Gawtmun Naipen Buakmit Inkuan
~Vanlallian Valte

Zodawn ah inlusi 50 ching minmen omna, 'Sialngiatzaang' kichi khonuam mohlou khat a om. Louneih, theihuan bawl leh huangvulh ganta khoi khawng minautaangte nektaak zonna taangpi ahi. Guite Road in tawnkha ahihmanin, sumbuuk, ann-nekna leh giahbuuk bawl chihte sum naak hoih mahmah suak. Vaangkhozawl laizangtak, 'Koplen Vuum' pialtouhna bul ah khosung adia sumbuuk lianpen leh alunpen - tenna inn toh kizom phei dinden, "Hauthawn General Store" kichi om hi.

Pa Ss Hauthawn bel, kholhkhawm pih nuam; houlungkup siam; taksa leh kimvel sianthouna awlmoh; kawlbaibek banga zingthoh bel; tualsingpi hai; biakna limsak; Pathian zahtaak mahmah (kipang) pa chingkam khat ahi. Khosung leh sehvel khuate' thudot ahihban ah Guite Hausapu, saptuamte leh simleivai a vaisaite thulaak muanhuai ahi. 'Petition' gelh leh 'affidavit' thutuun lepfel bang zaw aw, zouthoh tak hiveh e! A khutgelh nalh. Khawlsut deih t'a diin laisut-khawl lui bimbem kineih hi. Khualzinmi: khe a lampai, gari lian leh gari neu a 'ving... saa' a Sialngiatzaang tawnkha taphot khawl maih ngei ngel louhna hulliap neitu ahi.

Pa Thawn in dawi havang kaal a hun-awl aneih chia'n gamvaak-luidunghoh nuam sa. Ngabetna diin dynamite, dynamo, bleaching powder leh damdawi khawng peuh zang ngei himhim lou hi. Top senglouh leh nekching nai lou te sukchimit kisiamlou hiven! Gilmul kivang zou hial khop a khatvei-nihvei mehkhop banah insak-inkhang kholh tham a luahdok peuh leh huntawk sa loliap. Kawlzaalpi sunga ngalen leh tempawng guang zok-houh in, thau lawngphiik nei khat liangbat a agamkuan lamtak ka tuak mun simta.

Kumsawt loubang tulpih dia deih chibang ateel nu bel: mohpuakna khempeuh guntuh tak a semkhia, genthei-liangvai somdawl dia kiman gige, damlou veh ze-ol lou, deihlouh tuak taphot kan pahpah, mi hehnem siam – Nu Zanemsiam ahi. Gilsunggah goutan nih - Lasak, tumging lawmnou lepmawi leh kimawlna tuamtuam te a kiva - Lia Ngaizoukim leh Tv. Hanglunthang nei ua, tuailai leh khotaang thil vaisaina ah kipezou tuaktuak uhi.

Hun-leh-ni te ngak neilou in mualliam zel a, michih' tungkoih inkuante zong kimisak huntawkte' ngaihven hon loh toutou uhi. Hauthawn in avilvil bawn hi lou – sikul, khawlmun, zunbuuk leh vaantaang kholhbuuk lamna diing, hawkguam puahtuakte puahna, Gova Lui lei dohphatna, Gamgilui tuizawlna leh Singgaimual khua toh kikal lamlian puahphatna diing 'work order' got in om ziahziah lel. Amah lah uak nilouh. Kawlnisuak sim in akhosakna uh khangtou hulhul.

Mihingte Khangtou a, akouzaan diing uh Pathian deihlam himahleh, khangtousaktu limsaklouh phah pa tung gik na'n chia! Thawnpu sung a kualgu kiletsakna'n paukam hon nei: Biakna lam thudon nawn lou. Zu-le-sa leh laithaai kuang ah kibual thanghuai khin. Ahi, zulhzauna'n vaihawm. "Khovaak zah chih khawng zaw, a tulai kei lua!" chi. Langtang a neksiatna gam ah nekguk leltak ik ah nambun buang moh. Thil heikawi asiamna pen khosungmi leh gamlei milip t'a diin sialpi vuahthuak a thuak ngai maimah. "Negu non chih theih ua leh, negu hilou in ne-langtang hizaw lou di ka maw! Ka dinmun ah hong ding tei sin him dih ve vua. Ahia... ne lou taktak le om khang!" achih khempeuh vial leh akimpih pa'n, "Zeilou tak a ne te le eng ken!" chia kawk vengvang!

Khuak pilna leh neihzoh ziak in sungkuan chidam leh zahhuai bang in kilang uhi. A insung uh Pathian' phuhkhiak hinapiin, Pathian tellouhna ahihmanin pahtaak loh lou. Tung luun-maang' vanzat: kuate hiam, bang thil hiam tunga ki-nga a Pathian pen phawkpha nawn vet lou. Vualzawltu sanga a vualzawlna delh zaw mawk chih chuuu.... Mahni hihtheihna zang in Pathian' thangpaihna pumpelh tum uhi. Siamtu' deihdan zong lou piin 'Pathian limsak' chi a mite theih lunggulh zawsop uh e!. Amau' insung chidamlouhna leh poltehna in khotaang hindan nasan nuam sak lou baan hi.

Atanu uh Ngaizoukim lah, mi-thak tangpa mit-keuh ta-phot pawng pahtaak pong! Deih tumta nasan nei kip mawngsan lou. Aziing-uak awk-awk lamtak paamveng meithainu'n phawk chitchiat. Theithuuk leh meivuu hon duh saan venchin in, "Huai mipa' sawnta paai hi-tawk venteh, minsiat diing ngaingam lou in houh Lamlangtuang khua ah va ki-enkol tadihdih e! Sunglam haatlou suanlam tazen veh, mudah ke... va sukkiak sese!" chi siausiau khop hi.

Khaih! "Ngaidih, VK Tawna College, Lamka a siamsil mazap guibang zomdia hanchiam - Hanglunthang khawphawklou in RIMS damdawi-inn a Intensive Care Unit (ICU) ward ah puakluut in om, achi ve ua!" Footbal tournament, 'Solidarity Super Leaque' a vualtungtuanna lawm khawvak khin, tuahsiatna tuak hih chituak hi. Vangphat-huaitak in hong dam khe kiang-kiang mahleh, ngalpengguh kitan khin ahihchiang in, futbol pek nawn himhim lou diing a hasot ahi ta.

Pa Ss Hauthawn bel asunggil haat takzet ahi ngei diing a, hiaizahta a nekguuk nung in le sungpuak leh gilgumna'n pha ngeilou hi. A nekguuk-taakguuk zouzai agilpi leh ngoi in lah kei mahleh a sin, lungtang, tuap leh kalte poihlawng khin dimdem dektak. Taksa zawngkhalna'n nichin in bawm. Sesum zaw vanzat tangzaang ahia, doctor leh nurse te hon enkoltu hi uhi. Himahleh damsaktu bel Pathian hi veve. "Pathian panglou hauhsakna zaw hauhna thawn lel ahi..." chih tengteng Pa Sesum Hauthawn tung tu. Azahhuaina mansuah siksek. Aw, sesum! Thawn: thang kimvel hilou in, Thawn: Lamchiteng a lohsampa suak. Neih-leh-lam ah phungching mahleh ahinna dengdel a, mau-mehkeeu takngial le lenkip zou nawn lou hi!

Hawikawm a gawtna tuak ahi diam, Siamtu'n deihna nei lai – hong halhkhe zel sam a, neksiatsa nengthem (asang) zong in vialdian ngap lai tadihdih. Khatvei, a khualzinna khua khat ah EBC leh NTBC te'n joint revival crusade nei uhi. Zaan khat, Evangelist Thawnkhansuan in, "Delh leng ka delhpha lai diam? (I Samuel 30:8)" chih pansan in thugen hi. Mipa lungtang lawng petmah a, kap hup-hup kawm in thumna nei a, Pathian kiang ah kipekhia. "...Ka hehpihna nang din a hun hi, ka thilhihtheihna hat louhnaah ahi hihkima a om... (2 Korinte 12:9) chih leh "Delh in na pha ngeingei ding, na honkhe vek ngeingei ding..." chih tungtawn in kipahna thak tangta. Toupa phat in om hen! Kumpi David bang in a hinkhua a lungzinna thupitak atuah lai in mahni ki-ngaise mailou in ahih ding dawl - Toupa kiang zuan; tha-thak la in Amah ki-kemsak chinten.

Pianna bulpi ahihna phawk, amanphatna leh insungpa' poimohna hon limsak chiangin insung navaak ta. Pathian a ki-thunun leh khovel thilte a kibuallou; kipumpiak tak a insung kembit; insung poimoh sutuah, salam leh khalam a chawmtu, heutu leh siampu hihna la; bitna leh khamuanna tuntu hong hita. Amah' muh phakna chiang leh ngaihsut batna chiang lel a ki-nga hinkhua hilou a Pathian thilhihtheihna leh muanhuaina a ki-nga hinkhua zang zawta. A zi a iit di bangtak a iit a, vanzat tangzaang hiam, gou chi khat phet hilou, amah panpihtu dia Pathian' "siam-piak" ahihlam theichian a; amohpuakna kipezou tak a hon sepsuah chiangin, a zi leh tate'n zahtaak ua, athunuai ah kituluut pah mai uhi.

Nu Nemsiam zong khalam hinkhua hong kivel thak hi. Sisan a tatsa ahih lam thei napiin, naubang saang lou ana hi nilouh. Si-thunam zen a hotdamna a zon nua'n taanglai a Maang Jesu sepsa pom kichian thei ta. Pathian lauhdan siam, thumhaatmi leh khamangthang vei gingtu ahi. A pasal diin kipumpiak a, iit in kem. Khut nasep kizen – sungkuanpihte' nektaak diing bawl; Insung enching; tasam leh liangvaite lainatna'n dim, awlmoh tak in panpihna thilpiakte pe zelzel. Khentuam a nei kei a, nawlamte leh a luutna lamte chih omtuam sak lou hi. Thutak a kithunun; aneu-alian siang'h kamsia zang ngeilou a; itna toh dohzou; maitai takin nungta thei. Huan, amah kingaidam in midangte zong ngaihdam theihna tasam lou hi.

A tate uh chi sawn-sawn le hang: nu-leh-pa' hoih ziak kia hilou - thuman pen thildik leh Pathian' thupiak chiamnei masapen, lamzanna diing, khankhua sawtna diing leh Pathian' pahtaak, A lungtaina, ahihman in thumang uhi. Pathian deih louh thil hihkhelh diing lauhpen in nei uhi. Kimnu leh pasal khat, Ebenezer Academy school a aseppih Khualpu hong kideihta uhi. Akaal uah paldang kizep dek nakkhem mahleh buaina huaisia omlou in nupa a kizopna detdou nei in insung hon suang uh. Mohpuakna thak toh kikhen nawn lou ding in kichimat ua; Pathian a kibulphuh; Pathian' deihdan zong in zui uhi.

Thangpu in BA sangtak in hon zou khe-dom. Hausapu' tanu, nautum Lia Nunnem in le BSc Nursing azil zoh in, Lamka, Tedim Road, Center Road (Kangkap Centre paam chin) a Dr. Hauzel te' clinic ah sem tadihdih. Nihgel' kichih simsimna sawtkuam hita. Lia in zilna sangzaw zoptouh hiam, sepna kichian zon, ahihkeileh, pasal neih diing saikaak lellel. Hanglunthang mah a lungtang a lianpen hiding hiven, Sialngiatzaang tangdung a kho omte akipan misiangthou zatam pungkhawm te mai ah ki-khutsuih uhi. "Sihna lou ngal..." chih hitop mai daan hiin maw!

Pa Thang ahihleh bel, damsung sunnung' beikuan hun a Village Council ukpi khuam poimoh pen ahih toh sumbuuk enkol diin nupa thak te ngansiah hi. Sumbuuk keklian in damdawi chikim simlim in semuk ua, signboard ah zong: "(Van nepnawi & Damna zatui ngah theihna saauliim)" chih volh behlap uhi. Singngat doctor V Jamthianlal in Sialngiatzaang tangdung kha teng in veh gun. Damdawi: Chisa khingsakna, sungkhoh hulna, huutlou, sisan haatna, sunglam haatna, guhna damna leh hii-dalna te athawn in hawmkual sek. Assam Rifles doctor te'n le avangkim in free medical camp bawl zelzel uhi. Huchibang ni-khua in Hauthawn General Store mah pansan in nei uhi.

Zingsang khat, New Lamka a Damkam Bazar ah Sialngiatzaang khomi Vungnou toh ka kisutuah guih ua, gen masak di bang vaang pian mawk hi. Naungek aangpuak thiin-then kawm in naupang dang baankaih ti-tit saamta -Kilawm dek kawi ta zawzen! "Hiai Bazar 1994 kum a phutkhetu, amah Phamta Upa B Kamkhanthang Ngaihte in bangdia Damkam Bazar hisak adiam maw, Vungh...?" ka chih leh, "Hemhom chin! Amin tappa a pu Damkam min manmohna dia Damkam Bazar a hihsak eileltakvoi!" chiin hon nuihsan sihsiah. A neh khii hi. Daakko paak daak 09 in paak mahleh Kumtawn paak bel paallun den tel lawmlawm hi. Khawldih ua, Taangsaam zong paalun phiupheu ta!

Ka hohna diing uh kibang - Gouchinkhup Veng a Hangzasial Road ah ahi hi. Hunlui peuh suut awk semsem lou zaw'n Zodawn lam tanchin houlimna dia zang in ka tonkhawm tou ka-kauh uhi. Numei naupang khat kawlsing gah lou khin, kumsuk khial, kap nilnel ka tuak ua, a khuukvun pilh nimnem te chillum ken nuhzol sak thiam-thiam khit in a silipar gui kitol ka vuahdik sak hi. Amin Hoihnu ahi. Tal ah chivom nalhtak vom in vuan veh! Naupangnu' kiangnai ah puan-aak lum phankhit louh, khauphanchiang – samul khau liim a kisiat ka mu. "Eh! Hoihnu, khauphan siam naset maw?" "Kei siamlou, nunu siam a siam mai!" "Nunu la?" chia ka dot leh tunglam kawk kawm in, "Vantung pek ah tawldam ahi ta..." chi'n khuisa hit-hit hi .

Vungnou te nutahon toh kikhen petmah diing ka hi ta uhi. Apaneute' kelkong a apialluut kuan in, "Khosakna ki-khat lou ahihna ah, Pa Thawn te sungkuan tanchin ka thei kipkawi bun nawn kei a, bangchi khosak sek le amahtak d'uam?" chiin ka dong a, aman, "Amau zaw gawtmun naipen buakmit a - van-gam naipen dinkhe te ahi uhi" chiin hon dawng leuh. "Ann-nek lim ni'u guai!"

"Toupa ngakten zaw a hatna uh a thaksak nawn ding ua; muvanlaite bang in kha in a lengtou ding ua; gimlou in a tai ding ua; bahlou in khe in a pai ding uhi – Isai 40:31"

*****
(Hia laigelh 2015 a Evangelical Baptist Convention Church' thupi: "Pathian' Pahtak Inkuan" chih toh kizawtawn tangthu phuahtawm ahi.)