'Mibanglou Leh Piangsual' Hon Chi Nawn Kei Un..!!
( Based On ' Person With Special Needs ' )
Written By: K Lianthansang

'Phalbi Nupi' toh kituak tak a hunte zangkhawm leh, a vang ningbang zou a ka om theihna ding ngaihtuahna in ka phaphet kei. Tedim Road nawl a 'foot path' neuchik kizan deudau tawnin, lawmte nih toh ka paisuk uhi. Sawtlou ka pai nung un, 'Burma Store' sak deuh a dawr khat ah hon lutpih uhi. Ngalsaute ( Vaite ) dawr ana hi a, eimi numei 3 in leng ana ngak uhi. Puan-ak ka ban-et nilouh ua, a hoihlou himhim a om kei. Aman leng Rs. 600 nuai a om kei a, aman tam deuhdeuh-te bang hoih ka sa deuhdeuh hi. Sum lah Rs. 1000 kia nei ka hihman in, lungsim ngaihtuahna a kisual nilouh a; laak ding pen leng ka thei zok kei.

Amantam lah hoihsa – lei ngamlou zel. A mantawm deuhte, 'colour' tuamtuam enkual a ka om laitak un, numei bangzah hiam hong lut uhi. Amau bel a deihpen uh hong leithei pah ua, a paikhe pah uh. A paikhiat nung uh sawtlou in, dawr ngak a ana om eimi numei khat in, " pasal penpen, tu tantan van et chih himhim; na nung a hong lut numei te'n bang leizou pah uh eive. Hun pammaih maimai..." hon chi gamgam a, ke'n leng " kin lua maw? Na kinluat leh van et ding a k'on lakkhiat sakte uh koihlut thak mai ve leh.." chi'n ka dawng hi. Puan-ak tuamtuam 5 lel khawng entuah ka hihman in, a khep ( fold) nawn ding ana huphulh mahmah ahi ngei ding a, " hun pammaih sak maimai nei ve ua..." hon chinawn leuleu a, " hiai khawng sem dia ngak k'on sa a, kou leng saklam a hih ding kin mahmah khat ka nei ua, ka lei man nawn dah ding uh – hun pammaih lua..." chi'n ka dawng hi. Lawmte'n leng, " hun pammaih lua, kindeuh in paitou zok ni uh.." hon chi ua, bangmah lei lou in ka paikhia uhi.

Lampi a ka paitouh lai un, lampi lai a gari kiphu noinoi lak ah pasal khat 'Wheel Chair' in ana tai keuhkeuh a, a nunglam ah ' PANPIHTU KA NGAI ' chih kigelh hi. Huai ka muh apan, ka lungsim ah ngaihtuahna tampi hong lut zungzung ngal a; mak ka sa zozen. Lampi kiang leh koi lak hiam khawng ah leng, lungsim khoih taktak a khawsa mi tampi ka mukha a, ka om a lemthei nawn kei. Kei ka ki-en zel a, amau ka ngaihtuah zel hi. Nidang khawng in leng, mi khawngaih-huai tamtak mukha sek mah leng, huai ni kan a ka lungsim hon sukkhak lam ka theikha nai kei. Pathian in, ka kiang a gennop hon nei hidi'n ka gingta a; inn ka tun tanpha in leng ka ngaihtuahna huailam ah ka pekhe vek hi.
Nitaklam ann nekhin, TV ka et leh 'Discovery' Channel ah, pianken a chituamna biik nei tamtak hong kilang zel a, ka ngaihtuahna in gamla pi a uap ta. Huai nungin, ka lum a; lup kawm a 'Bible' sim in, Jesu' hunlai khawng ka bul suut hi. Bible sung hoih taka k'on veel chiang in, pianken a lawm-le-vual phakzohlouhna ana neikha-te Jesu in a awlmoh dan ka musuah hi. Huai ka chih ziak bel – Leitung a Jesu hong vaaklai in thillamdang 34 hih a, huaite lak a 25-te pen vualphaklouhna leh damlouhna toh kisaikha ngen ahih ziak ahi. A kingaihsiat vungvung di zen ua Jesu'n, huchibang mite a kou zialzial lam leng, Bible sung ah muhkhak ahi kei. Jesu' nungzui-te omna gam ( za-ah-za Christian) ah leng, Jesu' khekhap zuih sam dingin hoih hi'n ka ngaihtuah. Huchilou in zaw, nungzui I hikha kei ding uh.!

Bible simkhin, thuumna nei in ka ihmu suk ngal hi. A ninawn in, Pearsonmun khawsak a – 'Malsawm Ability Resource Centre' kichihna mun ah ' Thanksgiving Programme' zatna hun uap di'n ka va hoh hi. Amun ka tun in Programme a kipan dek nai kei; skul naupang leh nu-le-pa teng bel kim dimdiam uhi. Zinglam dak 11:00 pelh zoh nung sawtlou in, hunkemtu in Sam 75:1 a kigelh, " Pathian aw, kipahthu k'on hilh uhi; kipahthu k'on hilh uhi, na min a nai ziak in: min na thillamdang hih thute a gengen uhi " chih thu hon simkhe masa a, hun pat in om hi.

Huai hun ah, naupangte enkoltu – Staff-te apan in leng thugenna hun om a, huai mun a lawm-le-vual phazoulou a omte a kepna ua, thil tampi mahmah zilkhia uh ahihdan gentam pen uhi. Khat in hon genna ah, " hiai School – The Malsawm Initiative kichi, Pu Pauzagin Tonsing in GINNA toh a patkhiat liuliau ahi. 2010 a patkhiat ahihlai in, sum-le-pai taksapna lianpi om hi. Sum zat ding hong bei hun chiang in, koi lamlam hiam ah 'panpihna' hong pai zel a, a om lamlam zangtuah a ana kipaitou nimnem in, tuni chiang a hiaitan Pathian in hon pitung man in, kipahthu genlouh theih ahi kei. Pathian in a misiamte itlouh neilou ahihman in, naupangte leng vengbit gige a, a semte leng kituak takin ki-om hi.." chi'n hon gen hi. Kipahthugen ni himahleh, mittui kai zungzung kawm a thugenna hun neih in om hi. Kipahna lahkhiattheihna omsun 'mittui' loungal a om kei. Mi banga kipahthu genna dan a puakthei leh gingthei chituam deuh toh zat leng ahi kei. Kipahna mittui toh thugenna ngaihkhiat hun chiangin, a ngaihkhetu-te' lungsim leng hon sukha in, kingaihtuah vungvung in om hi. Staff-te lak a khat in agen nawnna ah, " hiai mun a ka sep ma in kipahdan leng ka siam kei. Himahleh, hiaimun a sem a; naupang tuamtuam toh ka kithuah chiang un hamphalua ka hihdan ka kithei a, kipahdan leng ka siam ta.." chi hi.
Huai nungin, hihtheihna tuamtuam nei naupangte'n, Bible chang gen leh lasakna hun hon zang uhi. Mitvak nawnlou a ana om, Heutupa Thangsuanpau in leng thu saulou hon gen zek a, mipi' thumkhawmna hon makaih hi. Ka lungsim hon khoih mahmah nawn ahihleh, numei naupang nih in " Jerusalem Thak Ah " chih la, a tawptan hon sasuak sipsip ua, mittui bang hong dai om sim mawk hi. Ka ngaihtuahna ah, ' vualphalou te'n, Jesu ana limsak zaw uh eive' ka chi hi. Marka 10: 46 apan khawng I simtouh leh, mittaw Bartimai' tanchin muhtheih in om hi. Mittaw himahleh, Jesu a limsak a, mipite'n khamdaih sawm hial uh ahihdan Bible ah chian takin kigelh hi. Ei lak ah bel, huchi bang hial a vualphaklouhna neite Biakinn lam naih a, Pathian' mel a zonna ding uh ana lamdaal I om nai zenlouh ziak un kipahhuai chihlouh theih ahi kei.

The Malsawm Initiative School ana pankhia a, vualphaklouhna nei-te' hihtheihna zonsuahna mun ding ngaihsutna nei kawm a kalsuan gige Pu Pauzagin Tonsing in leng thugenna hun saulou hon zang hi. Pathian' panpihna ziak liauliau a hiaitan tungthei ahihdan khawng a ngaihtuah chiang in, a kipahdan agenkhiat didan tuan theilou in " kipahna genkhiat theihna omsun tuh 'Mittui' ahi " chi hial hi. Tua a omna mun uh luah ahihma in, fencing hoihtak om mahleh, naupangte taikhe zel in, a buaipihkhop uh phasek a; tu'n fencing om kei mahleh, Pathian' venbitpihna toh naupangte kepnop mahmah ta uh ahihdan khawng leng hon genkha hi. A thugenna a ka lungsim hon khoihkha mahmah ahihleh, " Staffs tamtak in loh neilou a sem uh ahi " chih ahi. Huai mun a semte ahihleh, nungak leh tangval khawng ahi tangpi uh. Insung a naungek' ek nangawn siak kha ngeilou ngen leng hiding un a gintak-huai. Himahleh, huai School ah lawm-le-vual phalou a omte'n, zun-le-ek a teh nikhua un leng kih hetlou in siaksak uhi. Jesu Khrist apan ITNA omlou himaizen leh, huchibang nasep sem di'n a kisakhe kei hial ding uhi.
Khovel pilna-siamna sang deuhdeuh in, mite loh ( salary) tamlam in kidem mah le uh, hiai School ( TMI ) a semte'n zaw, loh bei in leng akum a sim sempeih mawk uhi. Pu Gin in hon genzelna apan in, loh nei zek a semte'n leng kha 3 loh khawng lalou in om zel ua; aman aloh ding uh a piakzoh ngei kigingta tinten zel ahihdan theihtheih in om hi. A ginna thupi in lian mahmah a, a ginna ziak mah a hiai School ana pankhia leh hiaitan ana tunpih ahihdan haih ding vual hilou hi. A thugenlai in, ka lungsim ah ' Jesu'n Vualphaloute a etdan chetchet a aman leng vualphalou naupangte en a kem hitah e...' ka na chi hi. Jesu'n, vualphaklouhna neite a kihbawl hetkei a, akhut ngeekngeek a khoih in ( Luka 5: 13 sim mah dih ), " chizau-huai lua " chi'a a pailiamsan lam leng genkhak ahi kei. Huai banah, Jesu in bel vualphalou a omte, a vualphaklouhna un a kou kei; Luka 5: 20 ngial ah 'Mihing' chih ana zang hi ( mihing bang a bawl a, mibanglou chilou ). Ei, ama' nungzui kichi te'n " pautheilou, bengngong, mittaw leh paitheiloupa " chi'a, a vualphaklouhna ua mi isap nawn louh ua; a min mahmah ua sap hita le uh chih khawng ka na ngaihtuah doudou nilouh hi.

Hunkemtu'n, 1 Thessalonikate 5:18 a kigelh, " Bangkim ah kipahthu gen gige un; huai tuh noumau lam thu ah Khrist Jesu ah Pathian deihlam ahi ngal a " chih hon simkhiat zoh in, thugenna leh thumsakna hun la dingin Rev (Dr) Pum Za Thang Tombing samzui ngal hi. A thugen teng avek in thei nawn kei mah leng, ka bilkha a thaamden teng bek a tom lamlam in k'on gen ding. Aman a genna ah, " Hiai Institution ahihleh, institution tuamtuam omte lak a chituamna biik ( unique ) nei ahi. A semte leng na kipezou ua, mite'n loh tamna lamlam a delh lai un, nou loh bei a sem leng om na hi uh chih ka theih in, ITNA ziak liauliau a sem na hi uh chih ka thei. Huai ziakin, na nasep uh ahihleh sappau in ' Love the unlove, touch the untouch ' chi lehang chiang pen ding in a gintak-huai hi. Gamdang khawng ah, vualphaloute tuamkoihna tawm mahmah mai a; Nungak melhoihna lam a leng sithuailou - Nurse leh Lasiam khenkhat ngial in vualphaloute kitenpih nuam mawk uhi. Pathian gingta chi lehang, eilam in leng I gingta thou ua; huai ziakin, ei sang a lungsim ana piching zawdeuh te'n tua banga hih ahihman un, en leng I zuih ding uh ahi " chi'n hon gen hi.

Sawtlou nungin naupangte kiang ah, " Naupangte, noute kha..mithupi; khovel in a ngaklah penpente na hi uh. Tunung chiang a mithupi penpente hiding na hi uh " chi a, vualphalou a khovel' theihphak mi bangzah hiam leng hon gentel hi. Huai nungin, " Pathian in hihkhelh nei ngeilou ahi. Huai ziakin, na chituamna uh lawm ( celebrate) in, kipak zaw un. Hiai mun a semte leng lungke mailou in hong pang un; Pathian in a khut leh mit dia noute hon zang ahi. Na nasep uh thupi lua ahi. ( Romte 11:36 ) Amah a kipan leh, amah ziak leh, amah a di'n thil tengteng a hong om ahi ngal a; amah kiang ah khantawn in thupina om hen. Amen " chi'n, thugen hon zou hi.

Programme zoh in, singpi puang ka dawnkhawm nainai uhi. Kei leng innlam ah ka pai ngal a, lampi a ka paisuk kawm in ka lungsim ah thil tampi hong lut nawn hi. The Malsawm Initiative a semtute ka ngaihtuah chiang in, Jesu' nungzui taktak hi un ka koih top mai. Jesu'n a nasepte a suang kei a, a hihdamte kiang ah " kuamah hilh ke'n " chi'n, a thilhih 'im' di'n thuhilh zel hi. Vualphaloute kemtu a pang te'n leng, a nasep uh suang leh minthan utna ziak a sem uh himailou in – ITNA leh AWLMOHNA ziak liauliau a sem ahihdan uh chian takin muhtheih hi. A naupang kepkhakte un, banghiam a hihtheih chiang bang un, kipak mahmah ua, a nu-le-pa te sang mah ua leng kipakzaw ding un ka gingta. Khenkhat ngial, a naupang kepte un, " NU" chi'a sam hial uh leng om hi'n gen uhi.

Huai banah, Jesu leitung a hong pai lai in, damlou hihdam ding kia a thupi bawl kei a, a khalam hinkhua uh leng a ngaipoimoh mahmah hi. Huai kia leng hilou in, GINNA leng a ngai poimoh mahmah. Ginna haute, a ginna zahzah un hihdamna atung uah a tungsak mawk hi. Ginna ( khalam ah ) tellou in bel mi a mawk hihdam kei. Ginna aneih masak uh deihsak masa ahihdan, Matthai 9: 27 leh 31 kekal khawng ah kimuchian mahmah hi. Genchian sem lai lehang. Matthai 18:8 bang ah, " Huan, na khut in hiam, na khe in hiam, a hon hihpuk leh, tan inla, paimang in; khut nih hiam khe nih hiam nei a khantawn mei a paih a om sa'ng in, piangsual in hiam khebai in hiam hinna a lut nang a di'n a hoih zaw " ana chi hial hi. Hiai apan in, khalam suahtakna poimohngaih zaw ahihdan muhtheih hi. Tuamah bangin, The Malsawm Initiative ah leng Pathian thu hoihtak in kisinsak zel uhi. Jesu' nungzuihna chikhat hi'n ka koih mai; a himah leng ahi.

Vualphalou a omte leng kisuanglah leh zumthei sam uh ahihdan leng I theih ding un deihhuai hi. Ka paisuk kawm mah in, ka lungsim ah ' vuakphalou leh kikhawm zouloute'n bang chi'n Pathian a muthei ding uam aw? Zum ziak a kikhawm ngamlou bangzah om ding uam aw? Biakinn naih zouloute, amau' omna mun a vanaih in, Pathian thu I genpih kha ngei ding uam aw? Jesu'n ahihleh, Bethsaida Dil kitoh ding ngak a om, kum 38 zeng leh mittaw khenkhat a omna mun uah va mu ( va naih ) in, hihdam hi. Eite'n leng, salam ah hihdamna pethei kei mah lehang, a kha bek un damna angah theihna ding I ngaihtuahpih ding uh ahi. Pathiam' gamna sepna ah, Biakinn sung kia ah hun samailou in, pawlam leng khawdak khe zel lai lehang 'mission field' keklian kisuak mai ding in ka gingta a; ngaihtuah pen in leng ka nei kha nilouh hi.

Nidang in, vualphalou a omte bang ka na kihbawl sek a, " Mibanglou leh Piangsual " chih kammal ka na zang sek hi. Himahleh, The Malsawm Initiative a omte ka vamuh a, a omdante uh ka theih nungin, " Mibanglou Leh Piangsual Hon Chi Nawn Kei Un; kou mibang ka hi ua, Pathian in a minthupina ding a hon siam ka hi uh. Huai ziakin, vualphalou hon chi zaw le uchin, ka zaak uh leng anuam tuam mahmah ding. Eh! Piangsual n'on chih veu uh leng a dik kei. Pathian' hon siam ka hi ua, Pathian in mi siamkhelh nei ngeilou ahi chih ka thei uh. Huai ziakin, Piang dik ka hizaw uh " hon chi bang un ka kingaihtuah hi.

Laigelhtu' Lungsung Pan:
Leitung a Jesu hong pai lai in, Vualphaklouhna neite a awlmoh mahmah chih I thei uhi. Eite'n bang chi'n I koih ding uam ah? Jesu'n akhut mahmah in phak nangawn akhoih ngeekngeek mai a; eite'n I kihbawl in, I pampaih maimah uh hia? Banah, Vualphaloute' khalam suahtakna ding in bang ka hihthei a, chih bek kingaihtuah ni. Jesu' nungzuihna ah, Saptuam hi'n khotang ah hitaleh, hong kiheltheihna ding un, mun awntou zel lai ni. Huchi'a, mun awnlou leh awlmoh a leng ana neikha nailou ihih u'leh leng, tua kipan in pan lathak ni hang. Tuabang ding a Pathian in hon deih ziak a, vualpha a hon koih leng hithei ahi. Toupa'n hon vualzawl zel hen.
1412 – Ka Kipak – 2015