TULEL A I GAM A EDUCATION DINMUN ET IN I MABAN DING UH.
By CT Lian Guite

Nidanglai nekzon dan ahihleh khut-le-khe zanga "tha" petmah a sepsuah a nek muh ana hi a, khang hong dangin tu hun in bel miteng nekzon dan ahihleh khut-le-khe mah pang a "siamna" a nekzonna hun hong tungta hi. Tulai in tha hi nonlou in, asiam ten nektam mu ding, asiamlou ten tawm mu ding chihna ahihtak man in, a siamlou ten haksatak a nekzon ngai mai ding chihna suak hi.

Huchi bang ahihmanin, kuapeuh in siamsinna i ngaih poimah uh hunta a, i neuchik ua pan in skul-te, college-te leh university-te ah kuapeuh in siam i ki sinsak chiat uh hunta hi. Huchi in skul asiam pente' doctor bang, engineer bang i hong hi ding ua, huchi lou teng college leh university a siam pen ten government kam, IAS, IPS, IFS, IRS, leh officers ah hong lut ding uhi. Adang lawi khat ten a siamna ziak mah un bank, defense leh office clerk khong a hong pang in, adang teng in a zillai teng utoh a siam lou deuh teng in i lung lut ziak hia/ziaklou in private business lam tuamtuamte ah I lut vek uh ngai hi.

Ahihleh bang ding a I gam a nasep dukdak neilou hichi tam hiam? Bang ziak a ccpur district sung a mi 100/57 te nasep dukdak neilou a om uhiam I chih leh, amaute a "siamna" uh neu in amau sanga siamzaw tamta in mi phazoulou kitam chihna khat suak hi. Hichi bang ahi i gam dinmun - nungak nou khat pilvang louh ziaka zawlgai kha, a nini a vah hiaihiai a tawp a miteng in the khia, zumhuai gop tawh kibang ding hi.

Huaiziakin tu a kikhel luat ma apat pawna a kuapeuh in pan i lak kei ua leh I gam a sepna mulou hong pung semsem ding, mimal a tamzawte kizawng hiaihiai ding, hiai in I gam a khelhna hon sangsak deuhdeuh dinga tualgal hong om non ding lauhuai petmah hi.

Ahihleh hiaite pumpelhna ding omsun chuh siamsinna a midangte sang a siam zawk ding himai ahi. Ka theory khenkhatte- Mikhat in a line/profession kibatpih mi 50-te sanga a siam zawk nak leh sepna/kam a muzou ding. Dawrkai mi in a dawr kim leh kiang a inkuan mi 30 lel a suklung kim zoh a, permanent customer a neihzoh leh nek nuamtak in amu ding. Hichi bang khovel ah I khiak a nopzawkna ding leh i nekmuhna ding un ikim ikiang a mi 30/40-te sang a I line peuh a laisiam zawk, kamsiam zawk, kipiak zoh, kuhkal zawk, thuak theih zawk poimoh ding hi.

Hichi bang a mihing hihna toh nekmuhna dia midangte sang a siamzaw dia iki sakna dite uh chuh I gam a skul, college leh university- te ahi pen mai hi.
Ahihleh I gam a skul dinmun bang a chi ale: I gamsung a siamsinna skul om teng sehnih in kisuah thei hi, private leh government. Private Instituition- I gam a private skul, nurse training na leh college omte asia law zen om in ka mu kei a, ahihziak in teaching lam/kihilh na lam chuh deihkhop huai kasa nai kei. Aziak bel teacher tamzawte eilam mi ahihziak in, ei mite a siamkei uh ka chihna hilou in, all India a competition khong maban a iki dem ngai ahihna ah huai a ding question set tu lam deuhte teacher in neithei le a mind set uh kipha baih deuh dia, phatuam ding in ka um, banah siam leng siamzaw mai di uam maw- ei mi nasep sanga unau talpakte khutnung mam zaw, Talpakte sang a vaite khutnung hoih zaw nuam, vaite khutnung sang a sapte khut nung hoihzaw chih dan bang om hi. Ei pawl mi gam a na I sep chiang ua ginom tak a sem, ahihziak a I gam a na isep chiang ua zawntat deuh a ka muh man in tua I skul-te ua I teacher lakte I gam mi a tamzaw ahihziak in I skul-te mi sang a siamna na dia lai zilkhiatna mun ding in sit huai lai kasa hi.

Ahihleh I gam a government skul leh college dinmun bang a chi ale:
Government institution tuamtuam skul, college, Industrial Training institution, DEIT leh Weaving Training Centre omte kingakna tak, sepna muhzohna ding, miten hon employe theihna di tan ua siamna leh theihna hon guanzou taktak ding government institution omlou phial in ka mu a, mahni theihna ding tan chiang hon pezou insituition omlou hin ka mu hi.

A bik in singtang gam a skul omte a tamzaw tham class 5 chiang khong ahi a, hiai mun a teacher a omte proxy teacher ngen(siam na niam) sim, hiai skulte apat pawl 5 zou naupang in Lamka a pawl 6 private skul a hong zop chiang in private skul naupang te standard phazou mahmah lou in skul naupang tampi ten a a siamsinna uh tawpsan in singtang ah kiknon ua, naupang tampi tak siamsinna paisuak theilou kitam hi. Huchi bang deuh sim in, I college-te leh technical institution I neih sunsunte a lecturer-te lah lehkha simpeih om nonlou ki outdated gawp. Hiaiziak tak in I gam ah degree nei tam mahle hang, theihna tak nei kitawm mahmah lai ding in gintak huai hi. Hiaite ziakin tulel a I gam a government Institution omte teng lak ah khat lel leng siamna ziak a sepna hoihtak hon guan zou ding om in ka mu nai kei hi. Aziak bel sepna hoihtak muhna dia ei Lamka-te kia toh kidem ding ki hilou, Imphal ate, Guwahati ate, Kolkata-te, bangarulu-te, Delhi-te, Mumbai-te leh akang mun tuamtuam a teng toh kidem a, a siampen hihna poimoh ahihna ah, tulel a I gam a government siamsinna omte mundang a omte demzohna ding in sithuai ka sa petmah hi.

Ahihleh I gam a lehkhasiam tamtak nupi-papi-sate research theihna ding university lah I nei kei ua, Imphal a om pen lah a field neu lua, banah deih bang a kikop pih theih taktak lou, hiaiziakin I gam a laisiam masa tamtak ten research bawl theilou in lehkhabu tawmchik ki neihloh a, tulai khangthak ten thilkhat i hihding chiang in pansan ding I neihlouh luat ziak in leh i gam' khantouhna ding tampi university I neihlouh ziak un hon dalkha hin kamu hi.

Ahihleh bang chi bawlphat ding: Tulai khovel a miteng, gam teng nekzonna, nekmuhna, khantouhna thauvui-thautang hi nonlou a - siamna, pilna zang a pen-muk kaih siam ahi chih I phok thak a, I gam a siamsinna I puahphat kei uleh tuban kum 5 nung chiang a kam muzou ki om nonlou dia, I gam uh hong segawp ding in mu ing.

Hichi bang ahihman in, I gam a siamsinna munte a siamsin saktu ding teacher/lecturer dingte bel siamna sang taktak neite mahmah lak ding ana hihi. Hiaiziak mah ahi ding a, government in lecturer ding siampente mah alak theihna ding ua a khaloh atam sak uh. Huaiziak in eiten leng I gam a institution omte enthak a I bawlthak kei uleh i gam zawng gawp ding a, nam mangthang, gam mangthang kisuak pahta ding ahi.