A Huphulh-huai Kiteenna..!!
Written By: K Lianthansang

Zoudawn loutul sihzou pok mah duh-huai chi'n, zingkal khat Damkam Bazar ah ka vazong nilouh hi. Lampi kiang a kivual dendon-te lak a ka muhlouh tak in, suahlam pang a akuak sung ah ka lutsuk ngal hi. Vangphat-huai takin veilampang a tusuk deudau-te' lak a atawpna pen a tu piteek khat in,tampi mahmah ana koih lenglung zozen hi. Adiktak a gen in, kamsiam ka hihet kei; himahleh huai hun in kamsiam theih tawp suah ka sawm veve. Ka duh leh deihpen – Sihzou mumah leng, Zoudawn loutul sihzou himah hiam chih ka theinuam chiitchiat hi. Zoudawn loutul sihzou a limdan ana chituam sese ahih man in," Pi, koi apan na lak a ( Zoudawn lam loutul apan hia?) " ka chih leh, " Bawi, hiaite maw...ka laakna tantan theih ngailou inchin maw...na deih leh na lei lel di ahi..." chi'n hon dawng maimah hi. A 'aw' leng tuni tanpha ka bilkha ah aging lailai. Kam siamtheih tawp kisuah sunsun a; kamsiam suah nawn tha bang dahsak zou hial abang!

Dawnna neem mahmah ka zaak ziakin, ke'n leng ka duh mahmah sihzou-te neem tak a en-liam vengveng kawm in, a mai a Hotel ah ka lutkha mawk hi. Sihzou man dia ka tawi in singpi ka dawn a, a limlou tuan kei. Singpi dawn dia lut himah leng, meeting na a leng tel mah ka bang hial. Ka lut tuung a ana thu buaipih uh ahihleh, ' Kiteen Hun ' chih ahi. Agenda dan a guanlawk hihial di'n leng ka ngaihtuah kei. Phurphut ziak a ana genkhawm khak zenzen uh tuakkha a, kei leng committee member khat bang a pangkha phut hidan in ka kikoih hi. Dinsa a thugen a om kei a, tutsa a gen ngen ahih banah, chiamnuih bawl taka thugen leng a om kei. Khat in thu agen lai a, a dangte'n ana awng zuazua chih leng a om kei. Huai ziakin, makai khenkhat kimukhawm a, chiamnuih bawl kawma gam-le-nam maban ding kikumte sangin ka chitak zawtham uhi.

Tal kolhsim, papi khat in " ken zi ka neih a khua vot petmah ahi. Khawvot lai a zi neih mah a noppen banah, kikawi pah thiintheen hang a, ki-itna leh kingaihnatna le lian semsem ngal ahi. Kei ngaihdan a tuh, khawvot lai mah kiteen hun ahi, chidan ka hi.." hon chih zoh in a puri zial zok a, singpi sa vitvit lak ah diahsuk toih hi. Akiang a simbeng upat sim kengkang zozen khat in leng, a laizial pankhu riahriah kawm in, " itna in khawlum leh vot a khentuam kei. Huai ziakin, khawlum lai a kiteengte ki-itna tuh khawvot lai a kiteengte' ki-itna sangin alian zawtham. Kikawitheih pah ziak a ki-itna leh kingaihnatna lian semsemte zaw, tulai pau in gen le 'thring lua' hita. Kiteen hun di chu, eimah kiman hunhun leng ahih ngai ahi..." hon chikhe metmet mai hi. Mai-et leh lauh geuguau tuam nei a thugen a om himhim kei ua; mahni ngaihdan diktak mah genkhe fekfek lel uhi.

Papi ngen houlim ahihna uah, 'experienced' leng hau mahmah ahi ding ua, agen ding uh kibansam lou in om hi. Kiteen hun toh kisai a genzoh un, 'Tulai Dan toh Saptuam' Dansiangthou ' chih pansan pi a nei in hon gen nawn leuleu uhi. Ke'n bel bangmah gen di ka thei kei a, a thugen uh ngaikhetu maimai in ka na pang hi. Alak ua khat in, " tulai a, bangziak a Saptuam' Dansiangthou nawlkhin a, Tulai Dan mah teel zaw a kiteeng sek I hiding uh...?" chi'n, dotna hon bawl hi. Khat in, a lu khuat kawm in " kei ngaihdan a chu...Saptuam' Dansiangthou a kiteen ding huphulh-huai sak ziak uh hipen dingin ka gingta. Kei ngei in leng, huai ka huphulh ziak a zi ka guuk thoh hiau mai ahi..." chi'n hon gen ngal hi.

Konglam naih a tu, papi liansim velvual khat in leng, " ke'n leng zi ka neih a guuk thoh hiau mai. Vaiveng baih in, gen-le-sak leng tawm himai. Neu apan lawmte eng ngoihngoih kawm a kikhawsa tou, zoudawn apan khangkhia in, let nunga Lamka kitung hamham. Aak bang a neektawm zong a, muhtawm-nebei tawm a kihihna ah, Saptuam' Dansiangthou a zi neih kichi khawng van a gah mahbang. Ei-le-ei bat kiguan lel kisuak inchin, hitel ngallou ahi. Huphulh-huai tak zaw ahi, Saptuam' Dansiangthou a kiteen chih khawng. K'on gensau sese dah di..." chi'n, dai vengveng hi.

Bangtan hiam nungin, khat in " ken k'on gensau zek di aw. Tulai dan a I kiteen chiang a bel, zankhat thu a thilteng vaiveng hipah mai inchin, azawngte ading a kizen law mahmah ahi. I kikhen nawn kei peuh leh hun himai. A mawngmawng in, Saptuam' Dansiangthou in kiteeng dek hi zenzen lehang – mi' hihbang a va hihlouh ding hong kilawmlou di hipah. Kilawmlou chih phetlouh, tulai pau a 'thring lua' in kiteeng lehang, mite' gen suihsuih a ki-om di chih theihsa, confirmed leng hingal bok. Mite' bildoh pen leh mitsuan pen lah, 'moupuan bang chibang te a, a hoih hia?', ' moulopna omlou dek hia? ' chih khawng hitel ta. Lungkham-huai lua! Saptuam Dansiangthou a kiteenna neidekte a ding in a huphulh-huai mah houh kei dia " hon chikhe zauzau hi.

Lukhu daalsim felfal khu keuhkauh khat in leng, " Moupuan khawng ziak mahmah a leng mitampi taisia uh amah ve. Kicheina leh kizepna lam I pibawl kei ding uh zaw chi khang. Ahihhang in, a vallua om hi'n ka thei. Thilteng, ban in hon bangen suk mawk leng. Lapawl form bang kumteng a kheng ziahziah zou pawl a omlai a, a khengzou hetlou pawl leng ana om veve. A form luisuak lawgawp a, kheng mahmah mai ni chi ihih leh thutuam!. Khawmpi leh Hunpi khenkhat lah, vanthak kilahtuahna mah bangta!. Damsung a khatvei, mipi' mai a kiteenna nei sunsun a, moupuan va silhlouh tel ding ngaingamlou leng om. A hiding mah le himah e. Silhlou in om zenzen le uh leng, a gense nuam pumdim di hiven. Huai gensiatna khawng maituah sese sang a tuh, zaanpuan teng toh kiteen hiau baihlam mahmah ahi. Huai ziakin, Saptuam in leng moupuan ( tual law zepzuap lou deuh ) khawng 'Budget' in nei mai lehang, tulai dan a kiteeng atawm deuh diam chi ka hi " chi'n hon gen a, dik mahmah vek hi.

Huchibang kawmkal ah, khat in leng hon gen nawn hi. A thugen apan in, Saptuam' Dansiangthou a Zi ana neithak liklek hiding in ka gingta. Aman, " sum-le-pai lam gen di chileng, gen di ka nei kei. Tanau-laina lam gen di chizel leng lah, gentham ding tanau-laina leng neilou tuk ka hi. Himahleh, inndongta ka nei ua, kizen ka sa mahmah hi. Zi neih ding ka ngaihtuah masak in, zaan khat thu a pilut hiau didan khawng ka ngaihtuah kha tham. Himahleh, ka lawinu'n ' Christian kihi a, Christian Inkuan khat bawl dia kisa hi hang a, Pathian' pahtaak inkuan I suahtheihna ding a, amah a I kibulpat masak ding ahi. Tulai khovel siatna tengteng leng Innkuan a kibulphuhna hoihtak neilou atamluat ziak ahi' hon chih apan ka lungsim a kihei zot zozen hi. Sum-le-pai, tanau-laina neih leh neihlouh in thu a paw kei. Kiteenna kichi, vangam a Pathian toh teengkhawm den ding I hihdan uh a misiangthoute'n leitung a alim chiing lel I hihbang un, moupuan leh bangbang hiam a ngai kei. Gensiatna kichi, Pathian' tate' tuah ding mah ahi a, lamdang lua a hikei. Moupuan leh salam thil a kigen suihsuih chihte zaw thupi ngaih ding ahi kei. Kou leng, tunai zek a kiteng in, ka hihzoh dandan un ka hih ua, mite' gen-le-sak teng buaipih in ka nei kei uh. Huai ziakin, silh-le-teen kichi thupi ngaih lawkei in, daal leng kidaal sak kei lehang chih ka deih mahmah ahi..." chi'n hon gen hi. A gennop pen genkhe siam kei mahleh, a ngaikhe teng in ka theisiam veve uhi.

Laigelhtu' Lungsung Pan:
Thupukna chih zozen di hia, miteng in a pomtheih ding u'leh, tuailai tampi te'n atheih ding ua hoih tuh, a tunga thugen nanung pen in agen ahi. Huai ah kibulphuh-thei chiat lehang Saptuam' Dansiangthou a kiteen a huphulh-huai na ding a om kei ding. Khovel khantouhna in hon zaapkha mahleh, igam leh I dinmun un hon zil nailou ahihdan thei ni. Tulai Dan a kiteeng khenkhat leng Saptuam' Dan mah a kiteeng thak thouthou ahihna uah, Saptuam' Dan mah pibawl pah thei lehang thoveng mahmah ding in gintak-huai hi.

(Hiai thu kikupna mun ahihleh, Hotel sung hi chiitchiat kei mahleh, a kilawm khawm ding geelna a Hotel sung kizang ahi).

2812 – Ka Kipak – 2015