Ka Pa' Laithon In 'Suicide' Apan Hon Hunkhia..!!
( Anti-Suicide Bill )
Written By: K Lianthansang

Ka nu' omlouh nungin, ka pa leh ka naute mi 2 toh ka khawsa likliak uhi. U-le-nau, tanau-laina hau ka hihlouh man un, tanau leh lainattu di hau – ka lawmte bang ka engthei mahmah hi. Deih a ka teel leng hisam lou; ka tung ua thiltung ka theisiam kei. Ka naute lah neulai lua uh ahihman in, ka pa' lunggimna theihpihtu, kou innkuan sunga kei kia ka himai. Ka pa'n bel, a lungimna hon gen ngei kei a, lungkham mel pukawm in leng ka kiang uah a om nuam kei. Nikhat, ka nu' hon paisan ziak ka dot leh, " Bawi, na nu'n ei sanga ngaihzawk a neih ziak ahi. Ei hon ngaihzawk hunhun chiang a, ei kianga hong pai dia, nuam taka omkhawm nawn di ihi uh..." chi'n hon dawng lel hi.

Christmas hunte khawng hong tung a – mi, a nute utoh Biakinn lam zuan a, inkuan-kuan a lim khawng kila ka muh chiangin, ka khasiattha a suak mai hi. Kumthak hong hi a, ka nu' anhuansa ne a, School kai ka utut maizen toh! Ka pa'n lah Auto a heklouh theihlouh ahihna ah, naupang chik a inn nupi' kizil ka himai hi. Ka lungsim in, ' Ka nu'n hon ngailou taktak mah adia aw? Ama' sunga piang hi taktak lou ka hi uh hia leh? Tua ka omdan uh hon mukha bek hileh, hehpihna neuchik bek toh hon en sam dia aw..' chih khawng ka ngaihtuah nilouh hi.

Pathianni zingkal khat, mit san niilneel kawmin ka thoukhia hi. Ka pa'n, News sim kawmin tuilum ana dawn hi. Ihmulou zen a zankhua a kingiahtuah a ka kahkhiat hun leng om mahleh, ka pa'n bel hon thei kei. Ahi'a, ka kiang a lum biimbeem, ka naute' hon theih di leng ka phal kei. Aguuk a kidiik a, zankhua a kap chu ka himai hi. Mai phiat khin in, tuilum ka dawn tei a, ka pa' kiang ah ka va tu hi. Bangtan hiam nungin, " Pa, ka lungkham lua...ka lawmte'n le 'tagah' chi a hon koukou uh. School le ka kainuam nawn kei – Zumhuailua..." ka chihleh, " Bawi, Gas ah I mehbel uh kimchiang pha in tui va suang in la, hong pai nawn in aw.." chi'n hon dawng daih hi. Lamdang sasim mahleng, ka pa' hon chih dandan in ka hih a, akiang ah ka paikik nawn pah hi.

Ka pa'n, News sim dingin honna sawl a, ke'n leng thumang takin ka sim hi. Huai sungin, ka pa'n mehhuan di khawng ana ngaihtuah hi. Sawtlou nungin, hon sam a, ka vapai leh – mehbel sungah 'coffe' ana helsuk( khasuk) hi. Ka kiang ah, " Hiai Aktui (egg) pum leh Allu (potato) pum silsiang in la'n, hon khakhawm mai in aw.." hon chi hi. Ka theisiam kei. Mehhuan dia kisa a, Coffe tui laka Aktui leh Allu pum ka khakkhawm mawk pen uh mak ka sa mahmah. Himahleh, bangmah genlou in, ka pa' hon sawl dandan in ka gamtang zomzel hi. Akiang ah ka tukawm a, lai ka simkawm in, ka thil huante uh a min ding ka ngak hi.

Hun bangtan hiam nungin, ka pa'n, " I thil huante ana lepkhia ( suakkhia ) inla, kuang khat ah ana koih in.." hon chi a, ke'n leng ka pa' hon chih bangin ka hih ngal mai hi. Ka kiang ah hong pai a, " Bawi, hiai Allu pum khoih lechin, a nip mahmah ding. I huanma in bel a taak mahmah mai a, mawk mai a mekkhap zoh di hilou ahi. Tua, I huanmin zoh nung in bel, a nip mahmah mai a, nektheih mai ding a omta ahi. Banah, hiai Aktui, a hawng(shell) khok (lakhia) leng, asung lam pen tui (liquid) maimai hinawnlou ahihdan na mu ding. I huan ma in bel, Aktui sung ah tuisik vuak a om a, tu'n bel a khal ( solid) om in, dop (care) luat leng ngai nawnlou in, kikhoih theita hi. Huai kia leng a hikei. I huanna tui dawn lechin, Coffe tui asuak ding a, Aktui gim a nam ka gingta kei. Tuivuak a omlai, Coffe I khak ziaka Coffe gim namsuak vek a – coffe tui suak mai ahi. Coffe in, a omna mun min khekzou hithet chihna ahi " chi'n hon gen hi.

Ka pa' thilgen ka theisiam kei. Akiang ah, " Pa, bang na gennopna a...?" ka chihleh, " Bawi, hiai - Allu, Aktui leh Coffe in a maituah uh kibang vek ahi. Huai ahihleh, belsung a kikoih - tui (water) ahi. Huai nungin, tuisou bulhbulh hon maituah khawm nawn uhi. Tuisou lak a hong omkhawm chiang un, Allu pen in a taakna(hardness) mansuah in, nip pah delhdulh ngal hi. Aktui bel, ama in a hawng pan mahmah in atuam a, huai hihsiat khak ding a lauhhuai mahmah. Tu'n bel, tuisou a maituah a, a sunglam a taak mahmah ta hi. Banah, Coffe in leng a hihtheihna suah in, tuisiang kilkel pen 'Coffe tui' suahzou hithet mawk hi. Bawi, nang hiai tengthum lak a bangpen na hi hiam, ana kingaihtuah in..." hon chi a, ka lungsim hong halh huai zozen hi. Haksatna leh lungkhamna banghiam I tuah chiang a leng, Aktui banga taak phet hilou a, Coffe banga ei leh midangte' hinkhua khek lumlet zoh ding ana hingut hi. Huaini apan in, haksatna leng I tuah ding phal gige ( Pathian' theihlouh a thiltung omlou ahihna ah) – Pathian' kiang belh zawk semna a zang dingin hanlung ka chiamta hi.
Hunte hong pailiam zel a, ka naute leng hong lian mahmah ta uhi. Taksa lam ah bel, kei sangin a lianzaw tuak ua, nasep leh thil bangkim ah hon panpih zou mahmah uhi. Ka 'Auto' uh lah segawp ahihman in, ka zuak uh. Kou kia leng inn a om a, khawsathei ka hihtak man un, ka pa'n mundang khawng ah nasem in hon giahsan zel hi. Achang a kingaihtuah louh theih a hikei. Nu-le-pa dinmun a ding bangin ka kingai a, ka naute ka etkol zohlouh ding kia ka lau. Ka hihtheih tawp ka suah zel a, gintak sangin ka naute'n leng hon zah (thuman) mahmah uhi. College khawng ka kai tanpha in leng, lawmte apan in simmohna leh pampaihna ka maituah den a, ka kingaihsiat vungvung hun tam mahleh, ka pa' hon hilhna ka phawkthak zel ziakin ka lung anuam kik zel hi.

Ka pa lah, kha 1 khawng gamgiak hita. Phone chihte khawng lah kinei nai vetlou ahihman in, Lamka hong phazel a lawmte' tungtawn khawng in, dam a omzel ahihdan hon hilh zel hi. Siamsinna lam a sum senna sanglua ahihman in, fee chikim ka ba keihkuih gige uhi. Achang in kiloh in ka kuan a, College ka kai man ngei kei. Leave letter va gelh a, kailouh ziak – 'Nasem ( kiloh)' chih di lah, kuate hiam nuihsan a ki-om di chih ziakin, ka kailouh ziak a fee (fine) om khempeuh leng ka pesiang tawmtawm hi. Exam form fill-up hong hun guih a, fill-up theih hunsung leng kipia hi. Huai hunsung in saifel kei leng, 'fine' omzel ahihna ah, sum loh ka kisaan mahmah angai zel hi. Ka naute lah, hoihtak a akai uh ka deih ziakin, kiloh dingin ka sawl ngei kei. Sum kidaih chih a om ngei kei. Ka pa' nasepna lah, a sepzoh chiang ua 'Bill' bawlpan di chih hizomah. Sum batlakna di zongdek leng lah, ka zonna di ka thei zoukei zel.

Zingkal khat, ka kingaihtuah den a, suun chianga kei-le-kei kithat mai dingin thupukna ka la hi. Ann khawng ka ne ua, ann nekawm in ka naute kiang ah, " Lai hoihtak in n'ong sim di ua, tunung chiang a kuamah simmoh theihlouh ding a om na sawm ding uh ahi.." chih khawng gen in, ka thuhilh tawpna le hidi chi'n, thil tuamtuam ka genpih hi. Ann nezou, School kai dia a kuanzoh nung uh sawtlou in mi khat hong hoh a, laithon (letter) hong pia hi. A laithon bawm tunga kigelh apan in, ka pa 'khutgelh – handwriting' ahihdan ka man ngal a, ka halh huai zozen hi. Ke'n leng, laithon hong pepa' paizoh in, ka phel ngal hi. Huai laithon ah thu kigelhte a tangpi k'on taklang ding.

To,
Lungngaih Gige Ka Tate,
Dam a na om ngei uh ka gingta a; kei leng Pathian' venna ziakin ka dam lel hi. Sum-le-pai zontheih dandan a nana zonlouh ngal uh a didan dang om tuanlou phot ahi. Batlaak di chih lah, k'on kawmuhna di le ka thei tuankei. Himahleh, I taksap hon theihpih gige – Toupa muang in, ama khut ah kikemsak peuhmah lehang, neek ngawl hial a hon koihlou di ahi. Sunday School khawng bang le, hoihtak in nana kai di uh aw...

Kou leng, khanawn khawng in ka lampi sialna(bawlna) uh a tawnsuak in ka zouta ding uh. Na kingaihsiat khak ding uh ka lauh ziak a hiai lai hon khak ka hizaw. Na theih ding ua ka deih gige, ka lampi bawlna mun ua ka ngaihtuah khiat k'on gen di. Lampi ka bawlna uh tang zenzon hetlou ahi. Lampi kawina a tam mahmah mai a, achang in 'U' turn bang leng om zomah hi. Hiai k'on genna ziak ahihleh – I hinkhua uah, lampi tawn bangbang ihi ua, a haksat hun leng omzel dia, a nop mahmah hun leng om di ahihdan ka gennopna ziak ahi. Huai lampi kawina munte a gari a tai chiangin, 'cut kawi' kei mawkleh, lampi apan tai khe ding a, 'accident' maimah di ahi. Huai mahbang in, haksatna I tuah hun leng a om dia, I haksatna tuahte a hibang bang a phuttouh a, phut galkai mai di ahi. Huai phu galkai peihlou in, hinkhua beisak sawm pah mawk lehang, hoih hetlou di ahi aw, Bawite.
Ka tawpna pen dingin, thil khat k'on genbeh utlai. Kawkhuk thuuk sim mahmah khat ah bawngpi khat kesuk kha a, lakkhiat zoh ding vual a hikei. Bawng neitu in leng a hihtheih tawp suah mahleh, 'upai' omlou hi. A bawng thah a, a sa neek di chih lah, a kisiamtan theikei. Atawpin, tupi leh suahdul a la a, abawng hingvui suk a, huaimun a haan kilawmtak bawlsak mai dingin thupuuk hi. Mittui kawi zoihzoih kawmin, kawkuak sung ah lei a pailut zungzung hi. Huai hun in, lei (soil) in bawng vukkha sek mahleh, a bawng in a leite ana singkhe ( shake off) zel in, a lei tungah ana kalsang tou zel hi. Lei a kivuk tam deuhdeuh leh, a bawng pen sangtou deuhdeuh a, atawp in suakta maimah hi. Huai ziakin, haksatna na tung ua hong tung nikhua in, thuakthei leh dohzou tak a doh kawmin, ana singkhe zel ( thuak mualsuah zel) un la; huai buaina leh haksatnate tung a dintouh ana sawm zel un aw ( huaite tungtawn a zillai ana la in, thathak kiguan zaw un aw). Lungkiat ngeilouh di ahi. Lungkia leh kingaisia a na om hun chiang un - Sam 37: 5; 55: 22 leh 27: 13-14 ana sim zelzel un aw, Bawite! Hiai teng in hunsak phot ni.

Laikhaktu,
Noute Adia Hing Gige - Papa.

Hiai laithon ka sim apan in, ka ngaihtuahna hong kidang zot zozen hi. Kithah chih khawng ka ngaihtuah ngam nawn kei. Haihuai abangta. Bible la in, Sam 37: 5; 55: 22 leh 27: 13-14 ka sim ngal hi. Hiai Laisingthou ka simna apan in - omdan ding leh puakgikte Toupa' tunga nga a; Toupa' zia ngak kisin ding ahihdan ka musuah hi. Huai ziakin, ' Ka Pa' Laithon In 'Suicide' Apan Hon Hunkhia..!!' chilou thei ka hikei. Kithah ka sawm nikhua a, hon thuneihkhum zel ding a kigelh - Dan ( Anti-Suicide Bill ) khat bangin, ka pa' hon laithon khak ka ngaihsunta hi.

Laigelhtu' Lungsung Pan:
Hiai thugelh phuahtawm pumlum ahi. Phuahtawm himahleh, a 'moral' lam I en zaw ding ua; kingaihsiat ziak khawng a mahni-le-mahni kithat ( Suicide) chihte I chiing nawn mahmah kei ding uh aw.
2402 – Ka Kipak – 2016