu'n, ka inn-muh uleh inn tanpha ana zuak ahihdan ka khawnung theih a, lunggimna ngen in ka pumdimta hi. Huai apan in, ke'n leng thilsual hih k'on pan a, mi toh kisual chih khawng ka 'hobby' a hisim mai di e. Ka lungkimlouhna bang hiam omleh, kisualpih di zong a vialvak ka himai a; ka lungsim le a paikawi gawp hial. Ka nu'n lah tangval sai, kei lah hichi mai, ka nau lah khamtheih a hihlouh chiang a 'normal life' zanglou toh kibang ta.

Ka nau' sihnung kum khat zoh in, ka nute hong kiteng uhi. Huai hunvel mah in, ka inn neite un hon hawlkhia ua, ka nuta ua mouthak chu ka himai uh. Ka pa-thak pen in, inn hon luahpih a, ka nu' vaihawmna nuai ah ka khawsa uhi. Ka nu a thunei mahmah mai a, mouthak leng ka bang kei uh. Ka pa'n leng, nna dang sep hon pan a, kei College hon kaizom sak hi. Ka nu'n bel, inn ah siam-khawl in siam gaan zel a, sum tamlou a muhte a utna lamlam ah zang ziahziah lel hi. Ka pa, mi salian a hihet kei a, ka nu' sangin leng a neuzaw tham hi. Ka pianna pa a hihlouh ziak mah in, a thu ka mang ngei khol kei. A thu zuihtak leh laktaak in le ka koih kei. Huchi bang mah in, ka nu'n leng thuzoh mahmah mai a, achang a a kiselkhak chiang bang un, innkong peuh a giaksak thepthup hi.

Inn luah a khawsa a, niteng nektawm zong himah le ung, State dang a laisim ka lunggulh a; ka pa' kiang ah ka kiphin hi. Ka nu'n leng hon nungthuap ngal mai a, State dang ah ka omkhiatsan hi. Huai nungin, ka innvengte uh tungtawn in ka nu-le-pa' dinmun ka theizui zelzel hi. Nikhat, ka inngei ua teng nuthawi khat in, whatsapp tungtawn in " Na pa hehpihhuai lawtel. Sum a lohkhiat sunsun na nu'n ngen vek zel. Akim a apiak louh chiang banga tawpek zialzial, amai khawng peuh bang phuaikeh sak sek. A kinak ging uh le kizaning dekdek ahi. Na nu thuhilh thei lechin chu...." Chi'n, hon awlmohna thu hon gen hi. Himahleh, ka ngaihsak ngei kei. Ngaihsak dingin leng ka koih kei.

Hun bangtan hiam nungin, sepna kichiantak ka mu a, ka nu leh pa' kiang ah sum ka thon sek hi. Ka sum thonte ahihleh, ka nu'n ama' khutsung ah ana huailut vek zel in, a zongsat sa – zu-le-sa a kibualna dingin ana zang sek hi. Nikhat, ka pa'n hon phone a, " Bawi, na nu damlou – gimlua ahi. Sum tamlou n'on khak mai diam?" hon chi khialkhial zawzen hi. Ke'n leng, aw khauhdeuh mai in, " Hon enkol zou dia kigingta a, ka nuta ua luah a n'on luahthoh zozen hilou ka hi umaw? Ka nu damlou ahihleh, sum ana kizon mai in aw. Hon khak leng le, ka nu' khut ah sum a lutkha tuankei dia, a hoih kei di.." chi'n ka dawng liuhleuh hi. Ka pa thak pen, 'Pa' chi a ka saplam ka thei kei. Ka pianna nu' thulaklouh tuh ke'n leng thulak luat dingin ka koih kei.

Zaan bangzah hiam, ihmulou hial a ana ki-etkol nung un, ka nu'n hon omlouhsan ahihdan ka thei hi. Ka pawna mahmah mai a, thuaksiam leng haksa ka sa!. Ka nu' luang laplou di thouthou chi'n, ka kinoh law kei a, ni 3 nungin inn ka tungpan hi. Inn ka tun in, ka tanaute uh bangzah hiam innsung ah ana om ua; huai lak ah Pastorpa leng a om hi. Ka pa'n hon gen masakpen ahihleh, " Bawi, na nu lungngaih het ken aw! Ama'n a sihma a, Jesu hondampa dia sang ahi....kei leng ka tha chau lua ahihman in sawt k'on dampih nawn kei ding..." chihteng lel honna gen hi. Ka lungsim a na mahmah mai a, " Pa, nidang in ka nuta un honna simmoh lawkha mahle ung, tu'n bel nuamtak in na omta ding. Tuni apan in 'Pa' chi'n k'on samden ta di aw Pa.." chi'n ka ngawngkawi a, ka kap huphup mai hi.

Sawtlou nungin, Pastorpa'n hon houpih a, lungnuam taka om dingin hon thuhilh hi. Ka pa ahihleh, a tha chaulua ahihman in, bench tungah lumsuk mai a; liing keuhkeuh kawmin a mittuite nulzel hi. Ka innkuan ua akimkhat hial si himahle ung, a omlai tegel ki-it taka ka omtheihna ding un, Pastorpa'n thumna hon neihsak hi. Thumna neihzoh phet a dingtou in, Pastorpa chibai ka buuk ngal a, kipahthu ka gen hi. Ka pa'n leng Pastorpa chibai buuk leh, chisim a, " Pa..." chi a sam kawm a ka etsuk leh, ka pa ana tang nawn himhim kei. Kintak in ka ngawng kawi a, sawi kawmin " Pa, Pa ei..bang chi e! Kei k'ong tun leh nalung nuamlua a ihmukha zozen maw Pa? " ka chih hang in hon dawng himhim kei.

Ka kiim a om teng in leng hong uum kimvel uh hidan in ka thei. Ke'n bel, ka pa phawnhalh sawmin ka hihtheih tawp ka suah a, thildang himhim ngaihtuah lou in, " Pa, kei hon ngak nabang hial a. Na kiang a om kei ve papa. Pa hon chinuam gigeta di keive papa..hong thou bek in la, khatvei bek 'bawi' chi'n hon sam lai ve " ka chih leh, a mit hong hak kiau zozen a, akhut hon khak siamsiam hi. Ke'n leng akhut ah ka lenpah a, midangte'n leng hihtheihdan chiat suah in, ka pa' hinna humbit sawm uhi. Ka pa' kiang ah, " Papa! Haksa leh leng, pang teitei mai ve maw?" ka chih hang in, tha nengchik leng laak a sawm tuan kei. Ka bawl gentheihdan ngaihtuah in, khitui naptui toh ka pumdim hi. Lametna ka neih lailai man in, Ambulance ka sam ua; kintak in Lamka damdawi inn 'Casualty' ah ka pawlut ngal uhi. Huai muna Doctor leh nurse te'n a hihtheih tawp uh suah mahle uh, ka it mahmah ka pa hinna humbit zoh a hinawn kei. Kisiik in kapkap mahleng, lei chihlouh sikkhak ding ka nei kei. Ka pa' kivuini in, a haan tung ah, " Ana haisawt hina maizen ing e maw Pa! " chi'n, kahtam lou in khitui-naptui toh ka pumdim hi. Hun mualliamsate ngaihtuah in, kisiik in kapkap mahleng, thilteng kikheel a hita!

Laigelhtu' Lungsung Pan:
Hiai tangthu ahihleh, thudik pansan a kigelh ahi. Nu-le-pate bang chituk in mawl in, omse mahle uh leng I paihtheih vual hilou ahihman in, nu-le-pa neilai te'n hiai tungtawn in zillai la lehang chih ka deih mahmah. Thil a kikhel nungin, kisiik in kapkap lehang leng bangmah a phatuam nawn kei ding. Huai ziakin, a hunlai in kingaihtuah in, pil sawmta ni.
2002 – Ka Kipak – 2016