2015 TRIBAL REVOLUTION : THE EXPLOITED against THE EXPLOITER
By Sangpu Tangpua

" Ka Pu hun in Valley toh Hills te anam nam in ki dou uh a, Kapa hunin Tribals leh Tribals kidou sak in om uh a, Kei khangthak hun in Tribalste laka Mipi leh Heutute ki dou sak in om uh hi.": Ka Pu leh pa hun in temta leh tei te zang in kidou uh a, Ka pate hun in thauvui leh thautang zang in kidou non uh a. Tu kei hun, khangthak hun ah, Ideas leh policy a kidou leh kivaihawm hun ah ki dingta hi .

A. MTFD Stage khatna: I Buai kipat zaan tuung apat in tutan MTFD heutu te Ministry of Home affairs leh MP tuam tuam hi ta leh suk theih nana su in tawlnga manlou hial in diang leh hehu uh hi. Jantar Mantar protest leh MTFD I chih Central government adia mit a ni'n neng om bang tuk in pressure naakpi in pia a, Central in Manipur Tribal te tungtang suveng di'n naakpi takin State Government pressure pesuk hi. State Government in le'ng sukveng theih na da'n en in, Tribals te laka aguukin sum theh ua, vau theih teng transfer di na tan in vau uh a, By means of hook or crook in Tribal heutu leh agent bangzah hiamte zangin Martyr te vuiliam sawm uh hi. Tribals te kinep bangin state in 6th schedule or direct tribals to central kizopna ana recommend bangin om leh I buaina uh veng mai di'ng chih thei mah leh, I leitang mahmah uh a chih tinten ziak un amau vaihawmna nuai apat I petkhiak di deihlou in pang tinten uh hi. Tu'n le'ng Jantar Mantar protesterte a guuk a min list uh kaihkhawm sawm pawl bangle om ahi uh chih zaak hizaw mah lai hi. Maban ah MTFD stage nihna luut tou ta di'ng a, pan naak zaw seem a ahon laak uh I lamen hi.

B. State Government lungput: JAC leh Ibobi Singh ava ki hou ua muhchet theih khat chu, CORCOM Meitei helte'n JCILPS te zangin Tribals te hon dou ahi uh ichi khial kei di'ng hi. Tu bang in le I buaina uh suk veng sa'ng mah in I TRIBAL MOVEMENT uh naakpitakin isung ua luh chihtak a luh a, khetchip dimdem,khet tai dim dem a, bangmahlou suahsak di chih a tup pipen uh ahi. Tribals te kituah louhna di leh kihuatna di uh saitheih sai moh a sai a, kinak ek ek, kithah ek ek na dia lungsim gilou chii tuh, DIVIDE AND RULE POLICY mah tutan I lohching sak toutou lai di uh abang sim hi. I melma ten GUUL BANGIN A HON VIAL VIAL UA, AWL AWL A HON GAK DEUHDEUH IN, A TAWP IN AHON GAAK LUM VEK DI UH chih thei chiat lehang ut huai kasa hi. Tu bang in le JCILPS leh CORCOM te toh kikawi thei Tribals Pawlpi om tham chih ithei a, zum hetlou in news khawng a suah suah tel lai uh hi. Hiaite pawl eilawi in iva ki nakpih a, va saisai sa'ng in poisa hetlou in om in, en eimah tup pen naakpi takin paipih zaw leng amau leh amau hongki beibei thou di'ng uh a, A tawp in TRIBAL MOVEMENT ah ahongkiik thouthou di'ng uh hi, Thelnah kia in zong a phungzuan hi. Maban ah state government va suk suk sa'ng in centre te kiangah State government lamet huai non lou Meitei helte thuneih khum ahih da'n uh leh BJP te bilngeek uh sukha thei di'n naakpi a nawk touh hoih kasa hi, Our Meeekness is not our weakness chih kha a theih vilvel di uh a deih huai hi.

C. Maban 2017 Selection or Election: Boruak giktak nuai ah election va neihdi chih bangle, I mai ua challenge lian tak hi in ka mu hi. Inn kuan kituak leh innveng ki tuak te nangawn le akikhenna uh election ahih lai in, tua hichi vengvung kaal ah election vaneih di chih aguuk tak a ka huphurlh mahmah khat ahi. Maban ah Makai hoih iteel mah mah ta di chih sa'ng in mipi te ki thu tuak in Manipur nuai ah ka om ut non kei uh chi'n boycott puang lehang ei adia I chidam zawkna ahi maidiam ka chi hi. Bawk khat hamphatna sa'ng in, ivek a ihamphat nadi uh a kisuuk zole hang phatuam zaw lou di'ng hiam?chih chouna liantak leng ahi. I gam puah sawmin heutu hoihtak dinkhiak sawm lehang le I system in zil non lou ahih ziakin. Ami dou zolou in I system pai da'n diklou tak mai a zung apat suksiang a kalhkhiak vek zohchiang in, a thak lik lek Governor or centre toh kizopna I pat thak uh kuul masa hilo hiam? tuun midiktat heutu khat sekkhia in MLA in chingsak ta lehang le Phaizang mite toh Assembly khat nuai ah cabinet minister a va hihna di'n phaizang mite ngaihdan ava paipih ngai veve di'ng hi. Huaiziak in maban election ah eimah hamphatna di tawpsan photin mabaan saupi enin kalsuan lehang a deih huai hi.

D. Tribals Movement leh Separate toh kisai: Kei namuh nada'n in Chinih in kahon khen hi.

1. Short Term Plan: 6th Schedule leh hamphatna tuamtuam, Tribals te Right and Land Kepbitna dia hamphatna ana tangkha lou North east adia Manipur Tribals te chauh ihih lam thei thakthak le'ng a ut huai kasa hi. Huai omzia tak chu 6th schedule nuai a hamphatna I ngetpen I Political Demand hilou in, eite tan dia kisiam itan louh hizaw chihna ahi. Hunpaisa ah Centre ah 3 vei hilhial mahmah recmommend in om a, Tribals ten I phuut zoh louh ziak hia? ahihkei leh adaal tute khuak pilna ibat zohlouh ziak hia tutan in I ngahlah hial lai uhi. Tu leh tu a 6th schedule nuai a Provision tuam deuh, 3 bills or whatever so called by the Valley,Gam leh leitang kepbitna di leh singtangmite khansuah nang I delhmasak pen hoih hi'n kathei hi.

2. Long term Plan: Tribals ten a tuam a State neih di ichih pen 6th schedule ainah phah in neiphot in, eilak a tribe chih a pawl tuamtuam te kipuah thakna leh kituahna pen lunggel a nei masa in. I nam sepaihte leh mipi kikal kituah louhna tuamtuamte I lep phot a, iki tuah mahmah chiangin a lom in panla khawm thak lehang bang a chi dia?. Chih, simtute leh kua peuhmah kidong le hang ka ut hi. Upa paunaakin Sakhi manlou a ngaltang tum I chih pian daan deuh in, eimah hihtheihna tan leh thahaatna tan ikitheih tel masak a, amasa di te masa sak in, pan hoih deuh ilaak thak a maban adia pan hoih zo seem I laak masak poimoh hilo hiam ka chinuam hi. Maban ah I galvan di INDIAN CONSTITUTION a tampi kigelh dengdong ahi chih thei kawm in, tha gum seng hetlou a I policy uh khoh thak touh zel ngai kasa hi.

Thukhitna: Tribals te iki mohsak a, iki demtam zoh khop leh mi aki paak di ahi uh chih thei kawm kawm in. Abiik a Tribal Movement toh kisai a pawlpi ineih uh JAC leh MTFD sum leh pai tha leh zung leh ingaihsutnate uh toh i support touh zeel a, thuumpih touh zeel poi moh kasa hi. Mipi Movement ahih na ziak mah in heutute Phunsan ngaihna hun a phun san a, soi seel leh tai hun angaih na mun ah I tai theih kawm kawm in. Thuneu khat khawnga mohsa leh i phunsanna te tua sangin tawm bawl zaw deuh in maban ah paidi daan leh hun pai sa a I pai daante hoih isak zawk uh a om leh mipi leh social media khawng ah taw leem leem louin mimal tak in gen thei lehang, amaute huaite ngai khe dia mansa gige di ahi uhi. Atung a kigelh te mimal ngaihda'n leh muhdan kigelh ahi a, kuahiam pawlpi gupna leh demna agelh hilou hi.

LONGLIVE TRIBAL UNITY: LONGLIVE TRIBAL MOVEMENT