I GAM KHRISTIAN HINKHUA LEH DIKTATLOUHNA
By : Hauzel Gou

Mihingte Jesu Khrist sisan vang a Khros a tatkhiak i hong hihtheihna ding ua, ngaihtuahna thawveng tak leh sia'nthouna toh Pathian' in hiai khovel a, ahonna piankhiak sak i hi uhi. Huchi ahih dungzui in, mihingte awl-awl in i hong khanglian zel ua, i ngaihtuahnate'n le pichinlam hon manoh touzel in, asia-apha ngaihtuah theihnate bang i hon nei thei panta uhi. Hiai asia-apha i hon theihtheihna, tuailai hun tuh Setan in le honna enlah mahmah a, huchi'n i Khristian hinkhua ah Pathian leh Setan tuh thuneih kituh den uhi. Hiaite ziak khawng ahingei ding, tulai in i khawtaang ah Setan in ei gingtute vanzat a honnei in i Khristian hihna toh kituaklou hetlou diktatlouhna in igam uah vaihawm zaw abangta hi.

Diktatlouhna i chih chiang in, i Khristian hihna toh kituak hetlou leh Pathian toh kimelmakna lianpen khat ahi. Gingtu Khristian khat i hongsuah chiang in, Setan in i damsung teng tuh ut in ut kei tale hang, tawpni nei ngeilou in khem a hon tum gige ding hi. Abiktakin, tuailai ihihsung in, Setan in hon zangnuam diak a, tuailaite' ngaihsutna tuh Setan in theilua ahihman in, thilnuam leh hun tomchik sung a kipahna di ngen in hon thuzoh a sawm zaw hi. Hichibang Setan khemna tuh ei gingtu Khristian-te'n i na hihkhelh khak nuam mahmah uh ahi a, huchi'n i theihlouh kal un Setan khemna thaang ah i awk khazel uhi. Gingtu Khristian-te Setan' vanzat a i hong om khak chiang in, i khawtaang leh saptuam sung bang hong buai hiaihiai in, nakpitak in siatlam ihon manoh zawta uhi. Huaiban ah, Setan in i ngaihtuahnate lamchi tuamtuam a hon thuzoh in, Khrist doudaltu di'n a hon zang nuam mahmah hi. Huchi'n innkuan sung tanpha hong kisia in, tuailai khenkhat-te ngial in nu-le-pate kem nuamlou in i omta uhi. Gilou ngaihtuahnate'n hon zeelsuak in, numei-le-pasal kal a thangtatna leh khamtheih zu-le-sa in i bual uhi. Tuaphetlou, diktatlouhna ziak a kineksiatna uang hiaihiai in, Pathian' vualzawlna idon sunsun i khalohte bang ua lungkimzou nawnlou in, sum-le-pai a ginomlouhnate'n ilungtang uah chii hon tuh in, hauhsak baih utluatnate ziak a nekguk-takgukna poisa hetlou in i om ta uhi. Setan khemnate ziak a ngaihdan diklou ahi chihte omsak nawnlou a, nekguk-takgukna hihtheiloute bang mihai a koih maimah i bang ua, negu siamte bang pilsa in, i ngaisang mahmah get zel uhi. I laisiangthou toh kituak a vaihawm chihlah tawm hiaihiai, mahni hoihsakdan leh khovel miitna ziak a laisiangthou in hon sinsaknate nawlkhin a vaihawm utna in i lungsimte uh luah zawta hi. Lungkhamna i tuahte bang hon siamtu' Pathian kiang a tut naksa'ng in, leitung hinkhua chimtakluat ziak a hin le peih nawnlou a mahni kithat chihte pung hiaihiai hi. Hiaibang ngaihdan dikloute tengteng Setan a kipan ngen ahihman in, a tawpna zaw sihna luiguam ahi zel hi.

Huaibanah, heutu khenkhat-te'n diktat-tak a vaihawm i kichih lai in, Pathian deihdan ana hikha khollou in mahni hoihsak dan chauh ana hikha nuam mahmah in, heutu ihihna ah lohsapna in honzui zaw sek hi.

I gam i en a, ipu-ipa ua pat Khristian i hihna uh kum 100 bang valta in, kipak chiat le ihi ngei ding ua, tangthupha kipahhuai neita chi'n Gospel Centenary bang ilawm zuazua ua, nuam i sa mahmah uhi. Himahleh, alehlam ah i khawtaang leh saptuam i et chiang in, eilawi Khristian hihna toh ibiak Pathian a kipak huntawk na dia aw... chih ngaihsutna lianpi honpe thei mawk hi. I Khristian hihna uh maikhuhna di lel a zang ina hihkhak di uh lauh-huai mahmah hi. Tualou in, Khristian i hihna uh bang sawtkuamtak hita, mihing khangthu suidan hileh, tulel in, a khang nihna ah i omta uhi. Tulel a i khawtaang leh saptuam kikepdan in, a khang thumna ding hon gaal muhsak hi'n kathei hi.

Huaiziakin, kingaihtuah vengveng in amasa'n i innkuan sung mahmah ah, pate'n pa hihna toh pichingtak a Toupa' deihdan a thudik a vaihawm kisam mahmah a, tuamah bang in, nu leh tate'n zong, i mohpuakna chiat uh thei a, huaipen Pathian deihna bang a, diktatna toh buchinsak sawm gige ding ahi. Huchi hileh Toupa'n i innsung ah vai honhawm dia, igam-inam heutu ding mi diktat i innsung mahmah ah hon piang khesak dia huchi'n diktatna in igam ah thu honnei thei pan ding hi. Huaiding a panla thak in, i sepna mun peuh ah eimah innsung bang a ngai in, gin-om tak in semle, i saptuam leh khotang chidamna hon tun zaw ding hi. Huaiziak in, ibiak Pathian' ei a dia gam hon bawlsak leh gamgi khungtu kiang ah i diktatlouhnate uh thupha tawi in, i Khristian-hihna toh kituak hetlou diktatlouhnate koihkhia di'n panla thak chiat theile ut huai hi. Huaidi'n amasapen in michih in mahni innsung chiat ah diktatna pankhe phot-phot le hang, igam ah diktatna in vai honhawm zaw ding hive aw unaute.