ZIINMANG' ANGSUNG AH...!!
( The Salvation Bills )
Written By : K Lianthansang

Innkuan nuam huntawk, neih leh lam a mi englou' innsung ah ka na piang a, duhduh ne a dawn in, niang leh tai takin ka na khawsa tou hi. Zawnna kichi khawng kou innsung ah theihphak ahi kei. Nasem-tu bang ka hau zozen ua, naa haksa himhim ka na semkha ngeikei a; kei sepkhak ngei di'n leng ka koih kei bok.

Hun leh kum-te hong pailiam zel a; ke'n leng, khovel pilna-siamna zonna lam ah Class-VII khawng kasim tak in lawm ahunkhop tak ka nei ta. Nidang a ka Nu leh Pa'n, School kai kuan leh pai a hong kha a, pi zel hi ua, tu'n sum leh pai zonna awlmoh zawk ziakin kei hon ngaihsak man nawn kei uh. Kou unau ka hih u'leh - keikia pasal kahi a, kei' tung ah Class-X simlel numei khat om hi.

Khovel pumpi kipei in khawl sawm tuanlou a, ni hong suakzel a tumzel ahih man in; sadan in k'ong piching ta hi. Kha lam ah bel a mangthang ka himai..!!. Sap-te thupil in " A small family is a happy family" ana chih bang un, ka innkuan sung uh chu anuam khopmai. Ka nu ahihleh - saptuam' lam ah Dorca makai ahi a, Khotang vai lam a et in Mother's Association makai ahi a, Simlei vai ah leng ana tuitum mahmah in, ki awi deuh leh MLA ana ki-candidate ta ding hi.

Ka pa leng mi maimai ahi kei. Mite thudot pen leng ahi a, simlei vai ah leng ana thuuk lut mahmah pawl ahi. Election hun chiang ngial in, inn ah a tukip mankei. Ahun tamzaw mundang ah (ZOUDAWN LAM AH) zinkhiatna in zang a, hun ka zangkhawm ngeikei uhi. Kou bel, sum tampi hon nawtsiat zel ahihman in, nuamtak in ka om veve uhi. Saptuam lam et in Department teng ah panna neisuak hi. Khotang vai a I etnawn chiang in, ka nu mahbang in panmun ahau khopmai; President leh Secretary chihte ama a di mawng a kibawl mah abang hial hi.

Mite'n ka nu leh pa amuan bang un, kou unau in leng ka muang mahmah mai uhi. Nitak atamzaw Meeting leh thil tuamtuam a buaina aneih ziak un hon pawtsan zel uhi. Kou ka unu toh inn ah ka wm ua, naupang chih mahtak; laisim sang in Message sim lam ka na hahbawl zaw sek uhi. Ka nu leh pa hong paihun ding chiang un bel, laisim bangbang in ka na kilimbawl sam uhi. Laisim lou a Message leh facebook khawng ka lawmbawl luat ziak un, exam result suah chiang in kou min a tazou ngeikei. Progress Report Card te lah chu sansuk phingpheng zel in, progress-na toh kisai himhim hon 'report' ngeikei. School leh College hoih penpen a kai himah le ung, kou chitlouh ziak in bangmah a phatuam tuankei. Ka Pa'n bel, kumkhat sung a ding Tuition fee pesiang pahpah a; ka result uh ahihleh hon dong pahpah ngeikei.!!

Ka innsung uh, Bill Gates te innsung toh kilamdang tuanlou ding bangin ka ngaihtuah mawkmawk sek hi (theihlouh luat man in). Ka inn u'lah sawng 4 tak a sang ahi a; bang sum zang-a kibawl a, hichi sang velvol tel hiam chihbel ka ngaihtuah ngeikei. Gam-le-Nam puahphat leh zuun na di teng; ka pa'n kou inn puahphat leh zuun nadia zang leng ahi maithei. Ka common room ua tutna, TV leh thil tuamtuam omte lah chu, Mumbai khawpi a omte toh kibang vek sim. Inn baang aa lah " MEMENTO '' leh pahtawina card tuamtuam kitaak dim metmot mai. Inn kong ah gari buuk liantak om a, huai ah - gari pei 2 nei apan pei 6 nei tan om dendon maimah hi.

Ka pa, inn a aom sunsun chiang in, nitak hon pawtsan den a, sun hunte lah hotel ahihkei leh simlei vaisaite inn khawng ah hon omsan zel hi. Ka nu lah khotang hoih di deihziak a makai ahihna toh, khamtheih doudal chi'n niteng in chiangpum toh kholak ah hon omsan zel hi. Kou bel ka uu toh inn ah nuam ka salou tuankei uh. Aziak ahih leh, ka ut dandan ua omthei ka hih ziak un. Ka nu leh pa' pawtkal chiangin, ka uu hong hel tangval tawthep dikdek leh khekol kawng a chain kaisak nelhnalh banah, underwear mantamlua teng leng hizenlou pi, mi' muh dinga dawksak teitei sawm ahunkhop hong omzel uhi.

Ka nu leh pa khotang hoihna ding deih ziakin kholak ah ahunte uh subei ua, akhenchiang a zu khawng man in, buaksak sek uhi. Ka unu hong helte'n zu khawng hon tawi zel ua, hon dawnpih sek uhi. Amau bel sawt a omngam kei uh. Aziak ahih leh, ka nu leh pa zahtak ahih man un, hongpai hun ding chiang un kihemkhe gaihgaih sek uhi. Ka nute' zu buak-te, kei' sung ana tungzel toh kibang hial hi. Ka pa te'n lah, Guta khawng deihtheih in soisa ekek sek ua, huai ziakin ka pa ka zahtak kei a, lauh in ka lauhthoh hi.

College khawng ka hong kai ta a, sum ka hauh ziakin lawm leng ka hauthei mahmah. Ka lawmte mihoih himhim a omkei uh. Khamtheih tuamtuam, a tang hi'n atui hitaleh ahihna uh sawt mahmah ngen ahi. Khamtheih ahih u'leh 'Normal a om' ahih kei u'leh 'Mibanglou zou hial in om' uhi. Kei bel akipan tuung ka hihman in khamtheih laakna di kathei kei. Kei, a ATM uh ka himai. Class Room sungah teacher-te' thugen ngai hi-awmtak in ka tu ua, himahleh kou bel a fuh( a kick pai) ka na hisek uhi. Khamtheih hih di mawngmawng a college kai mah ka bang hial uhi. College kai bang ka thanuam mahmah mai ua, himahleh ka teacher-te uh thugen sang in, ROSE(RP) achihte khawng uh ka sung uah a lut tam zawsek hi. Suun chia College ah a TANG(tablet), nitak chiah ka unu' lawmte apan a 'TUI' chih te ka paidan tangpi hong hita hi.

Nikhat lel leng ka ngawlzou mahmah kei. Ka hihlouh zek chiangin om leng ka om maimai theikei. Tapa tang neihsun ka hihlam zaw kithei mah veng aw, himahleh hiai ZIINMANG ANGSUNG AH ka na koltang den a hiven....!!. Ka nu leh pa'n, kei leh ka unu' kekal a piang ding naungek 2(nih), ABORTION tungtawn in ana suse(su kia) sese ua, tu'n lah nau neithei nawnlou di'n ka nu ana kibawl zouta..!!. Huchilou hileh zaw Unau bangzah hiam phasam ding ung ua, mihoih di leng om thei hi a, chih khawng ka ngaihtuah vungvung sek hi. Tua ka koltanna apan ka suahtaak kei leh zaw, ka inn uh leng ka taan loh khong ding uh.

Ka taksa kiam deuhdeuh in; ka khamtheih hih tam( dose sang) deuhdeuh mai hi. Ka innsung van u'lah, zuaktheih liai teng ka zuak ziak in kiam deuhdeuh a, ka maban uh chu 'ZERO' himai didan ahi. Ka nu leh pa'n leng a lohngaihna hon thei nawnkei uh. Nitaak teng a zukham a kitom chih khawng, kei paidan tangpi hong hi maimah ta hi. Hun paisate sapkik theih hileh samkik nuam hina tel ing e..!!. Ka khamtheih hih lah tawpthei mawklou ka hih man in, ka sungte toh ka kisukheh nikhua un, kei a di'n New Bazar khawng vanaih louh ngal a didang aom tuankei. New Bazar a, zuaktheih tuamtuam zuakna mun khawng chuh, kei a di'n inn bangmai ahi ta. Huai mun ah 'Hausa' kiteel ding chi uhen la, ki-Candidate leng ching dingin ka kikoih hial hi. Sum hauhau chinna gam ahih man in.!!
Ka omdan leh khosakdan in a zil nawnkei. Inn a paipai ding bang leng ka ut nawnkei. Ka nu leh pa'n lah " SUM DEIHTAAK ZAW GILOU CHITENG BUL AHI " chih thei hoih ta mahmah di un ka gingta hi. Ka unu'n lah Pasal tawsa neilou khat a zuita a; ka inn uh lianpi, hawm heuhou sung ah ka nu leh pa diip hawm heuhou sa in om liikliak uhi. Ke'n lah ka giahzelna mun nuam ka sa deuhdeuh a, sun chiang in lampi nawl a siik neng peuh, khekol langkhat lam kia liptou letlat kawm a, sai-ip sia a luak khawm in ka hahpan mahmah mai hi. Nitaak hong hi a lah, kuate' vok ann beel aman atam dia chih khawng ngaihtuah in ka ihmu thei tuankei. Ka omna mun a ana omsa, Numei te'n lah - Free Gift in HIV natna hik honna pawsak keihkuih tamai uhi.

Keimah suangkulh kibawl ah ka taang a, ka taikhiat sawm hang in suangkulh vengpa ZIINMANG in a ANG SUNG AH honna kailut tuntun sek hi. A haksatel mai, sun leh zaan in ka suahtaak theihna ding ka ngaihtuah nilouh ta hi. KHOVEL ah hon it tu khat leng om nawnlou di'n ka kikoih top. Mangbang tak a ka khamtheih hih kham a, aak puul dek bangmai a ka hah diaudiau laitak in, New Bazar BUS PARKING ah thawmging lamdang tak khat ka za a, ka va naihphei ngal hi.

Bangthu om ata mai a le? Bus Parking mun ah mi ana tamsim mahmah mai ua, a laizang lak ah Nungak hoih pipi, puanngou silh in a ding uhi. Ka mit-te hakzoulou sasa in ka hak a, tua nungak melhoih taktak te ettheih dandan in ka en teitei hi. Music kilawmtak mai a play ua, ka neu apan Music ka zaak-te lak a zaak noppen hi'n ka thei zozen hi. Nidang in bel Music ap-huai pipi ngai in ka na dur mahmah sek. Himahleh tua nitak a music ka zaakin ka lungtang tawng a zelsuak pah hi. Nungak leh tangval melhoih taktak te'n Lapawl honsa ua, ke'n bel a lathu ka ngaihtuah kei a; nungakte' melhoihna ka na buaipih zaw. Huchia mite melhoihna kia en ka kisak lai in, a lathu hoihna leng k'on theikhia a, khovel a hon ittu omlou hi a katheih lai in JESU in hon iit ahi chih ka muchian ta a, ka kipaak mahmah hi.

Lasak te hong khawl ua, Puanngou ngen a kizem pasal khat hong dingkhia in, Bible tang ( Matthai 9:36-37 ) hon sim hi.Tua zoh in a Bible tang sim pansan in thu tamlou hon gen a, THU I chih LA ahih mahbang in, thu kigente leh la kisakhe te'n ka lungsim ah mun lian a uap mahmah mai uhi. Suahtakna ni bangchik chiah ka tung ah hongtung diam aw, ka chih vungvung lai in, tuni'n Pathian' mizat tuailaite' tungtawn in ka kiang hong tung ta.

Huai nitak a Thugen tu'n athugen tamlou, ka theih dandan in k'on gensawn ding; Amasapen in, a Bible tang pansan enzual lehang , " Huchi in, mipite amuh in, ching ding neilou belamte bang a gimthuak leh dalh a aom ziak un a hehpihta mahmah a, huchi'n a nungzuite kiang ah buh lak ding lah tam mahmah a, himahleh a sem mite a tawm uh ( Matthai 9: 36-37 ) " chih hon sim masa hi. A gennuam tak bel GIMTHUAK LEH DALHZAK-TE LAK A NASEP POIMOHNA ahi pen hi.

New Bazar BUS PARKING a, Pathian' thilhih theihna tungtawn a ka hinkhua honkhek tu in atung a Bible tang saulou pansan a thu agenna ah; " Tuhun in - hun kikhek, huntawp a om, siatna uang semsem hun ah I omta chih I thei ua, Saptuam leh Khristian te om didan a lamdang taktak a om hun ah I ding tamai uhi. Huaiziak in Saptuam sung a nasepna leh sepdan tuamtuam neih ngaita hilou hia chih in omta. I nasepna leh Bazar kaina banah vakna peuh ah tanchinhoih theihpihna piak ngaita hi. Tuabang in tualsung program tuamtuam a kikhopnate banah, pawlam( Biakinn sung kia hilou in ) missionary nasem di Pawlpi'n I sehkhiat uh poimoh hilou hiam? I Lamka khopi sung uah saptuam a tam mahmah a,himahleh hong kikhom ngam loute lak a kuan tangthupha genta ding? I tangteel bang un, ching ding neilou belamte bang a gimthuak leh dalhzak kipumdim gawpta hi. Tuate samtu ding I nget kul hi, huchilou in zaw melma gal lianpen-te hong suaktou zel ding uhi " chi hi.

Aban a gen zomzel na ah, " Saptuam kepna ah Biakinn kai hilou in, saptuam sung et kiimvel a, a dalhzakte leh gimthuakte et kiimveel ding ahi. Jesu'n Belam mang leh makhai mang a gentehna te khawng hoihtak a ngaihtuah vengveng di'n deihhuai mahmah hi. Tua bang khop lungput lainatna a dalhzakte' tunga neih kul mahmah hi. I tenna puan inn te kaipalh in, I awlmoh leh veite' lak ah telsak tum chiat ni. Huchi bang hileh nungzuite bang a Khovel khek lumlettute chia theih a om ding I hi ( Nasepte 17:6 )" chi in a thugen hon sunzom lai hi.

" Buh lak ding a tam mahmah a, himahleh a semmite a tawm uh ( Matthai 9: 37 ). I seplouh ziak un tampi mawk man gawpta uhi. Hoihtak a I ngaihtuah chiang un, I khelhnate ziak ua I thuaknate uh( Natna) leh a tuamtuam-te, Pathian in vanzat a nei in, tuate pansan in mi tampite khelhna kisik a, Pathian lam zong in, hong piangthak uhi ( kei leng huchi bang mite lak a khat kahi ). Mi khenkhat te'n HIV/AIDS veikei leng ka piangthak kei ding chi hial uhi. Khenkhat taget lah sihsual a hong om nate uh pansan in hong piangthak mawk uhi. Huaiziakin Pathian in zaw, mihing te kisiik dia ngak taktak in hehpihna kong honsak a, thiltuahte pansan a vehveh lai PATHIAN ahi ( Eklij 3:10 & 11 ). Huaiziak in ahi, mi buaihuai leh chimtaak huai mahmahte nangawn Toupa'n a hinna uh a hawi lailai " hon chi a, kei ngei leng ka omdan hoihlou leh ka natna veite Pathian in hon sapna ahi chih ka theita hi. Ka lungsim in, " Semtu di omlouh ziak a Toupa' vehna sanglou, kei bangbang midang bangzah om dia aw...?" chih khawng ka ngaihtuah vungvung hi. I Bazaar kawm mahmah uah, kua nasem ding I om ua ?

"Missionary tamtak gamdang ah I sawlkhe zungzung ua, lohchinna thupi tak banga ngaikha sek I bang uhi. Inn gua hahlou a gamgua hah kisuak hileh kilawm hi. Kha mangthang mat di, I gam ah kei bangbang tam lawlai ahi. I gam zuun phot in, I innsung u'leh saptuam sung uh zuun phot peuhmah lehang, tuasang a tamzaw, gamdang a sawlkhiat ding hong piang law mahmah di'n ka gingta hi" chi'a thugentu khat in, ka neulai a agenkhak ka lungsim ah hongsuak zungzung hial hi.

Ahitak in zaw, bangteng gen a sa in, kicheina lam enkai in leh chiangpum toh sualgal dousawm mah leng; I kibulphuhna uh INNKUAN SUNG I etkol hoih kei u'leh agah a lungvei thouthou ding. Nahke awn in nahke maam hiai hun a hong suang khollou ding ahi. Innkuan sung neuchik enkol zoulou in, bang chi'n khotang I enkol zou mahmah ding ua eita? Kei' hinkhua apan in, Innkuan poimohna a thupidan ka thei chian semsem hi. Abul I patdik naak leh zaw a kimkhat zohsa ana hi taktak ahi. Singkung thulimlou chik a nasuan, a kiim leh kiang a loupa a deepthei di teng na hahsiang kei leh zaw; singkung hoih leh gahhoih suang ding in lam-en dah mai in. Nu leh Pa te'n khuaksa zen a, I ta leh naute uh kepna ah bang chileh lampi dik ka tawnsak thei dia chih ngaihtuah hun lawta hilou hiam ???

Laigelhtu' Lungsung Pan:
CHRIST A UNAU-TE AW; INNKUAN AH KIKTHAK IN, INNKUAN SUNG AH KIBULPHUH LEH THA LA THATHAK NI. HUCHILOU IN ZAW, I GAM U'LEH I CHRISTIAN HIHNA UH MANGTHANG VEK DING A, I KHANG UH LENG HONG KIBANSAM MAIMAH THEI AHI. HUAIZIAK IN, KHAMTHEIH HIH TE'N TAWPSAN IN, AHIHLOU TE'N LENG AHIHLAI-TE' TAWPSAN DIDAN NGAIHTUAH PIH NI. I GAM UH HONG HOIH NAKLEH TUA SANGIN, GAMDANG AH MI TAM KIKUAN KHETHEI (sawl khethei ) ZAW DING HI.

1710 – KA KIPAK -2015