Ahihlouhna Ah Pathian Minse Saksakkei Un!
By VzSiam

Tutung a i tuah buaina vengvungte tuh tampite'n, 'Pathian i limsaklouh a, gitlouhna leh thangtatna a i na bual ziak a Pathian' gawtna kituak ahi,' i chi a, kongzing ah hitaleh, hanmual ah hitaleh, gamvai a sisan soute' kipunkhawmna teng ah i tangkou ua, Pathian i sam kheukhou geuh uhi. Ke'n bel ka gingta dekkei! I Pathian thugente leh i thumnate dem ka hikei a, himahleh Pathian i ngohna uh ngohkhial kisa hizaw ka hilim.

Mei-am i sawk taak in a sa mahkei dia! Tuisou lai i sawk taak in i khut a pol nahouhkei dia! 'Tuisou ka sawk leh Pathian in hon awikei a, hon gawt a, ka khut a polsak,' kua'n chi ngei a set a! Thil gilou mah hih ngiitngeet hi ve hang, gilou gah i lou namah ke! Vomva kung ah kua'n singthupi a lou ngei a eita? Hoih gah deih in hoih hih ni hang in, hoih gah i lou setkei di maw! Pathian' hon gawt tuantuan le a kuul sam a! A hong kitaaklah luatna ding le a om sam a! Huai mahni tuhgah lou ding lel khawng! Pathian bang i ngoh khempeuh ua, i lak ua omom le ahi na peuhset diam ah!

Mi'n i nunglam a hon gen chiang ua lungdam kua i om a eita? I hihna ngeekngeek hon gen chiang un leng i pomsiam ua hia? Zaktamoh a va kiphuul sekta hilou i set umaw! Huchi a hih nung bang dia Pathian peuh a hihlouhna a ngohngoh i hi ua? '(Ei zaw) I thil hihman geih mu i hi ngal a,' chih gelh bang in.

Mailam muhkholhna neuchik leng neilou a, ngongtat a, sum-le-pai deihtaakna ziak peuh khawng a hihlit-hihmoh neilou a ut-le-dah a i kitalkaih taak in i puuk nasetkei dia! Kizuakzuak hi ve hang i gai khong mahkei dia! Tu bang hun a mi gam leitang mahmah awlmoh a, a mite mahmah it a haksatna teng palngam a a kipatlai a ei a hauhsakna kia lunggulh a i kipat taak in i zawngkhaal gawp mahkei dia! Mi hausa, a limlim ne a, kho-ul kai zungzung a nasemloute a hong thau in zunkhum leh lungphut haat khawng hon nei in a hong zawngkhaal hiaihiaikei ua hia! Kihazaat ziak peuh a unau suul khat a piangkhawm helhel hi napi kihoutheih ding vai himhim hawmlou a, kihoutheihna ding kong himhim khaak mengmeng a, kihou theihlouhna ding kong peuhmah zatak a hong dedawte mi'n a hon simmohlou ngam mahmah dia hia! 'Akta mangkuan kitutu,' chih gen ahi ngal a.

Bible tang ka theita chihman a huai Zawlnei Amoste, Zawlei Ezekielte' kamsuak khawng a gam leh nam ziak a sisan sou litlit a paikhawm mite toh thathoh leh lam-etna got khawng phatuam lawtel di'n ka gingta ngelkei mawk! Huchi bang a tohthoh theih a omte zaw sahkhua in a mit uh a mialsakte ahi ua, tu in Syria khawng a buaina bawl in a phaphetkei uh. Amau zaw a pathian u'a dia a tawpkhawk a pangte hi ve un!

Hiai thute zaw ka biakinnte uah sun leh zan a gen in a om a, himahleh ka dampih tuankei uh. Ka kha uh gehen ah pai mai hen! Ka sapum uh hon hondam un! (Pathian' zaakdah louh di'n!) Hiai gamnam pulpit (political plateform) ah zaw Pathian thu gen zolzol theite sang in hon ukkhum a hon maibawl namte khingthei ding, a pilna uh kalhthei ding, a lemtheihna uh phuuk thei ding, a thangkam uh awklou a susai thei ding mi ka deih uh! Pathian i poimohkei ka chi hetkei. I homework hihloupi bangchituk in Pathian muang le hang leng bang a phatuam dia?

Gamnam (politics) vai a madawk ut a, denchiang a bang hiam dinmun etlahhuai tham khat lam-en giugiau i hihleh Pathian thu chihman a i mihinna a belhlou pi leh kua mah neek tuan ding leng hiloupi gamteng i mawk siatkhiat sang in i dantan ah, 'Pa aw, hiai mite' kiang a bang gen ding ka hia? A ma uh bangchi pii ding ka hia?,' chi'n lungsim tamkham in Pathian buan in amai ah kitulut le hang mite' neektheih ding thu hon pekha mai na ke! Tua bang a i thum nung a hiai teng hong suak hia leh? Mi teng in nethei a, ke'n a na haak tuam ka hi hia leh?

Jakop' Pathian ei' Pathian leng ahih saam ziak in Kanaan ah ahon pikei ding. Mosi' Pathian ei' Pathian ahih saam ziak in i saltanna a pan a hon suutkhe kholkei ding. Englishte' Pathian ei' Pathian leng ahih saam ziak in zalenna leng i mu tuan kholkei ding. Pathian in amah gingtate ana pumgup hileh milem bia vaite'n Pathian hing bia Englishte apa'n suahtaakna a na ngah kholkei ding uh. Thudik ahihzawk ziak in kuama'n suahtaakna a nial theikei hi. Thudik ahihziak in i pang dia, thudik ahihziak in ma i suan dia, thudik ahihziak in saltanna apan i suakta dia, thudik ahihziak in zalenna i ngah ding hi. Thudik ahihziak in Pathian in leng a hon panpih khamoh di hia! Himahleh a miteel Abraham bel a deihsak tuntun a, a gam a pan a pikhia a, diklou simpi a mi' gam suh in amah a pia hi. Gam ama' a hive'n, pethei nalou di hia!

Pathian' nnasepdan hi a i theih uh, ei theihdan ana hikhin kholkei mai di e. Kikou zoizoi in kulhbaang muanhuai tak a chim zuazua a, phaak lite' khekhap ging tuh sepaih sang tampi' khekhap bang in a ging a, suangnou khat lel in melma a puuk hi. Hiaite Hebrute' khangthu lel ah ahi a om. Tuhun in hilou. Gingta leng zaw himai maithei. Huai lah van a gah ahi zel a. Huaiziak in hiai thute khawng a kipawng hasot a, kipawng suk hangsan a, ei lam a hihdingte; tha piakna ding a pe peihlou a, kuhkalna ding a kuhkal peihlou a, kideekna ding a kideek theilou a, dawilokna ding mun a hai hansan a i omleh hiai tangthute a ginna ngak in koimah tan a hon tunkei ding a, a hon puukpih phet ding hi. Denchiang a Pathian muang selua in Jordan lui hong kiphelkhap ding ngak a luipiau a i tutkhawl deemduam ding uh lauhhuai sa i ve. Jordan lui bang le siampute'n tui a va ngap uleh leihul hong dawk panphet eive.

Hikei veh aw, makai aw, na Bible khup phot inla, leitung gam tuamtuamte'n diklou tak a kivaihawm khumna deihlou a a kiphin chiang ua bangchi panlaak ua, bangchi zohzel uhiam chih va sui tadih inla, tamkuam na sui zoh chiang in Pathian muang kawm in ma hong kai in. Phatuam zaw ek maithei eive aw aw.

Ngiate leh mulukolhte'n gan silung tung a gilvah na'ng lunggulh a a boh lutlut bang un tampite'n i lak ua thil piang tuh a boh lutlut ua, a sa hoih pen tan sawm in i phe lukluk uhi. Huchih lai in hamphatna delh leng hi tuanlou, gam-le-nam itna leh awlmohna ziak liauliau a tawlnga manlou hial a thapia leng i tam mahmah ua, phathuai mahmah uhi. Chikmah a leng makai hi ngeilou, chikmah a leng makai dia kikoih ngeiloute himahle uh gam-le-nam' sapna nial theilou a, ka mankei chilou a, ka kizenkei chilou a, ka gensiamkei chilou a, ka neizoukei chilou a, ka pilkei chilou a, mahni hihtheihna tantan a makai ding a kipete' hansanna in ei midangte' dawilokna hon sulang mahmah a, tua bang mite phathuai in ngaihthupit huai mahmah uhi. A tate migilou in a soisak dai dide a gal-et kua a om a? A hatziak in a hun ahia? Itna ziak in hatna a neih bangbang in a hun ahizawkei maw!

Adik-atang a i gamtat a, gitlouhna zintun nilouhlou a, Pathian' pahtaak theih ding mimal hinkhua, khotang hinkhua, nam hinkhua i zat nung a hiai bang buaina leh nuaisiahna i tuah chiang in Pathian' gawtna chi in ngoh pan ni. Huai a hihma zaw ahihlouhna ah Pathian ngoh in minse saksakkei ni. A gawtna ahi zenzenkei a, tuhgah lou i hilel zaw hi. Denchiah thiikthusepa' hehna i tokthoukha di.

Pathian zaw a siangthou a, a zahtaakhuai a, a lauhhuai a, mawkbawl vual ahikei. Na Pathian ahihziak in a hon deihsak tuam kholkei maithei. Himahleh thutak ah dingkip le chin, amah tuh thutak ahihziak in a hon vualzohpih kha maithei! Pathian muang in Pathian muangte bang in kalsuan ni. Selah.