TULAI HUIH NUNG
- Muanniang Tunglut

Ka neulai in May-June kha in huihzang, chituamdeuh nungsek ahi dia, ka nu'n 'pateh huih nung hive aw' chisek hi. A zinglam chiang in a lawmte toh seng pua in gamlak ah pateh zong ding in kuankhia uhi. Nitaklam chiang in papak, panai leh pateh chituamtuam kipaktak in hon suahkhe lemlam hi.
Huailai in pateh huih atuam om chih lamdang kasa mahmah. Kei muhdan/phawkdan in tuh huih ngeina mah ahi a, a lamdanna/tuamna bangmah ka theikei. Ka naupanlai ziak leng himahleh ka kiim ka kiang a thil omdan/paidan ka phawklouh hiam ngaihsaklouh ziak ahi pen hi.

Tuhun in bel ka lianta. Pateh huih a tuam om hilou a, a gim apan ka nu'n phawkna nei ahi chih ka theita. I gam leh khotang a thil omdan/paidan leng ka phawk/theisiamta. Nidang a huih nungsek toh kibanglou huih chituamdeuh in I gam/khotang hon zial lellel ahihlam ka phawkta.

Hiai huih nung pen kikhekna huih ahi. I gam/khotang a siatna/thanghuaina a tamluat ziak a, kikhekna huih in hon nawk lellel ahi. Nidang a I omdan/paidan/theihdan teng khek pumlum ding huih hidin ka gingta hi.

Kikhekna huih in mi tampi a nawkta. Thil tampi leng hontunta. Chikmah a om ngei nailou singtangmite lakah kipumkhatna bang hontun hi. Tanggam a teng nam tuantual ten melma kibang khat nei ihihlam kiphawk in, ki pangkhawm theita. Hiai pen thil thupi mahmah ahi.

Maanlai apan numeite/nute khotang a kiphoukhe lolou, tate etkolna leh niteng nekding/insung vai a buaite himahleuh tutung I kiphinna uah a madawk in hongpang mawk uhi. Numeite tuh pasalte sang a thahatna neilou zaw chihmahtak a tangpi in zahkai leh dawilok deuh uhi. Tutung in bel hansanna leh thahatna koi apan alak uh ahia chih theihlouh khop in nei mawk uhi. Lamlian zui in deih leh nget kichiantak sam in kikou zuazua uhi. Torch rally a nei ubang, Lamka apan Kangvai tan human chain a bawl uh bang thupi petmah hi. Ka lungsim honkhoih diak tuh saiip silh a leilak a bok a thumna a neih uh ahi. Hiai in lungsim kiniamkhiakna ensak hi. Tulai inle thumkhawmna/angawl a thumna hah bawl mahmah ua, ka lungtang hon sudam in lametna honpia hi.

Hiai kikhekna huih in naupangte lungsim leng khoihkha hi. Salpha te luang koihna kong ah naupang neute vathum mawk uhi. A lungtang uh tamkham bang in Pathian kiangah kikou khia uhi. Lungsim honphawng a, ka chimul bang a thou hi. Naupang neute ngeina dan tuh kipak gige, kimawl a phe velvel, nu le pate muang mahmah a bit kisatak a om ahi. A kah chiang un leng natna ziak hiam, bang hiam deihna ziak ahihkeileh amau thu a pailouhziak khong ahi hi. Lungtang kitamkham bang zen a puaknat a nei kei uh. Huaiziak in bang dinmun kitungtel ahia chih tamveipi ka ngaihtuah hi. Bang in amau sawl/phutluih ahia chih ka thei ut mahmah.
Salphate itna chang a theikei kei uh chi tuh ka hi hetkei. A sanggam uhiam ahikeileh pa dan a koih thei uh ahi chih leng ka haihkei. Hileleng Pathian kiang a akikoukhiak uh huaiziak chauh hidin ka gingta kei hi.

Mahnimasialna, sum leh thuneihna deihtakna leh thanghuaina a kidim I gam uh ziak a puaknat nei hiding un ka ngaihsun hi. Amau lungsim siangthou lai, botloh nailou tuh a pate uh khelhna in puakgik pia hidin ka gingta hi. Hiai ah 'pate' ka chih chiang in makaite leh taltakte ka genna leng ahi. Pate/makai ten a chinlouh man uh hidin ka gingta hi. Kisaktheihna a kidim leh lungtang khauhtak a om pate/makaite a kisiik ua, lamdik honzot na ding ua kikoukhia uh hidin ka gingta hi. Amau kikoukhe keileuh suangnoute kikou ding uhia chih dotna lianpi ka nei hi.
Skul naupangte gam le nam itna ziak a akiphinna uh leng ngaihtuah tham mahmah hi. Nu le pate leh heutute zahtakna ziak in skul kaita mahleuh a lungsim un puakgik a nei ahi chih theih in om hi.

A tung a kigente apan kikhekna huih nung ahihlam chiang mahmah hi. Ngaihtuah dia hoih khat tuh hiai huih in kua teng nawk kha ahia? Miteng a dia nung himahleh kuate hiamkhat chauh kikhek ahi hia? Ahihkeileh atam zawten phawklou/ngaihsaklou ihi diam? Kipilsak leh genhaktak a om a, nungngatsan ihih khak ding ka lau mahmah hi. Kikhekna huih nung vitvit leleng mahni I kikheksak keileh hon pel mai ding hi.

Nidang in mimal I muang mahmah ua, adiak in makaite (Dan nuai a omte leh Dan nuailou deuh ate) tungah iki nga mahmah uhi. I muan dingpen tuh mihing hilou a Pathian kia ahi chih phawk dia lungtang kikhekna neih hun mahmahta. Hiai thudik theichianta tampi I om man in lungmuanhuai mahmah. Himahleh a phawk nailou a, amaute a lametna koihlai tampi I om uhi.

Singtangmite, adiak a Zo suante tuhun in pangkhawm mahleng atamzawte adin lungsim taktak a unau a kikoihna/ki-etna in samlai hi. Beh hiam nam (tribe) in hon kan laiteng zaw I lungput dik nailou lai hi. Na beh hiam na nam min ziak a suan khat, unau a na kikoih theih keileh Pathian a inkuan khat, huaiziak a unau chi'n pom lechin haksa hetlou ding hi.

Kivelchian hunlai ahi. I mit uh a keuh hunta. Thudik imuh hunta. Mahnimasialna hang a bang a I gup ding? Thudik maw, mihing? Na beh hia, na nam? Sum leh thuneihna deih man in bangteng I nawlkhin a? I mite maw, I leitang? I Pathian hia I sia le pha theihna? Taksa utna ziak in bangtan ei hon it pente I lungkhamsak a? Bangtan I Pathian nungngatsan in I khasesak dia?

Kikhekna huih nung lellel in igam/khotang a poimoh pente khoihkha nailou lai hi. Ka thumna tuh hiai huihnung bei mailou a, lungsim tengteng a mut siang a, I khotang a nitna/siatna tengteng pingpei bang a atuahkhiak ding ahi. Huaima zaw Toupa aw, tua huih khawlsak mai ken aw.