KA TUNG UA KHIALTE KA NGAIHDAM BANG UN....
Kum thak 2016 message
By Pastor Rawna Kopsiam

THUMAPI

Amasa pen in, Khrist sisan vang a ngaihdamna ka tanpih Toupa misiangthoute kum thak (2016) chibai ka hon buk hi. Manipur Tribal mite leh singtang gam humbitna dinga hinna a na pia, Tribal martyrte zahna i pe masa hi. Huan hiai tawh kisai a liam leh baina a na tuak kha tengteng a hangsan na uh leh a kipiak zawhna uh thupisa in, pahtawina sang pen i lan hi. Huan tha-le-zung, sum-le-pai, siamna leh pilna a, ana pangte tengteng, zahna thupitak i lan nawn hi. Gam-le-Nam a dia sih a poimoh hun a om a, hileh leng si vek mawk leng kuan i gam luah a zuun ding la! I gam luah ding leh zuun dinga hinna tamtak hong kepbit sak lai tu, i Biak Pathian tung ah kipah thu i gen hi.

Zinglam dak nih gin tawh kitawn in ka mobile alarm hong ginga, thou khia in ka kisilna ding tuilum ding suang in ka lum nawn hi. Nidang bang a ihmut nawn pah ka sawm leh ka ihmu thei keia, lupna tung ah ka kileplep mai hi. Huchih lai in, Toupa'n KINGAIHDAMNA thu gelh khiak ding message hong thei sak hi. Thou khia a va gelh mawk ding lah ka room a ka lawmte ihmu ka phawn khak ka lau zela. Hiai bang a hun ka zat sung in, zinglam dak li leh a kim hong ging nawn man a, thou khia in ka tui suanlum a kisil mengmeng in Biakinn a vapai in, hiai message ka hon gelh khia hi. Toupa'n poimawh sa ahi ding, unaute aw kingaidam tuah chiat ni.

KHELHNA I HIH CHIANG UA KUA TUNGA KHIAL I HI UA.

Tangval Joseph a pi, Potiphar zi'n luppih dinga, a zotlai in bang chin api zotna a dawng ale? Hiai bang thil gilou hih in bangchi'n Pathian tung ah ka khial thei dia. Min khelhna ahih chia, bang ziaka ei a na huchi heh mawk i de aw. Ei bawn hi chituk a na heh thei i hihleh Pathian a na heh mah di maw. Joseph in Pathian a lauh ziakin hiai bang khelhna hih ngamlou in tai khiak san hi. (Gen.39:9-12)

Kumpipa David in, hiai bang ngaihtuahna nei kha vetlou hihtuak. Taisan malak ah, a inn a saplut thawh zaw mah hi. Mosi dan bang a vaihawm ding hileh Kumpipa David leh Bathsheba a nih ua suang a denlup ding ahi uh. Kumpipa ahih mawk chia kuamah pau ngam omlou uh himai thei. Kuama'n a gen ngamlouh ziakun gawt louhin a paisuak tuan uhia? Pai suak tuan deklou. Mosi dan piak banga gawtin om kei mahleh Pathian in namsau in na innsung a lawi kei ding, chih khum mai hi! Suang a denlup a om khalou chi a kipahluat nang leng om tuan kei maw? David kisikin, Pathian kiang ah bang a gen ale, Na tung ah nang tung kia ah ahi ka khelh. Na mitmuh a thil gilou na hih ka hi chi hi. (Sam 51:4 )

Thukhun thak lam ah khelhna bang a chi gen a le. Na sanggamte uh tung a na khelh ua, a sia-le-pha theihna hatlou uh na liam sak khak chiang un, Khrist tung a khial na suak uhi. ( 2 Kor. 8: 12 ) Jesu'n khelhna neilou penin suangin deng masa hen, a chih lai in leng a deng ngam a omlouh uh kha maw. A hihleh huchi a zou mai di maw. Hilou e. A ban ah Jesu'n bang a gen a le? NGAIHDAMNA A PIA A, THUKHAH POIMOH TAK MAI: PAI INLA TUBAN KHIAL NAWN KEN, CHIH TOH PAISAK HI. (Johan 8:11)

Jesu'n thum ding dan hon sinsakna ah, ka tung ua khialte ka ngaihdam bang un, Nang leng ka khelhna uh hon ngaidam in chi hi. Pathian kiang ah 'ka ngaihdam bangin' chi a i gen theih kei leh, i ngaihdamlouh bang ua, ngaihdamlouh in i om tei kha ding uh, lauh huailua ahi. A malam a i gen banga, khelhna i hihte Pathian tung a khial i hi, i chih kawmkawm in, i mihinpihte tung a leng khelh theih a hi, chih Toupa'n hon sinsak thumna a kipan in a theihtheih hi. Pathian in hon ngaihdam banga, nang leh ken leng, i mihinpihte i ngaihdam theih zel poimawh ahi. Khaatna bang, thangpaihna bang, hehna bang, hanna bang, gensiatna tengteng tawpsan in omta hen, Gitlouhna tengteng tawh. Huan kihehpih tuah chiata lainatna nei in om unla, Pathian in Khrist a hon ngaihdam bangin nou mau leng kingaidam tuah chiat un. (Ephe.4:31-32) Hihkhial hia i theihte, i ngaihdam theih kei leh chu, Pathian in ei leng hon ngaidamlou ding ahi. Vaihawmna ni thupi a hong tun chiangin, i ngaihdam theihlouh pe'n tan/gawtna sangin, ei a mi ngaidam theiloutu' tan a huaise zaw mai diam maw!
TULAI DIN MUN EN NAWN ZUAL LE

Kinak a kimai kawk kawk hun hilou a, kingaihdam hun ahi. Sapten forgive and forget achih uh i poimawh pen uh hi'n ka thei. Ken leng siamlouh kon tan kei, tuban khial nawn ken chi a maban i sawn touh zel uh poimawh lua sa hi veng aw. Jesu'n kithutuak a thil na nget uh leh van tunga om ka Pa'n hon lawhching sak ding chih gen hilou maw. Innlam dia kisa panpan, i lamna mun ding uah kua hiam khatin, tutna, dohkan, lupna, Almirah chihte va lem nilouh mawk leh, i innlamna hon subuai lel ding hi. Inn i lam zawh chiang un, tuate pen i deihdan takun, lemfel zaw leng bang achi di?
I tup uh theih kichian poimawh lua ahi, atangpi in hiaite hilou hia maw?
(1) Bill thumte zatlouh a a om ding.
(2) Salphate sihna a khut khialte mat khiak ding.
(3) Manipur Tribal mite Rights kepbitna dia 6th schedule koih ding.
(4) Manipur State a pa'n inntuan ding.

Hiai ban ah Gam-le-Nam itna hanga, inn lum taisan a kalsuante UPF leh KNO te'n India Govt toh suai kai in, SoS nuai a om in, tu'n Salpha mi 9te sihna in, ki itna liansak semsem in, nidang a om ngeilou, pankhawm diing thupi a nei in, common demand khat hon bawl thei ua, huai chu State sang a niam zawlou ahih ding chi uhi. Salpha mi 9te sihna a thawn kei, chih a chiang a, a tak a hon suah kar uh a ngaklah huai mahmah. Huai ban ah, Nagate'n NSCN-IM makaihna in India toh Peace Accord, 3rd Aug, 2015 in signed uhi.

Hiai a tung a thute tulel dinmun a i buaipihte uh a tangpi ahi, chileng khial lawmlawm ding in a gintak huai kei hi. Bangchin pan i la ua, bang chia pan latou zel ding? Koi mun a va ngen, i ngetna mun uh dikna hia, a mun khek ngai om hia, (Centre Govt a nget ding pi State Govt lam nawknawk kha, State Govt a nget diing pi Centre Govt a ngenngen kha) chihte leng pilvang taka i ngaihtuah zel uh kul hi. Parliament Winter session hong kipan ding hita, eiloi a dia chance hoih om masa ahi chi'n salphate vui nailouh ding in Manipur Tribal Forum-Delhi (MTF-D) te hong tang kou uh. Thupukna omsa 30th Nov, 2015 a vui diing pen, Parliament a Member of Parliament (MP) te'n i tungthu uh a hon gen chiangun, tuni chiang dong misi vuilouh a om ahi, a hon chih diing uh deih huai ahi chi'n, Innpite leh JAC te lak ah ngetna hon bawl uhi. PTC in extra mile akal suan in, palai nna a na sem hi. Misi vui ding Innpite'n PTC mohpuakna pia khia uh, chih bel Innpite toh kithuzak kawm in. Misi vui leh vuilouh ding tungtang, PTC khuta om a hi mawk kei a, a hih zenzen leh chuh thil kilawmlou mahmah ahi ding. Thil kilawmlou khah a hoih ngei kei a, siatna nasatak a tun ding, huai ziak in Innpite leh JAC te hoihsak dandan a ompen thil hoih pen ahi mai thei hi. MTF-Dte pan lakna ziakin Parliament House ah MP 5 (Rajya Sabha ah; (i) Tarun Vijay, BJP, Uttarakhand, (ii) Bisawjit Daimary, BPF, Assam ban ah, Lok Sabha ah, (iii) Prahlad Singh Patel, BJP, Madhya Pradesh, (iv) Neiphiu Rio, NPF, Nagaland leh (v) Jitendra Choudhury, CPI-M, Tripura) te'n i haksatna uh hon tangkou pih ua, tuni chiang dong misite ki vui nailou, ni 100 bang vuilouh a omta ahi, chihte gen uhi. JAC, Innpi te, ATSUM, JPO, MTF-D leh ADCte pan laknate i phawka, tawl zong tawl mahmah ta un teh. Hileh zong mipite hon makaih tou zel un, chin i ngen hi. Mipi movement chi tawk lele makaitu omlou a, hi theilou ahi. Innlam a i pan laknate uh thupilua, huchih kawm in Delhi lamte panlaknate iim vual ahi kei. 4th Nov. 2015 apat tuni chiang dong Rally nei den ua, Salphate ruang vuilouh a a om nung ni 100 a chinni a thupitak Rally a neihte khawng uh leh a lang a lang a dianga, mi poimoh tuamtuam a muhzelte un, gen nei mahmah ahi, chih i thei uhi. India Govt in leng hon bildawh mahmah chih heutu tuamtuamte a pan i zak chiang in, lungsim a tawldam mahmah mai hi. A hia, bildawh chih chauh hilai, a ban bang chih zel ding, poimawh mahmah hi. Hih hehu hun bang, thawm daih deuh hun bang, thil kikhek hong om zelte mipin i theihsiam ua heutute full support i piak gige uh poimawh hi. Manipur Tribal ichih chiangin, Churachandpur district kia ahi kei a, Churachandpur ah leng, a om hetlou gamgi (Sialmatlui) bawl sawmsawmte man that vai ahi. I gam humbit sawm ihia, ei pata ki soisel den, i innsung ah ki nana/ki tawngtawng, a i omleh bangchi'n i gam sung i humbit thei dia, ei-le-ei iki nak sungteng i doute/melma toh pang khawm ki hi lel ding hi. Naupang zaw in ei sanga upa zawte zahtakin, upa zaw inleeng naupangte deih leh lunggulhte ngaikhia a, kingaihdam tuah a i pangkhawm ua, kal i suan khawm ding uh poimohlua hi. Ei ngaihdan leh hoihsakdante kia paipih sawm ihih khak ding ki ventuak mahmah a, Tribal min zat leng, i unau pih dangte'n hon gal et khak ding uh lauh huai lua a, diplomacy play siam ngai mahmah hi. Innlamte hi'n Delhi lamate hita leh i pankhawm kei ua leh bangtan mah ki tunglou ding, huai ziakin kizahtak tuah taka kal I suankhawm uh poimoh hi. Hill district dang 4 (li) a om, i unaute uh toh kithu zak gige a pan khawm gige poimawh lua ahi. Amau tel lou a, i thil nget uh lohching ngeilou ding, chih a thunawn in nei gige lehang.

Bill thumte toh kisai gen leh sak a tam mahmah hi. Manipur Govt ah hon thon kik nawn vet lou in Centre Govt in hichin a na kem khinkhian lel leh ei a dia hoih zaw ding leng hi mai thei ahi. Hichia a kep khinkhian pen uh ei hon angvan na uh hi zaw mai thei ahi. Manipur ah hon thonkik bang hile uh singtangmi MLAte teng pangkhawm in dou mahle uh majority talpakte ahih chiang ua, hon pass pih nawn ding ua, Centre lam a den nawn chianga chuh, a lou theilou a President in suai a na kaihsak ngai ta ding ahi. Salpha kaplumtute mat ding chih bang leng Manipur Govt kiang ah ngen leng baihlam zaw mai thei?

India Govt khah Federal system ahi a, Centre in thil khenkhat ah State te thu neih khum bang sek mahleh thil tamtak ah over power bawl khum theikhawl lou ahi chih leng i theih uh poimawh ding hi. 6th Schedule toh kisai bang, Parliament a Assurance Committee in, Centre Govt ah, Ministry of Home tungtawn in Manipur Govt kiang ah, "6th schedule in koi mun teng huap/area ding hiam" (6th schedule singtang gam a koih ding leh koihlouh ding a dong nawn kei ua), tukum 2015 sung in leng, thum vei (3 Times) mahmah a dongta uh, chih thu ka za kha hi. Huchi ahihleh Manipur kiang a ngen le baihlam zaw ding a bang. Manipur Govt in lah kihou dia hon chialchial ahih chiah. Hiai dan ding ahihleh chuh, i palaite (MLA/MDC) uh hong poimawhna lian semsem ding dan ahi. UPF leh KNO lamte leng daidide bang sim mahle uh a guktak a saupi i Gam-le-Nam a dia a na sawk touta uh ahi mel kuan a thei a. Manipur State apat a inntuan kar a ngaklah huai ngei maw? Mipite'n thil tengteng i theih vek leng poimawh gige khollou thei ahi. Thil tengteng thei vek le lah makai tuam leng ngailou zel dia maw. Heutu leh makai i chihte maw, mipite sanga a na hi thei zaw deuhte hi nak uhi.

I awlmawh luat leh puakgik luat ziakin thutampi i gen kha zel a, bangteng hileh kingaidam tuah a, pankhawm a, nnasep ding ki hawmtuahna lou ngal i maban uh lohchin na hon tun thei ding dang om in ka thei kei. Mipite leh Palaite i pan khawm theih masiah, Govt ah bang mah hih kolok zoulou mai thei ihi. Mipite'n i palaite uh tunga i lametna uh ana lian mahmah, Bill 3te Assembly a puaklut a hih lai a ana doudallouh nate uh, ngaidam in, boycott leh etsan chihte zuk kik thei mai le, banga chi dia? Palaite'n leng mipite tunga a puaknat uh omkhate tengteng hon ngaidam mai uh henla, mipite sik-le-tang in theih tawp in hong pang thak nawn le uh. UPF leh KNO lam leh mipilam leng kingaidam tuah vek in, Gam-le-Nam a din takheh chi in kumthak 2016 ah pan la khawm leng, Sian huaina toh tangbang dam in lungtup mual suah ding hihang. Ki ngainiam a ngaihdam ngen masa tu ding, kituh thei leng ut huai mahmah mai, i Bible ngei in leng, ki ngaih niamna vualzohna in a koih hi. Hiai "kingaihdamna leh pankhawmna" a mah a hong piang thei mai ding a diam? Peace mission nna sem thei i om diam? Saptuam heutute'n khutzep toh enmai ding ihi diam? Saptuam makaiten i kal ua kingaihdamna a hong pian theihna din palaina sem mai le uh bang a chi dia? Kingaihdamna leh pankhawmna hong om henla, panmun ki hawm in, Manipur Govt leh Centre Govt nawk pawl; JAC, JPO, ATSUM, Innpite (Kuki Innpi, Zomi Council, Hmar Innpui, United Naga Council) te hiai lam ah, Palaite (MDC, MLA, MP) huai lam ah, MTF-D te huai mun ah, NSCN-IM, UPF, KNO te hiai lam deuh ah, chi'n Hill District teng (Churachandpur, Senapati, Tamenglong, Chandel, Ukhrul) tuam dim a, nawk a i nawk kar uh ngaklah huai hina e maw? Singtang mite lak ah Forgive and forget chih kumthak 2016 thupi hi henla, kam kia in kon ngaidam chilou in lungtang sung a ngaihdamna taktak toh hi henla maban pheiphung suan khawm zelzel ni. Unaute aw thu kia in it kei ni thilhih leh chih taktak in hi zaw hen.