Toupa Toupa chinapeuh Vangam alutkei ding
-Jamin H vualnam

Mathai 7:21-23. Toupa, Toupa,honchi napeuh vangamah a lut kei ding uh; ka Pa vana om deihlam hihte tuh a lut ding uh.Huai ni chiangin mi tampiin, Toupa, na minin thute ka gen ua, na minin dawite ka delh khia un, na minin thil lamdang tampi ka hih zel uh hilou hiam? a chi ding ua. Huai hun chiangin, Nou thil gilou hihte aw, ka honthei ngei kei, ka kianga kipanin paimang un, chiin, amau ka hilh ding.

Toupa Jesu Khrist a, Pianthakna diktak leh kichian neilou kiathamlou a, khalam a pianthak ban ah salam mah aleng pianthakna leh kikhek na omlou na nana in Toupa deihlam asem in ahihkei himhim dia, huaite mah adin vangam lutding thil hitheilou ahi chih atung a i Bible tangtel omdan in agennop ahi. Khristian innkuan akipan a piangkhia, khristian gam a khanglian khristian mite tawh kithuah leh hing a teng a nungta khom, biakna leh phatna lunglut leh tatsatlou a a innsiang zuan gige chihman a vangam lutngeingei ding chih hituanlou hi. Tatsatlou leh hunteng a thumgige, a thu-le-late sim a sa a tangkoupih tontung, genthei liangvai te panpih, tagah meithaite kaankuah, sum-le-pai tampipi agam nasep nadia thawh toihtoih, khitui naptui tawh Toupa Pathian phat in phaphet kei mah leng, vangam lut teitei ding chih hituan nailou hi. Toupa van a om Pathian thu-le-la te limsak a, a thupiak leh sinsak dante a hing a, a deihlam hih a piangthak diktak te kia vangam lutding chih ahizaw hi. A huchih kei intuh Toupa'n thil gilou hihte honchih san dia, den a igen diudeu isep-ibawl teng bangmahlou leh vuaksuak hong hihding banah, ka honthei ngeikei, ka kiang a kipan paimang un hon chihsan lel ding hi. Khadiklou leh setan in leng thil hihtheihna nei veve ahihmanin pilvan kisam petmah hi. Tuabang te'n Toupa' min suang in thute genin gahsuah bang in kilang khanteh, dawi-le-kau te delh khia in thil lamdang bang leng hihthei khamoh lou ding uhi. Himahleh, khasiangthou nasep hia, ahihkei leh setan nasep hizo chih ngentel tak a theihtel poimoh mahmah hi. A huchih kei intuh thukhen ni chiang a Toupa' vaihawm namai a pan paihkhiak hi veve ding hi hang. Tuaziak mah in Toupa min a mawkmai a lohngam huai in kiselhpih huai hetlou ahi chih ngaihtuah thak a phawkthak deih huai petmah hi. Huchih komkom in bang dinmun a om a dingkha kahihiam chih kuapeuh kivelthak kuulpetmah in deih-huai mahmah khading hi. Aziakbel:

 Khristian kahi kichi nazongvangam lut kimlou ding a
 Khamangthang mannazong vangam lutvek tuanlou ding hi
 Biakinn kaigige nazong vangam alut vek kei ding a
 Thawhlom/thilpiak gige man in vangam kilut teitei tuanlou ding hi.
 Ngetna leh thuumna neih man a lohchin hipah lou a
 Thuumna khempeuh dawnkim hivek lou lai hi.
 Kong it hong chinapeuh in hong hehpih kimlou ding a
 Hong hehpih khempeuh in zong hong it veklou ding hi.
 Hong ngai nazong in hong itvek lou ding a
 Hong ngai khempeuh in hong hehpih kimlou lai ding hi.
 Nupa khempeuh ki-it kimloua
 Sang-gam laiguizom nazong ki lainat veklou hi hang.
 Kingai tengteng kiteng kimlou a
 Kiteng khempeuh kingaih ziak hikimlou hi.
 Hausa khempeuh kipak in lungkim veklou a
 Azawng tengteng lungkham in dahkim tuanlou hi.
 Melhoih nazong ngaih huai veklou a
 Melhoihlou nazong muhdah huaikim tuanlou hi.
 Apil khempeuh heutu/makai hiveklou a
 Heutu nazong pilkim vektuanlou hi.
 Heutu khempeuh zahtaak kaikimlou a
 Nungzui khempeuh a mawl hivek pahlou hi.
 Laisiam nazong in sepna/kaam neikimlou a
 Kaam/sepna neilou khempeuh apillou/laitheilou hikimlou hi.
 Akap khempeuh lungkham leh dah hiveklou a
 Anui khempeuh kipak hikimlou lailai hi.
 China/damlou khempeuh sivek lou a
 Asi khempeuh damlou/china hikimlou hi.
 Ann hai nazong thaukimlou a
 Agawng khempeuh neihlouh man hivek tuanlou hi.
 Samkaang khempeuh upat ziak hivek lou a
 Naupang chikleeng samkaang om veve hi.
 Mi khempeuh lohching veklou a
 Lawhsam nazong thulim louh man hituanlou hi.
 Thu khempeuh hoih in zaknop huaivek lou a
 Laa khempeuh hoih in ngaihnophuaivek tuanlou hi.
 Zuihzoh man a laigelh/thugen hipahlou a
 Akigelh/akigen khempeuh zuih teitei ding hikimlou hi.
 Lawhchin ziak a vualzou hipah lou a
 Lawhsapna zong lohchinna suakthei hi.
 Hoihlouhna tengteng thulimlouh man hipah lou a
 A thulim nazong hoih khin vek tuan lou hi.
 Diktatna kichi nnasep thupi leh alet thu ah kinga lou a
 Diktatna kichi atawm-atam, aneu-alet a na gin-omna ah kingazo hi.
 Nang-le-kei Toupan hong it vek a
 Athupiak leh a daante zuidin Toupan hondeih vek hi.

Tua ahihmanin ani hongtun a thukhenna leh vaihawmna ma a idin chiang in koilam izuan dia? Tangtawn hinna lam maw, kah leh hagoina? Hun nanung ahita, a gam hong naita ahihmanin i dinmun ding velchian hun mahmah ta hi. Ahun hogtun chiang in Toupa'n nou thilhoih leh nasep hoih hihte, ka kipahna leh ka lungkimna ka tate honchih a, ka kiang akipan in koimah ah napai mangthei keiding uh honchih deih-huai in uthuai ding hi. Huaiziakin, "Toupa Toupa chinapeuh vangam alutkei ding" chih limtak a ngaihtuah in kisak kholh hun ahih dan phawk thakthak ni hang...