OPEN LETTER
24/01/2016
To,
i. JAC Against Anti-Tribal Bills.
ii. MTF-D
iii. INNPI te, JPO
iv. MDC te, MLA te & MP
v. KNO & UPF
vi. Saptuam Heutute
A zahtak huai heutute' ngaihdan tamlou kon kum ut hi
JAC makaite' Manipur Tribal mite maban ding khualna ziaka, sun-le-zan chih omlou, a nuam sanga a nuamlou hun tamzaw tham ding, hiamhleh mailam non paipih teiteina uah, na tung uah lungdamna lian lua hi. Na mimal hin khua ban uah, na innkuante uh a dinga leng dipkuathuai leh thu kipahhuailou, mipite apat mahmah a leng na zak hun uh om kha ding hi, tua banga om leh zong, mipite tel siam nailou uhi, chih toh maban kal hon suanpih zel un aw. Hiai ah thu tamlou kon kup-ut om hi.
6TH SCHEDULE VAI:
I theih chiat bang un, 6th Schedule pe'n kum tamtak paita, NDA Government a om masak apat, Central Government in Manipur State kiang ah lai na khakta ua, huai zoh Congress Government hunte in leng na khak zel ua, tu lel a NDA Government hong om nawn in leng khak tou zel uhi. Lai tam veipi ki khakta, Central a NDA Government leh Sate a Congress Government a om hun a leng khak uh, Central a Congress Government leh Sate a Congress Government a om hun aleng khak uh, State Government in a dawn chiang a NO lah chi ngeilou napi a, YES lah chi tuanlou, tua a hih leh bang hanga 6th Schedule Manipur Hill Area a koih a om ngeilou hiam, ngaihtuah vengveng poimoh hilou hiam? Strategy leh i vanzatte uh khek ngai om ei diam? Tukum January 2016 in leng tua Central a BJP Government in Sate a Congress Government kiang ah 6th Schedule thu, Chief Secretary ah khak nawn uh hih tuak hi. 6th schedule pe'n Political decision, elected representatives te thupukna ding hi'n ka mu a, bureaucrat te'n a mau ut dandan a dawn mawk theih uh hilou ding in ka um hi. Central Government ah nasataka nawk ekek poimoh thou mahleh a sukna ding taktak State Government ei zaw diam? State Government in Political decision, elected representatives/Palai te tungtawn a decision toh hong piang ding in upna nei lian mahmah ing. Tua a hih leh palaite bang chi zat ding?
JAC BOYCOTT APUAN VAI:
JAC in Bill 3te Assembly a discussion omlou himhim a ahon passed ua patin, Tribal MLA te Hill District sung a alut ding uh phallou in boycott puang hi. I hehna tawp khawk i sung buaknate uh laka khat ahia, hoih hi. JAC in Boycott a puan ma inleng, mipi' hehlua leh lamet bang salou in i Tribal MLAte a diakin Churachandpur district sungate tenna innte, i haaltum sakta uhi. Amaute'n zong tenna inn ki halsak ziakin lungkham leh dahin om mahle uh, thei siamthou ding in um ing, a hangbel mipite thangpaihna latsakna hi ven. A hih leh hiai boycott September 2015 a i puan pe'n uh tutan a dingin a hoih lai hiam, i demand te uh muhna in pang ding hiam, ei Tribal sung hon ki tuaksak semsem hiam, chihte et-thak tuak kasa? A hoih leh sutzop touh zel a, a hoih kei leh khen tuak ding hi? Hiai boycott in Hill district teng uap a i bawl uh ahia, Hill District dangte ah Tribal MLA te kuateng lut a, kuakua in programe zang uh hiam chih lam genlou in, kei ana om khak na Churachandpur District kon gen zual ding.
29/12/2015 in Power Sub-Station nih Ankhasuo (Vangai) leh Sinzawl (Thanlon Constituency) a inauguration (hon) ding thu om hi. JAC in thupuan omsa (Tribal MLAte Boycott) bang in hiai inauguration ding leh Tribal MLAte a hoh ding uh, ama ni nih vel apatin kham bikbek hi. Hoihlua, heutute'n non makaihna uah mipi'n theihtawp a hon ki nung thuap. Hiai inauguration ding Boycott ziakin, New Lamka, Lanva, Mata, Bungmual, Pearsonmun, Mission Compound, etc te ah zankhovak a duty bang leng om hi. A hia hiai Power-Sub Station te gel hon khiat in hong om veve hi. A kho nung a thu i theih thak leh JAC in thupuan hon bawl pe'n Churachandpur district teng leng hilou a, Area khen khat keleu a dia zat ding hi kha ei diam hon chi sak mahmah. Huan ah JAC in development (Power Sub-Station) hon ding ka dal kei ua, CM leh Tribal MLAte'n Hill district a lut ding uh ahi ka phallou uh, chih dan bang thu hong om nawn. Huchi a hih leh bangziaka development i dal kei leh hiai program a kuan ding Official duty dingte zan khovak a duty zen a dal ngai ei ding, hon chisak mahmah? CM leh Tribal MLAte hilellou hiam i Boycott! Huailou, Vangai lam a program pe'n ah mipi'n naktak a ki thuahpih leh panmun khawng ki hawm uh, himahleh Sinzawl lam a pe'n nasatak a dal in om, mipi pan dan ki banglou mah bang maw, a hih kei leh JAC in thu piakdan ki banglou a hi zaw diam ah?
12/01/2016 leh 15-16/01/2016 te in Pu T.N. Haokip, D. Phailien ah "D. Phailien Khopi Maicham" bawlna leh Khongsai Inpi General Assembly, Zoljam vangkho, Churachanpur district te a program zatnate ah hoih takin tel hi. Hiai Program zat ma in JAC apat thusuah bangmah a om kei a, zatzoh a hih nung inleng, bangmah a om tuan kei! Bangziak ei ding? A hih kei leh Pu T.N. Haokip pe'n Boycott khalou ei diam, hi ken teh maw?
Heutute kon gen ut a hih leh thupuan i bawlte in, Manipur a Tribal tengteng a ding leh omna teng cover thei leh chih deih huai kasa. Boycott i puan ahi, hoih taka a vek ua Tribal MLA te Boycott ding hi mai ahi. A hia, September 2015 a Boycott i puan pe'n a tung in ki thutuak nainai, hoih sa nainai hi in ka ki thei hi, himahleh tu chiangin a tunglai toh ki bang nawnlou a huai ziaka JAC in implement haksa sa i hi diam? Hiai a tung a Program i gente ah mipi ngaihdan ki bang hetlou a hi chih a chiang mahmah a, mipi ngaihdan ki banglou a hihna ah tua Tribal MLA te i Boycott na pen khen a hoih diam? Kheng hi le hang, i thil deihte (i demand te uh) tangtunna ding in i MLA te naktaka zat theihna a om diam? Tua 6th Schedule bang, Central leh State ah a Government a ki bat leh leng pianglou, a ki batlouh a leng piang tuanlou, huchi a hih leh a next Step ding bang? Tua i MLA te uh i Boycott a hi ua, a kalsuan ding uh leng phallou chihna ahi. Huchi hilou in, i Boycott uh lakhia le hang, banga chi dia? Limtakin i Tribal MLAte leh JAC heutute'n hon en khawm le uhchi amau zong bawl khial akisakna uh, pai khial a kisakna uh, ei mipi lam in zong i hih khelh khak zong om thei, tuate thupha ki tawituah a mailam nawt hun lua hi lou hiam, zong ong chi sak mahmah. 6th Schedule pen Political decision ding in ka um tinten a, i Tribal MLAte i Boycott na uh zukkik in, amaute toh limtakin Table ah genkhawm in, i Gam leitang humbitna/kepbitna ding in, lungsim mun khatpu in, lungsim thovengtakin kal suan le hang, tua i deih uh State Cabinet/Government te ah positive response a om theih diam hon chi sak mahmah. Huchilou a zaw, JAC in Boycott amau (i MLAte) gamtang ut le uh zong lem hetlou, gamtang sim in ong om le uh zong ei pawlin zummoh hon chi zel ding ki bang, tua bang kal ah mipi'n zong i MLAte apat lamet ki nei veve, pau mahmahlou uh, daidide uh, Meiteite thuzoh sa hi ding uh peuh chi zel. I deihte uh a tangtunna ding in hun paisa a i thil bawl uh, Boycott i bawl pen uh, khentuak ei diam, hon chi sak mahmah. A hih kei leh i Boycott toutou le hang i demand te uh mu ding i hi duam? Bekthamlou in ah, tua i demand te uh genlouh a zong, a mipi lam area khen khat leh district khen khat in Boycott nawnlou himhim ta bang zong ihih mel theihlouh ahi, i hihdante pe'n ki bang thei leh chih zong a deih huai mahmah khat zong hi maw. Heutute non pi dandan ua mipi ki pai ahi, maban ding limtakin hon ngaihtuah un.
5th January, 2016 zingsangin ka Gate uah "The Lamka Post" ana om a (News suahlouhna sawtsimta ei chianga ki ngaklah lua) thil dang thutuam "Kum Thak 2016 message, ka tung ua khialte ka ngaihdam bang un" Pastor Rawna gelh ka sim a mapha kasa. (Tun hiai, Kum thak message pe'n Zogam.com, phualvatimes.com, zogamonline.com te ah zong om hi'n thei ing). I movement ua i demand te uh i lohchinna ding un, hun paisa i hih khelhte uh ki ngaihdamtuah a, pankhawm ding chih chiangtakin a gelh hi. Hill district teng uap a movement a pai ding, mipite, JAC,JPO, Innpi te, MTF-D, MP, MLAte, MDCte, KNO, UPF, NSCN-IM te responsibilities ki hawm a, pankhawm poimohlua chi hi.
14/01/2016: Hiai ni a JAC thupukna lakte, 26th January 2016 (Republic Day) Boycott ding, i lungkimlouh latsakna a hia, nasatak a pan i lak ua, Hill District chih kithutuak tak a panlak teitei ding ahi. Huai kawm in 1st February 2016 apan ni 5 (5 days) Chakka Bandh/Blockade National Highway te a Hill District tawn khate ah neih ding leh National Project te dal ding chite, ngaihtuah tuak lai a om diam? 31st August 2015 apan a ki buai, a diakin Churachandpur district bang sawt nailou ahi, normal taka niteng nektak zonna a pai theih pan. Tun Chakka Bandh/Blockade bawl le hang, Hill District dangte zaw thu tuam buailou ding un ka mu hi, himahleh Churachandpur district kibuai gawp theilou ding hia, ei a mipi nektawm zongte ki gawt na maimai ei diam? Ei a mipi nektawn zongte ki buai gawp in Government in lah hong phawkpih vetlou chih zong om thei dep lai ei. Heutute'n non paipih dandan uh bel mipi'n zuih ding hi mai ahi.
Huailou in, State Government in hon nelh siah mahmah uh, development lam kia focus zualin, development works te Valley ngen a koih uh, Hill District te ah koihlou uh chihte nasataka i tangkoupih uh ahi. A hia, en tun National Project Hill district sunga om sunsunte dal zelta le hang, State Government a dia panmun/stand point ding uh bawlsaksak lel ihi kha duam? State Government in Central Government kiang ah en- un, a mau/Tribalte mahmah ahi development works deihlou, dal uh hon leh chih thei ding uam? Tua ei district sunga National Project om kha, ka theih om sunsun, Guite Road bang leng tua i thil sawn in hon subuai sawnsawn diam? Guite Road hoihna dinga kikoukou, Central Government bang leng kisa kiangkiang a om, a lehlam tak ah ei a subuaitu leltak ihi kha duam? Huai ban ah, Central Government inleng development works te deihlou na hih uh leh chih Project om sunsunte honlak khiat sak mawk le uh, i maban ding ua hoih hetlou ding abang hi?
Project te dal sangin, en vengveng in Hill district sung a State Government leh Central Government Project omte a dateline te en in, hiai Project te time period hun hiaitan ahi, a ki zoh vekna ding in Sate leh Central Government in pan honla un, leh chih le hang, banga chi dia? Hiai a dateline te a a zoh kei uh leh, hiai te ahi, thil dang thutuam Development lamkia et-in leng Government in hon nialhsiahna, chia nasataka ki kou theih ding ahi. Heutute thupukna nou khut a om hi.
Heutute aw, kei muhna panin i demand te uh i mualsuahna ding un, Pasian kiang a thum kawm in "hun paisa a khat-le-khat bawl khial ikisaknate uh kingaidam tuah a, khat-le-khat thupha ki tawituah a, kal i suankhawm ding kisam sa mahmah ing". Tua Manipur Tribalte'n i deih uh thu khat kia hilou in thu 3/4 bang hi, 3bill te zatlouh ding, tual thattute mat ding, Singtanggam leitang kep bit ding (6th Schedule), Manipur State apat inn tuan ding, hihte muhna ding in JAC, JPO, Innpite (HI, KIM, MPC, UNC, ZC), MTF-D, MP, MLAte, MDCte, NSC-IM, KNO, UPF etc te i pankhawm uh poimohlua hi. A hangbel, pawl khat hih theihte pawl khatin hih theilou, pawl khat pressure group a naktaka a pan leh pawl khat negotiation power hat, tua dan a i pankhawm leh Pasian in zong thupha honpe dia, i deihte uh tangtun ding hi. Tua hilou a, pawl khat in pawl khatte gensia, hou sia, thulaktak salou a; kou kia in zong hih thei ni ung, nou zong hon poimoh kei ung, ki chihna a om zenzen leh bel, tua bangte pe'n Manipur Government toh a pang khawm hi lel dingin, tuate ziaka i deihte uh bangmah kimulou ding a, bekthamlouh ah ei sung ki sat zak ding hi hang. I demand te i muhna ding un, pawl khen khat gen siat, mi khen khat gen siat, i ego lianluate, mi dang thusimlouhna te, ei kia in bawl theih ding kisaknate, ei ngaihdankia hoihsaknate khempeuh i sacrifice ua, thukhat-la-khat i sat khawm uh ngai hi. Tua dingin Pasain in thupha hon peta hen aw.
Hiai a tung lama teng 19/01/2016 in Chief Covenor, JAC Anti-Tribal Bills, Churachandpur kiang ah mail in kana khakta a, awlmohlua ka hihna ah, bang hiam phatuam a om khak leh chi'n a tung lam ate leh hiai a nuailam a te, mipi leh heutute' theih ding in OPEN LETTER in kon bawl thak hi.
Mipi'n innpite leh JPOte tungtawn a tua i buainate uh hon makaih dinga JAC heutute' hon vawkkhiatna hi ua, thil nuam hi kei leh zong hamphana hi uh, mipi'n hon nungthuap hi. JAC heutute kia hilou heutu tuamtuam in theih tuak kasak, khat hong genlai ning. Mahni ki letsakna, heutu dangte simmohna, mahni kia gam it kisakna, mahni kia thil thei kisakna, heutu dang khempeuh diklousa a gen siatna leh ego lianlua nei heutu leh pawl/organization i om zenzen uh leh, hih anuai a bangte (phualpi lam apat panni):
MTF-D awlmohna hangtoh kisa a hih hang; Innlam heutute (JAC, JPO, Innpite, KNO, UPF, MP, MLA, MDC) te'n bangmah thei kei uh, amau toh nnasep khawm zong poimoh kei, old system hi a zuih uh, Central Government nawknawk leng (a ground a mipi, heutute voice leh Palaite te thugen Government in a ngaih poimohdan, thei na zenpi a, theilou banga a om a) i deihte piang lel ding hi, chia innlam heutute toh nnasep khawm ding priority a piak kei ua, elelcted representatives (MP, MLA) te Govt. in thulak mahmah a hi uh chih thei a, Delhi a MP te toh kimu dia program bawl, khatvei a a fuh kei leh nih/thum vei bawl a kipei uh, ahih hang a ei MP te leh i MLA te toh kimuh ding priority a pelou (midang MP/MLA te zong poimoh, a hih hang in ei a te poimoh diakse) a a om nilouh ua leh Gam-le-Nam awlmohna toh 4th Nov. 2015 apat tutan dong, Jantar Mantar, Delhi a Rally a neih gige uh leh sun-le-zan a mi poimoh tuamtuam mu-a adian nate uh, bangmahlou suak ding leh;
JAC, JPO, INNPITE' in kou mipi hon tel khiat ka hi uh; chia MTF-D te bang Delhi a om a Central Government a om heutute toh niteng phial a ki mu thei a om leh poimoh mahmah ahi uh, chihte theina pi a nnasep khawm sawmlou, Palaite toh tutkhawm a ki hou ding utlou a Boycott det sawm leh KNO & UPF te kianga sum omlou a nna kisem theilou a chih det tel uh leh; MP, MLA, MDC te'n kou Government theihpih a palai ka hi uh, chia; mipi nautang in amau tunga bang lam-etna nei uh a, hichituk a i gamsung buai hiam chih theih siam sawmlou a, JAC, JPO leh Innpite'n kou theihpihlouh a Government ah a hih khiat ding uh om kei, MTF-D te bang a tot bawl ua, Delhi a MTF-D in a thil hih uh poimoh mahmah hinapi in a poimohna acknowledge/theihpih utlou a om a, Nam vai a nnasep ding zonglou, KNO & UPF te' genkia ngak, a gen chiang ua lah thumanna lel leh awlmohna taktak tellou a kal a suan nimnem zel uh leh, ZERO a suah ding ban uah;
KNO & UPF in fulltime a Gam-le-Nam a dia kipia ka hi uh, chia; mipi'n amau tunga lametna liantak a neih a awlmohthu ki gen khenkhatte bang hehna a a lak ua, young generation in bang lunggulh hiam chih phoklou a, JAC, JPO leh Innpite kianga ngaihdan kikup khawm diamdiam lam sanga hih bangin hih un, hih bangte hih kei-un a chih vatvat ua, MP, MLA, MDC te kianga Politics taktak sanga development works a nnasep louh a sum lak dingte a pi bawl luat ua, mipi ngaihdante a lakkhawm kei ua, amau ngaihdante mipi lak a theihsiamsak sawmloupi a theihsiam mai ding ua a lam-et ua, Delhi a MTF-D te'n Tribal cause ziak liuliau a, awlmohnatoh 4th Nov. 2015 apat tunitan dong Rally a neih detna uh, a kipiakzohna uh thupi mahmah napi, deih bang a a nungthuap kei ua, (tunai zeka Delhi ah, KNO heutute'n MTF-D heutute toh kimuh ding lel zong utlou, UPF in bel kimuhpih) pressure groups poimoh a sak kei ua, tua mipi movement a zat phatuam kei uh leh;
MIMAL A TUP GUK NEI a tua i buaina uh tungtawn a chance ana lak sawm a, a langtang a ki pei pawl leh a guk a ki pei a, i buaina uh awlmohpen hi awmtaka om a, i Nam in pawl tuamtuam i neihte uh, JPO, Innpite, MP, MLA & MDC leh UPF & KNO te bang a hoihna ding himhim uh, nna a sep hoih himhim uh gen sawmlou a, a selam ngen a gen a, hiaite himhim zatna ding omlou, haite tungtawn in bangmah i lohchina ding uh omlou, chia ki pei den. Hoihlou sakte a hoihna ding a thukikup leh kalsuan sawmlou a, uangtaktak a a hihlouhna tantan ua gensia a, thu bawl tawm a, pawl thakthak, group thakthak bang bawl khia leh bawl khiat sawm a, a taktak a lah i buaina uh a awlmoh sang ua, pawl omsate suk min siat dimdem a, amau mimal hamphatna ding zong leh, khenkhat MLA utna ziak lel ana om khak leh;
SAPTUAM HEUTUTE'N hichi banga i gamsung a buai vengvung pe'n pona mahmah, simleivai a heutu tuamtuam te laka ki khekna leh pankhawmnna a om kei leh mipi demand te bangmah mulou ding chihte thei kawmkawm a, Jesu Kris' in a deih mahmah LEMNA BAWL (peace maker) theina zenpi a, khupzeptoh simleivai a i heutute a gal et uh leh;
I demand te uh sang a, mahni thukia deih a, mimal hamphatna ding zonga, i demand te uh lonchinna dia khat-le-khat ki ngaidamtuah a pankhawm i sawm kei uh leh LAMETNA TOH, MANGTHANG DING, MANGTHANG KHAWM VEK DING I HI UH! Tua bang hun ding zalmang in zong man ut khang!
Heutute aw, na it uh i gam leitang leh mipite, mangthang mai ding ngaingam na hi uh hiam? Amaute na khualna ziak uh leh i demand te uh atangtun a, Manipur/Meitei Government a i saltanna ua pat a i suahtak theihna ding un; Pasian ki makaihsakin, hun paisa a i bawl khelh uh leh i sep khelh khakte uh ki ngadamtuah in, (Bible in, khat-le-khat ki ngaidam tuah un, 70 X 7 vei khelhna leng ngaihdam ding, chi Mathai 18:22, i gam leh mipi a mangthang mai ding a awlmoh a a it pha te' ngaihdamna puang masa ding hong kituh ve ua) khat-le-khat, pawl khat-le-pawlkhat ki niam khiatin, mailam nawt dingin hong ki kum khawm unla, mipite hon makaih ve ua, maw?
Heutute leh mipite, awlmohna toh lungsim a om bangbang hon gen hi ing. Na ngaihdanlouh uh bang hiam kong gen khak a om leh zong, Gam-le-Nam itna hang mahtoh nong ngaihdam uh kong ngen hi.
Sang Hangsing
New Lamka
