Sia Pau! Nuam Mahmah Ei..!!
Written By : K Lianthansang

Mi khat in phone mang mukha ahi ngei dia, facebook ah " Phone mang khat ka mu a, a neitu diktak in hunchiam beima ngei in ka kiang ah a laak theih ding. Hunchiam bei nungin, kuama'n bangmah a genthei nawn kei ding " chi'n, anuai ah ni 3 sung hiam hun pe keuhkauh hi!. Mi' phone sukmang mu a, mu ahihdan mite' theih dia a taklat maimai leng thupi lua. Himahleh, a hunchiam abawl pen in a thupina teng liahkhuh vek hi'n ka thei. Facebook kichi, miteng in a khoih uh hi zenzen lou zomah ahihman in, kisiamtana taak leng a hikei zomah. Phone I chih, kep haklua ahi zenzen kei. Ann piakpiak ngai a, a kepman tam beilaw di leng ahi zenzen kei. Kei ngaihdan in bel, " Chiklai peuh in a laktheih gige ding " chih di'n hoih ka sa zaw. Ganhing hiam hi a, ann piakpiak ngai ahih taak leh leng, ann man a I seen zahzah, hong laak chiang ua ana 'bill' ziau lel di himai ahi.

News ngaina ka hihman in, zingkal tengin ka sim khial ngei kei. A suahlouh chiang bang in leng thawmhau-huai ka sa zozen. Huai kia hilou, News simlouh kichi – teenna inn khat hingal a, huih leh vaak lutna dia tukverh leh kongkhak omlou toh kibang ka sa a, a fee leng bat ka sawm ngei kei. Khawl siatziak hiam khawng a asuahlouh chiang in leng, a neitute'n a khawl bawlman a sum tampi seng uh ahihdan ka theihpih ziakin, a fee leng deek ( burgain ) ka sawm tentun kei. Huai mahbang in, meivak ka ngaina mahmah a, Electric a ginatlouh chiang in thawmhau-huai ka sa mahmah hi. Light omlouhna innsung tuh, khawmial chiang in a vaak het kei ding. A fee leng ka pehoih a, transformer asiat chiang nasan in leng sum kithohkhawm in kipang nainai hial hi. Fee piak hun chiangin leng, a siat hunsung teng deek ( burgain ) ka sawm kei. A deek omkhak taak leh thutuam! Solkal' panlakna a meivak muh sunsun tuh, hon bill zahzah uh piak ding ka mohpuak ahi; deek di'n leng ka koih kei. Huai kawmkawm in, mimal' panlakna ziak a suahkhiat hamham a om 'News' leng a fee a chih zahzah uh piak gige tuh ka mohpuakna ahi gige hi.

Mual a om leh guam om sek a, vuah azuk chiangin khawphat ding maban chihna a himai hi. Mihingte chitak zou gige ki-omlou ahihman in, nuilou a om gige thei leng a kitam hetkei ding. Aneu-alian in i theih chiat uh ahihleh, " Nuih damtheihna ahi" chih ahi. Dik leng dik di'n a gintak-huai. A ziak ahihleh, i nuih chiang in, i gil khawng kisang a, i sunglam a 'Carbondioxide' omte hong lengpawt ua,'Oxygen' kidiiklut ziahziah ahihman in, i sung a huih hoihlou sawt om manlou in, damtheih-huai di mah in a gintak-huai. Huai louin, damlou gimtak a om a, nui gige om di'n a gintak-huai het kei. Huai ziakin, I nuihzoh khop leh, kidam chihna himai hi'n ka koih.

Nuih anuam a, chiamnuih zak (ngaihkhiak) kuapeuh in nuam i sa ua, himahleh vangsiathuai tak in, CHIAMNUIH SIAM (chiamnuih hat hilou) kitamlou hi. Tua ziakin i gam ah chiamnuih siamte leh Chiamnuih Film-te a lar mahmah uhi. Comedy Film bawltu: Zou Film Company leh Bukpi Film Company ngial in hihhoih theilua uhi. Pau-le-ham dopsangna hoihtak leng a hibok. Tulai hun a, tumlam gamte' hihdan copy simsim a 'Music leh Motion picture' i bawlte uh sang in leng Comedy film te'n hihhoih thei zaw uh abang. Motion Picture changkang taktak-te khawng a upa lamte'n enthei nawn taktak lou uh ahi. Huaiziak in, ateek-akhang in i kituahpih pen uh 'Comedy Film' ahi cihtheih hi. I vek un Comedy Film bawl souhsouh ni cihna bel hi zenzen lou zel eikha...

I Zomi paute lak ua khat 'Zou Pau' a kiletkhia, Thailand Film tuamtuam-te; PAUPU FILM chi a i deihthoh mahmah-te uh hon bawlkhete ngaihsan huai mahmah uhi. Hiai Film-te ei pau mahmah a hon letkhete (akam phun toh kituak dia) chiamnuih siam ahihlouh tawp un leng, 'Sense of Humour' hau mahmah mihing hingeingei ding uhi. Hiai Movie-te i etleh, a Movie a pangte' kamphun (mouth movement) toh Zou pau a, agenkhiat ding uh kituak chetchet a abulhtheih ban uah, a gente uh nuihzat-huai leh ei toh kituak pipi hilai hi.

I gam ua Motion picture leh Film kibawlkhia tengteng in, Comedy Film I bawlte uh a phazou diam cih theih hial di'n om hi. ZOU FILM COMPANY LEH BUKPI FILM COMPANY te'n a Film bawlkhiat te uh 'Chiamnuih' lam ngen ahih ziak in, 'Box Office' ah ahih hoih mahmah ua, maban a leng hon bawl zelzel le uh a chih-huai ngei. Houchik bang mahleh, hichi bang Film bawlte 'Creative' mahmah uh hi a theih in om hi. Hiaite banah, 'SUMPANDI' kichi bang leng om lai (?).
Tumlam gamte tawndan etton pen khantouhna chikhat ahi a, himahleh eilawi in kihaichilh in a kisiatpih nuam mahmah. A hoihlam sang a ahoihlou lam i lak baihzawk ziak uh ahi diam? Music lam ah, Lu (head) sing (shake) teitei di sa, music theih zek lelah, sam (hair) hawisau teitei di sa mawk. Laam lam ah lah, HIP-HOP kithang mahmah zel, Motion Picture i bawl chiang ua lah numei leh pasal kipom teitei di sa mawk. Hichibang a pangte'n sum hoih muh deuh uh hia leh? A hoih muhdeuh ua leh bel hoih mahmah, himahleh kisuk lar na dan maimai a zang i hih ua leh bel, hihkhial mahmah ding i hi uh!

Bukpi Film leh Zou Film-te apan et in Film leh motion Picture bawlkhiatna a sum tampi sen ziak a market a lohchin ding chihna hilou ahihdan kilang hi. Editing lam zaw ahoihdeuh mah hileh poi kei. Himahleh, i gam Market leh mipite' 'Duh leh Deihzawng' et ngai masa hi. Tumlam gamte ah 'RAPPER' te lohching mah le uh Lamka ah lohching lou in omthei veve uhi. I market uh lianlua hilou ahihman in, mipite' suktheih lam deuhte et masak ngai hi. I gen ut pen tuh, I gam market leh mipite deihzawng et in Comedy Film mah lar pen a, a bawlte leng lawk mahmah di un i ngaihtuah. Huai ziakin, "Hichibang Film bawlte'n, hahpan semsem leh khantouhna toh kituak in hon bawl zelzel un aw" cih, mipite' awsuak hi maimah di'n a gintakhuai hi. Huchibang kawmkal ah, Zou Pau naktak a hon thehzaksaktu, Pa Paupu ngei leng 'Sia' chih title ka lungsim in ka pekhin daih ta. Kimuhkhakna thut a-om ngeingei leh tuh, " Sia Pau! Nuam Mahmah Ei..!!" chih khum ek ka ut ahi.

2912 – Ka Kipak – 2015