HUN VEILOU ITNA!
( RealLife Story)
Written By: K Lianthansang

Kumthak nitak, phalbi mei-kai thiithiai-te electric light in asalha, kumthak kipahna husa gingte'n ka lunglenna hon kaithou zel hi. Kimboi toh ka kingaih lai ua hun ka zatkhawmnate uh phet hilou in, sepaih ka panlai a; phalbi khovot nuai a class neihlai natawm a ka lunglen vungvung lai khawngsilhpuanbang ka lungsim ah hong thaksak hi. Ka lunglen khitkhiatna dingin," Vachih inzong saanmun muange, sanggah kei zaw belhding neilou. Siansiam' tangbangkadam ding a, paallai khaubang vaalsam kei ning.Nihgel itna hunvei zoulou,tun leh zua te'n palbang honnang.Singdang' tanding ka thanpih se, sumbang tuahma'n gibang kikhen..." chih lavui-te sa kawmkawm in, khitui in ka mel, lawmlou takin hon tuam hi.Ka lungsim in, 'Kim aw...ka itna nang a dia hunlou hiam? K'on iit maizen zen toh,hichi a n'on lungkhamsak tel. Khenlou dingleh gin-om ding a tong I chiamsate, koi a om uhiam? Kathuak, kei ding in zalmang hileh chi'ng e! Na tongdam nem lel maw ka tantawk...' chi'n, thil omdan theihsiamlouhna leh khasiatna in hon tuam hi.Kimboi bel houpih butlouh a aom tak ziakin " tell me the meaning of your silence" chi'n kahtam ka lounilouh hi.

Kimboi in tongchiamhon pelhsan nung kumnih phial bangpaitamahlehkei adi'n mangngilh vual a hikei. Hun-le-nite pailiam zungzung mahleh, khenlou ding a tongchiam ka neihlai khawng uh ka ngaihtuah kik chiangin, ka luankhi'n tuibang hon tuum zel hi. Kumsang kivei zongleh, ka Itna a bei ngei kei ding. Kimboi ka itluat ziakin, hun-le-ni liamzel te'n leng ka itna a liammangpih thei sam kei uhi. Mi kingaihtuah leh lungleng pahpah ka hih ziakin, ka thiltuah puak haksa ka sa a, puaksiam theih ngei dingin leng ka koih kei!!

Ka unau pasal teng lak a naupang pen himah leng, insunga di'n khuam poimoh mahmah ka hi veve. Ka nu-le-pate leng teek mahmahta uh ahihman in, a khasiatna vungvung ding ua om ka sawm ngei kei a, a hithei tanin ka duat mahmah hi. Huchibang khawng a ka omlai in, pu-le-pa' khang apan ankhing-tuibuk ka kikawmpih uh, siatni-phatni a kitaisanthei vual leng hilou ka hihdan uh nupi khat in hon genkawm in, a tanu' a ding a hon deihsakdan thute hon genkha hi.A tanu' min ahihleh, Kimboi ahi hi. Huai nungin, a inn uah ka va hohkha a, Kimboi in," U Mang, k'on miss lua. Tulai na kisaktheihdan..." khawng honna chih chiangin, ka lungsim hon luahdim pah mai a, azan ka ihmuthei kei dek hial. Ka ihmut sunsun tak in, ka manglam ah Kimboi toh ka na kiteng dek zomah ua, ka lungsim a hi heuhau hial. Ka kiteng louh ziak uh ahihleh, Kimboi in " U Mang, sepna khawng hon nei phot in la, huaizoh chiangin kiteng ni...." hon chih ziak lel ahi. Huchilou himaizen leh, ka manglam a leng ana kiteng ngal didan ka bang hial uhi.Huai nung, ka lungsim sungah Kimboi a kualden ta.
Exam theih tuamtuam khawng exam in, ka hunte ka zang zel hi. Nikhat, Shillong a om ka tanaute khat toh ka kihoukhakna uah," Shillong a College n'ong kailai a na nungak hoihsaknu kha, tangval a utpeuh in a sawktheih uh ana hidan ahi. Na kingaih khaklouh uh hampha mahmah neive" hon chi hi.Huai hun apan in, Kimboi ka lungsim ah hong omngal a, ka nungak hoihsaknu bangmai a a ut peuhmah in a sawkkhak ding uh kalau mahmah hi. Dai kaihtheih dandan a kaih ngal a, bittak leh siangthoutak a kep ding ka lungsim sung ah ka ngaihtuah ngal mai. Huchi'n, a inn ua vahoh a, a nu' kiang a hoihtak a va gen di'n ka kisakheta hi. Anu'n bel, kei adia deihlua a hihman in, " Ei' tate khawng na deihtak un...." Chi'n, ana heem(indirect) pau a, ka kipak gu mahmah. Kimboi bel, kei adan a ka koihtak ziakin, a paallutlai a midang in a boh ding uh leng ka phalthei himhim kei. Ka angsung a omsak det ka ut mai!!

Kimboi ahihleh,Lamka ah a pute'n aneu apan ompih den ua; college leng Lamka mah ah kai hi. Sinlai nungaknou,mi tuangang lawlou himahleh fel mahmah mai hi.Mi nun-neemtak leh ngaihbaang theitak ahi zomah.Apute'n ta a neihlouh ziak ua aneu apan in kemden uh ahihman in, a pute suun in kamsiam mahmah lai hi.Kimboi nu-le-pa' kianga, zi dinga Kimboi deih leh ngaknuam ka hihdan ka gen apan in, ka genna maban sunzom leh zeemhoih dingin hong kipan ua, Kimboi' kiang ah honna genpih zelzel uhi.Apa ngial in, a sepna mun lam apan in Kimboi houpih a, midang en leh lunggulh lou himhim dingin theisak hial hi. Huai apan in ka kal uah Itna grape gui hongsel kiukiau a, nuam ka sa mahmah uhi. Nu-le-pa' thaunilhsa a kingai ka hihman un, ka lungsim anuam mahmah.

Kei bel, Kimboi nu-le-pa toh ka omna uh kibang ahi a; Kimboi toh bel ka kal uah mual zatam kikhung hi. Phone a neihlouh ziakin, ka kihoukha mengmeng kei uh. Himahleh, Kimboi' nu'n ka kihoutheih didan uh lampi hon ngaihtuahsak zel a, a inn ua ka va hohkhak chiang in a tanunu phone zel a, huaikhit chiangin kei toh hon kihousak zel hi.Nitaklam khat ka vahoh leh, honna kihoupih sak guih hi. Nidang in Kimboi toh kihoukha zelzel mahle ung, huai ni chiah in zaw ka awsuak hong tuam a, normal takin leng ka omthei kei; dip kisaai ditdit kawmin ka kihou uhi. Ka kihou kimlai un," Kim, k'on ngailua.." ka chihguih mawk leh, zumlua a hingei dinga, " Tomato ka bang, U Mang.."chi'n hon dawng guih a, mak ka sa mahmah; ama'n leng huai a genlam a thei kei. A nute kiang a ka vanget ziak khawng hon dong a, nuam ka sa mahmah uhi. Kimuhtuah a, kithuah khawm ka utdan khawng uh ka gen ua, sum bei ziahziah ahihlam leng phawklou zen in ka kihoukha thepthup uhi.

Hunte hongpai zel in, laithon khawng ka kikhak ua, pek (page) tampipi ka gelhdim metmot zel uhi.Exam ka piakna khat ah ka ching a, training dingin bel hon sam naikei uhi. Kimboi nu'n, " Khatvei bek innlam va pai in la'n, Kimboi toh va kineel ve ua..." hon chi a, ke'n leng training a hon sap ma un, chi'n sum zongtawm in Lamka ka paisawm ngal hi. Maban a ka sung' dite' inn bang ah ka giak a, amau leng a makpa ding ua hon deih uh ahih man un, kamsiam taktak in hon houpih uhi. Ka paidek ni bangin, Airport tan hong kha uhi. Kimboi pa'n, " Ngaihnoute' meel mudi chuh, nuam nasa kei dia maw..." chih bangin hon chiamnuih hauh zomah hi. Ka lungsim anuam ngei mai!! Tun-le-zua' hallouh nihgel itna naknop hina maizen e!! Airport ka tuntak un, " Painuam...Damtakin aw...." hon chi ua, Airport sung ah ka lutsanta.

Buaina bangmah omlou in, Imphal Airport ka tung a, ka manglam abang hial. Nidang a ka pai toh leng a kibang himhim kei a, kipahna ngen in ka pumdim hi. Kimboi ka muh utna lian deuhdeuh a, inn tunkal bang ka ngaklah mahmah hi. Ka kimuh chiang ua ka om didan leh ka gen di khawng bang ka ngaihtuah kha nilouh hi. Ka ngaihnou' mel mudia ka pailai in, Zouhuihkhi siang diik a, Zousiktui vot dikdek dawn mah ka bang hial a, lampi phok nemnom teng bang a maam bangmai in ka thei hial. Inn tun a, ka ngaihnou mel kilawmtakte ka muh kan a ka kipah lam ka theikha nai kei. Hun tomchik sung zangkhawm dinga pai ka hih mahbang in, ka hunneih teng ama' adingin ka lankhia hi. A nini in a mel kilawm ka sa deuhdeuh mai a, kei alou dingin ka phal kei. Nekding huankhawm, tui tawikhawm leh ka sep lamlam uh bang ka semkhawm den uhi.

Nikhat,insung a kingai ngehngah kawm tuak a sapla, ABBA-te' sak "hasta manana till we meet again, don't know where, don't know when, Darling our love was much too strong to die. We'll find a way to face a new tomorrow. Hasta manana, say we'll meet again I can't do without you" chih la ngai a, ka lu uh kisutuah ngehngaha ka om laitak un,Kimboi'pu'n thakhat in hon tuakkha guih a, ka zum ngei mai.Kim bangin " forever and for always" chih sapla nalhsa petmah a, ana ngaizel dingin hon ngen hial hi. Nuam ka sakluat ziak in, hun(time) bang paikin hileh kilawm ka sa hial hi. Ka mang khawng bang uh ka genkhawm ua – ka manglam uh adangkhat ah Kimboi' pa'n honna kitengsak tuak ahihdan ka kigentuah tak un lamdang leh mak ka sa mahmah uhi.

Hun in ngak neilou ahihman in, ka paini ding a naita. Ka paidek nitak in ka ki-aam mahmah ua, kikhah ngeilouh bang ka ut phial uhi. Khovel hoihlouhna kal ah, zan sawtpi vatut leng thil hithei a hikei. Himahleh, Kimboi in aw neemtak toh, " Tulai hamham ve maw U Mang..." hon chih chiangin, kei adi'n nialvual a hikei. Bangteng hileh, a pute' mitmei ka vengna ziakin, dak 12 lakin pai dingin ka kisa hi. Ka paima in, Kimboi kiangah " Kim, tuban hun sawtlou in training ding kahi a, kha guk vel nung a mid-term hong pai thei pan ding ka hihna ah lai ana hah sim inla, college a examna te ah hon pass sawm teitei in aw - hona thumpih gige ding kahi. I ki-iit semsem leh taksa a kigamla deuhdeuh ding I bang. Amual zatam te'n hon gamlat in hal mahleh heina peuh ah gin-om ni aw. K'on itna sial bang lian a tehpih dingdan katheihsiamna in aban kei.Tua ka sepna thak chaan ding khop hileng le, nang' itna ka chaan kei nakleh huai chaan leng poi ka sa kei.Ka sepna sangin, nang itna neih kateel zaw di.I will make every effort to get you. Give me a love that never hurt and I will give you a love that never cheat. Ka first love na hihlouh hangin atawpna ding na hi"chia mangpha kikhak in ka paisanta .

Ka ngaihnou zinsan ding ka ngaihtuah chiangin hithei ka sa kei. Zin nawnlouh a omdet mai bang ka ut hial hi. Ka tun ni sapkik theih hileh ka ut ngei mai. Ka ihmusuk a, ka manglam a Kimboi va heel in, " K'on ngailua Kim...." ka chih patpat leh, ka Pa'n hon phawng hi. Ka thoukhe zot a, ka ngaihnou' mel ka muhut ziak leh, gari a sim dia laithon ka gelhsak la dingin Kimboi' kianglam ah gari khe 2nei in ka vatung hi. Huai ah, a pu-le-pite chibai va buuk in, ka ngaihnou ka melh cheuh a, ka kiksan nawn ngal hi. Ka kikhiaklahdan uh huihpi leh vuahpi in leng thei hileh kilawm takin zu luahluah zozen ding hi. Mualtung leh lampilai a gial paak phihphiahte ka ngaihnou toh etkhawmlouh dingin a pammaih ngei mai!!

Ka paina di gari a taikhiat takin, ka sakhau (pocket) sunga lehkha hoihtak a kikhep zitzet lakhia in, sim dingin ka mai ah ka koih dihdiah hi. A laithon ah, " U Mang, hunte paihat hina tel e maw? K'on ngaih patpat leh n'on paisan ahun pah tel a. Tua nang paita chihmawk, kahon ngaihngaih toh, poi na e! Omthei laihileteh kachi na e. I am very happy when I came to know that you came to Lamka just to see me. Wow!! Mi'n hon thei le uh hampha hon sa mah di uh. Kei zaw ka hampha lua. UMang ke'n k'on muh tung a hon zahtak lua keive, zum leeng ka zumdan,infact talking to you is nice and nicest of all is beingwith you. Maban a kha 6 ngak di chihmawk, ngaklah huai china tel e!! Poikei chi mai ni. Maban a training-te nahon zou dia, na lemlakte hon khol in aw U Mang. Tunung chiang a, ta I neih chiang a na Papa-te training lai chia ka etsak di'n. Hiai teng in k'on khin mai ding...Mangpha leh painuam Uu"chih kigelh hi.
Ka ngaihnou lungsim a vei petmah kawma lampi pai a haksa ngei e!! Hunte, keikia aka omchiang apai hatlou a, ka ngaihnou toh ka om chiang a hichi paihat sese; hun in houh hon melma bawl hiam aw, ka chi hial hi. Gari apat rail a pai in,ni thum nung in Delhi ka tungthei pan hi.

Pianthakna khat a piangthak kahihziak in, Delhi ahka lungleng thei mahmah hi.Ka ngaihnou muhtheihna naipen, a nu-le-pate hilel uh ahihman in, ka vatung zihzeh hi.Kimboi laithon honkhakte khawng ka simkhawm ua, kinaihsemna thak ka neihloh hial uhi. Anu ngial in, a inn ua vapawt gige dingin hon ngen hial hi.Ni bangzah hiam lel paisa a zaw, Kimboi toh innlam a – nekding huankhawm leh tui tawikhawm a om hi ung a, tu'n zaw mel(mile) sang val in hon halta hi. Lunglen lah puang deuhdeuh, 'ka ngaihnou in bang khawng ahih de aw, achim law de aw' chih khawng ngaihtuah pipen in ka nei hi. Atak in omkhawm kei mahle uh, lungsim guk in a kiang ah ka om gige; ama'n zaw phawkpha din ka gingta kei. Hun sawtlou - kaal thum lel paiman hamham in, training dingin sapna ka mupah hi. Ngaihnou ngaihluat lah om, sepna lah om - hichi kan a lungnopna di atam khol kei di. Mite' a di'n sepna pen uthuai pen hikhol kei leh leng, kei adi'n zaw thupi in a huntawk mahmah.
Training dinga ka kuanni ding hong tung pah abang. New Delhi Railway Station a platform number 2 ah Train Number 12307, Jodhpur Express ngak in ka om a, ka ngaihnou mah ka ngaihtuah tuah. Train a tuang natnat in battalion-te ah ka va ki-report hi.Huai ah, training pih ding lawm bangzah hiamtoh va kimu in, training taktak ma khanih bang batallion ah file khenkhat,verification leh nasep didan sinkholhsak in ka om uhi.Agam keutoh, hun-awl ka neih zeuhzeuh ziakinka lungzuang thei petmah hi.Vaipau lah theilou ka hih zawkmah man in, chim in ka chim petmah hi. June kha a battalion a ki-report in, August khatawp in batallion apat training namun ding - Haryana mallam ah ka trainingpih di mibangzah hiam toh ka kuan uhi. Training center ah ka hun tamzawte, khiallou in Kimboi ngaihtuahna dingin ka zang zel hi. Lamka lam ka pailai a,Kimboi' pute leh a nu' tanaulamte deihsakna thuhon gente uh bang ngaih tuah in, kuamah theihpihlouh in ka nuikha hemhom sek hi.
Training center a ka ki-report ni ngial in ka lung ahong nak kiat mah mah. Utthu a paithei ding hileh pai ka naak utngei mai. Sepaih apan ka ut gige himahleh nungak ngaih ziakin ka utpen nguina kongpi a suakta. Sepaih training kichi thubaih a hihet kei a; Dan khauhtak nuai a vaihawmkhum a ki-om ahihtak manin, ut dandan a omtheih a hinawn kei. Thubuai a om khak chiangin sir-te diklouhna ah leng sir te'n siamtang thouthou ua, training aomte a ding a rule 'the boss is always right' chih ahi zomah. Schedule tight takin a hon bawlsak ua, ut hun-hun in phone ah pautheiha hinawn kei.Huaiziakin, hun tamzaw-te lungsim saikakna ngen in ka zang hi.Training masak ni in - PT,extra physical class,theory, martial arts chihte ka hih ua; nidang a nasep zek chia "ka gimlua, ka tawldam zual di" chihdan-te hitheilou in, kho-ul tampi toh pang tenten ngai hi. Taksa sawizoina lam ana bawlkha khollou ka hihna uah, kha masate bangin training a om te - Michael Jackson moon walk pai kabang hial uhi.Huchih hun inleng, ka lungsung tawngnung ah Kimboi in lungnopna,tawldamna leh kipahna hon pia hi.

Annek leh tuidawn-te hong kikhek in, sung hatlouhna chi tuamtuam leh natna khenkhat hong om sek hi.Meimatum tampi ka neihloh hial a, hun sawtpi hon nawngkaisak mahmah hi. Meimatum natdan leh tamdan tohka ngaihnou ka itna teh di hileng a huntawk mahmah dingka chihial hi. Hun khenkhat ah, lawmte toh nungakte thu bang ka genkhawm nainai sek uhi. Night class nitak a, tactical wings lam a class ka neih chiangun, heutute'n vaipau a agen belbual-te bang uh ngaikhalou hial in, agal a street light in lampi leh meikai thiithiai-te asalhna nuai khawng ah Kimboi toh vakkhawm bang in ka kingaihtuah sek hi.Hun leh nite awl-awl a hong kitawl in mid- term bang hong hithei dek sam hi.

Training hun ah zaw hun kibichilh tak ahi. Zing phalvak ma a thou in, barrack-te ka hahsiang ua – class tuam tuam te leh games and sports chihte'n zui sek hi. Lunch break ding dakkal nih kan hun omlou zomah hi. Nitak lah ann nekkhit sawtlou a light sumit dia thupiak kihizomah lai dep. Ka ngaihnou lah college kai lai ahih toh, hun kituak dia adjust abaihlam hetkei; khat aman chia khat manlou, chih bang in ka om mun mahmah uhi.A lemtangthei pen bel Sunday dak 11am apat 3pm kikal ahi. Ka ngaihnou Sunday school kaitawp leh nitak akikhop ma hunkal lel chance ka nei hamham a; 11am-3pm hun kikal pen kou lunch break kikal toh kituak ahihna ah hun lemtang thei pen suak hi. Himahleh,hiai hun pen leng weapons cleaning hiam tambola game khawng bang aom chiangin ann ngawl zen in ka ngaihnou ka houpih zel hi. Kimboi in ka hunzatdan hon theihpih leh, hon hehpih lawsam di zaw hi a!! A lungkham di ka lauh man in, akiang ah haksatna ka tuah neuhneuhte ka gen tam kei.
Achang a, Kimboi in ka kihou hun uh ngeinadan a ana laak mawk ding ka lau. Aguk takin lah, adjust theihtawp a ki-adjust kawm a houpih ka hilim hi. Kalkhat a khatvei kihou – huai le Sunday chauh ahihman in, gen di ka hauthei mahmah uhi. Dakkal 3 bang ka kihou nung un leng, minute 20 lel abang!! Pathianni a bei chiangin, hong tun nawn kal ding ka ngaklah petmah hi. Pathianni chiang a ka ngaihnou toh ka kihou khak hamham pen uh ka hunnuam pen himai a hihman in, ngaklah louh ding vual a hikei. Kimboi in, " U Mang, k'on ngailua...hoihtak in trainingte hihtou zel in aw....." hon chih chiangin, ka lungsim a tawldam mahmah hi.Ka ngaihnou toh atak in kimu kei mahle ung, zaalmang in ka kimu zel ua, zingkal thoh nuamtuam mahmah sek hi.
Mid-term a chihchih uh - training a omte kuapeuhmah in kangaklah uh hong tungta a, battalion a khanihvel om,training kha 6 vel neita, akigawm a khagiat vel zoh a Kimboi' mel mukik nawn dia ka omtheih pen, kei adi'n zing ninou suak kilawmtak bang ahi.Mid-term dia kal nih lel piak ka hihziak un Delhi a sawt om manlou in, Lamka lam ah ka diang suk pah vengveng hi. Imphal toh lamka kikal bus ahka tuang a, Kimboi' mel ka muhnuam luat manin, Bus bang lamkal ah khawlmun ka sa zozen hi. Nu-le-pate toh neu apat teenna inn pen mangngilh kei mahleng, ka utna pipen suak nawnlou phot ahihna ah, ka ngaihnou-te' inn mah ka kidenna munpi hong suak ta hi.Ka nu-le-pa'n leng hon theisiam ua, ka kipak mahmah.Ka ki-itna uh apung deuhdeuh mai a, ka kithuahden uhi. Mundang a pawtkhiatna ding hun leng ka nei kei ua, inn ah ka kihel den uhi.

Training lai a ka ngaihtuahte, pawtkhiat theih hunhun a Kimboi toh bawlkhawm dia ka genlawk- innlemte leh nektheih chi tuamtuamte khawng bawl in, ka nekhawm zaizai uhi. Huai hun, Kimboi birthday toh hong kituakchet a hihman in ka lawmkhawm thei ngal uhi. Khovel paidan mah leng a hingei dia - hun nuamte paihat abang a, hun nuamlou leh tangkhat a omna nite sawtdeuh abang se hi.Hunte paihat mahmah in, mangpha kikhak ni ding hong nai hulhul a, hong tungpah zel hi.Ka ki itna uh lah lian deuhdeuh ahihman in, ka paihun ding a phurhuai het kei.Ka nu-le-pa taisan zen in, azing-azan Kimboi' kiang ah ka zang hi. Zi dinga pisuk mai bang ka utphial a, himahleh thil hithei a hikei zel. Ka paidek nitak in, Kimboi in bangthu zakha a hidiam ah, " U Mang, sepaih zaw k'on deihsak mahmah kei..." hon chimawk hi. Ka training ma hileh zaw, kuanlouvet di hinga.Tua lah, kha 6val zouta ka hihman in, a haksateng zoukhin toh kibang ka hita. Ka pan tung a zaw hon deihsak thou ka sak hi a, bang doh-ai hiam aw, tua Kimboi in Sepaih ka pan ding hon deihsak nawnlouh mawk!!

Bangteng sang a ka iitzawk ahih manin, a deihdan a ompen kei ading in thil haksa leh lit-huai a hikei. Kimboi' hon itna ka chaan sanga, sepna koihkhiat poisalou ding ka hihdan ka gensa a hihman in, ka thugen tangtunsakna ding a ze-etna mah abang hi. Kimboi in lah, " I will be faithful to you with every promises I have made" chi a gen tuantuan ahih chiangin, huai thute in kei-le-kei ka kihaanthawn zel mai hi.Zan hong sawt deuhdeuh a, mangpha kikhak nawn hun hongtungta hi.Kimboi kiang a lampi a ka sim di laithon gelh ding leh zingkal ka paima a valazual nawn ding in ka kigen hi.Huchi in, kikhelah tak in Mangpha ka kikhak thei khong khong uhi. Ka paidekni zingkal ka thoupah a, ka tanaute inn bangzah hiam leng ka phasuak man hi. Kimboi' kiang ah, laithon ka vala a, heina khatlouh ziaka kikhen ding himah le ung, a haksa ngei mai. Haksa sa pipi in, ka kikhenta uhi.

Ka ngaihnou' lenna Lamka vangkhua taisan a, lenna a ka lenkawm in, a laithon ka lakhia hi. A laithon ah, " U Mang, omthei lai hileteh china mahmah ing e, a nop dek patpat leh napai ahun zel. Tuaban khaguk ngak ding chih kare! ngaklah huai china lawmlawm zel e. Bangteng hileh kenle huai sung in exam ka na zouta dia Delhi lam ah kimu nani maw. Umang, I thil bawlkhawmte anop in a memorable lua.Duhthusam gen di hileh, I kiteng chiangin gam lian a lian kinei henla, I inn-lem bawte dan ka dream house hiven, huaidan in inn kilam hen la, kiteng khawm nainai leh ka utdan. U Mang nang, kei Delhi lam ka pai chiang a fuh deuhdeuh di ing a,hon sit ding bang in nakingai a, huchi lou ding keikhah.The more I know you is the more I love you,k'on ngailua. Nang adin ka gin-om ding ka chihte, minute khat lel lenghon muangmoh lou ding in k'on ngen.Mel leh puam ah zaw, ami akikhek kei nak leh poi kasa kei; kalung akim thou thou nadi,and I am happy to know that you are madly in love with me. U Mang, kei gin-om tak a ka om bangin nang le ana om zel in aw; kei tuk a midang na ngaih di kaphal kei. Oi!! U Mang bang chikchiang apat a Mangpha kikhak ngai nawnlou ding adia aw... huai hun di ka ngaklah na e. U Mang, I thumnate ah hiai thilte phawk ni – amasapen in Toupa'n hiaitan ahon pina ziak in thum ni ,i relationship ading in thum ni,exam ka pass nading in thum ni,hoihtak a training na zoh nading in thum ni,damtak a I kimuh nawn nading in thum ni. Painuam leh Mangpha....Darling I wish u a happy and safe journey"chih kigelh hi.
Kimboi' laithon ka simkhit in ka mitsi zek a, huchi'n Delhi ka tung hi. Kipahna ngen in ka dim a, Unau Thahdou te'n, a la khat ua,"misi suun sangin ahingte suun anazaw" achih uh atak bang hial ka sahi.Ka kipahluat ziakin, Kimboi in aksi nelkai la dingin hon sawl leh leng, linlou hial in kuan leng kilawm hi.Delhi ka tun nung, Training Centre a ka lutma ninih hun ka neihsung in Kimboi'bnu-le-pa' kiang ka va tung zihzeh hi. Amau a bang a honna bawl zawkmah ziak un ka intek mahmah a, anu ngial in "Makpapa" hon chi hial hi. Innlam a hun ka vazatdan khawng 'report' ka bawl a, ka hulum mahmah uhi. Ni 2 nungin, Haryana a ka training munpi uah ka lutnawn a, lunglen kipan a hingal mai. Kimboi in lah ka sepna hon deihsaklou ahihman in, maban lungzinna lianpi toh kha 6 training ding omlai teng k'on phutou nawn hi.Training leng zou nailou a hichi kikhiatlah pah,tunung chiah sem taktak leng le posting na a tai vialvial a, zite toh omkhawm kha taktak loudi chihna ziak leh Kimboi lungkimna ding deihna ziakin 'resignation' pe dingin thupukna ka lata hi.Numei zaw thil hihthei tak ahi ua, 'uuuu' chia kai ngaingai kawm a hon sap un, saupi hon tunpih thei mawk hi.

Kikhin dimdem in, resignation ka pelut a, ka tawp sawmna ziakte khawng dot in ka om hi. Hon muanmoh ziak un tawp hon phal kei zomah ua, a khophuai telmai.Hiaikia thamlouh,'sajai' bang ka muh behlai laidep hi. Ahitak in, training saupi zoukhin a, a zattheih huntak a tawpsawm chih a ngaihtheihlouh ziak ua hon phallou uh a hipen mai. A langkhat lam ah, a tawp ut te a ding a tawptheihlouh chih dan omsa omlou hiven chi'n, sawtpi hentaang hon sawmlai un leng training camp ka pawtsan teitei a; ka battalion lam uh Jodhpur ka zotsan hi. Mi' theih in zaw, 'mihai' ka hi; himahleh haichilh khat nei ka hihman in, thil hitheilou a hituan kei. Mihing a kibang kim kei – apil deuh, haideuh,thuakthei deuh, thuakhatlou deuh,mi ngaih leh haichilh deuh bang om hi.Huaiziakin ka kimohsapumlum tuan kei.Khovel bangchituk in kilehpei vulvul mahleh leng, Kimboi bangbang apiang nawn kei ding. Huai ziakin, Kimboi tantheih (tanzoh) teitei sawmin, ka sepna natawm chaan poi ka sa kei. Nu-le-pa' theihpih a kingai ka hihman un, kitenkhak ngei leng ka kigingta hi.
Ka sepna apan pawtkhiat sawm a,'discharge' laika sai pen, gintak sangin ana baihlam het kei.File-te Frontier headquarte, Sector headquarter, Headquarter leh mun tuamtuam a 'approval' ngai ahih ziakin a nawngkai mahmah hi.Hiai huntan ah zaw, ka thilsai felsiang naikei mahleh, a lohching khat ka hi veve – Kimboi kei a ahihlai ziakin. Huchih hunsung in, Kimboi in leng exam-te hon zou panpan a, kihouna lemtangzaw in ka hong kihou theita uhi.Ka duhthusam uh ahihleh, Kimboi in Delhi a, a nute' kianga laisimna maban hon sutzop ding, ke'n leng Delhi lam mah pansan a nei a, laisim kipatthak ding chihte ahi. Himahleh, ka thil sai felzou pah theilou ahihman in, ka sa vengvung zozen hi. Huchih sung mah in, ka ngaihnou leng Delhi lam a hong tung a, hun paisa a ka lauhthawng guuk mahmah tangtung di a bangta.

Delhi a Kimboi hong pai nungin, hon ngaihsak nawn kei. Nidangdan a hon call a," U Mang, na chim mah di maw? K'on hehpih lua U Mang" chi'a lungzuan hon hehnem di leng a om nawn kei. Ka phone ka en zel a, missed call leh sms khawng bekom dingin gingta sek mahleng, kinepna thawn lel asuak gigeta. Ka lungzuan louhna dinga, Kimboi in "when you feel lonely wrap my love around you" hon chihsekte a mangta a, thawmhauna ngen in hon pumtuam ta hi. Kimboi Delhi ah hongpai dia, kinai zawsem a omthei di ka chih hangin, lungsim ah kigamla zawsem in ka omloh uhi. Lamdang hina maizen e – manta khaalgah ka nekkhak ziak hiam aw, kuate thubawl ziak hiam, ka chisek hi. Kimboi houpih but a aom louh pen ka theisiam kei – ka theisiam ngeikei ding. Thu omdan kihilh chih lah omlou, ka call lah pick-up ngeilou, message lah hon reply ngei mahmah lou, muh chiale hon houpih utlou chuh a beidothuai ngei mai.

Hichia om liai-luai pen thil hithei salou in, Commandant pa kiang ah 'casual leave' ka ngetleh, ni 3 sung piak in ka om hamham hi. Ka battalion uh Jodhpur apan Delhi ka zuan a, kilawp takin Kimboi' omna lam ka tung ngal hi. Thil omdan ana lamdang vekta. Kimboi in kipak taka honna vaidawn di ka sak hang in, hou leng honna houpih kei a; a mitsiik nangawn in leng honna en kei tel hi. Ka khasiattha asuak a, kideek zoulou in konglam ah ka pawt khiatsan hi.Ka lungsim in, 'nidang a ka iit Kimboi hinawnlou hialeh?' chi'n ka ngaihtuah a, ka mittui leng hong vung dek mawk hi. Nidang a, nungak ziaka mittui pawt ngeilou a om phenphan sek himah leng, tu'n bel hon khoihkhakdan atuamna mahmah om a, khasiat louh ding vual a hikei.
Suti ni 3 lel mu ka hihman in, ka kiknawn a hunpah hi. Battalion a tawpna laite sai a ka omlai in, zankhat kingaihtuah sual in ka buaigawp hi. Kingaihtuah sual a, khattang sawlbang heina gam vangla a khitui-naptui toh ka omlai, Kimboi in hon mu himaizen leh zaw, a thuakzohna in zou di'n ka gingta tuan kei. Ka mangbatna leh kahna aw, Vaite tuallenna gam ah huihnung in omzia neilou takin hon tuahmangsak tawmtawm zomah hi. Ka Birthday hongtung a, Kimboi apan in thu kamkhat bek kinem mahleng, ka lawmte apan in 'Wish' ka mu lel a, ka khasiatna hon behlap sawnsawn hi. Ama Birthday ka lopkhawm lai ua zaw, kei a le chiamteh kichisam zaw hiven..!

Sepna lah tawp, ka ngaihnou lah houpih but hinawnlou a om maimah tuh ka lungeelna in atheisiam kei tel mai. Ka ngaihnou lah pum lamdan hita; khenna simthu a tongsuak in lel kei mahleh, ngaihsak nawnlouh leh lakloh tak a koih in ka om geigui zomah hi.Hiai lungimna ziakin kaguih loh a, nna khat peuhpeuh ka sepnate ah bahna in ka neihloh hi. Hun paisa a hangsanna hon petu leh hatsaktu, alehlam in ahong pai daih ta hi.Ka thil saite(kitawpna) khanih sung vingveng zoh in fel khongkhong mahleh, sum tampi liau in, phalna hoihtak toh 'discharged' in ka omta hi. Thil nih, fel taka kitonkhawm a pai helhel di'n deih mahleng, a nihtuak in a ki melma et ua, beiloh tuak ding abang uhi (nungak chaan maithei - sepna chaan hita).

Khat saifel khin in Delhi tungkik mahleng, saifel ding a leng uthuai hetlou adang khat in honna ngaknawn leuleu hi. Ka thuakzohna in hon zoh nawnlouh man inathu omdan kan chian leh a omdan theichiang ding in Kimboi omna lam ah ka kuan hi.Huai hun akavahoh in, Kimboi sungkuan te ana om vek uhi. Ka kingaihna uh bulpantu, Kimboi' nu kiang ah alungsim etkhiatna dingin, " Nu, Kimboi in lah hon ngai nawnlou maimah a...." ka chihleh, a re-action hong tuam mahmah mawk hi. Nidang bang hileh, khuzen a kipei pah hehu ding zaw hiven!! Huaihun in bel, "Tulai a naute genhak unchin, thu amangnuam kei ua, nu leh pa te deihsakdan in apai ut kei uh" chi'n hon dawng lel hi.Atak a zaw, a tate thuzoh lua hiven!!nidang lai a naute' ki-iit pihte kikal a kigolhlou ding chite, a gen uh bang nawnlou uhi. Ka thuzak tomchik himahleh, a gennop ka man chiang mahmah mai a, Kimboi toh ka ki-itna un a phaktawp hiaitan himai ding ahi chih leng ka haih kei. Nidang a hon deihsaktu mah in, tu'n gibing hon khenta – apoi in a theihsiam hak ngei.Kimboi kiang a, tun-le-zuate'n gibing honkhen sawm dek mawk le uh bang na chi di, chia dotna ka bawllai a, "Ut mawk di hia... Ka itna nang dingin ka pekhe khinta U Mang" hon chihlai khawng ka phawksuah zungzung hial hi. Himahleh, thilteng kilumlet abang ta a – temlou a ngawntan a om hidan in leng ka kikoih hial.

Ka lungsim in kihin dimdem mahleng, khatvei bek Kimboi kimuhpih a, thil omdan dotchian ding chih ka lunggulh nawn hi. Nikhat a inn uah a nute omlouh kal a ka vahohhun in ka houpih a, ahih hang in dawnna bangmah ka mukei. A room lam ah hon tailutsan zawmah hi.Delhi apai chianga kikhek lou ding chi hinapi, kikhek lumlet ahihtak ziakin, atawpna hiding in Kimboi kiangah agelhthoh in hichi'n ka gen hi "Nidang a ka om dante kei mizia hiveklou a, nang kipahna ding ka deihna a tampi ka bawl phat zel ahi. Na utlouh leng hih dia hon sawlsawm ngeilou ka hi. Huaite banah, nangdeihna bang ahih a, hichia hon koih ding na hihleh, na lampi ah kading nawn kei ding" ka chita mai hi.

Kimboi ka itna atul ngeikei ding.Himahleh, aman ka itna kimkhat leng a thei kei. Hoih bukim ki-omkei mahleh, Kimboi zaw ka mit in ahoih pen ahi a, a tawpna ding a ka neih leng a hibok hi. Kuamah tung ah Kimboi ka itna bang itna ka pekhe ngei kei a, khitui leng ka na nul ngeisam kei. Kimboi in, "UMang ken nangchauh hon ngai di,I will be faithful to youwith every promises I have made" hon chihte 'aw suak' lel hita hi.Ka thiltuah zalmang himai hen la, khanglou mai leng ka ut ngei. Rose pak banga etlawm leh ka iit mahmah Kimboi' lungsim ah tul dingin kisata mahleng, kei hinkhua ah Kimboi in tul ni nei ngeilou ding hi.
Thilteng hoihtak a pai a, Kimboi deihdan a hing ka kisak lai in, ka itna uh mekmit chot in hong om hi. Misi suun bangmai in ka hunte ka zang a, Kimboi ka lungsim a omden ahihman in, thildang himhim alut thei kei. Maban panlak dingdan leng ka thei nawn kei... ka maban bangchi zutzop nawn di ka hiam chihleng ka ngaihtuah khe bun kei, ka mangbang pet mah hi. Ka kikhenna ziak un, lehkha leng ka simhoih thei nawn kei a, ka lungsim a buaigawp.

'Psychiatrist'te kiang bangah ka vapai a, ka va ki-ensak hial hi. Ka lungsim tawngnung pen ah, 'Zalna laikhuntung ah sambang ka zalmoh a,nunluite ngai a luankhi toh maimit ka siin louh Sian hawm simthu hiam -tun leh zua hawm simthu?? Lung a ka ngilhmoh ngaih aw, nang a ding a ka kipiak khiatna leh kaitna te hun lou hiam awdamtui sia n'on luan....I tongchiamsate leh naubang nui a I kholhkhawm lai hunte lung a ka geelgeel chiangin pamlua sang e loubang atul mai ding.Bang doh-ai hiam aw nang ngaih puaksing bang ka lelh,lung in na ki-awi na hiam ngaih aw.....ngaih nunlui. Kei a ding zong hon geelsak sam ve' chi nguutnguut kawmin, khitui lum pilhpelh inkamai hon luansukhi. Tomchik sungin, ka khitui luanna hong vot dukduk zozen a, ka theihthak leh Kumthak phalbi vuah masa in ka khitui lum pilhpelhte ana luan vot ana hi leltak hi.

Laigelhtu' Lungsung Pan:
I Dedicated this story for the one who broke my heart -
How will i ever understand your silence... when will i ever forget your sweet fake words, your commitments and promises. You never realise your silence kills me from inside each and every single day. I try to reach for you to find out the reason for these sudden change, but all i got from you is just your Big Silence as usual... cause you nolonger have any words for me. I had mourned you like a deceased, and dead people never comes back alive in our life... only their memories remains... and this memories will someday get weakens too. After i have given you all my life, my heart and my soul, after all the love and sacrifices i made for you... is my love not good enough for you?? What more do i need to sacrifice for you to love me even after I gave up my career for you?? Sorry to say, that's all I got. I bet you will be the luckiest person if you could ever find someone to love you as much as I did, even then you will never find someone who would love you more than I do. I was hurt to the core, as much as i have loved you... hopesomeday i will not care about you anymore as much as you have hurt me. I'll be alright, might not be today... but someday... I'm going to get over you. You left me when i needed you the most. Loving you wasn't my inborn... so I'm sure i will someday unlearn loving you cause having you is not worth anything. I will never be able to trust you again. We may not trust everyone we love, but we will always love the one whom we trust.
They said, "Love doesn't cost anything", I disagree, falling in love with the wrong person can cost you Everything...!!