Theihsiam Ahak Ngei..!!
Written By: K Lianthansang

Ka nasep uh a lakloh ziakin, nitum nung tanpha in leng ka pai naikei uh. Ka lawmpa'n teklei a lep kawm in, " ka tate agil uh akial ta mah di....meh ana huan kei le uchi'n, ke'n hon tawi ding ka hi ka chih hi a..." chi vungvung zozen hi. Mak ka sa sim mahmah mai a, akiang ah, " na tate amau vuak inn a nusia maw..?" ka chih leh, " amau vuak zaw hisam kei uh, a pi uh leng om ahi. Himahleh, hat nawnlou ahi.." chi'n hon dawng hi. Kum khatsung, asuk-atung a nasem a ka kizuihpih himahleh, a khawsakna uh ka theihpih kei. Ka lawmpa'n aban hon genzel a, " tuni Kiginni ahih toh, 'pay day' hizomah inchin, ka tate sameh khatvei bek mehpih nuam inga, annek honna ngak un ka chih leh, paihak ni toh kituakkha sese a, lungngaih lua ka hi.." hon chi hi. Huai nung sawtlou in ka tawp ua, kintakin inlam azuan pah vengveng hi.

Ke'n leng inlam ka zuan ngal a, koimah ah ka bang sawn sese kei. Inn ka tunnung tanpha in ka lawmpa' khosakdan theihnuamna in ka pumdim hi. Zankhua in leng ka lungsim anuam thei taktak kei. Zingkhua hong vaak a; phone tungtawn in ka lawmpa kiang ah, " tuni Pathian ahih toh, khatvei mawngmawng ann nekhawm ni. Sungkuante leng kimeltheih-tuah sak bek lehang hoih in teh " ka chihleh, kisuanglah takin hon nial bawl hi. Ki-itna latsaktuahna leng hikawm ngal ding ahihdan khawng leh bangbang hiam ka gen nungin hon 'aw' vanglak a, a inkuan un zing biakna kikhawp tawpin hong hoh nainai uhi.

Nitaklam ann k'on ne ua, nuamtakin ka omkhawm zaizai uhi. Ann nezou, verandah ah ka tupawt ua, naupangte'n bel ann akham naikei uh. Ka lawmpa'n, a lawinu hon tonpih-louh ziakin lamdang ka sa sim a, " na lawinu lah n'on tonpih hetkei a..." ka chihleh, " ka lawinu omnawnlou ahi. Ka pianna pa leng a om nawnkei a, ka tate leng akim in k'on tonpih thei kei. Ka pianna nu ngei leng ngaplou sasa a k'on kaihkhiat ahi a, khawmial ma a ka kikpah kei u'leh...lampai bang haksa sa mahmah ta inchin, buaihuai maithei ahi " chi'n hon dawng hi. Ke'n a inntan uh gari a va khakik ding ka hihdan ka hilh ngal leh; amel ah, kipak ahihdan hon latsak phet hilou in, akam mahmah in leng kipahthu hon gen lawk ngal hi.

Amah ahihleh, kei' makaihna nuai a 'mistry' di'a ka zat ahi. Akhutma a maam a, idea leng nei mahmah mihing khat ahi hi. A inkuan khosakna uh theikei mahleng ka deihsak mahmah a, ka kithuahkhak uapan in ka nungzui in apang den charchar hi. Ann nekhawm di'a ka sapna ziak ahihleh, a khosakna uh tangpi ka dotchian nuam ziak ahi pen mai. Mi kisuanlah hat leh chitak ahi a, pautam zelzul in leng a om ngei kei. Chiamnuih a kigen chiangin ana heh tuankei a, ana nui veve hi. Ama'n leng achang in chiamnuih agen zel sam a; chiamnuih thanghuai lua bel gen di'n leng akoih ngei himhim kei.

Tumlam, mualdawn a ni atumkhiat toh kiton phial in, suahlam tangtung ah khapi hong suakkhe chiaichiai hi. Nitum toh kiton a kha asuah chet chiang a 'fullmoon' hita chihna toh kibang ahihman in, khapi leng alian huntawk mahmah a, beem vilvel in vaakpha mahmah hi. Lawmpa kiangah, " na haksatna omchiang a kisuanglahlou hial a n'on gen zel ding ahi. Ke'n leng kei hihtheih tan a hon panpihnuam gige ka hi.." ka chihleh, " Nang hon deihsakna ziak liauliau a tuni tanpha nasep ding neiden a om inga, ann ngawl hial a omkha nailou ka hi uh. Pathian in ahunhun a apanpihna khut hon zaakkhum lai a, ittu leh deihsaktu ding hon pelai ahi. Pathian in nang tungtawn a nasep ding hon pia a, hon vualzawl manin kipahthu gensenglouh bat nai ka hi " chi'n hon dawng hi.

Aban hon genzel a, " Ka lawinu no'n kan a, 'om nawnlou' ahihdan k'on hilh hi. Himahleh, ka lawinu' omlouhdan zaw tuni tanpha ka theisiam naikei. Ka kingaihlai uapan in hon pan zozen leng; kum 18 khawng ka phakma apan in kei sanga kum 3 a naupang zaw numei khat (ka zi) hoih ka sa mahmah mai a, zawlmit in ka en ngal mai. Himahleh, itna thu ka genngam kei. Amah lah naupang mahmah lai ahihman insung ah tuitawi khawng lel in pangthei pan hamham hi. School kainawnlou a nasem a kiloh ka hihman in, ka vapawt zihzeh peih kei zomah hi. Alehlam ah, amah laisimlai ahihman in, alaisimna subuailou chu ka hipeuhmah phot a, ka lungkim veve. Kum 1 hiam lawmta danin ka kithuahpih a, atawpin bel ka itdan ka gensuk top mai hi. Alungsim kuaikuun zou di'a kilam-enlou pipi a ka gen himahleh, honna ngaigu simsa ahi ngei dinga, nuam takin ka zou hiau hi.

Hunte hongpai zel in, ka itna khaugui uh leng a kikhihna tuak ah akip mahmah mai a, mawk a phelkhiat zoh ding ahi kei. Naupang himah le ung Manipur a'Tribal Unity' banga ngek ka hikei uh. Manipur a 'Tribal Unity' bel ngek lawlai ahihman in, malta thak zek nangawn leng a nethei kei a, tuanvai-te ( makaite) a dingin mehhuandan chi tuamtuam tampi zat ngai sek a, pei lung-am zou mahmah hi. Kou bel huaibang ningniang ka hikei hial uh. Anuam-ahaksa ah leng a kitaisan kei ua, kitheisiam takin ka omtou uhi. Nikhat, nasepna mun a ka omlai in, ka lungsim ah 'nasem a kivaak ding thouthou, zi kinei suk hen la; hatlai mah a tate lai simsak a,teekluat ma a amau hon vaaktheih ding un' chih kia hong omden nilouh hi. Ke'n leng a nitaak in ka nungaknu' kiangah ka lungsim a huai thu omden ahihdan ka va gen a, amah leng hong kingaihtuah in; a kalnawn in ka kigu hiau uhi.

Naupang chik a kigawm himah le ung, ka nu leh pa'n amau' ta bangmai in hon bawlsak ua, ka kipak mahmah. Nasep bang leng kei sangin ahat zaw a, ahihtheihlouh om leh leng ka nu leh pa kiangah dongzel in, kisintawm kawmkawmin mailam hinkhua ding ka geltou zel uhi. Mite'n naupanglua sa in, hon sitsak mahle uh, a maimai tuankei. Siik asatlai mah a seek ahoih mahbang in, ka zi leng asatlai mah in ka pi a, ka nu leh pa'n a deihdan chet un hon seeksak ua, zi hoihtak nei ka suak mai hi. Ka nu leh pa a damlouh hun un leng, taitheih nana ah ana tai zel a, ' Kiginni chiangin k'on din ding uh ' chi'n, Pharmacy khenkhat khawng ah damdawi ana batlaak zel hi. Mi khenkhat hile uh bel, ' Sum omlou, bat di chi a vatai gige zumhuai...' chi veuvau ding un ka gingta.!!

Hunte hong pailiam zel in, tapa 3 ka nei uhi. Ka tapa aneupen apian nung kalkhat zoh in anu hong damkei a, Lamka Damdawi Inn ka lut ngal uhi. Kalkhat khawng ka omzoh nung un ka pawtkhia ua, innlam a ka kikep patpat chiang un a buaise zel a, damna deih in damdawi inn ka zuankik zel uhi. Abuaihuai mahmah ahihleh, ka zi a damlouh lai in leng nasem a kuanlouh theih ahi kei. Gimse lawzen a aomlouh zek chiangin ka nasepna ah ka va kuanzel a, nitak chiangin Damdawi Inn ah ka va giahpih zel hi. Huailai a ka mizuihpa eimite mah ahina a, ka haksatna ka genngam tuan kei. Ka zi, suun-le-zaan a ompih in ka nasepna ah va kuan kei leng lah, ka tang a ding midang ana la ding ua, nasep bei a omzel ding ka hihmam in; suun hun a ka nuneute omsak zel a, zaan hun a kei vagiak zel ka hizaw hi.

Suun huna nasem a ka kuan hangin ka lungsim anuam tuankei. Central Lamka lam a Building lian mahmah khat ka bawllai uh ahi a, room khat a eikia I pankhak chiang bangin kithawmhau mahmah hi. Mi kikou zek khawng a om chiangin I diip hawm mai a, kihi loklok zozen hi. Phone natawm ka neizou naikei a, room a cement pe dia honglut dek te khawng bang, ka zi' sihthu hilhdia honglut dek hidan khawng in ka suangtuah kha sek a, kei-le-kei ka kisugim thei tel mai. Atawpin bel, ka mizuihpa' kiangah ka haksatna bangkim ka gen a, hon theisiam mahmah hi. Huainung bel ka nasep leng anuamtuan mahmah mai a, tawldam-huai tuan leng ka sa.

A nitaak in Damdawi Inn lam ka naih nawn leuleu a, ka zi ana gim mahmah hi. Zaan dak 12 lak in ' bangmah chikei ni..hong hoih hiaihiai ding ahi a, nou leng inn-lam ah ana tawldam phot mai un..' chi'n, nuneute ka paisak hi. Apainung uh sawtlou in ka zi hong buaise ngal a, Doctor-te lah ihmuvek ahihman un, phawnzoh ding a omkei uh. Abeidot-huai ngei mai..!.Ka zi'n hon beisan ta. Ka kianga naute khat ompen sawl in, ka nuneute (innlam a tawldam dia ka paisakte) ka nungdelh sak a, inn atunma un va delhpha in, hong kik ngai uhi. Huai zan in ka lungsim ah bangmah dang a omkei a, ' mibang a hau hile ung zaw, ka zi' hinna kihumbit man a om maithei hi a' chih kia ngaihtuah ka himai.

Mangkang te'n 'Hospital' ana chih uh, 'Damdawi Inn' agenna uh himahleh, tulai in – Mitallang deuhte Pibawltuam deuh a nei a, Damdawi Inn a zintun (host) hoih tuam sese ding dan a ngaikha I bangta mawk uhi. Hospital kichi, lungkham mangbangte adia belhpen ahihmanin - Christiante adia 'Church', Hindu Sahkhua zuite adia ' Temple' leh Muslim Sahkhua zuite adia ' Mosque' ahi chih thei gige lehang zaw nuam mahmah di hiven. Ka gennuam tak bel, damna deih a damna inn naih ihih ngal leh azawng-ahau kal ah kideidanna tua sangin dau zawdeuh theih hamham leh ka chihna ahi zaw hi. Milian-milal hile ung bel, a minute hal a hong enkhe zel ding zaw aom ngei ka gingta tinten.

Azan-azan in innlam ah ka kipua ua, inn ka tun un ka insung teng uh leh ka kongpua teng uah mipi ana dim man uhi. Damdawi inn ah, khawtuah ding bei a beidong kisa in naubang ka kap a; innmun ah bel, khotuahtu mitampite ziaka kipak in kipahna luankhi ka nuul hi. I kikhotuahdan uh thupi ka sa a, phatuamngai pawlpi I neih uh ka kipahpih mahmah hi. Tuadan mah a phattuamngaihna sunzom zel a, tunung aleng azawng-ahau khentuam seselou a kal I suantouh zel uh ka lam-en. Kithaloh ding hileh, kou inkuan hong gaal ding mi atam hetkei ding, himahleh ka zi' sihna tung a ka muhkhiat ahihleh, eimite'n phattuamngaihna kitaisan lou a, namdangte muh a 'Christian hindan kitawisang lailai ahi' ka chi hial hi.

Atom lam in gen ni. Ka zi' sihnung kum 4 zoh in zi dang ka neinawn hi. Zi neihthak, a sawmthu in bel ka sawm nawn kei. Himahleh, lawm-le-vual, tanau-laina te'n aguk a honna awlmoh uh ahi ngei ding a, honna zonsak hilhial uhi. Guuk leng angaikei a, inn a lawmte'n hong pilut sak hiau uh leng ahi sim. Ka zi thak ahihleh kei sangin a upa zawtham a, taak gimgem zozen in, hong kipatna insung apan deihtawk a kiseek( a omdan kibawlkhin) leng ahi hi.

Ka kiteen tung un zaw, mihoih law di'n ka gingta a, ka lung anuam mahmah. Himahleh, ahun hong sawt deuhdeuh chiang a 'true colour' hong dawkkhe sengsung hi. Apautawm mahmah mai a, ka tate kimawl vengvung le uh leng a ngaihsak kholkei a, munkhat a tutang zitzet kawmin a etna ngal enen mai a, huchi'n nitaak hun khawng zang zel hi. Achangin kawng a duap baatthoh siam-te gaan zel a, annhuan leh tuitawi chihkhawng a nasep tangpi hideuh hi. Ka nu leh pa lah teekta uh ahihman in, a damtheikei zomah ua, amau' lungtunna bangin ka kemzou kei uh.

Ka pa agawl hong na a, anai khawng hong om zel hi. Nikhat a khatvei bek hahlouh a koihtheih ahi kei. I hahlouh zek chiangin anai pumdim in, uih lutlut zozen hi. Ka zi'n lah huaite 'kihbawl' ahi diam ah, hah asawm ngei kei. Inkiim-inkiangte' theih in bel, ama' hah vek ahi zel. Ke'n, nasem ka kuandek chiang leh ka tunchiang in ka hahsak zelzel a, ka pa kipakthei mahmah hi. Ka pa'n, agawl nat ziakin anntak netheilou a, annchiim lam bel nethei cheuhcheuh hi. Huaiziak mah in, sawt hon dampih kei a, leikha' ann dingin hammual lam hon zotsan pah hi. Himahleh, a sihma a ka kiang a hon thugen in ka lungsim hon khoih mahmah hi. Ka Pa'n, ' Bawi...suun khat, na lawinu kianga anchiim duh ka hihdan ka gen leh, ankhingte hon huansak maimah a, ka khase mahmah. Ama' lohkhiatsa ne leh dawn a hing hile hang, hahna di leng a omnawn kei ding. Nidang pek apan a-omdan ka mit asiip mahmah, himahleh nou nupa kal asiat ding ka deihlouh man in ka na iim sek a, tu'n bel ka iim zou nawn kei..' hon chi a, ka kingaihtuah vungvung zozen hi.

Ka zipi pen naupang chik a ka neih ahi a, deih dandan a chiiltheih ahihman in, zi hoihpi asuak hi. Himahleh, ka zi thak pen a taaksa a honglut ahihman in, bawlthak theih ahi kei. A pilthei ahita a, kamkhat ka gen ban ka gentam nuam kei. Huaiziak a hon simmoh leng ahi ngei ding a, haksatakin hinkhua ka zangtou leiluai uhi. Ka Pa' sihnung kha 1 leng painailou in ka tapa upapen hong damkei nawn hi. Amah ahihleh, gilna sa in kipeek den a, Doctor kiang a ka tai chiang un damdawi honna gelhsak zel hi. Ka zi thak in lah hon etkolpih taktak kei. Ka omchiang chouh in, a enkol taktak abang a, nasem a ka kuankhiat chiangin, amah leng ana kizalensak sam hi.

Nitak khat, ka inkiang ua nupi khat in, ' suun a na insung ua naupang kapkap za inga, ka va etleh na kong uh ana kipaw-hawt (chabi kikhailou). Ke'n leng mak salua inga, insung ka va etleh, na tapa gilna sa leh kapkawm a ana kipeek suangsuang maimah. Hehpihlua inga, damdawi ka na piak ahi..' chi'n hon gen hi. Hichibang maimai khawng a ka zi, khawlak khawng a ana pawt hiauhiau mai ahihdan ka theih chiangin, ka lunggim mahmah mai a, etkhiat himhim ka sawm hi. Zingkal ann nezou, nasem dinga ka kisak takin, ka zi'n leng asiam hon phelkhe sam hi. Ka kuankhiat san a, amun ka tunnung in na ka sem zek uhi. Ka cement uh hong beilakloh ( athak hong koihmanlou uh) ahihman in, nasem ka khawl ua, ke'n leng innlam kintakin ka zuan ngal a, insung ka lut leh ka tapa leh api loungal insung ah muh ding a omkei uh. Siam lah kizalhkhe sa in ana om zengzung zomah a, agantunu muhphak ahi kei.!

Kei leng kihahsiang in, ka tapa' kiang ah ka valum-tawldam hi. Nitaklam hong hi a, ka naute School kai hong pai ua, homework khawng gelh in buai vengvung ua, alian zawdeuh pen leh a pi'n ann huan uhi. Ann ahuanzoh un, kongpua ah va kimawl nawn uhi. Kei tunhun di kuanin, ka zi hong pai a, kou room lam ah lutsuak galgal hi. Himahleh kei hon mukei ( kei room dang a lum) a, tungnailou honsa zaw ahi ngei ding a, belkuang khawng gingpah romrom maimah hi. Ann kithuuk vitvit ahi ngei dinga, athuuk zoh in naute kiang ah, ' ann ka ne....' chih teng gen kangkang hi. Huaitakin, konglam a kimawl a om ka tapa leng room a hong lutsuak ngal in, ' Papa...ann neta di..hong thouta ou..' hong chih leh, kei om ka hihlam atheipan a, kisuanglah mahmah hi.
Ka tapa' natna chiah lah matkhiat a omlou. Test theihteng test in, 'Ultrasound' tanpha la mahle ung, eimi Doctor ka naihpa un, ' hong dampah in teh...' chi'n damdawi hon pezel hi. Nitak khat bel ka buaise taktak ua, Damdawi Inn naihnawn louhngal kinepna himhim a omkei. Na sa-a kipeek den mai ahihmanin, azan-azan in Damdawi Inn ka naih uhi.

Damdawi Inn ah Meiteite Doctor khat ana om a, huai pa leng lunghimoh gawp in, ka damdawi lehkha teng uh leh ka ki-testna result teng uh hon ngen a, ka ensak ngal uhi. Ka tapa leng a en a, hoihtak a acheck zohnung in alu hon peikhum tamai hi. Ka tapa bel a sikhe naikei, himahleh lam-etna himhim a om nawnkei. Doctor pa'n, ' Na tapa a gilpi vang ahi...' hon chi maimah hi. Eimi Doctor pa' theihna ana sang deuh hihen la, test na result a-et apan agilpi lam dengdel ahihdan hon hilh maileh zaw, Imphal tan apoimoh leh leng neilou sasa a damna ding deih a kidelh sam di hiven. Huai hunin bel, New York naih le ung leng aphattuamna di a om nawn kei. Hinna tunga thunei Pathian himahleh, hinna kepbitna lam a siamna apiakte' thulimlouh ziaka leng ahunloupi a sihtheih ahihdan ka chian semsem hi.
Ka Zi leh Pa ka taan nung a, ka Tapa upapen ka taan nawnzel ziakin lungngai vungvung in ka om mun mahmah. Ka zithak lah hichi maimah..!!. Kei a di'n zaw ' Theihsiam Ahak Ngei..!!' chih vungvung louh ngal, gen di dang ka theikei. Huainung sawtlou in, ka zi' sanggamte damlou hong om ua, ka zi'n va ompih nilouh hi. Buai leh buailouh gen chih a omkei. Numeite vaihawmna kalh a gamtat khak ding kiveng gige ngai mahmah ahihman in, a thuthu in ka omsak hi. Kal khat nunga inn hong pai in, ka innvengte uh inn ah hong bang malam a, hon gensiatna thu ka gaalzaak kongkong zomah hi. Kidekzohna himhim ka nei nawnkei a, inn honglut in ka 'aw' ka suahkhum ta. Huai nitak mah in a vante a zial a, suulkik simthu leel nawnlou dingin, khaubang hon chiah san vengveng ta hi. Akhawnung in maak-man hon phut(ngen) ua, kou leng maitheih nana a maikhawm in ka va pepah uhi.

Bangteng ka tung ah hongtung mahleh, Pathian' lam naihna in ka zang zel a, ka lung amuang veve hi. Ka lungsim ah, ' Theihsiam Ahak Ngei..!!' chichi mahleng; a khawnungin Pathian in amah lam naihsemna dinga hon sapna ahihdan ka theikhia hi. Khetbuk a singpum khat leilak a ikhet chiangin tumhoih deuhdeuh a, kip deuhdeuh hi. Himahleh, khetbuk a a-kikhetnalam pen in thuaklah mahmah zel a, a sing mong khawng kiniil nengnung sek hi. Huai mahbang in, Pathian in akhetbuk leh achiang in hon khamuan a, ka tung ah thuak-haksa taktak hon tungsak mahleh, amah lam ah ka belhkip deuhdeuh zaw ta hi " chi'n hon gen hi. Huainung in ka hehneptheih dandan in ka hehnem a, a inn ua ka va kha hi.

Laigelhtu' Lungsung Pan:
Hiai tangthu dandan a thil ana tuakkha (thuakkha) ngei om ahi chih thei ni. Mi'n atuahsa uh kigelhkhia ahihman in, amau' tuah apan kibawlhoihna ding leh pilvanna ding tampi omkha ding ahihman in, ziltheih leh laktheih omte ei a banga bawlin, ana kibawllem tawmtawm thei lehang I laigelh in manphatna lianpi nei ding hi. I taklatnop pen itheih ngei uh ka lam-en a, kibawlhoihna dinga izat ngei uh leng ka gingta hi.

0411 – Ka Kipak – 2015