Oh! Daih Zozen..!!
( Based On Tuailai 1434Pro )
Written By: K Lianthansang

"Na hih peuhmah uh, mihing a ding bang a hihlou in, Toupa a ding bang a hih in, kilawp takin hih un (Kolossate 3: 23)". Mihing' et a kilawm ding ngaihtuahna tan lel a thil I hih chiang un, a sukkhak di taktak a sukha ban kei. Huai ziaka, I thilhihdan uh khenkhat, i kibulphuhthakna ding uh hunkhop om hi. Kikhop bang ngeina dan a koih pawl bang leng om maithei ( eilak ah bel a omkhak ka gingta kei). Ka ngaihdan khat hon genzual leng, Pathian phat leh pahtawi dia, biakkhawmna nei dia kuan I hih vet uleh, I dakchiam uh a ginma in music department te bang tungthei uh hen la; mawk tut mailou in, phatna la sakhawm zaizai lehang bang a chi dia. Kingakna kawm leng hidia, pat ahun chiang a, programme paitoutheih pah ziahziah mai di ahi. Huchi hileh, kikhop hunsung sawtluat ziaka kining man chihte vang deuh dingin leng ka gingta.

Tulai in I gam uh se deuhdeuh a, galmuanna tawm deuhdeuh ahih manin, I fencing te uh sang deuhdeuh a, I inn chiabi-te uh lian deuhdeuh hi. Fencing sangtak a I bawlzoh nung un leng, atung ah mi kuikeh thei ding bangbang hiam I koih lai tel uhi. Zoudawn lam khawng ah bel, guta-lata chihte leng a om kei a; mun khenkhat ngial ah, kongkhak khawng, singkhuah peuh in kidou thoh lel hi. Huai banah, aak kikhoi deuh tangpi ahihman in, aak-gil theilou om hial ding ka gingta kei. Ka gennop tak bel, nitaklam chiang a aak in a gil uh naih siausiau uh a, aak-te a lutkim chiang un a kong kikhak pan hi. Huai hun chiang a, aak giltang kimlou a omleh, zontheihna chiteng kiban zon hi. Tulai in ahihleh, nu-le-pa khenkhat in, a tate uh 'GOUMANPHA' chizen mahle uh, kholak ah ut-le-dah in vakmang le uh leng a ngaihsak kei uh. Aak sang a tate I thupi ngaihlouh ziak ua, I gam uh hichi tel a sia hidi ahi hon chisak hi. Tuni a tuailaite, tunung chianga nu-le-pa hidi I hihman un, diktak a I kibulphuhtheihna ding ua k'on taklat himhim ahi.
I gam siatna uh, thauvui-thautang a bawlhoih theih di hileh, a hoihna a sawt mahmah ta ding. Sepaih lah, huihkhua apan, leinuai ( Underground) tanpha a om. Leitual a lah, VDF tanpha kinei – buaina tam deuhdeuh bang maimah. Simlei vai a makaite lah, saptuam in asuan mahmahte uh h-zel – lah, etton theih dia kuamah omlou.! Pathian' gamna sepna chi a, Pathian phatna la khawng sa a tamzaw in lah, mihing' mitmei kia veng. Mite' muh didan in ahoih thei bangpen a kichei in, Album khawng ah form tuamtuam silh-kheng zangzang mah lehang, I lungsim ua Pathian omkha nawnlou – Kicheina vuak in I lungsim uh luahdim zouta. Amah bia kichi hang a, I lungsim uh I piak kei uleh, phattuamna bei ahi. Pathian thu awite kichi hang a lah, a thu zui mawngmawng lou – a thu manglou kihimai. Amin suang hial a I kipolhkhawm chiang un leng, I mangngilh kha sek uh. Huai ziakin, Pathian' Thutak – Laisiangthou pansan a I kibulphuh kei ngeingei uleh, a paimang gawp di kihita.
THUDIK ( Thudik tuh Thutak chi lehang leng a dik veve ding) Leh DIKTATNA A KIBULPHUHNA dia poimoh tampi a om ngei ding, himahleh tamlou chik gen sawm ka hi. A poimohpen zaw, thu tampi va gen a hikei a; I genkhiat sunsun hoih taka zuih a poimoh pen a hizaw. Kum 2014 in, Tuailaite Khrist gim I nam sauhsauh ua, huai nung kum 2015 in I ngaihtuahna te uh Khrist in hon thuzoh nawn hi. Huai ziakin, Diktatna leh Thutak a Tuailaite'n kibulphuh haksa I sa het kei ding uh. Mi atamzaw, khovel' muh a diktat leh thutak a ana kibulphuhsa leng I omkha maithei ua; tu'n bel, Pathian' mitmuh a diktat leh thutak a kibulphuh zaw dingin kisa chiat ni. Huai ziakinm, diktatna leh thutak a kibulphuh 'tuailai' hihtheihna ding a poimoh ka sak khenkhat ahihleh -

(1) HOTDAMNA LEH PIANTHAKNA KICHIAN NEIH A PATHIAN TOH TON GIGE DI:
Hotdamna leh pianthakna kichiantak neiloupi a bel Diktatna leh Thutak a kibulphuh chih thil hithei chiahlou khat ahi (Jesu Khris neilou-te leng diktat leh thutak tampi a om veve uh). Hotdamna I neih a Pathian toh iton gige leh bel huaite, thil baihlam tak ahi. Pathian toh ton gige te'n, Galatiate 5: 22 leh 23 a KHAGAH kigente a neikim vek ding uh chih theihsa ahi. Thilkhat hon gen mawkmawk leng, Election om chiang a, Vote guuk hoihlou ahihdan thei kawmkawm in I chiing zongsak ta uh. Vote gudia na kisak lai in, na zahtak mahmah - Pastor khat khawng in honna enzui vungvung leh na gungam teitei diam? Kigungam hetlou di ahi. Himahleh, huchibang a honna enzui di omlou chi a, kisuanlahna tel hetlou a vote I guk lai un leng Pathian in honna mu gige ahi chih theita ni. Khrist toh I ton gige leh, amah mangngilh zual chih omthei lou himhim ahi. Jesu Khris i diktatna uh leh I kibulphuhna ding uh ahi.

(2) A NUNG I ZUIHPA UH THEIHCHET DI:
Anung I zuihpa uh, bang chibang mi a chih I theihchet kei mawk uleh, gammang theih ahi. Lungsim venglou hingallou in tuh a theihchetlouhpi pawng zuihzuih khollou ding ahi. En leng, Jesu Khrist' nung I zuihna uah, I pawng zuihkhak ding uh ka lau. Mihing' sanga thupi zaw zui I hi uh chih I theih ua, Pathian munteng a om ahi chih lel thei lehang leng, DIKTATNA leh THUTAK a om tuh, a hidi sa ahi. Zanlam, mikhat in, " Laizial tepte vangam a kai ding uam?" hon chi mawk a, ken leng " Vangam a kai di uleh, kailouh di uh zaw ka gentan thei kei. Bible ah leng, hiai toh kisai direct tak in a kigelh kei ding. Himahleh, Laisiangthou in, Isai 66: 1 leh 2 ah Toupa'n hichi'n a chi, 'Van ka tutphah ahi a, lei ka khengakna ahi. Inn bang chibang ahia n'on lamsak ding uh? Koilai ahia ka khawlna ding? Hiai thil bangkimte lah ka khut a ka bawl ahi ngal a, huchi in thil bangkimte a hong omta hi, Toupan a chi: ahihhang in, hiai migentheitak a om, lungsim a kisiik tuntun, ka thu a liing zel tuh ka en zaw ding' chi'n ana gen hi. Van a tutphah hi a, lei a khengakna ahihleh, bang chibang inn lamsak ding i himah ngut ua? Ama' tentheihna inn tuh i sapum ahi. Himahleh sapum khat peuhpeuh ah a teeng thei kei. A teen theina SAPUM om dingdan i laisiangthou sim in hon hilh hi. Ahihleh, laizial khu lunglung lak ah Pathian om nuam dingin na gingta hia ?" ka lehchih daih hi. Amah le hong kingaihtuah vengveng a, " Hiai chu, thukhunlui hunle ei vele.." chi'n hon dawng hi. Huai takin, " A chihleh, ' Pathian, khovel leh a sung a thil om tengteng siampa, lei leh van Toupa ahih ziak in, khut a lam inn khawng peuh ah a om kei' chih, Nasepte 17: 24 ah kigelh ahi. Khut a lamlouh inn tuh na Sapum mah hilou di amaw?" ka chihleh, a dai vengveng hi.

Mii khat, kikhawm tawp phet in Biakinn apan taipawt ngal a, Dailen buuk sung ah 'Laizial tep in, a kamsung ah guantheih tuamtuam guanglut ngal hi. Pathian munteng a om ahihdan theilou a; Biakinn sung kia a om hidan a ngaihtuah a hidiam? Tulai in leng, Biakinn sung a( kikhop hunsung a) phone khoihden bangzah hiam I om ngei ding uh. Biakinn sung a phone khoihtheih louh chinuam ka hikei. Himahleh, na kiang ah Pastor pa hong tu leh, phone na khoih thouthou ngam diam? Na khoih ngam kei di leh, Pastorpa bawlpa leh na phone khoihkhoih pen bawltu-te bawlpa, na kiang a om a, na thilhih teng hon mu gige eive. I zuihpa leh biakpa uh I thehchetlouh ziak ua huchi banga omkha I hih tak uleh leng, kipanthak (kibulpatthak) ni chinuam dan ka hi.

(3) MI' DIKLOUHNA GEN NGAM DI:
2 Samuel 12:1-7 suk khawng I sim leh - Jawlnei Nathan in, Kumpi David natawm mai-et lou a, va maitang kawk ngam ahi chih I mu uhi. Tulai in bel, diktatlouh ziaka sum hau hi a theih a om tata I mai-et ua, aguk-agal in a inn uah I va diang duaiduai lai tel uhi. Diktatlou taka hausa khenkhat ngial in, a hauhskna uh Pathian' vualzawlna hidan a agen chiang bang un dik I sa mahmah lai uh. Hiai khawng ka ngaihtuah chiangin, nungak zawlgai – a gil a puakkhiat nung tanpha a leng, a gai hilou a, gilvah maimai ahi chi a pang teitei toh kibang hidan un ka koih. Mi khat, a loh toh kituaklou hial a hong khan hulhul mawk leh tuh; a nekguklai I muhlouh hang in, negu ahi chih a chiang huntawk. Huchibang tanpha a muhtheih di igam uah tam mahleh, va maitang kawk ngam ding I om nai kei uhi. Mi dikloute maitang kawk a, a diklouhna uh pulak ngam dingin Tuailaite kisa thak ni. Banah, David banga diklouhna I neih khak a, maitang kawk a I om leh leng, I pomtheih(pomsiam) ding uh ahi.

(4) KHOVEL HAMPHATNA TAAN NGAM DI:
1 Samuel 20:31; 23:17 khawng I sim leh - Kumpi Saul in a laltutphah humbit sawm mah leh atapa Jonathan in, David pen Pathian in kumpi dia teel khin ahi chih atheih man in, Pathian' lemgel lemsa in a laltutphah David adia laan khe ngam ahihdan I muthei uhi. Ei tuailai te'n leng, nu-le-pate' summuhna theihpih sawm in, diklou taka muh a omte nawlkhin ta ni. Pathian in diktatlouhna hua ahi chih thei a, kholak a 'poster' I takkhiat zelzul ngal uleh, a takkhe te bek in zui masa ni. I takkhiatte uh, sawt omlou ding a hihman in ( kibotse pah di, vuah zuzek leh leng muat ngal di), a bulpantu in pang peuhmah le, aban zaw awl a hong hoih mai di ahi. Veng chih in leng, 'Diktatna Pawlpi' chih bang kiphuan in, I vengsung ua sepna neite' min leh, a mite' omna mun toh a list kaikhawm in, notice board khawng a miteng' muhtheih di'n takkhe lehang bang a chi dia? Huchi hileh, miteng in – sepna mun toh kituaklou a va om vekvok nuam salou ding ua, phatuam mahmah maithei eive!!

(5) PATHIAN DANG NEIHLOUH DI:
Thupiak sawm-te I sim leh, Pathian dang neihlouhdi ahihdan I muthei uhi. Sum-le-pai, mihing, lalna, sepna, khovel nopsaknate leh a dangdangte amasapen a I koih chiang a, Pathian dang nei kihimai ahi. Hiai, Pathian' zakdah mahmah ahi. Serial etnop ziak bang, Football kimawlna etnop ziak bang in, kikhop ding ngaihsak kei mawk lehang leng, Pathian dang biakna chikhat himai ahi. Banah, Gospel Video Album piching khat bawl in, lapawl memberte leng asiam ngen - hoihlua. Himahleh, mi' hihdan leh chiindan chi a, kicheina leh form lam khawng mah buaipih pen a I neih khak zenzen uleh zaw, milim bia-bia ana kihi 'Daih Zozen'ding ahi – Pathian pen ngaihsak khalou I hih maimah chiang ua. Huai ziakin, Pathian dang himhim neilou dingin, Tuailaite bek kisathak ni.

(6) LAISIANGTHOU MAH PIBAWL DI:
Laisiangthou pen, Pathian' tate adia 'hinna ann' ahi chih I theichiat uh. Himahleh, ann nengeilou pi in hat vevu I sawm sek ua; hat leng I kisa mahmah uh. Banah, mi' gendan, mi' zuihdan, mi' chiindan chihte a buailou in, Pathian' deihdan lam ah buai zawta ni. Mi' thu nialngam zen a Pathian' thu zuih sawm ding ahi. A chituam liuliau ngam leh laisiangthou – thutak a ding ngam Tuailai hihsawm ding ahi.

(7) A KIKHEL MA A KIPATTHAK DI:
Samson' tangthu neulai pek a I theihsa uh ahi. Abul-abal in genkei lehang leng I thei vek ding uh, huai ziakin, gensuk mualmual ni. Sih di ngak mai a, Samson om a, mittang natawm khelkhiat sak a aom hun in khua a muthei kei hial ding. Mial nuai a om toh kibang ding ahi. Himahleh, Pathian lam-etna bang a ana omlou ahihdan kithei in hong kisiik a, Pathian' kiang ah hatna ngen in hong kipanthak hi. Pathian in leng hatna pia a, a sihma in amelmate tampitak' hinna la malam hi ( amah leng si ). Tuni'n, I gam uh gammial ahihman in adik-atang leng I theibun kei uh. Ei tuailaite'n, Pathian' mel zongthak in, amah toh pangkhawm peuh lehang, melmapa setan in hon maingap lou ding a, I gamsung uh gammial pen vaaksak zou ngei ding ihi uh. Huai ziakin, ei mahmah in pan lathak in, thil diklou hih dingin I khut leh khe, banah I ngaihtuahnate uh zang nawnkei ni.

Upa te'n, " Khau saulua kikai awk nuam " a chih bang un, gengen in sasa lehang leng I zuihkei uleh, kikai awk dia...phatuam tuanlou di ahihman in, I genkhiat sunsun te uh adik omte zuithei siausiau dingin, Pathian in hon vualzawl hen la, hoih deihluatna ziaka genval khak omleh, hon ngaidam leh I chih bok ahi. Kolossate 3:25 na a, "" Thil diklou hih pa'n a thil diklou hih man a mu nawn ding hi; mi khentuamna himhim a om ngal kei a.." chih, lungsim ah vom tinten kawmin hinkhua zangta ni.

Laigelhtu' Lungsung Pan:
Hiai thugelh, ka tuailaipihte lak a genkhiat ding a ka geelkholh himahleh, buaina tuamtuam ziakin hun a kikhel ( hun zangtheilou) man hi. Pathian in, " A genthohlam na hihtheih vaklouh toh, a gelhthoh mah in ana puangkhe mai in..." hon chihna banga ngai in; ka thugen sawm teng hiai a hon luikhia ka hi. Laisiangthou sin leh Pathian gam nasem tuamtuam-te apan leng a ngaihdan uh ka kaikhawm ah, hiai sung ah k'on zeptel hi. Ahoih pen leh dikpen ahi ka chi kei. Himahleh, point 7 teng zuihzoh sawm chiat lehang, siatna hon tun hial dingin ka gingta kei. Huai ziakin, a thu simkha taphot, van Pathian in hon makaih tawntung leh chih ka thumna ahi.

1902 – Ka Kipak – 2016