Lungkimna Thuguk
Written By: Upa V. Lianzathang.
Lungkimna toh kithuah Pathian limsakna tuh punna thupitak ahi. Khovel ah bang mah I lutpihkeia, bangmah I pawtpih theisamkei ding hi. Himahleh nekding leh silh ding neiin, huai khawng ah I lungkim ding uhi,( 1 Tim. 6:6-8)
Long Captain khat Eddie Reckbenbacker a long tuanpihte toh Pacific tuipi tung ah ni 21 sung gam mang in a omua, a hongkik nawnthei uhi. A hongkik nawntakun dotna khat a dong uhi. Huai dotna tuh hiai ahi : Tuipi tunga ni 21 sung vingveng namanthat sung-un bang nazil khia a? chih ahi. Aman a dawnna ah mihing in dawn ding tui siang I muh ua, nitenga nek ding I neih nak leh bangmah phunna ding a omkei chiin a dawng hi. Long Captain khat thil muhkhiak hiai ahi.
Mi tampite'n annek ding kiningching anei ua, nek senglouh anei uhi. Bank ah sum tampipi a koih ua, leitunga taksap chih omlouin khosa mahle'uh, lungkimthei taktak louin a om uhi. Huchibang mite lakah Kristiante leng tampi a om uhi. Kristiante tuh Kha siangthou tennate I hi ua, Jesu'n kahongpai nawn chiangin noute kipahman kahonpe ding a chihte I hi uhi. Van gam lamen theite I hi ua, ginna a lungmuang taka omdia lamette I hi uhi. Himahleh kristian tampite tununga lametna kipahhuai neilou bang khopa duh'aam leh huaiham a om uhi.
Khalam pichinna lamah Paulin a mah leh a mah piching huntawk a kisakei hi. Himahleh salamah nitenga lungkimtaka hintheihna thuguk a theikhia hi. Manpha asa mahmaha, ginna lama a tapa, a deihthoh mahmah Timothi kiangah a gensawn hi. Timothi kiang ah, "Lungkimna toh kithuah Pathian limsakna tuh punna thupitak ahi. Khovel ah bangmah I lut pih keia, bangmah I pawtpih theisamkei ding hi. Himahleh nekding leh silh ding neiin huai khawngah I lungkim ding uh" achi khi, ( 1 Tim. 6:6-8).
Pathianin honpiak thilte ah kipahdan theile I lungkimthei ding uhi.
I neihlouhte ziaka lung gim sangin I neihte ziaka kipahdan zille huai ah lungkimna I mu ding uhi. Tucson Arizona aa om Rev. Martin Blok kichi in Michigan mallam a Pathian thu gena a khualzinna aa a thiltuah khat a gen sawn hiai a om hi. Car a pai kahi a lampi nawl khatlam ah mi upa samngou khat khea pai katuaka, ka car ah ka tuangsak hi. Kithei tuah louin sausim katuang khawm man ua, ka hongkitheih khiak ua leh preacher tuak kanahi uhi. Ka mipuakpen northwoods aa school khat ah nipi kalthum sung khawng thugenna neita anahi. Aman ka thugen nate'n nipi kal thum sungin dollar 2 honpia ua kakipak mahmah a chi hi. Nitaklam chiangin nek ding sang leh bawngnawi honpia ua, katate a lungkim kholkei mahmah uhi. Himahleh a kiang uah hiai kachi hi. Pathianin honchiam sang leh tui ahi a, a mau sang leh bawngnawi honpia ua, I hampha mahmah uh kachi chih hongen hi. A car hekpa'un a thilzak lamdang asa mahmah a, a mangngilh theikei hi. Lungkimna thuguk leitung thilte a kipan ahikeia, Pathian neih taktakna aa kipan ahizaw hi.
Tulaiin kristian hausa Pathian kianga kipah thugen ding donlou mi tampi aom uhi. Vualzawlna a donuh toh kituaka kipah thugen mi a tam hetkei uhi. Gam haksa Communist gam leh kristiante doudalna gama omte'n thuakna a neih kawm kawmun Pathian vualzawlna haksa pipia a muhte uh tung ah Pathian a pahtawi theizaw uhi. Kristian I hihna ziak ua sawina I tuah ngeilouh ziakun Pathian tung ah kipahdan theilou I hi zaw maithei uhi. Gingloute toh kilamdanna I neih hun sung uh biakinn kikhop sung kia ahi. Biakinn sung ah leng I taksa biakinn sung ah ommahleh I ngaihtuahna biakinn sunga omlou a hithei lai hi. Hichibang mite'n kristian hihna ziaka thuakna tuak maizen le hang baihlam taka koihpukin I om ding uhi. Gingtu taktakte tuh thuakna atuah chiangun a hat semsem uhi. Pathian aa kipana a muh ding uh a theihchet ziak uh ahi. Pathian aa kipana a muh dandan uh ziaka kipaktheite lungkimna thuguk neite ahi uhi. Haksatna nasa penpen a tuah laiun leng Paul leh Sila lungkimna hinkhuain a hingthei lai uhi. Amau suangkul sung ah Pathian kianga thum leh phatna la sain a omthei uhi. A buai laitak ua suangkul sunga a thum uh thil hitheimah ahi aa, a hi dingmah a hi. A tangpiin I buai chiang ua Pathian kiang a thumna kinei chiat mah ahi. Himahleh suangkul sunga a khe uh singtum toh henbelh a om a, a khut uh sik khainiang a henkhawma om kawmkawma Pathian tunga kipaka phatna la a sak theihlai mahmah uh thil lamdang ahi. Pathian toh kizopna diktak a nei uh chih a chiang mahmah hi.
Philipi khua aa sungkul sung-ah zankim laitakin Pathian phatna la hongkisa a zakun suangkul tang tengtengin lamdang asa ua, Pathian leng a kipak hi. A thumna uleh phatna la a sakte uh dawnna in Pathianin zin nakpiin a liingsak hi. Suangkul kongkhak hongkihong a, Paul leh Sila a hennate uh hongkitol a, suangkultang tengteng pawtvek thei dinga zalensak in a om uhi. Himahleh kuamah pawt tum himhim a omkei ua, Paul leh Sila in leng a phatna la a sak uh a tawp tuankei uhi. Suangkul tang tengtengin a ngaikhe depdup maimah uhi. Hiai Pathian sikha nihten bang hon'gen uhiam chiin a ngaikhe kheukhou maimah uhi.
Suangkul sunga nuamsak luatna ding a ziak a omkei hi. Suangkul tangten zingchiang in katung ah bang thil hong-om dia aw chih a ngaihtuah tangpi uh ahi a, a tuhunzat lel uh leng hun nuam ahi kei hi. Paul leh Sila a zepnate uh a pumpi uh san helhul, dup hethut, a khut uleh a khe uh hen-a om, bangchidana huchi lawmlawma kipakthei ahi ua? Thumna kia hilouin phatna la leng a sathei lai uhi. Bangmah ziak dang hilouin lungkimna thuguk aneih ziakuh ahipen hi. A neih uh Jesu ah a lungkim ua, a neihlouh thilte uah a kihih buaikei uhi. A thuaknate uh leng Jesun eite honitna ziaka a thuakna sangin anep zolai chih a thei ua, a mau ah kipahna beitheilou a om hi. Suangkula a omni zan ua a hinna uh bei ding hitaleh a zing chianga vangam a om ding chih a naihtuah chiang un kipahna a mau ah a luanglet hi. Paul leh Sila a maukiain suangkul ah a omkei ua, Jesu toh a omkhawm uhi. Suangkul sung mial mahleh a maua om Jesuin a mau vakna a pia hi. Krist min ziaka a thuaknaun' gah tampi suang ding chih a ngaihtuah chiangun suangkul sung-ah leng phatna lasak a tawp tuankei uhi,(Nas. 16:25).
Pathian itna a kipanin bangmah in honkhen theikei ding chiin Paulin a gelh hi. A mah huai ginna ah a om a, huchiin lungkimna thuguk a nei hi, (Rom. 8:35-39). Jesu krist hehpihna ziaka hotdamna a neih kipahpih in leilam thil himhimin ahihbuai nawnkei hi. Pathiana kipana I muhte' ziaka A mah tunga kipah gige theihna tuh lungkimna thuguk hi. Amen!!