Ka Melsiat Ana Zang Manpha Hileng..!!
Written By: K Lianthansang

Aguuk a ngai in, aguuk mah a khenzel louh ngal a didan dang a om kei. Melsiat hang a, numei melhoih lou kideih tuan samlou zomah. Buaihuai tak ahi. Class – XII tan in leng nungak ka nei nai tadih kei. Himahleh, ka na guuk ngaih leh guuk khen bel simseng ding ahi nawn kei. Kuama'n hon deihlou ahi chih, theilou kihi hetlou napi'n, nungak bang 'main subject' in kinei phial hi. Huai hunlai khawng ka ngaihtuah kik chiangin, kisiik ngoihngoih na ding ngen ka ngaihtuah khia a, anuam het kei!

Class – XII ka simlai in, ka kaipihte uh numei khat hoih ka salaw mahmah hi. Agen didan tuan leng ka thei kei a, lawmte kiang natawm ah leng hoih ka sakdan ka genkhe nuam kei. Ka genkhiat a, amau leng hoih ana sak khak ua, ka tankhaklouh ding ka lauh ziak a hizaw. Huchibang vingveng kal a ka dinlai in, 'chance' hoihtak khat ka mukha zenzen a, akiang nai deuh a pai in, " Ehem..." ka vachih phalhphalh leh, " nang dandan in hitaang hileng, College le ka kaingam nawn kei di. Na melsiat lam le kitheilou tel maw! Na inn ua liimlang (mirror ) om tel lou hia...?" chih khum phekphek in ka om hi. Ka hihna diktak mah a, chih a k'ong om hial chiang in zaw, etna di mun leng ka thei nawn kei a; tuike nuih veivuai kawm in ka kihep mangsan hi.
Huchibang teng ka tuah nung in leng, nungak ka deihna a bei tuan kei. Nitaak hong hih chiang in, ka ki-en vengveng zel a, " pawt thouthou di himai.." chih toh, pawt ka thuah sek hi. Numei melsedeuh bang heel di'n leng ka en ngei himhim kei. Ke'n leng heel ngam ka neituan sam kei. Himahleh, lawmte' pang beel kawmin, nungak hoih pipi ka heelkha veve a, ka kipak guthei mahmah hi. Ka meelsiat ziak mah in, nungak ka 'try' kha ngei kei. Angaih lam bel zei mahmah ka hingei dia; amau' theihlouh kal nasan in ka ngai thei a, ka na khenthei thepthup zel. Kei toh kituak a, kizen kawikawi chih di'n hoih ka sa!

Christmas leh hun poimoh tuamtuam hong tundek chiangin, mi khenkhat te'n kicheina di van chi tuamtuam lei zungzung uhi. Huchih hun chiang in leng, bangmah ka ngaihsak sese kei. Bang chituk in kichei in, khovel a van hoih penpen silh leng le melhoih tuanlou ding ka hihman in, van leina dia sum seen a ngai sese kei. Sum 'save' na chikhat tuh, 'melsiatna' chih ding hial hileh kilawm hi. Banah, powder leh nuhtheih chi tuamtuam leng kei adi'n a poimoh kha himhim kei. Powder bang kinuh hi zenzen leng, ka vom toh ' sahou vutphual' bang phelphul zomah leng kilawm. Huai ziakin, kicheina van tuamtuam leina tang a gilpi puahna di I buaipih zawk leh, gilvah zaw hilel.

Eh! ".....Na inn ua liimlang (mirror ) om tel lou hia...?" chih thu toh kisai 'dawnna' hiai mun ah k'on bawl zual di; atak a lah kidawng ngam teuhlou ahihna ah. Liimlang kichi melhoihte adia, alawmhoih pen uh leh amau kipaksak pen himahleh, melsete a dia bel meelma lianpen leh hon lunggimsak pen khat suak ahihman in, liimlang ka ngaina kei himhim. Huai ziakin, ka insung uah liimlang in mun anei kei a, zatna bei leng ahi bok. Melhoih kisa te'n, a melsiat khak ding uh alauh man un Liimlang a bulbawl mahmah ua, ke'n bel ka melsiat beh khak ding leng ka lauh nawn louh ziakin, liimlang ka poimoh kei. Nou melhoih huntawk kisate dandan a liimlang thupi ngaih ka hikei! Liimlang in melhoihna hon pethei hileh, melhoih diak kituh in sum nasung zomah d'uh maw!

Huai banah, ka gennop nawn khat ahihleh, ka 'melsiatna damdawi' ahi. Ka melsiatna tung ah ka lungkim mahmah. Mi khenkhat in hon muh chiang un, anuih uh a za zozen a, nuih chihtak in anui zel uhi. Huai chiangin, kei ka na kipak deuhdeuh zel. Aziak tuh, 'nuih damtheihna ahi' chi omsek ahihdan ka theih ziakin. Ka mel 'sorry' I chi diam ah, ka mel 'joker' ziak a ana nui nilouh a, damna ana ngah a om ngei leng ka gingta. Nuih damtheihna ahih manin, ka mel ziak a nuikha tengteng damthei tawntung le uh chih ka deih mahmah. Ka melsiatna damdawi a manpha thei pen a zat ka tup gige mah ahihman in, ka mel ziak a nui kibehlap zel hen...

Lawmte khat kiang a, " na nungaknu melselua hilou maw? Adang zong mai ve ?" a chih u'leh, " A melsiatna tak a deih ivoi... A melhoih lua toh I kingaih chiang a hon haza leh tuhkhe nuam tamlua inchin, ei kilunggim maimai....a melsiat mah u'leh kuama'n hon tuh sese lou unchin, relationship le hoihzaw ahi. A poimoh pen zaw ITNA ahi.." chi'n dawng geih a, dik ka sa mahmah. Kidemna bang hihen la, mark petu di'n pangkha leng, 'fullmark' chuh gen-le-sak omselou a pengal di ka hi. Sum-le-pai sun sese leng angai kei ding. A dawnna diklua ahih man in, bangmah seng lou a 'fullmark' mudi'n leng chitna nei mahmah hi. Thuneitu sangzaw om a, hong kigolh ahih ngal kei u'leh chihman thu!

Tunung a ka kisiikna mahmah khat ahihleh, ka meelsiat ka na zatkhelh ahi. Kuama'n hon deihlou ahihdan thei zenpi a mi ana guuk ngaih teitei lou hileng, tu'n hichi mai in ka khawsa kei hial ding. Ka melsiat ziakin, nungak heel ngam leng ka nei kei a, lawmte' pang bel a kuanzel ka hihdan ka genkhin. Huailai pek a ana pilvang in, kuamah' hon deihlouh pen hunlem a la in, lai hoihtak in ana sim hileng, tu'n Bandh ziak lel a neek-le-taak tasam dekdek hial in ka om kei hial ding.

Tulai in, a pilthei chiang khenkhat te'n " Eimite lak a IAS, IPS di kibansam khong leh kilawm; tulai khangthakte lailam awlmoh tawmlua.." chi zatzat sek ua, bang ziak tak a huai chithei dia pilna neithei in IAS, IPS chihte ana muzoulou mawk uh adiam chih sim in om sek hi. Bangteng hileh, melhoih hi'n melhoihlou hita lehang leng, lai I zillai nanana in(un), I laizilna kia uh buaipihthei lehang adan omdeuh leh kilawm. Khenkhatte bel sum-le-pai zongkawm liailiai a laizil ana omtham uhi. Laizilna dia sum-le-pai leng a poimoh mahmah khat ahih ziak in, buaipih kawm ding mah ahi. Himahleh, nungak leh tangval khawng buaipih pen a nei a, laisim lam I bahsak khak chiang un, I minam uh a ding in niamkiatna hon tun hi. Kei leng, melsekawm pi a ka awkna huai mah ahi. Ka Melsiat Ana Zang Manpha in, lai hahtak a ana sim hileng, nampi' kinepna leh masuanpen suak di hiveng.

Laigelhtu' Lungsung Pan:
Hiai thugelh 'paizia' phuahtawm himahleh, 'omzia' neitak a kigelh ahi. Na theuhsiam kei leh, hiai anuai a thuvual saulou na simzoh chiang in, abul ah simkik thak lechin. Hiai ana simsuak masa mah dih – Galhang vuak toh I nam suakta lou ding. Pilna leh siamnate, zata' khankhualna leh vualtung tuanna ahi. Laisiamte' pen muk in khuavannuai vaihawm zou ahihman in, Joseph leh Danial' dungsuun a nam salpha di'n hanlung chiam ni in, minam' kulhpi muan leh bitna hih sawm ni. I gam tulsa, mialnuai a khawvak puak dia gim gentheihna chikim toh gam leh nam a di'n pang TEITEI lai ni. Tunnu luankhi nuul di'n, Siamsin seinou zatamte'n hanlung hong chiam ni chi ihi. I Gam' khuampi muan leh kingakna ihi uh.

2712 – Ka Kipak – 2015