PATHIAN IN BOYCOTT PUANKHUM dup mai
- Pastor Rawna Kopsiam

Tulai I buaina thu un lungsim tengteng hong la zou mahmah ahi ding, hih theih leh sep theih neitei lou na pi in, om mun ah ngaihtuahna a pai sau thei mahmah mai hi. Buaina I tuah tam leh pau tuamtuam bang leng thei tam mai ding hi le kilawm. Tuma lam a I buailai un Ambush, refugee leh curfew chih khawng I thei hoih mahmah ua, khenkhatte bang curfew en nuam a pawtsuah teitei chih bang om hihang. Tutung I hong buai nawn leh Dharna, Protest, Memorandum leh Public Boycott chih te hong kithang nawn zel hi. Nupi upa simta khenkhat bang in leng dharna tu nawn di khawng chi suk ziahziah mawkta uhi.

Adam leh Evi in Pathian thu a manlouh chauh uh hilou in Setan thu aman ziak un a tung uah haksatna hong tung hi. Pathian in Eden huan a om thei nawn lou ding in boycott puan khum hi. Huai kia leng hilou, amau ziak in tua I tenna leitung uh hamsiat in om zaw-mah lai hi. A tapa uh Kaina leng tualthahna case ziak in boycott in hong om zel. Na sanggampa sisan in leilak apan in kei hon sam hi. Tu in lei in nang hon hamsiatta. Lou na khawh chiang in lei in nang a ding in gah a suah nawn kei ding. Leitung ah galtai leh vakvai na hi gigeta ding. A maban ding bin chi na e maw. Che fuh zaw kisa khawl kei hial na ve. Hamsia in nungdelh zui ngal ahih mawk chia. I mi thahte khawng uh sisan un Toupa sam thei ahih mawk leh Pathian in hon boycott tei khak ding lauhuaina e maw. Vualzawlna toh leng kizui kei lua maw.

Gamchiam zuan a a pai lel lai un Israelte lak ah leng thu buaihuai pipi hong piang sek hi. Ngaihdan kibang lou taktakte ziakin heutute hileh mipi lam hileh BP sang tam thei mahmah uhi. Aigupta a kipankhia pan tuipi san leng kan man nailou in patau pah mawk uhi. Heutute phunsan na hong piangkhia pah hi. Hong pai zel ua, Gamdai ah ann omlou, tui om lou, Aigupta sabel khawng a lungsim uah hong kilang dundun mai. Aigupta a a om lai un leng bang huchi tak a ngaih ding in le sa a nene khawl duam ah. Mi suak leh sal bang a om a, kapkap a, Pathian samsam ahih lam bang uh kimangngilh kha sek uhi. Gamchiam Kanaan gam tun zoh nang in kum tam lut in hun sawt lut ngai mahmah lai hi.
I tung ua Toupa a kipah leh huai gam ah ahon pi ding, huai nawitui leh khuaizu a luang gam ah. Pilvan ngaih chi mahmah hi. Aziak chu "I tung ua Toupa a kipah leh" chih ahihmawk chia. Akipah kei ngeingei leh chu kipan khia mawk le uh leng huai gam tung zoulou ding uhi. Ei lawi leng kipan khiata chu I himai ua, I tung ua Toupa akipah leh huai I lamet gam uh I tung ngei ding uhi. Toupa I kipah sak kei uh leh chu gamdai gamgeu ah...... ! hi mai. I movement uh ziak in boycott bang I puang ziahziah uhi. Kuamah ka dem kei. Ahia ka gen nop bel mihing te boycott sang a lau huai zaw a hon boycott thei Pathian ahi chih kuapeuh in phawk gige ni.

Pathian in boycott a puankhum dangte I en lai uh awle. Kanaan gam enkhetute report a ngaih khiak zawh un lungkiakna nasa tak mai hong om hi. Pathian muangloute, A thu mang loute tengteng Pathian in boycott puan khum dupmai hi. Joshua leh Kaleb chihlouh siah kuamah Kanaan gam na lut kei ding uh. Pathian in boycott a puankhum vanglakte chu ngaihdam nawn chih leng a om kei. A boycott in a huamkhak tengteng khat lel leng Kanaan gam tung zou om kei ve uh aw. Nasa thou maw. A makaipa uh Mosi leh Kanaan gam enkhia di'a vakuan leader mi 12 te lak ah mi 10te leng boycott in omkha ve uh aw. Mosi bang in Pathian kiang ah ngaihdam ngenngen mahleh Pathian in ngaidam utlou in Kanaan gam tung zoulou hi. Paukhial leh hihkhial zaw kisa mahmah na ve. Boycott in a huam khak mipite chu simseng leng ahi kei uh. Aigupta apan hong pawt tengteng Joshua leh Kaleb chih louh teng ahimai uh. A sim nop zawng in gen le chu Aigupta apat hong pawt tengteng lak ah mi nih chauh boycott khak louh chihna ahive.

Samson, mihat leh hangsan leader khat ahi. Leader khat hisam din chu mak tei deuh mai ahi, amah thuthu a gamtang mai. A mipite kiang a I va huchi di uh, I va kha chi di uh chih leng om sak ngeilou. Leader khenkhat mipi gamtangsak thei hetlou om hi. Khenkhat in lah mipi gam tang saksak thei. Khenkhatte leuleu lah mipi tawh gamtang khawmkhawm thei uhi. Samson bel melmate gamsung ngen a va gam tangtang zaw-mah lai. Melmate ngaihzawng va nei ahih mawk chia! Pathian in boycott hon puankhum taktak mai chu a chekei nasa khopmai. Bible sim le chin Pathian in a paisan lam himhim a thei kei chih kigelh hiveh aw. A mite tawh Israel gam sung ah omkhawm in vaihawm khawm maimai zaw leh zaw chih sim in a om aka.

Kumpi Saula leng piandan ah soisel bei khop a hoih leh fel ahi. Ama'n leng Pathian a lungkim sak kei-a, kithoihna sang in thuman ahoih zaw a, belamtal thau sang in a thupiak zuih a hoih zaw hi chih message mu geih mai hi. Kumpi a bawltu a Pathian mah in boycott puankhum geih mai hi. A sik-le-tang a kumpi dinmun luahtu ding leng guang fel khin vek mai hi. Chance muh chi nawn keina e maw. Ama'n leng I tung ua Toupa a kipah leh chih Bible chang khawng ngaihtuah in na nei kha maimai bek leh zaw hiai tantan tung lou ding hia chih sim in a om zel aka.
Babylon Kumpi Nebukhadnezar bang leng Pathian in a tun ding a, thuneihna sang tak a piak ahi. Dan. 2:37 Van Pathian in kumpigam leh vangletna, thahatna leh thupina nang honpia hi. Dan 4: 27 Daniel in kumpipa hiai bang in thuhilh hi. Adik hih in na khelhnate tawpsan inla nuaisiahna thuakte tung ah chitna suah in, na gitlouhna tawpsan in. Hilehleng thunei hong kisa a, hong kisaktheih chiang in Pathian mah in boycott puankhum nawn hi. Pathian zaw, mihing kumpi gamte a thunei pen ahia, a utpeuh kiang ah hiai thuneihna a pe zel chih na san mateng nang ading in hun sagih a bei ding chi hi. Kum sagih boycott khum chihna ahi. Kum sagih sung teng gamsa bang in khosa maimah hi. Pathian in a boycotte mulkimhuai thei e maw.

Hiai bang teng theinapi in a tapa Belshazar kingainiam het kei hi. Kingaihniam naksang in Toupa tung ah ki-liik sang a.. Biakna leh sahkhua thusim het kei hi. Dan 5: 22. Kumpipa Belshazar leng boycott in hong om zel hi. Boycott na lai gelh hiai bang ahi. Mene mene Tekel Upharsin. Hiai te pata ziak in Babylon gam khovel theih in hong om a, Amau pata ziak mah in Babylon puksia dimdem hi. Babylon pukna ziak Bible ah hiai bang in kigelh hi. Ka mite tung ah heh ing a, ka goutan hihnin inga, na khutsung a hon piakhia hi ing. Amaute tung ah zahngaihna suah lou chin a, a tate uh tung a hakkol gik suan na hi. Nang lah kumpinu hiden ding ka hi chi chin a, Mitphiat kal lou in beisakna hi ding. Zan khat thu in Persia kumpi Cyrus in hong zou gawp dimdem hi.

Leitung mihingte kiboycott khawng chu neptak ahi maw. Ikh aleng nam zoulou a chihte uh a bang maimah a. Bang mah kawngrou leng sukha lou a bang. Ahi-a-lah Pathian in a boycott vanglakte'n zaw thuakzou het kei ve uh aw. Huaise mahmah uhi. Tuni'n mipi lam hi in heutu dinmun a ding khate hileh kuapeuh kingaihtuah thak ni. I tung ua Toupa akipah leh huai gam ah ahon pilut ding, huai gam bawngnawi leh khuaizu a luang gam ah. Akipah kei ngeingei leh chu a boycott thuak khate adding in huaise mahmah inteh. Leitung apat atuam mawngmawng, separate Administration vangam lut kha lou di'a boycott a om khak ding ahi a lauhuaipen. Hong un Toupa lam ah I kiiknawn ding uh. Ama'n hon bawtzanta mahleh hondam sak ding hi. Ama'n hon liamsakta mahleh I liammate hon tuam ding hi. Amen.

-----
This email address is being protected from spambots. You need JavaScript enabled to view it.