KI-ITTE KHENLOU IN KIDEIHLOUTE GAWM KEINI
-Jamin h vualnam
Tulai i khovel paidan et in nungak-tangval, pumkhat hi a, inntum loutum suang a tuibang kigawm pah dingte kaal a itna/ngaihna dau hiaihiai a nawmtom bawl lua ibat nachiang uh om hileh kilom abang ta.Itna kichi mel-le-puam hoih,innten louten neih-le-lam hauhziak,pilna siamna neihziak a hong om hipah khollou ding hi.Hoih isak leh pil isak,neih-le-lam haumahmah ichihte leeng ingaih leh it theihte hong hipahlou ua,zawng napi,hoih khollou napi a i-it theih leh ngaihtheihchi Mi' ana omtuam veve hi. Tua ichih nopnabel,tulai in tua itna/ngaihna taktak omlou pi a, a neihziak a hauhziak sepna leh gou-le-gam aneih man a 'IT' leh 'NGAI' kineih a kitenpihsuk mawk chih paidan neilota ihi uhia chi ut dan ihi.
Hihleng ahitham a, nu-le-pa tampi tenleng Tate' maban leh leitung khosak naang etna in,atanu/tapa tawh midang kuahiam khat aneihziak, sepna leh a hauhsak man khong un itna kichi omloupi gawm in kitengsak sukmawk hivehang aw maw.Taten leng thuman lohchinna chihbawlin nial tuntun tuanlou ua, hilehleng ahi giauguau khatchuh om veve hi.Tuabang a itna/ngaihna tellou ahihziak mah in huchi lomlom a lohching in hong gahsuah phetphut khollou uhi.Amau a kipan pumpi tengteng, kizopna chiteng sepziak a, lemtak a suktuah leh kizomkhawma, hiangchih in sep dingdan bangtaka a sep chiangin pumpi a khanga itna ah amau leh amau akilam tou uhi(Ephesate 4:16).Khenkhat tenlah, ki-it ki-ngai ngoihngoih hizenpi, zawnziak leh sepna bangmah neihlouh man in daltheih dalmoh in daal in khen/hal teitei guigui hi hang.Tuabang khong honghih chiang in amau ah kingaihsiatna leh lungkiatna tung a, huaite ziakin khamtheih guihtheih leh thilchin hoihlou a hongkibual in hinkhua honzang maimah tuailai tampi ki-omta hi.Tuate ziakmahin vualzawlna te'n hon gamlat hiaihiai uh ahihdan phawklou ihihlam kitheilou lailai hi hang.Itna tellou neih-le-lam etlah man a kiteng nupate' leh ki-it kingai ahihziak a zawnman leh sepna bangmah a neihlouh ziak a ikhen/ihal guiguite' innsung ah kipahna leh lungmuana chii bang kituh khachiah lou ahidiam chih uthuai hi.Salam etin aneideuh leh khosathei deuh bangin kilang ua nopsasim bangmah le uh, asunglam lungvei leh kituahna kipahna lungkimna kitasam deuh ahi d'uam chihtheih in om veve hi.Kinakna kituahlouhna kiginlelhna angmasialna leh hoihlou thulimlouhna te'n innsung zelsuak vek hongbang maimah hi.Melhoihte, hausate leh sepna neihziakin; a dohzou a, a migi a, a haza kei a, a kisathei sam kei. Tuabang neite; a ki-uangsak kei a, a huham samkei, amah thulou thu a sa lou kei a, amah angsung a khual sam kei, a hehbaih kei a, hehsain a omden sam kei.Huan gilou a kipahpih kei a, a dik a kipahpih zaw, bangkim a thuak teitei a, bangkim a gingta a, bangkim a lamen a, bangkim a thuak khezelchih hilou a,Itna ziak keleu a tuabang teng omthei ahihdan thei thakthak nihang(I Korinth 13:4-7).
Innhoih leh thupi neih-le-lam sepna lianpi leh motor hoih taktak, alim, a-al, niang-le-tai a neekding dawnding kiningching toh kinaknaa a dim innsaang in, Tanghou gaw, inn hoihlou leh niteng nektawm mu a itna toh muanna a kidim innsung ahoih zaw ana chihilhial hi(Paunakte 17:1). Ahi a Pathian donglou leh amau a itna telloupi a, gou-le-gam, neih-le-lam etlahna ziak a i tanu/tapate igawm gaihgaih pen uh adikpen leh hoihpen hong hikhollou khading hi. Tuateziak khong mahleng hinteh innsung kisia, nupa kal buai, nupi/papi zawlsai, kikhen leh kimaakna thu-le-la alang alang a ale'n vengvung a nuthawi/pathawi leh naupang kemtuding kichian leh gina omlou a genthei leh tagah a i pumdim nasan uh. Neih-le-lam ah zaw tasam leh lungkham vungvung in omkei khani, ahihziakin itna, hehpihna, lainatna, migitna, dohzohna leh a dangdangte tasam leh neiloupi a innkuan bawlkhak baihlam mahmah ding suak hi. Ta' leh nau hongnei d'ua hong ki-it maiding uh chih duhthusam vuaktoh innsung hong khang hoih veekvuuk khollou khading hi.Innhoih leh thupi sung a teeng a kipahna leh lungkim a lungmuan-na neihlouh theih veve hi. Alim, a-al huan ziahziah mahleng gilvah laivah in ann neklouhthei veve a, kipak lungmuang leh tawldam tak a zan ihmut teitei ding chih hong dik-khin khollou khading hi.Itna/ngaihnate neilou a, a tellouh chiangin; huat pet mahin a honho ding ua, vuaktangin kihawmkhaiin a hontaisan ding uh chih (Ezekiel 23:29) mangngilh louh hoih ding hi. Itna tel-loupi a nupa hong khosak chiang un kitheihsiamna hong tasam ua, ningkitelin kimuannate hong beithei hi. Huatna hong khanglian in tua in kitauhtuahna leh kidounate tokthou a, a damtheilou meimatum hongsuak maimah ahihdan phawk tontung nihang.Himahleh tuabangte bang chibang a meimatum huaisia leh lungvei hitawkmahleh Itna in tuabang tatlekna tengteng tuamdam in khuhmang zou mahmah ahihdan theihbeh hoih leuleu ding hi (Paunakte 10:12).
Bang chituk a pil a siam a nei a thupi himahlehang 'Pathian' thei a, athupiakte zui a kem a hinpih na'ng in Itna neih kisam petmah hi. Itna neilou in Pathian a theikei, Pathian lah itna ahi ngal a (I Johan 4:8) chih kuapeuhin hinpih khanpih a neihchiat sawm nihang.Kituak dialdial, kilem diamdiam leh innsung gamsung chidam naang in itna mah thupipen hi.Apoimoh kholdiak leh deihtuam di'n nupa kal a ITNA leh koppih zi/pasal dingte' kal a ITNA mah mitsuan in neilehang lohchinna leh gahsuah nanak hong hiding in lam-ethuai isa hi.Tuabang hileh nupa kal ban ah innsung ah, tanau laina kal ah, khosung ah leh innsak-innkhang kal chidam in hong hoih maiding hi.Huan dan zuih kimna a ding in leng a kalbi masa ahi chih mangngilh louh hoih in deih huai mahmah ding hi (Rome-te 13:10). Huaiziakin nu-le-pate, nungak leh tangvalte hi'n kuapeuhmahte'n "KI-ITTE/KINGAITE KHENLOU in aKIDEIHLOUTE GAWM SESEKEINI".