'BIRTH-DAY' Lawmdia Chialna
-Jamin h vualnam

Pathian,Lei leh Van siam a thilbangkim siamtu,lemgelsiam leh hehpihna a dim,agenkholhte leh thuchiam a zuau ngeilou Toupa ahi.Asiamsa lei mihing te; mawhna,khelhna leh gitlouhna a kidim,si a mangthang maiding 'Eite' ahon itman in,aneih sunsun a Tapa tangkhat leitung mihing te sikle tang a thuak a sidia a honpiak/honsawl ahi.Kha/spirit hilou a sa a hinna nei ei mihingte lak a hinna thu leh tatna nna semdia thupiak ahih man in,eite bang a sa a hongpiang a mihing mel hongput ngai ahi zaw hi.Huaiziakin Jesu Khrist (Pathian/Toupa' tapa tang neih sun) leitung a mihing bang a hongpian a,a nnasep leh omdan ding tengteng gelsa dimdiamte hih tangtun a sukbuchinna dia ahong pianni tuh Khristmas chi'a ina loplop uh ahi.Tua ahihman in Khristmas tuh; Pathian' thilgel thupitak hong kipat a,sepkhiak na masa leh tangtung masa ahi leng ichi thei ding hi.Huaiziakin,tua Khrist hongpianni eiten bang chibang in ilawm dia,a 'Khrist' hia ahih keileh a 'Mass'?...A Khrist pen lawmni chidan a kichial ihi zaw hi.

Ei adi'n naungek ahong piang a,Tapa piak in i omta hi.Amah tuh eite vaihawmpa ding ahihziak in.Amah tuh;Kuppihpa lamdang,Pathian haat,Tangtawn Pa,Lemna Lal ahih kia hilou in,a lalna thilhihtheihna akhang zel/nilouh dia,a lalgam ah muanna leh kipahna a om gige ding.Thudik leh dikna a kibulphuh in tawpni beini omlou a taangtawn in vai ahawmding (Isai 9:6-7).Maban naichik ah 'Birth Day' lop ding (25th Dec) inei ua,khenkhat te'n ngaklah in ikithalop mahmah lai un,mi khenkhat adi'n huphulh huai in dipkuat huai khading hi.Huan ikhovel huihnung vengvung teziakin hundang leh kumdang banglou deuh a nekletaak bangleng kinei zuazua loudi'n veng khenkhat leh saptuam khenkhat ten thupuk uhi.Ahi a, Khristmas hun a nekkhawmna bawl/bawllouh pen athupi leh apoimawh pen ahi hetkei chih theihmasak deih huai hi.Azawngpen leh neilou pen kichiten leng sameh zaw ngawltuan lou ding ihi,amehmun leh meh vaang deuhbel ki-om mah.Tua Bawngsa,Vawksa,Sialsa,Aksa,Ngasa te zaw huchi awlmawh luat dia koihlou zaw in,tuate sang mah a poimoh leh awlmoh huaizaw a 'Khrist' pen buaipih in nei zaw lehang deih huai in manpha zaw ding hi.Sameh gilvah pingpeng a kanek a,nikhat ninih nung a buaina leh sungkhawh sang mah in,nitaklam khat sameh nekhawm sese lou in,kei a dia Khrist kameh a,ahong pian nasan diktak leh 'Kei' kaki tuah a,nikhat ninih nung phetlou,taangtawn a hinna dia kasaan/kaneih leh tuamah manpha in deih huai zaw a,etlah huai zaw hi.Salam a gilvah laivah a ka om pengpung sang mah in khalam a gilvah leh Khrist tawh kakizopna lampi kasial tang manpha zaw ding hi.

Eipawl in a 'Khrist' sang mah a,a 'Mass' pen ibuaipih a i-awlmawh zawk chiang un,I Birthday lop uh lohsam in vuaksuak khasek hi.Igam inam achidam kei,isaptuam leh I innsungte alungvei gawp,lemna leh muanna imu nawnkei ua,hoihna chitna leh dikna te'n hon nungngat santa hi.Khrist hilou a mass kia ka lopnilouh ziak hiding in upmawh huai isa hi.Bangkim tung a thunei leh thil hihthei; Lamdang Pathian,lungkham mangbang thawmhau leh tangkhat kisak hun a dia Kuppihtu,bangkim tung a vualzou leh nungtawlh ngeilou Pathian haat,tawpni beini neilou leh lamdang ngeilou Tangtawnpa,muanna bitna leh dikna a Lemnalal, 'Toupa jesu Khrist' kei lungsim a,a thakthak a kapian sakthak kei intuh muanna leh bitna,diktatna,lemna,kituahna te'n eite/leimihingte lak ah vai hawmlou ding mah ahi.Aziakbel,tua naungek hongpiang,eite adia latkhiat ahihtak man in leh Amah (Jesu Khrist) tuh eite' vaihawmpa ding chih ahih takziakin.En,vai hawmlou in amah (Jesu) vai ihawmsak uh kisam petmah hi.Ikhalam khrist a hinna chiim tak tawh ka Tou Jesu akizopdik louh chiang in,leitung salam thilte mahmah leng hong bualchuar/nawngkai pah vengvung ahih man in,hun tomchik idamsung a ding in leng nawngkai khaban hi.

Belam chingmiten Jesu' pian atheih ua kipahpihna laa asak bang un eiten leng,December 25 hongtun ziak kia a kipahpih hizolou in,ei adia hongpiang ahih dan kitheih chianna thak,kiphawk suahnathak leh ikhelh imawhnate apan a kisik a kalsuan na thak ineih intuh 'Birth-Day' lawm manpha leh lawm dikpen ihimai ding hi.Huchi hileh Pathian tuh pahtawina sangpen piak in a omdia,ei a Jesu a hongpian thak leh huchibang mite lak ah Lemna le'ng in Muanna a om ding hi (Luka 2:14).Ei a khrist a omlouh/apianlouh chiang in Pathian lungkham a,huan eimah leh imi hinpihte lak ah leng lemna leh muanna a om tuankei.Himahleh Toupa Jesu tuh eite khelhna ziak a lungkham leh mangbang a om hina pi'n, Pathian,pahtawi a om a,leitung mihing te siam tansak ihih theih nading leh kituak leh lungmuang,kipak leh tangtawn hinna tang a,apa khua leh tui vanmun thupi tang/ngah a i-om theih nadia mihing a hong pianna ahi.Huaiziakin tua I Birthday lop ding uh (Christmas) hun a,Toupa Pathian ihih theihna sangpen,thupipen leh lianpen a phat in,mangthang maiding eite honkhual ziak a itna nnasep thupitak sem a hong pianna,ei mimal chiat a dingin hong hithei leh ichi ahi.
Huaizakin,ikichial na uh,manpha,thupi leh lohching a gahsuah ahong hih theih nang in,nang leh ken athak a Jesu Khrist ilungsung bawng inn a piangthak sak din iki chial thakthak uhi.Tuaziakin Pathian tawh kilem leh khamuang a om chiat a,Khrist Mass ahih tawh kitawn a eimah leng Khrist a siamthak hih sawm/tum komin,lemna,muanna,kituahna,ki-itna leh salam khalam khanlohna hontun theih nadin pan la in kisa thak chiat ni.Khrist-Mass (Birth Day) lohching,manpha leh zatnuam.