I TUNG UAH TOUPA A KIPAH LEH
Pastor Rawna Kopsiam, This email address is being protected from spambots. You need JavaScript enabled to view it.

AIgupta kumpipa a sita hi.Israelte bel a saltanna nuai uah thum leh mau in a kikou kou uh a, Saltanna hang a huhna ngena a kikou uh Pathian kiang a tungtou hi. Pathian in a maute thum leh mau a za a, Abraham, Isaak leh Jakob tawh kal-a a thukhun a phawk gige hi. Tua hang in Pathian in Israel tate a en a, Amaute a awlmawh hi.Exo. 2:23-25.

HEUTU OMLOU A ZAW...
Mipite lah chih ding dan leng thei tuan zezen lou in kap vengvung mai,Heutute Mosi leh Aron bang mohsa mahmah uh. Bang hih masak ding bang hih nanung ding, tubang hun a bang gen di'a kilawm, bang genlouh di'a hoih chihte ngaihsun man om sam lou uhi.Makai khat telkhia in Aigupta gam ah kilehkik ni kichi uhi.Ei tulai buaina toh ka etkak chiang in kibang ka kisa mahmah hi.Bible pau lou deuh in gen le, Manipur GovernorDr Sayed Ahmed (27 Sept 2015) a bill President kiang a forward-tu leh Senior Advocate Chanambam Upendra (29 Sept 2015)a bill drafttu a sita ua, National Register of Citizens 1951 census record bangmah muh ding omlou chi in talpakte buai nawn mahmah zel uh.(Imphal Free Press 17 Oct 2015 Saturday).Huai kallak ah Tribal mite mangbatna hong kipan ding ahita chi di hileh kilawm. People's movement chi tawk leng le Leader omlou a zaw I movement un bang tan mah hon tun lou di e.Awl in ngaihtuah vengveng lehang, mipi lam bang in leng a poimawh lou tantan sawk saulua I hikha ding uh kiven hun ahi. India Government kiang a I thilnget ut kha bang eita? Unaupa Sumpi'n ball pek a gente bang mai, a ball dahchhuak raw u a hnawk sak..chite I bat khak ding uh lauhuai ka sa. A ball pen koihkhia a ground sung a ei-le-ei I kipek khak ding lauhuai lua ahi. Chewing gum tangkha toh tangkha lou tawh lung aw damdam chi a lungkim tak a a ball mah goal khuam sung a I pek lut phawt uh poimawh lua hiveh aw.

HEUTU LEH MIPI KIKAAK (GAP) OM THEILOU:
Heutu lian Mosi leh Aron mawhsak a a-om lai un bang ahih masa pen ua le?Mipi mai ah khupbawh uhi. Hiai a khupbawh chih bang gen na ahi de aw? Kingaihniamna thuphatawina chi khat chu hi peuhmah ding in ka gingta.Pathian kiang ah leng mipite a ding in ngaihdam ngetsak lai uhi.Heutute'n Mosi bang in mipite mai ah I kiniamkhiak ut diam, kuamah perfect ki-om lou ahih chi'a. Heutute adi'n Pathian ngaihdamna I ngetsak thei diam?En I ngaihdam masak kei leh Pathian ngaihdamna ngetsak haksa mahmah maithei zel. Bangteng hita leh Israel leaderte'n hih hoih ka sakna mahmahchu mipite toh a kal uh gap om lou in mipite toh tonkhawm gige uhi. Eilawi aa pen mipite toh I kal gap sau luata ahi kha de aw, kithuza-tuah banlou I bang sim maimah ua! Anung-ama gen sau nawn lou in hiai gap(mun-awng om) pen beisak phot thei leng bang achi di? Hiai ding in chu mipi lam in leng public boycott pen I zukkiik phot ngai leh kilawm. Bangziak a kitawp lou, mipi'n a ziak thei zoulou, ngaihdan kia gen-gen mai. Tawplouhna ziak tua genkhiak hun nailou ahihleh leng thukhat la khat a pangkhawm I hina chih bek genkhawm theihna dan om leh bang achi di.I maban ding uh saupi etna a thil tengteng im nei hetlou a genkhiak vek bang leng hoihpen khollou himai thei.Kimaituah a genkhawm chu hunta hi. I gap uh sau luata hilou hiam?

TOUPA'N A HUN BANG IN A GUM:
Heutute a dik gige uh zaw chi ngam khang, hilehleng Israelte tanchin khawng I Bible uh pansan a I simsim chiang in mipite sang in heutute Pathian in a gup zawk hun tam mahmah veh aw. Toupa heutute tung a A thangpaih taktak chiang in bel Amahmah in a dinmun ua pan koihkhia hiaumai hi. Huai ding in mipi zang sese kholkei veh aw.A tunga I gen Governor leh Advocate bang eilawi chet ngai seselou a sipah mai uh chi'n deihkaih sukpah mawk le'ng. Mosi bang leng Pathian in gum mahmah bang napi a tunga a lungkim nawn louh chiang a zaw Kanaan gam na lut kei ding chi a boycott puankhum topmai! Mosi in ngaihdam a ngetnget hang hiai thu nanana ah zaw Pathian in ngaidam hetkei veh aw.Mosi leng hih khial, pau khial zaw kisa mahmah inteh. Dan.3:25.Kon ngen ahi hon galkah sak inla,Jordan gal-a gam hoih, tanggam hoih leh Lebanon hon mu sak in ka chi hi. Ahihang in noute hang in Tangtawn Toupa ka tung ah aheh a, kei hon ngaikhe kei hi.Tangtawn Toupa'n ka kiang ah tua teng kichingta,hiai thu ka kiang ah gen ngei nawn ke'n...Jordan lui kan lou ding na hi, chih san maimah hi. Noute hang in ....!

LUNGKHAM HUAI MAH LEH KIPUMKHATNA HON TUN:
Salpha Ngalliam K. Lamkhenthang pa'n I Palaite un hihkhial a kisa sim na ding ua, ken zaw hihfuh uh sa lua ka hi, Amau thilhih ziaka Tribal mite laka hichu tuk a pumkhatna hong om ahi zaw achih bangdeuh in ngaihtuahna chituam deuh a ngaihtuah in chu a dikna chiang leng om mahmah zel hi in ka thei. I Palaite un thu hon mangpah hile uh hiai bangkhop in I kipumkhat zou di uam. Leikha in phulun pawtna di kei vang I chih dandeuh ua. I Palaite uh tutung a leikha a hong pang kha ahi ve ua.Tu in chu I lunggulh leh lamet gige uh kipumkhatna in hon tuamta ahihman in kipahhuai mahmah hi. Kam sung ah lei leh ha leng kikei kha sek mahleh hihkhelh khak ahi. Ha zong kisuanglah lua, lei zong kisuanglah lua hi. Kingaidam tuah a a sepding tuak uh hon sep nawn chiang un gilvah in kilungkim lua hilou hiam. Nu-le-pate'n leng I tate bang hong ngetngawl luat chiang un I utlouh simtan bang leng amaute itna a I hih hun om thou hilou maw.

PARLIAMENT HOUSE AH:
Tua I thilnget dek uh khah (Bill 3 te toh kisai kia, State government kiang ah), i lunggulh uh, State Government kiang hilou a Centre Government kiang a ngen dek I hih uhleh MLA te poimoh thou le uh leeng, amaute sanga pawimawh zaw chu MPte hive uh aw maw. I MPte uh bel a taktak a Bill pass na a leng tel khalou hilou himai thei eive ua. A mau member hihna chu Parliament lam daih hia maw.Theih khelh khak ziak in amau leng a na thuak kha tei uh chih man ahi.Hiai eivo'i kuamah a theikim omlou, hih khelh khak na omsek mah ahi. Kisuanlah hun in, kingaihdam leng hun mahmahta hi. Centre lam a I palai thei dingte melma bawl a I nak bawlbawl nilouh leh leng hoihpen gige khollou ding hi. En thu zakhat vei I gen sang a amau khatvei a gen lel uh leng manpha zaw tham ding ahi. Eilawi in Parliament a meeting na a va gen thei mawk lou I hih chiah. NSCN (IM), UPF, KNO ahihkei leh JAC, MTF-D a dangdang te'n leng Central Government toh kihouna ah, thu poimoh mahmahte kimum mah le uh Parliament sung a zaw bang mah va gen kha ban zenzen lou du e. I poimohna uh tuam chiat, i mun chiat uah poimawh theilua hive hang aw. Parliament session lah hong om nawn pahta ding, November last week 2015 a om nawn diing hita. Huai hun a Innpi sunga kuan ei Tribal mite gum a gen di lah? I MPte uh himai. Manipur tribal ten MP khat i nei ua, amah toh naksem a i pankhawm ua, aman bang leng amah lam a pang diing lawm a na bawl sawnsawn poimoh hi. Pankhawm hun lua mahmahta hi. I panmun chiat uah poimawh lua hive hang aw.

MIPI LEH HEUTUTE TUNG AH TOUPA A KIPAAK DIAM?
I lungtup uh mualsuahna ding a I panlakna uah, Heutute'n I vaihawm dan uah, I lunggel dan uh leh I sepsuah dante uah Toupa a kipak diam? Mipite'n leng I lunggel dan uh leh I movementte khawng uah Toupa a kipak diam ?I tung ua Toupa a kipah leh huai gam ah a honpi ding, huai nawitui leh khuaizu a luang gam ah. Bangchi leh Toupa I tung ua akipak thei de aw. A kipah kei ngeingei leh chu I maban uh a bing chi na e maw. A ziak chu a kipah leh chi ahih mawk chia. Unaute kituak diamdiam a om khawm a nak hoih in a nuam mahmah hi. Bible in a hoih leh a nuam omkhawm a gen khak omsun maw Unaute kituak diamdiam a om ahi. Thil khenkhat hoih mahmah napi a sepkhiat nuam hetlou om hi. Huan thil dang khenkhat lah nuam mahmah ahihhang a hoih mahmah lou om zel. Tua bang kallak ah a hoih leh nuam mahmah omkhawm sun bel kituahna ahi.

Manipur Tribal teng ki gawmkhawmna taktak diing in, Naga Group in leng role poimohtak a play a ngai a, Kuki Group in leeng role poimohtak a play ngai a, Zomi Group in leeng role poimohtak play a ngai hi. Hiai role te ki bangsim chiat sim mah leh hih theihna lam tuamtuam om thei hi. Zomi Group in role a play theih khah chituam nawn diak mahmah om hi. Huai chuh, Manipur Tribal teng luankhawmna din, Tribal sung ah Palaina hoihtak Zomi play thei hi. Tua i poimoh mahmah uh lah Tribal te pankhawm hia, hiai pankhawmna dia palaina hoihtak play thei diing Zomi Group a i heutute i khet liam, i hih bah khak ding, ei mipi te leeng ki ventuak mahmah hi. Huan ah, Zomi heututen leeng a mau kia a role poimohtak play theilou ua, mipi tha hatna toh play thei lel uh a hih dan uh a theih chiang mahmah uh poimoh lua hi. Manipur Tribal problem te khatvei thu a gen veng a hih theihna diing in, tua Central government toh thukhunna suai akai te NSCN (IM), UPF leh KNO te khah Government a a poimoh ngaihua, a thu uh alak theihna diing un, heutute leh mipi te kikar a gap omlou a pankhawmna leh Pathian makaihna poimoh lua hi.

Tutung I thiltuah un mipi lam pumkhat a hon gakkhawm thei hi in a lang a kipahhuai lua hi. Mipi lam I kipum khat bang ua heutu lamte leng pumkhat a hong om theih uh poimawh lua ahi. Mipi lamte pumkhat a om. Heutu lamte leng pumkhat a hong om uh. Hilehleng mipi leh Heutute kikal...... gap lianpi om a bang mawk a. Tribal Unity buching nai lou chihna himai. Chih bel mipite tawh heutute kal a kichimat gige ding ahi. Huaiziak in tua kipum khat thei I chihchih uh kha bukim nai deklou ahi.Melma in I kipumkhatna suksiat ut lua mahmah a kipeipei ahi chih phawklou a eilawi I kinak bawlbawl mawk leh bang suakta di la. Jesu eite a di'a a thumna leng maw pumkhat I hihtheih na ding mah uh ahi. Pathian in Abraham, Isaak leh Jakob tawh kal a a thukhun a phawk gige a, tua hang in Israelte a en a, a awlmawh hi. Israelte bang in Pathian kiang ah thum in kikou kou lehang, Jesu'n eite adia a thumna Pathian in phawk in hong awlmawh sam na lou ding hia chi in lametna toh I ngak uhi.
....................