Kiteenna Mulkimhuai..!!
Written By: K Lianthansang

Hiai thil mulkimhuai tak atun hun in, kum 5 val zek hidan in ka kithei. Kiteenna ( kigawmna ) laklak a mulkimhuai mahmah pawl hiding in leng ka gingta. Naupang lawlai ka hihman in, thil omdan ka theichiang law lawmlawm kei a, ka manglam hidan khawng peuh in ka koih top zel hi. Himahleh, nupi-papi ana hikhinsa khenkhat kiang a, ka thil muhkhak leh theih mialmial pen ka khawnung dot(kan) leh, atak a thiltung mah ahihdan hon hilh uhi.

Naupang thuduh chih mahtak, mi' hon ning di leng khuallou hial in dotna ka bawlbawl mai hi. Tua kiteenna toh kisai bel, a thu omdan kimtakin kuamah kiang ah ka dongkhe zou kei. Nupi khat ngial in, " huai hun a kiteenna zaw, lungsim a mangngilh vengveng theih hileh ka ut ngei. Theihchet sem ut a n'on dot chiang in lah k'on hilh ut a, ka gendek chiang in khasiat tha lamlam bang asuak zel a; haksa ka salua. Theih le theihtam luat di le hikei, theichian vet lechin na mangngilh ngei kei dia, a buaihuai zaw di. Hon dong nawn dah mai in la, ke'n leng mangngilh sawm in theihtawp ka suah tou lai ding.." hon chih khum maimah hi.

Thuchian theinuam a, taltaak deuh ka dotkhak te'n lah, " na theihchian kei leh hoihzaw ahi. Kou a upa lamdeuh te'n ka thei hoih mahmah ua, ka theihna uh ka sihmangpih ding uh. Nou naupang-khangthakte kiang ah bel hiai thu k'on hilh chian nuam kei uh. Miteng in a mangngilh ua, I gam ua thil lamdang leh mulkimhuai thiltung khenkhat khawngte, khangsawnte kiang a theihsawn sak uthuai hetlou ahihman in......hunlui sangin, mailam hun ding ngaihtuah zaw ni" chihdan khawng in hon dawng zel uhi. Ahi'a, thuchian kimtakin hon hilh kei mahle uh, ka mitkha ah tua thiltung a mangngei kei ding. Ka manglam ana hilou a, atak a thiltung mah ahi chih tan hon hilh ziak lel un leng, lamdang sakna lungsim toh ka pumdim hi.

Ke'n, kum 5 val zek ka hihlai a ka na muhkhak leh theihdan tangpi k'on sekhe himhim ding. Tua hunlai a, mulkimhuai taka ana kiteng tegel bel, khawsung khat a tengkhawm ana hi uhi. Kei pian kum in, akhua uah nopbawlna ana zang ua; huai hunlai in bel zawlmit in ki-en hiauhiau pan uh chi'a agen uh ka zakha ngei. Huai nung in, muntuam-gamtuam ah hong kikhen kha uhi. Munkhat a heikhawm lou ahihman un, akal uh susethei ding tam mahmah a, 'sangak palai' kichi bang leng kithang mahmah hidan in gen zelzel uhi.
Huai hunlai khawng a, kithuzakna leh kikawmtuahna ginatak leng omlou ahihman in, akal uh hong kigamla hiaihiai a, ki-it ahihlam uh leng kimangngilh zou khop in om uhi. Nidang a, khawsung khat a heikhawm a, ankhing-tuibuk ana kihawmtuah dialdial zaw hi ua!. Politics vai ah leng, mipi toh government' kal a palai a pangte a kigamlat luat chiang un, kitheihsiamlouhna tuamtuam piang pahpah hi. Huai mahbang in, ki-it hitawk le uh leng, muntuam tuak a om a, a kithuzak ngeilouh ziak un, lungsim munkhat ah heikhawm sak theilou uhi. Gamlei buai in, akal uah palai omsek mahleh, huai te'n a ki-itna uh susethei ding thilte a nang zou kei. Nan (block) zoh malak ah, kithah-kimatna khawng ziakin akal uh dengdel sak tuan mahmah hi.

Mundang-gamdang apan mipilvang-thei khenkhat in leng awlmoh mahmah ua, amau omna chiat ah panlak dingdan kia ngaihtuah pen in nei uhi. Muntuam-gamtuam a kikhen zelzuul in bitna hon pelou dia, kikhenna hon tun zaw ding ahihdan khawng mipil deuh hidan a theih a om te'n hon ngaihtuah ua, gawmding simthu lelpih zel uhi. Kum tamtak kituam khen a om ahihman un, kigawm ding chih phut pen a numei pe'n in ngaitheilou hi. A omna mun chiat ua khawsathei tuak uh ahihman in, ki-itna leh kigawmna omkei leh leng poi salou uhi. Gensau zek lai leng, a numei pen ngial – a duang ching mahmah in, khedap tulsang a buhlouh hang in a tangvalpa' sang in sangzaw tham hi. A tangvalpa bel, mi neizou lua ahihlouh hang in, mi a eng vungvung tuan kei. Himahleh, a nungaknu bel banglam peuh ah phazou tuanlou hi.
Kiteenna loungal 'ITNA' humbitna di dang omlou hong bang ta hi. Muntuam tuak a om ahih ziak un, midang khatpeuh in leng nuamtak a khemkhe thei ahihdan leng thei tuak ding un ka gingta. Himahleh, kin-le-buang a kiteenna sai ding chih pen, a nungak pen in theisiamlou hi. Mouvanken leh vanken dangdang di khawng nasan leng ngaihtuah manlouh a, kiteen ding chih mawk, thil hithei leng hilou zel ahihman in, a numei' ngaihdan leng setuanlou hi. Kimin dimdiamna omkei mahleh, kiteng ngeingei ding ahihdan uh bel thei uhi. Ahihhang in, a pasallam indongta (vaihawmtu) te'n, ahun leh ani ding natawm a hilh lawk kei uhi.

Zingkal khat, ann nekhin phet nisalum awi a kong a ka om laitak un, Biakinn lam apan 'mike' hong ging vongvong hi. A thugen uh avek in ka theichian nawn kei. Himahleh, moupi dia hong kuan uh ahihdan bel ka thei hoih mahmah. A paungaihna uh ( mike) zang in, mipite' kiang ah – Biakinn gei a field lam naihkhawm ding in hon ngen uhi. Kin-le-buang in, field lam ka kidelh-huan souhsouh mai uhi. A omdan tak bel, moupa pen a sepna lam a aom ziak a, mounu pen in ava naih mai ding chihdan ahi hi. Mounu' sungkuan khenkhat in lah, hithei sa mahmah lou in, Biakinn sung ah lut ua; thuumna nei vengvung mai uhi.

Alamdang mahmah khat ahihleh, nitum ma ngei a mounu pikhiat a, pupa' dan a kiteensak mai ding chih ahi leuleu. Nikhat-ninih bek leng kisakkhawl hun piak ahi nawn kei a, mounu'n tuh a zanpuan di toh moupi dia hong kuante azuih mai ngai hi. A sungkuante damlou om leh leng, ngaihsak ahi kei zomah ua; hawl a kihawl thoh toh kibang ka sa. Bangteng hileh, ki-it nanana tuh a kigawm ding mah uh ahi. Himahleh, alang tuak ah kiminna (lemsakna) om tuaktuak leh chidam-huai tuan mahmah ding hi. Moupi dia hong kuante' hon thupiak bang ngei in, mounu'n a it leh ngaih mahmah – a tuallenna vangkhua nusia in, a pasal ding' kianglam zuan in khaubang chiah ta hi. Khitui-naptui toh kiteenna a tel dingin, a khawzang un kuan ua, pupa' tawndan a kiteenna sapsap ding in, thupi mahmah hi.

Moupa mineizou lua hilou ahihman in, mou nungzuite a dawl( buaipih) seng kei. Mounu'n, vanken in puansilh-niikten kia keng a, van got ( vanken hilou) pen bel, a ninawn in va awl laak uhi. Mounu' tunsuk ni nanana tuh, moupa' ana omna khua hulum tuan mahmah hi. Mou nungzui, giahna ding neiloute bang hehpih-huai mahmah ua, naungek pom kawm a kiteenna a hohte ngial, a ngaihna omlou uhi. Mialnuai a kiteenna sai in om a, kitengsaktu'n leng puan pangngai a silh kei. Maban ding etna leh khualna ziak liauliau a, kin-le-buang a kiteenna sai a om ahihdan 'aw' khauhdeuh mai a genkawm in; inn-le-lou suang a tengden dingin 'Order' suahkhum tep mai hi. Kiteenna uap a hohte lak ah, kap-le-mau a om lah beilou in, chiau in chiau vengvung maimah uhi.

Kiteng ding tegel' lemsakna ngak masa lou a kiteena sai ahihziak in, a lungkim vikvek atam het kei. Sapok lim mahmah napi, a minsiang ma – beel sunga a chiak bilhbilh laitak in va nekha maizen lehang, isung-ilai teng kang gawp ding hi. Huai mahbang in, kiteenna kichi hoihlua hina pi, kihoufelna omlou pi a 'force' a kiteen chih mawk pen MULKIMHUAI mahmah hi. Kiteenna Mulkimhuai chihlouh theih ding vual ahi kei!. Mounu lah khawsakna lam a haksa lawmlawm lou a ana khawsa ahihman in, a pasalte inn a kikhual taka teng a, inntum-loutum suang ding chih pen hithei salou hi. Huai ziakin, Lamka lam ah apasal taikhiat san in, khosakna detdou leh nekzonna kipzaw toh tu in om hi.

Mounu' ngaihdan masa bel - unau numei vuak ahih ziak ua, a pasal pen makpa sungkhum ding chih ahi. Makpa sungkhum a, pasalte vaak di'n leng aneih-alam uh kiching huntawk hi. Himahleh, vaisailam te'n huaidan a ngaihtuah dek kei uh. Apasal in, vaisaite dangka bangzah a ana 'capture' man hiam chih bel thei tuanlou hi. A ngaihdan nawn leuleu ahihleh – huchi'a kiteeng ding vet ahih leh leng, kisakkhawlna ding hun kipiak zek hileh, chih ahi. Mounu' lemsakna hoihtak tellou pi a, aw khauh leh thagum-thatang a kiteensak kichi thil lauhuai pi ana hi a, kiteena kuitung leng a om vak kei. Tu'n leng, mulkimhuai taka kiteeng tegel a kiteng tungtawn tuan kei ua; meithai-tagah pungsak maimai hi. Huai ziakin, kiteenna ( kigawmna) himhim sai ahih chiang in, alang tuak ah kiminna ( lemsakna) om masa leh hoih mahmah ding ahihdan, khawsung mipi'n gen vengvung uhi.

Laigelhtu' Lungsung Pan:
Hiai tangthu ahihleh, phuahtawm ahi kei; atak a thiltung ahi. Ahun-le-ani bel ka theichian kei. Himahleh, kum 30 phalou deuh paisa a thiltung ahi hi. Hiai apan in, kithutuah diamdiamna mah poimoh masa ahihdan muhtheih in om hi. Kithutuahna om masa lou in zaw, kiteenna kuitung taktak atam kei. Huai ziakin, mipi hi'n makaite kal ah hitaleh, kithutuah masakna omlou in thil sai kei thei hamham lehang chih deihhuai mahmah hi.
0612 – Ka Kipak – 2015