Salpha-te Toh Houlungkup Zan..!!
(Closed Door Meeting – Self Introduction)
Written By: K Lianthansang

January khabul lam hi'n ka thei. Nitak khat, Lamka Damdawi Inn a morgue ( misi koihna ) ah ka va hoh hi. A mawk a hoh ka hikei a; salpha-te suunna neikhawm ding leh thugen manpha taktak-te tungtawn a khat-le-khat tha kipetuah dia hoh ka hizaw. Salpha-te' sungkuante, Numei pawlte, JPO, Student Union leh Ukil-te apan in thugil leh theihtuak tuamtuam leng ka ngaikhia uhi. Nitak dak 10:00 nung in ka pai a, ka sungte ana lumkhin vek uhi. Ka common room uah 'meiphu' ana kikoih a, mei-am leng ana tamlai mahmah hi. Bangtan hiam ka kihailum zoh in, lupsan mai ding a mei-am a pammaih luat ziakin, tamlou ka teen ( lakhia) hi. Ka mei-am lakkhiat-te, a tuung in am hoih mahle uh, a am dangte toh kisukha hetlou a hong om hial chiang un, a vu ( meivu) hong tam deuhdeuh a, mit deuhdeuh maimah (u)hi. Ka lungsim in, ' Tribal Unity chih a kigen vingvengna kal ah , khenkhat ana phengphi tuam mahle uh, tunung chiang in hong mit deuhdeuh ding ua, adangte toh pangkhawm a toksuah hong hinawn thouthou ding uh. Hiai meiphu leh mei-am in Manipur singtangmite' omdan taklang hoih hina maizen e...' ka chi namnam a, lupna lam ka zuan kawm hi.
Ka lupkawm in, thugensiam tuamtuam-te' thugente ka ban ngaihtuah dundun nilouh a, ka ihmu thei zok kei. Ka theihlouh kal a ana ihmu kha chu ka hipeuhmah ding; ka manglam in, galvan tawilou Salpha mi 9-te toh innsung khat ah ka na kimukhawm uhi. Kam khat lel leng apau omlou in ka dai sipsip ua; ngaihtuah leh puaknat mahmah bel neivek uh hidan in ka mu hi. Kipolhlimna leh thuvantang maimai genna di mun a hihlouhdan leng ka thei a, amau leng theivek hiding un ka gingta. Bang chidan a, Phamsa Salpha mi 9-te toh ana kimukhawm kha zenzen ka hiding uam chih, tuni tanpha in leng ka ngaihtuah khe bun kei. Adik mah gensuk mai leng. Huai hun in, 'CHIAMNUIH' bawl a nui zaizai leng ka om kei uh. Tal sawn hial a om bang leng a om ua; maban hun ding ngaihtuahna chiimtak toh ngaihtuah hiding un ka na suangtuah hi.

Kongkhak teng kikhak phitphet mai a, alai ah 'candle' kidevak kiukiau hi. Amel uh kimuchian kei mahleh, ka meltheihsa ngen ahih ziak un, amin uh toh ka thei chetchet vanglak hi. A lamdang mahmah nawn ahihleh, huih (oxygen) tanpha luttheilou phial ding a bang (wall) ki-umkual sung a om himah le ung, a laizang a candle kuang liakliak pen, huih in mutmit dekdek bang in hong phe liakliak zel hi. Koilam apan a tua huihnung hong kipan hiam chih tanpha leng ka thei bun kei. Alang-alang ah muttuah in om a, mitkhe lou hamham in om mun mahmah hi. Huai hun in, ka ngaihtuahna ah – Manipur a 'Tribal Unity' mah hong kilang zel hi. Ka ngaihtuahna teng Salpha-te' theih dingin a phalhuai het kei. Ka ngaihtuah theisak leng, khase law mahmah ding ua; a kha uh leng a tawldamlouh khak ding ka lau mahmah hi.

Hun bangtan hiam ka tutkhawm zoh un, Salpha Ngalliam – Robert V. Jamminthang hong dingkhia hi. Coat vom khat silh hidan in ka thei a; a khekol bel ka muchian kei. Bible hon phen a, [Paunaakte 14:31 - 34] sunga thupil omte hon simkhia hi. Aw ngaih lawlou lah, chiang takin, " Mizawngte zawhthawh bawl mi in amah Siampa simmawh hi a, a tasamte tunga siam mi bel Pathian pahtawi mi hi ahi. Siatna hong tun chianga, migiloute tavaih a, sihna nangawn hong tung mahleh, midiktatte'n bel bukna nei lai hi. Theihsiamna nei mi' lungsunga pilna teeng a, mihaite lak nangawna amah kilangsak hi. Diktatna in nam pahtawi a, khelhna in bel nam khat peuh daisak hi " chih hon simkhiat zoh in, thuumna hon neizui ngal hi. A thumna neihna a, agen teng bel ka thei nawn kei.

Thuumna a neihzoh phet in, " Kei ka hihleh, Robert V. Jamminthang ka hi. Thanlon khua ah, February 3, 1985 in ka na piang hi. Kum 2013 in, ka pa V. Vungkhojam in 'cancer' natna ziakin honna omlouhsan a, ka nu Chiinneihching bel tuni tanpha a damlai. Unau mi 7 ( pasal 4 leh numei 3 ) lak a, a 6na ka hi. Hon gensau zek leng. Ka min bul a ' Robert' kikoih pen, ka minphuaktu ka Pu V. Tualjam' ( V. Siampu' pa chi lehang chiang pen inteh ) deihna bang a kikoih ahi. Ka neulai, kum 2 vel ka hih apan in ka chi khawng bawk(pol) in, a sung ah tui khawng om a, hon dawtkeksak chiang ua leng sawt phatheilou ahihman in, Thanlon khua ah hon atsak uhi. Ka ki-at zoh in Doctor-te'n damdawi hon pezel mahle uh, a hun beisa ngen ahih ziakin, hon nesak ngam kei zel uhi. Atawp in, ka Pu Thangsuan ( tua Bungmual a teng – Khamkhanthang Valte' pa) in thumna khawng hon neihsak a, ka damsuah hamham hi. Ka dam nung in, Pathian' ziak a dam ka hihdan kithei in, Sunday School khawng hoihtak in ka kai a; Bible chang gentam ziak khawng in leng lawmman ka sang zel hi.

Ka pa, Solkal Skulpu himahleh, 'kailouh loh' a laknuamlouh ziakin a sepna mun ah om gige hi. Siamsinna leh khawsakna lam tuamtuam etna ziakin, 1991 in Lamka ah ka pem ua, Ebenezer Academy Skul ah ka siamsinna maban ka sunzom hi. Class – V tan huai mun a ka kainung in, Novadaya ah Class – VI leh VII ka zil hi. Unau melhaih ( 1997 kum) ziakin, huaimun apan Ebenezer ah Class – X tan ( kum 2000 tan) ka kai nawn hi. Lasiam hikei mahleng, mi'n lasa ding a hon sawl nak uleh, ka sazui ngal mai. Sapum siangthou taka kepsiang gige ka poimoh ngaih mahmah a, nitak teng phial in ( lupma in) ka kisil gige hi. Banah, mi om maimai thei ka hihlouh man in, laisim bang leng ka tu hithiat thei kei. Zingkal chiang bang in, inn khawng kimvel kawmin ka sim zel hi. Naupang leng ka ngaina a, awlmoh leng ka hau mahmah. Awlmoh ka hauhluat ziakin, 1997 a buailai in, 'Duty' dia hon sawlkhaklouh pi khawng un leng ka va duty sek hi. Huailai hun sutkik sawm hikei mahleng, ka mizia na theihsiamna ding ua k'on gen ahi.

Ka unau ua a neulam ka hihziak leng a hingei dia, ka nu ngai diak ka bang. Ka omlouh kal a ana pawtkhak chiangin, gintakna teng va banzon zel in, ka muhkhak nana ah, ' Nu, ka hohdek nana ah nana hoh a..' chi'n ka chiamnuih suk zel. Huchih kawmkawm in, Bethany Christian College ( Sielmat) ah Class – XI leh XII zoukhia in, Delhi lam ah B.Com ka va zil hi. Damlouhna ziak in 2nd Year tan ah ka khawlsan a, Lamka a NGO khat ah ka sem hi. Nungak leng, 2003 in ka na nei a...kum 10 val bang kituak takin ka kingai uhi. Kivakna ding detdoutak ka neihlouh ziakin gawmding simthu bel ka lelpih ngam kei. NGO a ka sepna toh kei hinkhua a kituah chiahlouh ziakin ka tawp a, New Bazaar a ka U Gin' ( kou unau a 2na) pharmacy ka va ngakpih zel hi.
Huchia haksatna leh lungngaihna khawklua tuaklou a ka om laitak uh, 2013 kum in ka pa'n sihna hanmual lam hon zotsan hi. Huai hun apan in ka lungngai vungvung mai a, ka pa'n ' lai hoihtak in n'on sim dia, mi khat bek n'ong suah sawm di aw, Bawi ' chi'a hon thuhilhna kampaute khawng ka ngaihtuahkhe zungzung a, kisikna ngen in ka pumdim. Ka pa' sihni in leng, a luang bul ah, ' Hon ngaidam mahmah in aw Pa, na thu ana zui hileng, tua summuhna kichiantak nei di inga, lungnuamtak a si di hi chin a maw ' chi'n kahtam lou mahleng, ka pa'n a zathei nawn kei. A sihnung kum 1 achin in leng, a haan a va pai in, ngaihdam ka va ngenngen lai hi. Diktatna ngaisang mi ka hihman in, kaam leithoh ka deih kei a, ' Bangteng hileh, ka neu apan ka lunglutna gige 'Bible zil' ahihman in, Bible ka zil ding a; ka zohchiang in Missionary in ka kuan ding ' chi'n, thupukna ka bawl hi. Ka tanaute kiang khawng ah leng, ' Khovel ah lah sawtpi damlou di inga, Bible zil in Missionary na sem in ka pang di. Hon siamtu' deihna leng hipen dingin ka ging ta ' chi'n ka genzel hi. Kei' lunglutna tak zaw – 'Social Gospel' ahi hi.

Huchi'n, kum 2015 apan in Grace Bible College ( GBC ) ah B. Th ka na zil hi. September 1, 2015 zingkal leng ka thoukhe pah a, inkong khawng ah naupangte toh kimawl in chiamnuih khawng ka genkhawm zaizai uhi. Suun hong hihtakin ka nungaknu' kiang a va pawt zual in, ka painawn pah a; lupna tung ah Bible ka sim hi. Police Station lam a lah thau khawng hah ginlua ahihman in, kei leng lamlianpi tan bek khawdaktou di'n ka pawtkhia a; ka Mobile phone natawm leng tawilou himahleng, khanglam pek ka va tungsuk. Ka naute khat toh omkhawm ka hi ua, melma hiloute'n Police Station kong a hon kappaih phet un leng, ka nau in puakkhiat hon sawm mahleh thau a ngim in om a; hon pawkhe ngam kei. Huaitan chet ka thei a, aban bangmah ka thei nawn himhim kei.

'Family Camp' neih ding ka sawm gige himahleh, ka taksuah man kei. Zi-le-ta neih ding nanun zen in Bible ka zil a, tu'n gam-le-nam a di'n ka hinna ka na pia hi. Pathian in hon zatnopna tak a hon zang ahi ka chi. Ka sihna (uh) tungtawn in, Manipur singtangmite' lak ah kituahna a omtouh gige ka lam-en mahmah. Bible zilzou in, Missionary kuansuk-kuantou leng le khamangthang tampi manzou ding ka hihlouhdan Pathian in thei khawl leng ahi maithei – kuama'n i thei kei. Tu'a ka sihna in, Manipur pumpi ah ki-unauna hon tun in, Saptuam tuamtuam bang in thumna neikhawm duamduam theita uh ahihman in, Pathian bangkim hihthei in a zatna di ageelkholh bang a hon zang ahi. Huaiban ah, JPO leh JAC-te panlakna thupi ka sa a, vuina (khasiatna) ding himhim ka thei kei " chi'n, hon gen hi.

Huaizoh in, Salpha Ngalliam M. Khamsianmuan hong ding ngal a, " Ka min ahihleh, M. Khamsianmuan ahi a, March 30, 1994 in Singngat Sub-division sung, Sugnu Road a om 'Muizawl Khua' ah ka piang hi. Ka nu Muizawl khawmi ahi a, ka pite' khua a kum 1 ava om sung ua piang hidan in ka nu'n hon gen hi. Ka khua taktak uh Singngat Sub-division sung mah Sumchinvum ahi. Ka pa M. Kamkhenthang leh ka nu Damzaching' gil a gah goutan 2te lak a aneupen ka hi a, sanggam numei Chingneihoih kia ka nei. Sumchinvum khua ah School kai ka pan a, huai nungin Bungmuala om 'Harmon English School' ah Class - B ka zou hi. Huaizawh in, Singngat a ka papite' inn a om kawmin 'Singngat Standard School' ah ka unu tawh kai in Class - I ka zil hi. Huai mun apan Pearson khua a kisuan nawn in 'Covenant Children Home' ah Class V ka sin nawn leuleu. Class VI leh VII ahihleh ka khua (Pearson) ua om 'Thangkhai Govt. School' ah ka zil hi. Ka unu'n School kai a khawlsan takin, kei leng laisiamtheilua ka hihlouh tawh ka tha hong dah deuhdeuh ta hi. Huaiziakin ka nu' kiang ah ' Nu, lehkhasiam kia nekzonna lah hilou a, School kai ka tawp mai ding a; zing leh nitaklam teng a tai kizil zelin sepaih ah lut ka sawmzaw mai ding ' chi'a gen in, school kai ka khawlsan hi
.
Ka pa ahihleh, nidanglai in 'SSB' kichi telawi ah ana pangkha ngei hi. Tu'n ahihleh pioneer a pang in Bungmual khawsak a Pioneer-te' camp sung ah naa semzel. Ka unu'n, Chennai a Restaurant ah sem in, innmun khawng ka leikhe zou hamham uh. Ka khawsakna uh haksa ahihman in 'Driving School' ah ka kai a, ka zoh in ka ute gari zangin 'Tui Supply' in sum ka lawh hi. Tui ka supply chiangin leng kithuahpih ding midang tonpih sese lou in, kei-le-kei ka kitoudelh zel. Nikhat ka nu' kiang a ' Nu, Imphal lam a kiphinna om ziaka School naupang khat leng si eive. Huai, a thilnget uh a lawhchin ding uh chu ngaihngam huai kei e. Lawhching mawk le uh , eilam leng hon sukha ding hi'n chin, puaknat-huai mahmah ding ahi ' chi'a ka gen leh, ' Bawi, huaite khawng ei ngaihtuah phak ding hilou eive. Ngaihtuah nawn ke'n aw..huai khemkhem khawng ' chi'n ka nu'n hon dawng zel. Huai hun chiangin, ' Na theihoih kei ua, puak leng pawna lou na hi uh. E'n bangtan hiam theihna chiang kinei sam a, huai i hon gen ahi, Nu ' chi'n ka nu' kiang ah ka gen hi.

Singtangmite' adia kipumkhatna(unity) ni August 31, 2015) in hongtung a, Lamka khawpi sung sou vengvung maita hi. Nitak hong hi a, mipi' kiheina lamlam ah ka va tel tei hi. Zan dak 12: 00 vel a ka nu houpih in,'Nunu ei, misi om inchin maw..damdawi inn a va koih ung a, huaimun a om ka hi ' ka chihleh, inn a pai di'n hon sam hi. Inn ka tun takin ka nu' kiang ah, 'Nu, utdeuh leng..Damdawi inn a hong zanhak di hi'ng a, mi gam-le-nam adia hinna pia om a, ei nuamtak a ihmut dan omlou ahi. Ka lawmte leng tampi om uh ahi. Tua buaina khawng ah sikha zenzen lehang a kiminthang mah di maw Nu' ka chihleh , ' Nang si lechin kou bang suak ding e? Hon hehpihlou maw bawi; hai paupau louh ding ahi. Tu'n leng, ihmu pah in la'n, thildang ngaihtuah sawm nawn ke'n aw ' chi'n hon dawng hi. Ke'n leng,' Nu, ka pau nawn kei ding. Hilehleng ka ihmu tuan kei ding. Mitsi leng le kei ihmuthei tuanlou ding' chi'a dawng in, ka daihsan vengveng hi.

September 1, 2015 in leng ngeina bang in tui ka supply nawn hi ( Water supply-te Bandh in huamlou). Sun dak 12:00 vel a tui supply zou in, ka nu' singpi san bawl ka dawn laitak un ka pa leng hong pai hi. Thau khawng gingging mai ahihchiang in ka nu'n, ' Bawi, khanglam a buaina ah na va hawh mahmah kei ding aw..' hon chi a, ' khemkhem eive...' chi'n ka dawng lel. Ka pa'n leng hawhlou ding in hon genpih mahleh kidek zoulou in, tui supply na puan-ak kheng zokin , ka va tungsuk veve. Police Station mai ah, gam-le-nam' adi'n 'thautang' 5 hial ka va maituah metmot hi. Hon kappaih tung un ka sikhe pah kei a, lampi lai a thallup in ka naak leepleep mai; a haksa ngei mai. Gam-le-nam humbit dia Solkal' thau tawi-te'n lah lim (photo) khawng hon la souhsouh mai ua; panpihna khut zankhia kuamah a om kei uh. Ka lawm-le-vual te'n hon panpih sawm chiang un lah ana kap sawm maimah zel ua; mittui kai niuniau kawm leh panpihtu ngai ngoihngoih kawmin, singdang' gamlei leng hilou – Police Station mai ah ka hinna a beita!

Tu'n si ka himai a; vangtah kisa sim mahleng, sihampha ka kisa veve. Pathian theivek a ki-om a, Christian kichi vek minam himahleng, i khelhna uh a sang lawta. Huaiziak a, i kibawltheihna ding ua, Pathian in hichibang i gam ua hong tungsak a, Singtangmite khekhat a hon dingsak hiding ahi. Huaibanah, JAC-te panlakna thupi ka salua. Mipi huaizah makaih ua, kei a sikhinsa natawm leng hoihtak a hon kep ban uah, a sikha teng leng mipi a asuahsak ziak un leng ka lung amuang mahmah hi. Ei singtangmite adia si ka hi a – singtangmite' maban ding ngaihtuahna a pang i makaite uh leh mipi' thuthu ka hita. Kei leh ka sihpih midangte' tungtawn in i gam uah 'DAMNA' hong luanglut leh chih ka deih mahmah" chi'n hon gen hi.

Salpha Ngalliam – Khaijamang Touthang leng hong dingkhe tiutiau in, " Kei, ka min Khaijamang Touthang ahi. May 10, 2004 in ka pa (late) Haokhothang Touthang leh ka nu Nemneilhing' gil a gah goutan 6-te laka a 4na hiding in ka na piang hi. Sanggam numei 2 leh pasal 3 ka nei a; ka sanggam numei lianzaw pen in pasal a neizouta. Khosakna haksat ziakin, Siamsinna lam leng School hoih ah ka na kaizou kei. Tuibuang Govt. School ah Class – III (tan) ka na sin a; private school toh tehvual hilou hi. Nikhat, ka nu' kiang a ' Nu, kei leng school hoih ah hon kaisak bek ve...' chi'n, kingaise kawm taka ka gen leh, ' Bawi, tulai a Govt. school-te hoihlawta ahi. Private school sang a niamzaw tuanlou ahi. Lai hoihtakin sim lechin, private school hoih taktak a kaite sanga leng siamzaw a omthei na hi. Kingaise mawk lou in, lai hoihtakin n'on sim dia, Officer liantak khat n'ong hihsawm di aw..' chi'a hon hehnem kawmin hasotna thu hon muam hi.

31st August, 2015 nitak a, inn a kihaal zelzuul lai in leng ka na phur mahmah mai a, himahleh ka nu'n pawtkhiat hon phal kei. Ka nu' kiang ah, ' Nu, inn halna a ka lawmte hoh ua, kei n'on phallouh sese..' ka chi hial hi. September 1, 2015 ni hong hi a, khawvak phet in inn apan ka diangpawt ngal hi. Ka innkhang uh Tedim Road a, tangval bangzah hiam in Siik-tuilawng zanga lampi a khaktan lai un leng, ka va hahpan mahmah. Zinglam dak 8:00 lak in ann ka ne ua, ann nekhin phet mipi omkhawmna lak ka va tung hi. Dak 12 vel in ka nu'n hong sam a, ' Bawi, mipi leng thangpai vek ahi ua; sepaihte leng heh mahmah ahi uh. Na va pawtkhiat leh, sepaih te'n honna kapkha d'uh ahi ' hon chi hi. Ke'n leng, ' Nu, Sepaihte'n 'thau' a mi pawng kap mawkmawk lou pi uh. Hon kap u'leh leng thautang taktak ( live bullets) hon zatkhum lou d'uh eive. Mipi' om nana a om-a, bawl di a chihchih uh bawl di ahi ' chi'n ka dawng kik lel hi.

Atawp in ' Commando-te hong lut ngeingei u'leh 'buangnai gophel ( catapult)' a ka na kapna di sailiim(sailuum) ka hual di leh..' chi'n, lawmpa toh ka innkiang uah sailiim hual in ka omden uhi. Thau khawng a hahgin luat tak in, kei leng Lamka Police Station lam ka va tungtou kha hi. Police Station kong ah suang tomkhawm in ka pang a, kei' sanga lianzaw te'n ka suang tomkhawm-te zangin Police Station buden zungzung uhi. Thautang vanlam a touleng lou in; aphei zawng in(horizontal) hong leng zungzung mai a, mi 2 kap puuk in om ngal uhi. Thautang taktak a hon kap hial ding ua gintakna nei ngeilou himhim himahleng, thautang taktak hon zat hial tak un kei leng hinna humbit di'n ka tai sam hi. Police Station kong, lampi khanglam ( Old Bazar lutsukna lam) a footh-path tung apan, saklam ( New Lamka lam) zuan a ka taitouh laitakin 'thautang' in ka taklam taainem ah hon vut phei a, ka veilam ah pawtsuak ngal hi. Huai hunin zaw, kei naupang neuchik a di'n taisuan zawh ding ahi nawn kei. Ka khut taklam a ka taainem hum tinten in, achang in ka khut a sisan bang neunuau-te ka enzel hi. Na salua ka hihman in ka khut veilam in foot-path tung ka nengsuk a; panpihna ngen in ka khut veilam ka liiktou hi.

Huchihlai in, Lalsei ( Kholmun khokhang a Zalenmun khawmi) in mangbang leh beidong taka omlai hon muh chiangin thuakthei lou a,a hansanna tengteng suah in hon pomkhe tou hi. Huai apan in, mi khat in a Activa uh hon 'start' ngal a, kintak in Damdawi Inn lam hon zotpih ngal uhi. Damdawi Inn ah ka nu ngai leh amel bek munuam in kiheituah leplep mahleng, ka meltheih khat lel leng a om kei. Tuiduh-dangtak a ka kikou hang in, piak ka hikei zomah. Huchi'n, ka mit hong mial hiai-hiai a, bangmah ka thei nawn kei. Huaibanah,kei sihna ziakin JAC, JPO leh mipite agim mahmah ding uh chih leng ka haih kei. Huaiziakin, kamkhat lel leng ka gim chilou hial a ma hon lakpih ua, kei ngei leng amau' tapa bangbang a hon bawl ziak un, ka kipak mahmah. Nam leh gam a di'n hinna ka na pekhinta. Ka sihna tungtawn in, Manipur singtangmite' lak ah KIGAWMNA hong omta. Huaiziakin, si hampha ka kisak hun leng atam mahmah hi. ' Tribal Martyrs' mi 9-te tungtawn a SUAHTAKNA kawlni I gam ua hong suak ngei ding ahi " chi'n, hon gen tiautiau hi.

Salpha Ngallian – K. Lamkhenthang leng hong dingkhe ngal a, " Kei ka hihleh, K. Lamkhenthang ka hi. June 18, 1971 in Thanlon Sub-division sung a om, Sinzawl khua ah ka na piang hi. Ka pa, K. Ginzalian leh ka nu Phakhoching' gil a gah goutan 5-te laka upa pen leng ka hibok. Sanggam numei 3 leh pasal 1 ka nei a; ka sanggam pasal pen in kum 19 ahihlai(1997 kum) in nam-le-gam a di'n a hinna ana peta. Khosak haksat ziakin ka neu apan Skul leng ka na kai zou kei. Lamka lam ah 1984 ( kum 13 ka hihlai) in ka pem ua; ka pem ma un bel Tongchiin khua ah Class – II tan ka na zilkha sam hi. Ka pem nung uh kum khat zoh (kum 14 lel) in, Light House ah 'Cinema Hall' kongkhak guard in ka pang a, atawplam in bel 'operator' in ka pangtou hi. Neuchik ka hih apan, kei-le-kei in nek-le-tak ka kizonthei pah hi.

Sapte'n, ' Like father, like son ' a chihbang deuh un, ka pa' phattuamngaih zah mah in kei leng khotang vai ah phattuamngaihna in ka pumdim mai hi. Huaiziak mah leng a hingei dia, Hiangtam Lamka hausa – G. Thangkhosuanmung in leng hon deihsak thei mahmah hi. Suun leh zan in a poimoh lamlam sem in ka diangtuah zel a, inn ah nasep ding om leh leng ka taise ngei sam kei. Adiktak mah gen lehang. Zu dawnthei cheuhcheuh mi ka hi. August 31, 2015 nitak a, ka lawmpa Thangzalian Phaipi leng ana sikha ahihman in, a ninawn zingkal ka thoupah a, Damdawi inn lam ka naihpah vengveng hi. Suun hun ( 1st September) in leng Damdawi Inn lam mah ah ka hoh nawn a, 'receiption' khawng ah leng ka va tukha. Nitaklam, Police Station sak zek a Thangzalian Phaipi-te' inn a ka va hohsuk leh Naupang Khaijamang a kapkhak uh ka galmuh chet a, va pikhiat ka sawmnalam ah kapkhak in ka om maimah. Thautang in ka veilam taineem ah hon vut in, a khatlam ah ka ngoi teng nawkpawt ngal hi. Ke'n leng, ka ngoi pawt lelaw pen ka khut langnih a dom kawm in, ka thaneihteng suah in taimahleng a hithei kei. Huai nungin, mi phatuamngai khenkhat in hon panpih ngal ua, gari khat zangin Damdawi Inn lam hontun ngal uhi.
Dr. Thangminlian' inn ah X-ray la di'n hon sawl ua, huai hun in ka pa' kiang ah, ' Pa, ka ngoi tengteng kegai vek hia? Na law mahmah eive Pa..' ka chi ngoihngoih mai hi. Ka pa'n leng, ' Kegai lou hial ahi. Bangmah chilou di na hi Thang...' chih kan gen di athei tuan kei. X-ray ah thautang khat leng muh ahi kei. Ka sisan lah tam kaikhe law mahmah ahihman in, sisan unit 6 hon khai kawm ua 'operation' toh hon thuah zui ngal uhi. Nitaklam dak 4:00 apan Dak 9:30 sung vingveng Operation hon neih zoh un leng ka halh mahmah mai a; ka paupau zou lai hi. Mi' husa(thawmging) zatheilou ka hihman in, room tuam ah kei kia hon omsak uhi. Huai zan omsuak in, September 2 sun leh zan leng bangmah buaina omlou in ka omsuak charchar nawn. September ni 3, 2015, zinglam dak 1:30 vel in ka omdan adik nawn kei. Zinglam dak 5: 00 gindek kuan in, ka naak khawng hong tuam hiaihiai a, ka pa' khut a lenkawm in, ' Pa...Pa...' chi'n ka sam a, ka pa'n leng ' Thang, bang chi e? Hiai ah om ka hi, lungkham ke'n aw ' hon chih takin, ' Ka Phone leh sumneih sunsun 250 koi a om a? Ka khekol sakhau a om di ahi ' chih teng genzou hamham in, ka naksuk-naktouh (breathing) awl deuhdeuh in, beikhia ka himai hi.

Unau khat ihi uh kichi hang a, kigawm sawm ngeilou. Athu kia a kigawm I sawmsawm lai un, i lak uah thillamdang khat hongtung hi. Dakkal 1 sungin kigawmna hong om guih mawk a, Pathian' thilgel ahi chih achiang huntawk. MLA-te'n leng hihkhial a kisa sim na ding ua, ke'n bel hihkhial uh ka sa kei. Hihkha fuhlua uh ahi. Huchia omlou himaizen le uh Singtangmite lak ah kigawmna hong om ngeingei kei ding a, Pathian thu leng hiaizah zouzai kigenkhe lou ding ahi. Huaiziakin, MLA/ Ministerte'n hihdiklua ua, hih leng hihkha fuh mahmah uh a hizaw. Kin-le-buang a kiphutkhia – JAC leh JPO te' panlakna leng thupi ka sa mahmah. Gim leh tawl khawksalou in misite hon buaipih den ua, kipahna asang mahmah a, kipahthu genseng vual ahi kei. Mipite' a khotuahna uleh lainatna uh leng thupi ka sa " chi'n, a lungsim a om bangbang hon genkhia hi.

Kindeuh mai in, Salpha Ngalliam – Thangzalian Phaipi leng hong dingkhe ngal a, " Ka min ahihleh, Thangzalian Phaipi ahi a, April 1, 1985 in ka piang hi. Ka pa (late) P. Zelzamung leh ka nu Vungching' gil a gah goutan 4-te laka aneupen (nautum) leng ka hi. Sanggam numei 2 leh pasal 1 ka nei a; ka sanggam numeite'n pasal neizou vekta ua, ka upa'n leng hon sihsan khinta. Naupangchik ka hihlai ( 1988 kum ) in ka Pa'n, Kal (Kidney) lam buaina ziakin hon sihsan hi. Ka pa' sih hun a Class – B lel simpan ka hihman in, amel-le-puam banah ithuai ahihdan ka theihoih law man kei. Ka pa'n Auto khat hon nutsiat ahihman in, a hektu ding zongin, sum loh in ka heksak uhi. Ka pa' sepna tungtawn a ka nu'n 'die in harness' in 'swepper' nna sem a, ana khosathei hamham ka hi uh.

Siamsinna lam ahihleh, St. Mary School (Tuibuang) ah ka U-te toh ka na kai uhi. Class – VI tan huaimun a kai in, aban St. Paul's Institute leh Children Training School khawng ah ka kisuan kual hi. Laisimna mabante lamzangtak a sunzom zel dia kikoih himahleng, khosakna haksat ziak a sunzom theilou in, Class – X leh XII leng 'Open' a zouthei hamham ka hi. Class – XII zoh in, Delhi a om ka U Mawi ( ka unau ua upapen) kiang ah ka va pai hi. Hun bangtan hiam nungin, Lamka a kik nawn in, kum 2003 in, ka lungtang' kumpinu bang a ka ngaih banah, sihtanpha a ding a 'ZI' dia ka teel – Laldinsangi toh 25th December ni'n ka kiteng uhi. 2009 kum in tapa melhoihtak- Kenneth Mungsuankhup (6 yrs) ka neikhia ua; aman ka sihhun (2015) in, Dawn School ah Class – B simlel hi.

Zi-le-ta nei mahleng, kivaakna di detdou ka nei kei. Huaiziak in, ka nu' kiang ah, ' Nu, Van (gari) hon leisak in la'n, School naupang khawng ka kha zel ding a, huai in sum ka zong di ' ka chihleh in, ka nu'n leng hon ngaihtuahsak pah hi. Dawn School naupang bangzah hiam vakhak leh piikik zel tuh kei' nasep pipen hong hita hi. Khovel buaina leh siatna te khawng, ka nu' kiang a gen zel in; inn a hong pawt-te kiang khawng ah leng ILP toh kisai ka na genpih zel hi. ILP toh kisai ka nu' kiang a ka gen leh, ka nu'n Gas (LPG) toh kisai khawng gen honna hisak zel hi. Ka nu'n, ' na Bible chang le a hizen a hia, huai ngen huchi gengen ' hon chi sek hi. Ka nu'n bel bangmah a thei kei a, ' gamdangmi kisuak ngeingeilou di ahi' chi'n Manipur gam mi hihna ana 'sumkuang chiang keih' hi.

August 31, 2015 ni in Bandh om a, ke'n leng naupang khak leh pii ding neilou ka hihman in, inn a omden in, phone ka en den hi. Suun in, Mualveng ah ka nupi' kiang a va pawt in, ' Nupi, 'lungleng' kichi bang chihna a?' chih khawng peuh ka va dong thepthup hi. Nitaklam hong hi a, Bill 3-te ki-passed ahihdan phone tungtawn in ka theipah hi. Nidang a dak 8:00 khawng a ann nezel hinapi, huai nitak dak 6:30 lak in ka ne a, tam bel ka ne kei. Ann nezou, Delhi a om ka U Mawi in hon houpih a, New Lamka lam a innkang leh buaina om leh omlouh hon kan takin,' ka theikha nai het kei ; ka va en di..ka va taipah di..' chi'a dawng in, phone ka 'off' ngal a banyan vuak toh New Lamka lam ka zuanpah vengveng hi.

Hun sawt kihallou in Damdawi Inn ka tung maimah. Ka khe hon meksak kawm a, ka nu'n, ' Bawi, bang chi maimah e? Na lungtang a na puaknat gige puakzakta ahi maw Bawi?' chi'n, kahtam hon lohkhum ngoihngoih mahleh, ka 'aw' asuak zou mahmah kei. Huai nitak dak 10:00 ginma deuh in, gam-le-nam a dinga hinna piak ka lunggulh gige pen, ka taksuah ta! Ka sihna tungtawn in, KIDEIDANNA PUANZAK lakkhiat ahi ta a, singtangmite' lak ah KIPUMKHATNA a om ta. Hiai pen, Pathian' lemgel ahi ngei ding. Huaiban ah, Pathian in ka tapa Mungsuankhup kemtu dia ka zi leh ka nu muang ahi chih leng ka thei a, ahoihlam ngen ka kipia hi. JAC-te panlakna ah gensiatna di bangmah ka thei kei. Mipite a di'n ka si ta a, mipite' tapa ka hita. Ka LAST MESSAGE ahihleh LIFELINE( State dang toh kikawmtuah a, nek-le-tak laklutna di lampi hoihtak neih ding ) POIMOH LUA I HI UH chih ahi " chi'n hon gen hi.

A kilkawm sim khat apan in khat hong ding nawn a, ka muchian kei. Sawtlou nungin, " Ka min, En Khan Khup Suante ahi a, July 21, 1996 in Lamka ah ka piang hi. Kei bel, S. Nangzachin leh Dimngaihdon' gil a gah goutan 4-te(numei 2 leh pasal 2) lak a aneupen leng ka hi. March, 2015 in Chingngaihniang toh ka kiteng uh a; tapa melhoih mahmah – Daniel Cin Sian Muan leng ka nei uhi. Blue Star Academy ah siamsinna lam ka na pan a, Class - X ka zoh tanpha huaimun ah ka kai hi. Class – X zoh in Rayburn College ah Class – XI leh XII ka zil sunzom nawn a; Class – XII exam ma chet a zi ka neih ziak a exam lou in; ka dinkhawl leulou hi.

Manipur gam buaina thu khawng hong thang vengvung chiangin kei leng om maimai thei samlou in, ka upa' kiang a thu omdan khawng gen in ka kikuppih sawm zel hi. Himahleh, ka upa'n ' huaite khawng ei' ngaihtuah di hilou ahi. Heutu muanhuai tamtak I nei ua, amau hon ngaihtuah ding ua, hon saifel mai d'uh ahi ' chi'n hon genpih zel. 31st nitak in leng inn a om maimai in, ka innkiang ua, Damkam Bazar sak a DC' gari halsiatsak ahihlai in leng inn ah ka omlai. Ka lawmte inn-halna mun a om uh ahihdan ka theih tak in, ' Ehe! Kei le pasal kei vele. Pupa' satsa gam leitang natawm tankhaklouh di chih himhim ' chi'n ka pawtkhia hi.
Minister pa' inn kuang zuapzuap va en in, Dorcas Road Junction a 'Traffic Stand' kiang ah ka upa toh ka kimukha uhi. Ka upa'n, ' Khupno, ong pai in..inn ah chiah ta ni ei ' hon chi a, ' nang ana chiah in, ka lawmte toh k'ong kithuah zek lai ding..gam leh nam a di'n I pang sam kei dia..' ka chihleh, Achihleh, kei ana chiah ning; ong pilvang mahmah un aw?' chi'n hon dawng a, ka upa toh ka kihou tawpna uh a himai hi. Huai nungin, Herbron Veng apan Dorcas Road tawn in, Dorcas Veng a om - MLA Vungzagin' inn ka nawktou ngal ua, huai ah liamna nasatak ka tuak hi. Ni 7 sung vingveng ICU (Imphal) a nat-le-sat ka thuak nungin, ka kha (spirit) in lungmuangtakin ka sapum a pawtkhiatsan ta. Ka sisan a thawn in a luang kei ding. Ka zi'n, ka tapa hoihtak a enkol leh kemtou a, mithupi khat asuahsak teitei ka deih mahmah hi.." chi'n, tutsuk toh thuah ngal hi.
Kisuanlah mel takin, agei ah khat hong ding nawn ngal hi. Aman bel, " Henlalson Gangte ka hi a, India Zalenna sualte lak a tel – Bhagat Singh' sihni; 23rd March, 1997 in, Henglep Sub-division sung a om, Santing – 2 ah ka na piang hi ( Santing khua ah 'Veng' kikhen lou in; 1, 2, 3 chihdan a kikhen mai ahi). Ka pa, M. Khaikhothang leh ka nu Chiinkhohat' gil a gah goutan 4-te lak a 3na (alianlam apan) ka hi. April 14, 2014 in Hoihdimhat toh ka kiteng ua; June 1, 2015 in tanu – Abigail Hatthienkim ka nei uhi. Siamsinna lam ahihleh Santing khua ah Class – IV tan ka kai a, 2005 kum in Lamka a peemlut in Phungkhothang Government School ah Class – V leh VI ka kai hi. Huai nungin, ka Nu'n New Bazar ah 'Hotel Boy' di'n hon koih a, sum lohtheih dandan a lohtou kawm in, Covenant Children Home (Mualkoi) ah Class – VII ka sim nawn hi. Huai hun in, damlouhna khawktak ka tuak a, ka U tegel (numei leh pasal) in sum lohtawm in, Blue Star Academy ah Class – VIII hon zilsak ua; zi ka neih in skul kai ka khawlsan ngal hi. Huai nungin, 'carpentry' lam ah nek ka zong hi.
Pahthian ka muang gige a, ka tanu leng Pathian' lam ah pi gige ding ka tup pipen ahi. Ka zi' kiang ah leng,' Omlouhna ka neih zenzen leh, I tanu hoihtak a nana etkol di. Milian khat hong suak di ahi a; Bible chang leng – Sam 23na na simpih gige di ahi ' chi'n ka genzel hi. Nitak ka lup chiang un leng, Sam 23na sim zel in; ka zi toh ' Sawt ta puona damsung lungkham buoina, Ei sapna aw gi chu ka het leh; Lalchutphah vela a ngaklahnau aw chun, hehpihte kahna a sawt taluoi a tiu ( LA LAKKHAWM no. 187 – 'Kanaan Chu En Zingin' kichi a 'chorus' ahi) ' chih la ka sa zel uhi.

August 31, 2015 ni hong hi a, ke'n leng ka nuneu' tapa khat sam in, Dawr neu khat ka bawlpih hi (Gangte Veng lutna bul lak ah). Suun nitum tan ka bawl hang un, a tung ka khuhzou hamham ua, atuang bawlzoh man di vual a hikei. Kou inn a nitaklam ann nekpih in, ann nezou ka va kha hi. Huai nitak ahihleh khawmial apan buaina kipan ngal ahihman in, ka nuneute' inn ka tuntak un, ' Son, hiai ah giak mai ve...' hon chi ua, ' ka nau ka ngailua..amel mulou in zaan khat lel leng ka omzou kei ding ' chi'n ka dawng a, innlam ah ka pai veve hi. Ka pailam in, T. Manga Vaiphei-te' inn hal dinga kuante toh ka kituakkha ua, ka va telkha tei hi. Huai mun ah, ka hinna a beita!! Tu'n, Mipi' a ka hita a, amau' hon zat dandan ka hita mai ding. Phatuamtak a zat a ka omtheihna dingin 'THUUMNA' tungtawn in hon 'DELHZUI' gige un " chi'n, kei hon en zauh(cheuh) kawm hi.
Salpha Ngalliam – K. Pausuanlian leng a tutna apan hong dingkhia in, " Ka min ahihleh, K. Pausuanlian ahi a, March 10, 1997 in, Thanlon Sub-division sung a om, Kaihlam khua ah ka piang hi. Ka pa, (late) K. Ginkam leh ka nu Haulianching' gil a gah goutan 4te laka aneupen (nautum) leng ka hi. Sanggam numei 2 leh pasal 1 kia ka nei. Kum 3 lel a naupang ka hihlai ( 2000 kum ) in ka Pa'n, Kaihlam khua ah sungna in hon sihsan hi. Ka pa' sihnung kum 3 zoh ( 2003) in Lamka ah ka peem lut ua; huai hun in Class – I ka simpan hi. Class – 6 tan, Mualkoi a om ' Covenant Children Home' a om in, huaimun mah ah siam ka sin ngal. Class – 7 apan ka sihtan dong ( Class- X simlel), Home based in ka kaitou nawn hi.

Ka nu' kiang ah, ' Nu, lehkha siamkei lehang leng, ball pek a neek zontheih lua ahi. Mi tampi le ball pek a kivaak uh ahi...' chi'n ka genzel a, aman ahihleh laisim mah pibawl zaw dingin hon hasuan zel hi. Gam-le-nam ading a hinna ka na piak dek ni ( 31st August, 2015) suun in, ka paneu – K. Paumuanthang' tate toh paak kung tumtan bangzah hiam gaaklom singsing in, khau in ka heen uhi. Ka thilbawl uh ahihleh, a teh khawng hong sel(om) chiang in bawk bipbep ding a, kilawm mahmah ding hi. Nitak hong hi a, ka nuta ua ka pawtna lam uah, inn kihaal kuang zuazua khawng ka va gaal-et uhi. Sawtlou ka om nung un, ' Bawi, paita ni aw...?' hon chi a, ' Nu, ana pai in...k'ong om zek lai di ' chi'n ka dawng a, ka nu'n leng lungmuangtak in hon paisan pah hi. Huchia ka om chiang in, lawmte khawng toh kimaikha in, khangluilai a upa te'n ' khaap tam lamlam hon zui un aw..' ana chihsek bang un,kou leng, khaap tam lamlam ka zuita hi.

Bangmah tawilou in, Tedim Road ah ka kizui phei dipdip uhi. Lungmuangtak a ka pailai un, koilam a pan a thautang hong kipan ahia chih nangawn theih zohlouh in, thau in hong kikap mawk a, ka mai lam a te hong puk ngal uh. Ka mai zawn a pa leng, kuun kawm in tai a, kei bel lampi lai ah kappuk in ka om ngal. Ka lawmdangten leng a panpih didan hon thei tuan kei ua, ka chiau vengvung mai uhi . Bangtan hiam nungin, Damdawi inn lam ah hon pawtou ngal ua, ka lawmpan leng hon delhtou ngal hi. Ka nu leh sanggamte ngai in huiva bang maumau mahleng, ka lawmpa lou ngal ka meltheih a om kei. A beidot huai ngei mai! Damdawi inn ah, ' Ana lua..ana lua...' , 'naak haksa ka sa, hon panpih un' chi'n, ka 'aw'neihteng suah in ka kikou a, atawpna tuh sihna ana himai mah hi.

Kei leh 'Tribal Martyrs' dangte' tungtawn in igam uah DAMNA hong om hen la, singtangmite' KITUAHNA leh KIPUMKHATNA hong hih tawntung ding ka deih mahmah hi. Huchilou a, ka sisan luangte athawn mai asuah leh zaw..na ka sa law ding. JAC leh JPO-te' panlakna leh hihdan ka lungdam lua. Alehlam ah, Sepaihte' melma leng kihisamlou a, thautang taktak kizatkhum zaw ka theisiam kei. Phaizang bial a, 'rubber bullet' zang ua; singtangmite' lak a 'live bullet' a zat uh, ka pawna mahmah. Huchia, mi kap di poimohlua ahih u'leh, unau damlai 3 ka neilai!. Ka sisan amawk mai a aluan khak di ka lau a, huchi di'n leng ka phal mahmah kei. Singtangmite lak ah kigawmna hon tun ta a, avenkik thak khak ding leng ka lau in, phal leng ka phal kei bok. 'Separate Administration' muh ngei leng ka lam-en a, ka lam-en gige ding hi " chi'n, a kizom leh kizom louh ngaihtuah sese lou in hon gen limliam hi.
Salpha Ngalliam - H.Paulianmang leng ana om maimai thei nawnlou in, hong dingkhe pah mai a, " Kei ka hihleh, H. Paulianmang ka hi a, aneu-alian in kikheem ni chi a itheih uh - 1st April ( April fool), 1993 in, Singngat Sub-division sung a om, Lungchin Khua ah ka piang hi. Ka pa, (late) H. Thianlal leh ka nu Ngaikhanching' gil a gah goutan 3te lak a alianpen ka hi a; sanggam numei khat (Chiinliankim) leh pasal khat (Muangouthang) ka nei hi. Siamsinna lam ahihleh, School ka kaitheih apan in Class - V tan, Lungchin khua ah ka kai a, Pawl(class) VI leh VII ahihleh, Singngat khua a ka Pu Son' (Teacher a sem) etkolna nuai ah ka kai hi. Pawl VIII apan B.A tan ( ka sihtan dong), Lamka a om – Rayburn ah ka kaitou charchar hi.

Ka pa' omlouh nung in, ka nu' kiang ah, ' Nu, tu'n mi'n hon simmohbawl mahle uh, tunung chiang a hon zahtaak di uh ahui. Na lungkham hetlouh di ahi. Ball pek khawng a va taitai di inga, Sepaih kilaakna ding om chiang a va taiching mai di ka hi...' chi'n, ka nu ka khamuan sek hi. Football kimawl lunglut lua ka hihman in, hun-awl ka neih nikhua in ka kimawl khial ngei kei. Hiai leitung ka nutsiat ni ding in leng, kimawl in ka kuan hi. Khomial zuul in innlum ka zuan vengveng a, kisil in ann ka nengal hi. Huchih sung mah in, ka lawmpa hong pawt hi. Ann ka nekzoh phet in, ' khang khawng ah ka va khawdaak zual d'uh ' chi'a, ka nu' kianga gen kawmin, lawmpa toh ka kizuipawt ta uhi

Dak 9: 00pm bang gingtou di'a a kisak takin thau hong ging a, innlum lam naihlou in, Lamka Damdawi Inn lam sisan a pumdim kawmin ka naih maimah. Sihsual a ka omlai in, ka nu leh sanggamte ka ngaihtuah nilouh hi. Ka nu ngai in malbang kou mahleng, tong hon dawng di'n ka kiang ah a om mawk kei. Haksa satak in, Lamka Damdawi inn ah ka hinna a beita. Ka hinna bei mahleh, ka guh-le-tang te'n thu genthei di ahih nakleh, kum 1 leh 2 koih le uchin leng poi ka sa kei. Himahleh, ka sihna athawn asuah mai leh zaw, ka lung anuam ngei kei ding. Insung a ka poimoh mahmah lai in, I gam un leng hon poimoh mahmah a hingei ding a, ka sikha hi. Si di vetvet si hampha ka kisak hun atam mahmah zel. Ka sihna in I gam sung ua KITUAHNA hon tut ka deih mahmah.

Hun paisate apaisa hihenla, I moh leh khelhnate uh kingaidam tuah ni. Tuni a hing-le-dam a omlai te'n, hun hongtung ding ah - adikloute bawldiktu, ahoihloute zemtu, akawite tangsaktu hih hon sawm un la, hon siampa' deihna leh I mi hinpihte iitna toh hing in kal hon suanta un . Kou, kei, nang, nou chihte omnawn kei henla..'Eite' hong kichituah ta un . I GAM leh Nam zemtu leh tungdingtu hong hihsawm chiat le uchin chih ka deih mahmah " chihteng, kei hon en kawmin gen lel a, adang agen nawn himhim kei.

Laigelhtu' Lungsung Pan:
Hiai thugelh ahihleh, kawlchiang tawilou Phamsa Salpha mi 9-te' tanchin, tomkim taka tuunkha ding a kigelh ahi. A tangthu PAIZIA PHUAHTAWM himahleh, a TANCHINTE UH PHUAHTAWM HILOU ahi.

0102 – Ka Kipak – 2016