Aman Hon 'Try' Masak Eive..!!
(Valentines Day – Valentang Den)
Written By: K Lianthansang

Pathianni zingkal khat, lawmpan " Zan nitak a ka thil sai-veng louh uh va sai-veng zual ni.." chi'n hon pawtpih hi. Vengnuam lam ah hon paipih a, College Lampi ( College Road ) tawnin St. Peter's School sak a Zawi (Street) khat ah hon petphei pih hi. Huai nungin, compound nuam mahmah khat ah hon lutpih a, paina ding mun teng ah 'carpet grass' a chihte uh kiphah zihziah lel hi. Innsung ka lut uleh, ann huanna pindan (room) ah, pasal khat ana tu theithuai (thouphet mahbang) hi. Muhkhak ngei bang sasim a, ka ngaihtuah vungvung leh, television ( vangla melmuh) a lasa khawng a ka muhsek ahihdan ka theikhia hi. Amau' inn hidan in ka koihsuk mai a, zing-ann ana ne hidan in leng ka ngaihtuah ngal. Inn bang(wall) a 'inkuan limlak' kitak ka etleh lah amah a telkha kei zel a; lamdang sakawm takin ka om hi. Ka lawmpa bel a room sung ua valut ngal in, nupi gawngsim giugeu khat toh a va kichiamnuih ek-ek uhi.

Bench tunga tukawm a ka dakvel leh, a ann-huan room uh lutna di kong tungah thumanpha mahmah khat kitaak ka mungal hi. Huai ahihleh, " THILHOIH HIH DING NA THEIH KEI LEH LENG NA HIHLOUH DING BEK THEI IN " chih ahi a, anuai zek ah laimal neu in, " Khelhna man tuh sihna ahi ngal a ( Romte 6: 23 )" chih kigelh hi. Huai thute ka etlai in, room apan ka lawmpa hong pawt a, glass nou khat a tui kikoih hon dawn ngal hi. Ka ethoih leh, ama a ana omsa ( ka meltheih ) pen in leng ann ne hilou in, tuidawn kawma saguh kheuh ana hiphiangsan hi. Ka omna mun tuh ka theikheta a, kintak a konglam a pawt in, verandah ( hulliap innka ) ah nisa-lum awi ka kineih hi. A khawnung sawtlou in lawmpan, innteknu kianga sum bangzah hiam pia in hong pawtkhe vanglak a; kintakin ka paipih ngal hi.

Innlam zuan a ka pailai un, " Zu zuakna mun hilou amaw n'on hohpihna " ka chihleh, " Himah ei! Zan nitak a zu dawn dangte toh kibuaisim zomah ung ua, lawmte khat in a khamsiat sim toh ka dawnman uh ka piak u'leh piaklouh lam nasan uh leng thei nawnlou ung ua, huai hiveh aw.." chi'n hon dawng luailuai hi. Ke'n leng, " Chiset e, huchia va om tel, nanak eng chauh uh e! Huai pasal khat ana ompen le, lasiam khat hisam lou maw...a inn uh hia?" ka chihleh, " Lasiam khat zaw hisam mah e, tun a om selaw gawp a! A inn uh hilou ahi, zing zu dawn ahi.." chi'n hon dawng a, bangmah dang ka gennawn tuan kei. Ka lungsim ah, 'THILHOIH HIH DING NA THEIH KEI LEH LENG NA HIHLOUH DING BEK THEI IN' chih toh 'Khelhna man tuh sihna ahi ngal a' chih kia a gingden a, lamdang ka sa zozen hi. Inn ka tunnung tanpha in leng huaithu ka ngaihtuahna apan in a pialmang kei.
Nitak ka lup in, 'Zu' toh kisai ka ngaihtuahkha nilouh nawn hi. Ka lungsim ah, ' Kum khat in, zu dawn zongsang khatin ZU litre bangzah mawngmawng a dawn gai dia aw?' chih kia a om. Azing-azan khenlou a zu dawnte adia dotna hoihtak hiding in leng ka ngaihtuah. Hiai dotna houchik bang mahleh, a dawnna pehial lehang, chizauhuai mahmah maithei a; agim natawm leng nap ngam huai nawn kei leh kilawm ka sa. Bang ziak a zu kichi - khangthak tuailai, mipil leh laisiam pipi banah, pawlam et a khalam dinmun sang taktak nei mi tampi in hichi thupi bawl I hiding uam aw, chih khawng ka ngaihtuah vungvung mai a; ihmu theilou in zalkhung tungah sambang ka zal nilouh hi.

Ka buaina bel buaina taak mah ahi. Ei gamsung kia a leng kibuaipih hilou in, khovel pumpi in a buaipih mahmah uh ahih ziakin, ka kimohsa pumlum tuan kei. United States ngial in, a zu bawlkhiat zah uh, Unit tamtak in niamsak sawm a, customer-te kiang ah leng, a hoihlouhdan leh damtheihna adia a lauhhuaidan khawng sinsak hial uhi.

Huchibang kawmkal ah, South East Asia a zu piangkhe tengteng lak ah, India in 65% hilhial ana bawlkhia hi (gintak haksa sim maw). En, zu I hahbawl mahmah lai un, 'UK Cancer Research' a kipan Sarah Lyness in, " Zu in cancer chi tuamtuam 7 (seven) bang piangsak thei " ana chi tiptep zel hi. A biktak in, ei Manipur tanggam sung a tengte lak ki-en lehang, State dang -te bang in i zu dawnte uh a siangthou het kei. LOCAL KHUTSUAK - puang khilkhel, a hoihlouh behlap a hoihlou sawn lai khawng dawnte i hitangpi uh. US khawng a Factory hoih taktak a zu siang kilkel kibawlte nangawn huchi tuk a lauhhuai ahihleh, ei lak a te nak lauhhuai na'n chia! Amau gam in Zu doudalna dia campaign bang nei zozen uh a; eilak ah bel, laitui leh laidal kia a doudal I bang uh!

Puaknat nei velvul kawm a ihmut thil hithei a hikei. Ka lungsim in, ' Zu kichi doudal a, sukbei hithet ding chih bel thil hithei a hikei a; manglam a leng matphaklouh a hita! Himahleh, Christian ( Pathian' thu awi ) I hihngal uleh, ei lak ah mun awnkei in, 'timing' nasan leng bawlsak deidai kei lehang ka chi hi. Meitei te'n a ut uleh huanta ve uh, va dawn kei peuhmah lehang hun hilel mai ding ahi. Eilawi in zu I khaam pen uh, Meitei-te phungvuhna hidan a ngaipawl leng I om ua, adik! Himahleh, sum-le-pai sang a Pathian nawlkhin zaw i hihkhak ding uh lauhuai sak in om!. Pathian' thu awi I hihna uah, I khut uh silsiang peuhmah ni. Aduh tenten om a, mundang a dawnna di a muh uleh amau thu hita ahi. Banah, munchih-mualchih teng huam a, Zu hihbei tum a panlak sang in; a hoihlouhdan leh natna tuamtuam tuntu ahihdan bang, ahihkeileh society sung siatna tuntu ahihdan bang pulak zawle. Huai hileh, society hoih ding deih a sih leng poisalou khop a kipumpiak a, akhen chiang a khosung a duty a alang-alang a i om vengvung sang un a phatuamzaw khamoh kei dia hia?' chihte ka ngaihtuah dundun hi.

Zan asawt deuhdeuh leh ka halh deuhdeuh mawk a, ka ngaihtuahna ah thil dangdang leng hong lutbeh zungzung hi. Thildang tampi, ngaihtuahna subuaithei ding khop a puaknat-huai tanpha hong lut mahleh, 'THILHOIH HIH DING NA THEIH KEI LEH LENG NA HIHLOUH DING BEK THEI IN' chih in ka lungsim a luahdim lailai tel hi. Lamdang ka sa zozen a, huchi tel a ka lungsim a luahdimna ziak ka theizou kei. Bangtan hiam ka ngaihtuah nungin, lawmte khat in " Hiai hih leng bang a chi dia aw, Christian gamgi ka kankha dia aw..chi a, thilhoih hih didan theilou a na buai vungvung hun chiangin, na hihlouh ding bek na theih ka deih a, na hih hetlouh ding tamlou k'on hilh ding " hon chihlai ka phawkkhe guih hi.

Ka lawmpa'n hon thuhilhna ah, " Mi kuahiam, thil hihkhial hinapi, a thilhihtheihna leh thupina ziaka maivil leh siamtansak a a-om mawk leh thildik hilou ding ahi. Huai ziakin, thupina ( lalna) ziak khawng a mi na muan pahpah hetlouh ding ahi. Etsakna dingin, David in leng a thupina zang in, Uria' zi a luppih a, Zawlnei Nathan in, a thilhih hoihlou a hihdan a va hilh. Huai mahbang in, sum-le-pai hauh ziak hiam, chet theih ziak hiam khawng a makai dia chingsak a om a, a kilawmlou tanpha 'Vote' mu zenzen omleh leng, thupi ngaih lawke'n – Dik hetlou a thuneihna len leng omthei a; dik himahleh thuneihna tangzou mahmah lou leng omthei veve ahi chih thei in. Huai banah, khotang in ana hihsekdan leh chiindan uh omsa chihziak a adik hidan a pomvek pah lawllaw di leng hilou ahi. Mi I muan leh ngaihsang mahmah khat in, dik ahi achih ziaka leng dik hidan khawng a pom mawkmawk di leng a hituan kei. Mahni ngaihdan kia hoihsa a paipih geugau sawmte leng adik hituanlou zel. Mipi atamzaw' ngaihdan zuih kichi leng, tulai pau in gen le, 'thring' lawta. Noah hunlai khawng I ngaihtuah leh, lom sih neinuai khak ding alauhuai mahmah. Huchibang kawmkal ah, ahoih hidan a kilang tengteng leng hoihkim veklou lai ahi. Anuam lamlam zuih a, ahaksa lamlam nawlkhin leng a dik tuan kei. Pathian' thu awite I hihman un, ama' deihdan – Laisiangthou a honna kawkmuh bangbang zui lehang kikhial lou ding ahi. A thuhing kikheng ngeilou ahih manin, athupiak zuih ding I mohpuakna uh himai dan ahi. 2 Timothi 3:16 leh 17 ngei ah leng, ' Laisiangthou peuhmah Pathian hatkhum a piak ahi a; huaziak in, thuhilhna ding bang, taihilhna ding bang, bawlhoihna ding bang, diktatna lam a kichilna ding bang in a phatuam hi. Huchia Pathian mi tuh nna hoih chiteng sem ding a kimtak a kivan a a kim theihna di'n.' ana chi ahi. Huai ziakin, THILHOIH HIH DING NA THEIH KEI LEH LENG, LAISIANGTHOU' HON SINSAKLOUH BANG TAK A THIL HIH TUANLOUH DING A HIHDAN THEI IN AW " hon chi hi.

Ka lawmpa' hon thuhilhna thu ka ngaihtuah khiat zenzen ziakin, lungnuam takin ka ihmu theita hi. Pathianni nawn hong tundek takin, 'Valentine's Day' kichi hong kithang nawn a, huai in ka ngaihtuahna teng a luahdim nawn hi. Kiginni nitak, bandh ziaka Lamka khawpi sung dai zikzek nuai ah, lupna tung mah ka bel nawn hi. Kei hon it a, Valentine's Day ni a hon 'wish' di bek le omlou chi'a ka kingaihtuah laitak in, sawtpek apan hon it gige om ahihdan ka ngaihtuah khe guih hi. Facebook ah leng message honna khak ngei a, a dawnna ka pe nai kei. Mi tuamtuam zangin ka kiang ah a itna thu hon genzel a, ka nawlkhin zel. A inn a hoh dia zot in ka om sek a, ka ut ngei kei! Hoh teitei angaih hun in leng ka kilepkhiatna di ka zong den hi. Amah houpih di leng ka lin ngoihngoih mai a, balance seng hetlou a kihoupih thei di himah le ung, ka nawlkhin sek hi. Himahleh, hon itna a bei ngei kei. Hon 'try' na kumkhua sawtta mahleh, a lungke tuan kei a; hon luh teitei sek hi.

Hon message khakna ah," K'on ngaihnat luat man in na lawm hih ka ut a, 'FRIEND REQUEST' k'on khak hi. Himahleh, k'on gintaak banglou takin n'on 'CONFIRM' ngei mahmah kei a, lamdang ka sa. Nang k'on ngaihluat man in, group tuamtuam ah thuhoihpipi ka post sek a, na hon 'LIKE' sak ngei sam kei. Ka mel se mahleh, n'on theihkhak ngei bek ka hihiam chi'n, na 'WALL' ah hong kitaklat sawm mahleng, ka lawm hih na utlouh ziakin na wall ah bangmah ka 'POST' thei kei zel. Mun khenkhat a ka post sunsun-te lah hon 'SHARE' sak bek tellou chin a......'COMMENT' bek hon pe dia k'on na lam-et gige zaw hi chin a maw!!

Hun bangtan hiam nungin chu, n'on confirm khongkhong a, ahihziakin na lungsim taktak n'on pe kei. N'on muhbaihna dingin thil bangkim hon 'TAG' gige mahleng, honna 'HIDE' sak daih zel chin a. Ka 'PAGE' bawl-te khawng ah na om dia aw chi'n hon zongsek mahleng, thu houchik khawng genkhawmna 'GROUP' peuh ah nana chiakchiak maimah. Bangziak a hon 'POKE' ngei tellou e? Midang, melhoih nasak deuh-te khawng lah na poke zatzat sek a, melselua ka hi hialeh? Na omdan lui taisan a, hinkhaw thak a na ki 'UPDATE' kei ngeingei leh, chikmah chiang a hon zong muthei nawnlou dingin k'on 'BLOCK' diing. Ka thugensate mawngmawng ka 'EDIT' ngei kei himhim a; ka 'ACCOUNT' leng 'FAKE' ahikei. Huaiziakin, ka thu 'POST' tengteng ana 'FOLLOW' gige tamai ve maw?

Nang k'on it ziakin ka 'ONLINE' gige a, ka account leng ka 'DEACTIVATE' ngei kei diing. Tunitak mahmah in leng, ka 'MESSAGE' hoihtakin ana simthak in la'n, hon 'REPLY' teitei in. Banah, kei apan 'NOTIFICATION' hongpai chiangin honna nawlkhinsak nawn mahmah ke'n aw? " chi'n kigelh a, huai message tuni tanpha in leng ka kemden a, a lamdang ngei kei.

Huai zan, Inbox a lut in message ka simthak a, hon itna nawlkhin vual in leng ka koih nawn kei. Huchih laitak in, message hong lut a, " Zing chiangin, kei toh Valentine's Day zangkhawm ni aw..please.." chih hong lut hi. Thupukna kintak in ka la ngal a, ka pianma apan honna 'try' leh kei ziaka bawlsiatna tampi ana thuak mualsuah - Toupa Jesu Khrist toh 'Valentines Day' zangkhawm dingin thupukna ka la hi. A ninawn Pathianni in leng, akiang a kipahthu gen ding leh a deihlouhdan a ka omkhaknate ziaka thupha tawikawm a; ka lungtang tengteng pekawm a 'Valentang Den' dingin Biakinn lam ka zuan ngal hi.

Laigelhtu' Lungsung Pan:
Valentine's Day chiangin, gingtu hilou nungak leh tangval khenkhat in hunnuam zatkhawmna dingin zang sek mahle uh,nang bel, nang a ding a hong si a, bawlsiatna tampi ana thuak mualsuah I Toupa Jesu Khrist mangngilh ke'n. Huai ni chiangin, ama' deihlouhdan thil na hihkhak omte hepkhiatna ni bang, amah lam naihsemna leh ama' kianga haksatna (thumna) tutna ni bangin zangthei lehang hoih mahmah ding in ka gingta. Ei gingtu kichite'n, gawtmun meidil a pai ding lai nasan hon honkhetu I mangngilh maizen uleh tuh – a itna I theisiam nai het kei uh chihna himai ding ahi. Huai ziakin, Valentine' Ni ( Valentine's Day) I zatkhak hunteng un, itna ziak liauliau a ei a dinga hong si – Jesu Khrist ngilh ngei kei ni.

1502 – Ka Kipak – 2016