Nu! Ka Theisiamta..!!
Written By: K Lianthansang

Zodawn a teng ka hi ua, ka kingakna uh ahihleh, 'Mualmet' a hipen mai. Louvat hun in, mual-le-tang a singkung hing dipdip-te ka phuuk pai zelzul mai ua; hoihtak a akeu theihna dingin, kha khat sung khawng - 'tap-phou' chi'n, nisa nuai ah ka phou zel uhi. Huai nungin 'louhalna' kinei a, gam lian taktak kangse gige phial hi. Louhal khit in, ' mangtom' chi'n, a kangtumlou khenkhat loulai apan kitomkhia hi. Huai hun ahihleh, March leh April kha kawmtuah lak vel hiding in ka gingta. Kei ngei leng, 'mangvom lai ( mangtom hunlai)' in ka piang a, ngou leng ka ngou kei bok! Buhtuh zoh chiangin, mualmet ka kipan ngal uhi. Mualmet kichi 'loukhou' chihna a himai a; loukhoh ah – louhaam, louthual, phuaisiat chihte kivualtou diudeu in, buhlaak hunzel hi. Mual-le-tangte , tukawi toh metsiang vilvel (loupa tengteng) kichi thilnuam liai a hikei. Deihtelna piak in ki-om leh, 'tukawi' tawi sangin, 'pen' tawi uthuai zawtham hi.

Ka pa'n a sakhaupi sung khawng ah hon kuah a; School ka kaitheih ma apan in,lou hon kuanpih zel uhi. Loulai a singliim phung khawng ah hon sial (lumsak) zel ua, amau ka kiang lak khawng lou hon khohsan hun uh leng tam mahmah ahihdan ka khawnung theih hi. Achang in, loulai keenlak peuh a ka tuuk hun leng a om ngei ding. Ka letdeuh nung in leng, ka nu-le-pa' loukuanna ka zui sek a, buuk khawng ah ka kimawl zel hi. Adik mah hiven, k'on gen mai di.

Khatvei, lougiahna ah hon tonpih uhi. Suun a,ka nu-le-pa'n lou a khoh kal un mehbel sung ah moja (khepek a buh) ka na koihkha hi. Nitak khawmui zul in buuklam hon zuan pan ua, meh ka huandek un bel khua a mialta. Buuk sungah, khawnvak neng leng ka dezou kei ua; phutuan ka devak keukau uhi. Mehbel sung a moja ka suklutkhak pen tui leihkhum suk in, anteh-louhing khawng leng ka khakkhum uhi ( a omlam kitheilou a hihchia). Ann ka nek tak un, ka pa'n gaw keu ( keu - spoon dia 'gua' kisui ) a meh hon hawp taihtaih leh, ka moja hon hawpkha a, " atui nik (hang) I chihleh, hiai a omkha a eive maw.." chi'n, hon lakkhe dengdang hi. Huai nung zaw, annek a lem nawn het kei!

Ka khua ua Missions Skul ah siamsinna lam ka pan hi. Nasem ding a neulai lua chihziak khawng a school ana kai leng a hikhamoh kei ding. School kaitawp chiangin vok-ann khawng ka huan zel a, vaipai hun ( loukuante hong pai hun ) ding chiangin, ka nu-le-pa dawn dingin, sakhaupi toh khawmual khawng ah ka na ngak sek hi. Ka nu ngial in, a seng dimvuum in van hon pawsek a, buuk tepkawm zomah hi. Anung ah ka pa'n, sakhaupi dim in van kuah veve a; singlukhuah kham ding pukawm zomah hi. Ka nu' vanpuakte tamlou dawn in, kipaktak in inn ka tung zel uhi. Ka pa' kiang ah, " Pa, bang n'on puak?" ka chih chiangin, " Tawlnou k'on puak.." chi'n hon dawng zel hi. Huai hun chiangin, a sakhaupi sung khawng ka zong vutvut a, ka lam-et bang ka mu kei. Ke'n bel, huailai khawng a 'tawlnou' kichi 'bilpi (rabbit)' dandan khawng hidi'n ka koih hi. Ka khawnung theih thak chiangin, ka pa'n a gimdan leh tawldan a genna ana himai mah zel!

Ka neudeuh lai a awmna nei mi ka hih ziakin, ka nu'n zankhua in hon pawzel hi ( ka ihmut theihlouh chiang in). Suun a louna sem a gimlua himahleh, kei hon khual ziakin, zan ihmutlouh leng poi a sa kei. Achang in hon angpuak a, tutna neu a tukawm leh khuam a kingai kawm khawngin mitsi( ihmu taktak thei tuanlou) zel hi. Nitak khawng chingin, ka homework - 'ABC-te' hon gelhpih zel hi. A handwriting ahihleh, Doctor-te a toh a kilamdang kei. School kaikha hetlou dia, ka nu'n Doctor-te handwriting (khutgelh) a demzoh lamdang ka sa. Zingkal, lou a kuandek chiang un pencil thak deih khawng in ka kiphin zel a, a niik kawng a sumbawm a vom apan in a neih sunsun cheng 2 khawng hon pe zel hi.

K'ong lian deuh a, Kiginni (skul khawl) chiang khawng in, lou ka kuankhawm zel uhi. Loulampi ah buk(tuibuk di kam a tepna) khawng hon tepkhu ruahruah zel mahleh, a khu ka diik-khak ding bel hon phalteuh kei a; a malam ah hon paisak zel hi. Tangmai, Dawnpawl, Mazel chihte khawng a om sunsun chiangin hon pezel a, " Ke'n duh khollou ka hi.." hon chizel hi. Gimtak in inn ka tungkik zel ua, ann ka nek chiang un leng, ama' neek tang peuh hon pia in, gilvahlou a ka omkhak ding hon khual mahmah hi. Ann thuuk in apang zel a, ann ka beikham dek chiang bang un, " Ka gil vahta ahi. Ke'n ann tam netheilou ka hi Bawi...Ka gil leng kial law kei " chi'n, ka kuang ah ann hon koih zel hi.

Nitak laisim zou ka lup chiangin, ka nu-le-pa a lumdek nai kei uhi. Zun nawn a ka thohkik chiang khawng in, meikiang ah dumkung khen leh malta teng ( a keulou deuhte hakgam thak ding a tengkhia) khawng in ana tulai uhi. Lumphot ding a ka sawl chiang in, " Ka ihmut uh suak nailou ahi, Bawi! Nang ana lumnawn in la, na thoupah dia...zingkal chiangin na lehkha simnawn pah in aw.." hon chi zel uhi. Zingkal ka thoh chiangin, ka nu'n ann ana huanta a, ka pa'n vok-ann khawng pia in ana om man zel uhi.

Hotel khawng a singpi dawn in ka lut ngei kei ua; ka pa a lutlam khatvei mah leng ka theikha ngei kei. Sum ka neih sunsun chiang un, chini(sugar) ka lei ua, inn ah ka kidawn zel uhi. Huai leng, apuang hilou in, asan khawng peuh hilai hi. Ka nu'n tam dawnlou in, kei a di mah hon ngaihtuah sak zel a, " Kei, ka dangtak khollou ahi, Bawi! Na duh zahzah dawn in aw..." chi'n, ama' a di khawng peuh hon piak hun leng atam mahmah. Ka nu'n, " Bawi, khovel a melhoihpen leh lehkha siampen na hi..." khawng hon chisek a, ka lung anuamthei mahmah hi. Ka lup chiang un, ka nu-le-pa' kal ah ka lumzel a, Bible a – Joseph, Danial, David chihte' tanchin khawng hon hilh zel ua; ka ihmut san kha sek hi.

Ka letdeuh nung in, zu-le-sa a kibual in hinkhua ka zang hi. Achang in, ka nu leh pa ka vuaksawm zel a, lungkham-mangbang takin ka koih gige hi. Nitak khat, zansawt nung a zu khamsa a pai in, ka nu ka vuaksawm hi. Ka nu'n, mittui kai zungzung kawmin, " Bawi, Bawi Aw..! Na utleh hon vua in la, na utleh that leng hon that in. Ka nung n'on sat nuam leh leng poilou ahi Bawi. Himahleh, na neulai a..zan khuakhua a k'on puakna ka nung ahi. Na utleh ka khut leh khete hon sattan sak in, poi kei! Ka khut zang a, ka angsung a hon pom thinthen inga a, ka khete zang a nang hon awikawm a kivei zel ka hi. Nang nopsakna ding ka khual ziak a, ka khete zang a lou gamla pipi a kuanzel inga, ka khutte a louna va semzel ka hi. Bawi aw, na utleh ka lu hon khettap sak in. Na nek-le-dawn ding ka puakzelna ahi. Bawi, na utnana hon khoih in aw...." Chi'n hon gen hi. Huai nitak apan in, ka nu-le-pa' kiang ah ngaihdam ka ngen a, hinkhaw thak pan dingin thupukna ka lata hi.

Lupna ah mittui kai zunguzung kawm in ka lum a, ka neulai hunte khawng ka ngaihtuah kik vungvung hi. Mi' nute khenkhat in, a tate uh itlou a a taihsan lai ua....hichibang nu-le-pa manpha ka neihkhak hampha ka kisa deuhdeuh hi. Ka nu'n kamkhat lel leng, " K'on puakna ka liang a khamlua.." chilou a, zan khuakhua a honna pua ahihdan khawng ka ngaihtuah chiangin, ka khitui khamzoh ding a hinawn kei. Tangmai, Dawnpawl, Mazel chihte khawng a om sunsun hon pezel a, " Ke'n duh khollou ka hi.." hon chih leng, kei hon khualna ziak liauliau a hihdan ka khawnung theihkhiat a, ka khasiatna khop a pha! Ann ka beikham dek chiang bang ua leng, gil kial pipi a, " Ka gil vahta ahi. Ke'n ann tam netheilou ka hi Bawi...Ka gil leng kial law kei " hon chihzel leng, ka nu'n hon khualna ziak ana himaimah hi. Ana hai sawt hina maizen ing e maw, Nu!

Pencil man di khawng ngen a ka kiphin chiang a, ka lungkim di a deihluat ziak a aneih sunsun hon piak khawng ka phawkkhe zungzung a, kisiikna ngen in ka dim. Ka lawm-le-vualte eng ngoihngoih a ka om di hon phallouh ziak ua, gim-le-tawl khawk salou a ana pang ua; tua ke'n khawsung mipite' mai a ka nu-le-pa ka maizumsak maimah zaw, hai hina maizen ing e! Singpi duhlou leng hilou napi, " Ka dangtak lou ahi.." hon chih leng, ka nu'n hon itluat ziak a zuau siangthou gen ana himaimah hi. Ka neulai apan, ka pa ngei leng 'Tawlnou' ana guan inga, ka letnung tanpha a tawlnou ka puaksak lailai tel zaw, khovel a mihaitawp toh ka kiteh! Ihmutsuak lou leng hilou napi a, ka skul fee di a ngaihtuahna ua dumkung leh malta peuh buaipih ua, ihmu manlou zenzen a aom lai khawng uh ka ngaihtuah chiangin, mittui in hon tuum gige hi.

Alehlam ah, ka nu-le-pa' kiang ah ngaihdam ngenman hamham in ka om a, ka kipak. Kikhel lawlam leng a hisim zawmah!. Ka nu-le-pa'n honna omlouhsan man himaizen le uh, Pathian' kiang kia a ngaihdam ka nget angai ding. Leitung Pathian – ka tuun leh zua' kiang a ngaihdam ngen a, lungnuam taka ka omsak man hamham ziakin, ka lungsim a zangkhai mahmah hi. Ka lawm-le-vual te'n leng, a kikhelma ngei in nu-le-pate' hon itna theisiam le uh chih ka deih mahmah mai a; gen leng ka genpih zelzel hi. Nidang in, ka nu' hon itna ana theisiamlou in, ut-le-dah in ana om segawp mah leng, tu'n ka theisiamta. Ka nu' kiang ngei ah leng, " Nu! Ka Theisiamta..." chi'n, ngaihdam ka ngen a, ka pa' kiang ah leng tuabang mah in NGAIHDAM ka ngen hi.

Ka Pa' hon thuhilhna ka mangngilh ngeilouh khat, " Kei' sangin pilzawl leh laisiam zaw in om lechin, hon phazou deklou di na hi. IAS khawng hong hile chin leng, kei hon demzou dan in kikoih mawk ken. Ke'n, ka tapa IAS hon suahzou ka hihman in, nang n'on demzohna dingin ta n'on neih chiang a, na tate khat bek IAS na suahsak zoh a ngai ding. Eh! huai hun chiangin leng, ke'n, tupa IAS nei ka hizel ding a, n'on dempha ngei kei ding. Bang chizong teng in pil kisasim mah lechin leng, n'on phaklouhna tampi om ding ahi. Huai ziakin, k'on hilhtheih sunsun-te zuizel lechin, na siatna di tam lawmlawm lou di ahi. Na siatna di hial k'on hilhkhak taak leh leng, kei a moh ka himai ding. Na siatna di hial hon hilh di'n leng ka kigingta kei ." chih ahi. Hiai thu in ka lungsim hon lawngkha mahmah hi'n leng ka thei.

Huai banah, ka Nu'n " Bawi, na neulai in pencil leh rubber man di n'on ngen zel a, ka neih sunsun in k'on leisak zel. Pencil zang , Skul a lai na vagelh chiangin, na gelhkhelh a om sek a; rubber zang in na nulmang zel chih leng ka thei. Na gelhkhelh tam leh, na rubber hek (beibaih) ding chihna a himai hi. Tua mahbang in, thil na hihkhelh chiang in na thilhihkhelh thoihdamna dingin, maizumna leng tampi ka na tuakta uh. Singpi khai hial a mi' inn a ka lut hun uh leng a om. Thil na hihkhelh tam deuhdeuh leh, I neih-le-lam uh kiam hiai-hiai ahi chih leng na theih ngei ka gingta hi ( thupha tawina ding in). Tua kia hileh zaw phadawm deuh ding hiven!. Nang ziak in, zan ihmulouh hun tampi ka nei a, na pa leng a hibok. I neih-ilam kia uh kiam hulhul hileh zaw poikei. Pencil a thil na gelhkhelh sek banga thil na hihkhelh munluat chiang in, ka taksa mahmah uh leng 'rubber' bangin a kiam hulhul a, ka damsung uh leng kiam hulhul ahi. Huai ziakin, tuni a kipan zaw.....k'on itna theisiamta in aw Bawi?" hon chih lai a, " Nu, N'on Itna Ka Theisiamta...sawtpi hon dampih hamham lai un aw, Nu " chi'a ka dawnkik lai ka mangngilh thei ngei kei.

Laigelhtu' Lungsung Pan:
Hiai tangthu phuahtawm himahleh, a 'Moral' lam thupi ngaih zaw ni. Nu-le-pa' hon itna theisiamlou tampi I om ding uh ( kei tel in). Huai ziakin, a kikhel ma ngei in Theihsiam I sawmta ding ua; akiang ngei uah Ngaihdam ngenthei lai lehang hoih mahmah ding ahihdan taklatna a hong kigelh ahi. Hiai tangthu simkha peuh in, Nu-le-pa nei ngei ding I hihman un, minute 1 bek kingaihtuahna dingin zang ni.

2401 – Ka Kipak - 2016