Zingkal Khat Ka Thiltuah Lamdang...!!
Written By : K.Lianthansang
New Lamka lam apan in, CCPur Police Station lam manoh in ka tai suk charchar hi. Huai hun ahihleh, khawvak ma, zinglam dak 03:00 lak vel hidi'n ka gingta(?). Khua vaknailou himahleh; Aak , Sing-aat, Syntex , Meihol leh a dangdang zuak dinga pua tampi tak ka tuakkha hi. Akhen-te ngial, khekol langkhatlam leptou manlou zen in, lampi nawl ah niin neng tomkhawm in a na om ua, 'Ihmu manlou zen a, Next Dose di ngaihtuahna a phatuamngai leng ana om ahi maw' ka chi lungsim hi.
New Lamka lam a, Hol(Charcoal) 'Bag Nih' tak pua a ka muh, Pasal khat kiang a, " Na Hol puak kua-te a nalaak e..?" ka chih leh " Kou a ka laak ahi, nou a ka laak lah hilou a, ng hon gen di bangmah omkei....!" hon chihsan hi. Ka lung kimtheilou ahi ngei ding a, " Koi mun a nakoih dek e..?" ka chih nawn leh " Salem Veng a ka Hotel ua di ahi...." chi'n hon dawng nawn leuleu a, ka gingta kha dek zozen..!!. Amel etmai a leng, Hotel bawl hial dia a gintakhuailouh ziak in, a guuk in ka nungzuih hi. Ka zuihzuih leh New bazar Bus Parking ah lutsuak phei a, Mission Road tawn a apaiphei takin ke'n leng Tedim Road lam ka naihsuk san ta( a ma' Salem Veng gamla omlua hiven).
Tedim Road ka suahsuk toh kiton in, Nehru Marg Junction lak ah Aak khat ana haam lawlaw a, mak salua a ka vanaih leh Pasal khat in, a Bag(JANSPORT kichite) ah Aaktal lian mahmah khat a na kuah keihkaih mawk hi. Interview neihpih chidan leng hituanlou in, " Hiai Aak koi a nalaak, koi a nakoih sawm e..?" ka chihsuk pah leh " Kou a ka laak ahi, ka Pute ka piak dek ahi..." chi'n hon dawng ziau hi. Presence of Mind nei mahmah ka sak kawmkawm in, a Pute a deihsakdan thupi ka sa mahmah (khawvaak ma nasan a Pute aak piaksawm tel hiven).
Tulai a, mimal leh Organisation khenkhat te hihdan zuih tei bang ka ut simsim. Gutate vanguuk teng laksak a, a ninawn chia News khawng ah 'AHUNCHIAM' toh Flash mai di ka dia aw, hong laak kei u'leh ei a nei kihimai di.... chih khawng ngaihtuah mah leng Christian hindan tawisang khalou dia kigintakna kaneih man in Police Station lam ah ka kikhohsuk vengveng ta hi.
Ka theihlouh kal in JP Selection kong mai ka tungsuk a, lampi ah mikhat ana om (tut thoh) hi'n ka mu. Himahleh, a kiang ka tuntakin kuamah muh di a omnawn kei mawk. Police Station gei a, Tipaimukh Road tawn a ka taitouh zek leh Nupi' melpu khat in lampi ana kaan mawk hi. Hoihtak a ka et leh kuamah muh ding ka neinawn kei zel. Lausim chu ka hi ngei dia, nungkik thak in...Tuibuang lam manoh in ka taisuk mawk hi.
Ka tai suksuk leh mi khat in, Tempawng toh honna delh mawk a, sih utnailou ka hihman in ka taikik nawn hi. Bangmah genlou pi a hondelh ahihmanin, keile bangmah genlou pi in ka taikik tou(Police Station lam manoh) hi. Ka taihat dan hon test nuam ahi dia aw , chih khawng ka ngaihtuah kawm a, atawp in ka khawl a, ka na pang tenton ta mai ve. Ka kiang hongtun in, hon sat ngam hialkei, bangmi ahia chih leng ka theikei. Himahleh, eipau a " Bangziak a n'on hichi delh mawk..? Ka taidan, Election Model Code of Conduct toh kikalh kha hia..?" ka chihsuk zialzial leh eipau a siamtheih tawp suah in " Ka Aak uh kigumang inchin maw, Guta di k'on sa a eikha, hon theisiam in aw Pu( Pu bang honchi zozen)." hon chi hi.
Pi-Pu te'n, DAWI-LE-KAU a biaklai un, Dawi-le-Kau banah Gamsa khawng chauh lauhpen in a nanei uhi. Himahleh, tuchiang in PATHIAN LEH MIHING I bia ua, lauh ding mahmah atam ta. Galmuang tak a kholak pawtngam di vual ahi nawnkei. Hihlouhna pi a leng thuaktheih mawk na khovel ahihdan khawng ka ngaihtuah dundun hi. Buaina peuh lah a pan(start) tu omlou..lah buaina tam deuhdeuh mai. A group ahihkeileh a Veng-veng a kidelhtuah vengvung chih khawng I 'Hobby' uh mahbangta.
Tipaimukh Road lampi lah ka tawnnuam mahmah a, Police Station sak zek pen ah lah ka taitou ngam nawnkei zel. Tedim Road lampi maam hinhen tawnin ka taitou zek a, Central Road ah ka taikawi phei hi. Huihnung ziak hia chih katheikei, " ZION Hotel " kong ka tungphei ding kuan in, ka khanglam(taklam pang) a Haipi(Mango) kung om pen hong kising(shake) nungnung hi. Khawl zen a ka et chiang in a dai zel a, a kung ah kuamah muh di a omkei. Ka tai zek chiang in hong kising zel hi. Laulua ka hihman in, ka kikhoh phei a, ka theihlouh kal in Tipaimukh Road ka tungphei ngal mai.
Hat theihtawp suah in, Tipaimukh Road lampi phok sim bimbem lak ah ka kikhohtou hi. Uang gen lehang, lampi lai ah bawng-ek om leh leng ka siikmaat mankei ding. Public Ground gei chu ka tungtou pah a, lampi kiang ah BUS khat a na khawl bembuam hi. A maizawn ka tuntak a, ka ettouh leh Driver-te' tutna zawn ah mikhat tu hidan in ka mu hi. Huaikia leng ahikei, 'Helmet' khukawm zomah hileh a kilawm. Two Wheeler a tuang khenkhat in, Helmet khuk di a lit-lit maizen u'toh, hiai a Bus Driver pa'n bel Helmet khukawm kiuh-keuh lel hi. Ka muh pe'n atak ahihleh thillamdang mahmah chu ahi.
BUS Driver in, Helmet khumawk chih ka ngaihtuah chiang in, ka lauhtha hong suak deuhdeuh hi. Lamdang ka sak mahmah ahihleh, ka tai chiang in huih hat-ahat dan in ka thei. Himahleh, Churachandpur College kiang a singkung te khawng lah liing mawngmawng lou zel uh. Lausim kawmkawm a ka nungtai(dek khawng zau huanhuan zozen ahih cia) nalam in, lampi lai a suangtum ah ka kisuipuk kha thepthup hi. Ka khut leh khe khawng bang, lampi lai a suangphom lak ah ka tatdulh nengnung a, anuam law vak kei..!!
Ka taitou zel a, BSNL Office gei a hanmual lak ka tuntak in, mi'n a gen zeuhzeuh sek uh ka ngaihtuah khe kha nawn taget hi. Bangmah bel muh leh zaak di ka neikei. Himahleh, D.Phailian a lamtou kipat na bul ka tun di kuan in, Waiting Shed a lutphei chet khat om hi'n ka mu a, Ui maimai khawng hidi'n ka ngaihtuah lel. Amun ka tuntak in bangmah muh di ka neikei zel( nikumlam in bel, akiang a Dawr sung ah kikhailum a om ngei...!!). Lampi tou om ahihlam leng ka phawk nawnkei, ka gimluat lam leng ka thei kei...Bungmual lam manoh in ka kikhohtou vengveng lel hi.
Naak noh zen a Bungmual Auto Parking tan ka taitung tak in bel, Biakinn a zing thuumna nei dia kuante khawng toh ka kituakkha ua, lung anuam tuan mahmah. Hotel khat ana kihong chet ziak in, huai ah Tuisiang khawng ka dawn a, Daily News Paper khenkhat ka sim cheuh a, ka sim zoh a innlam ah ka pai a, ka kihahsiang ta hi.
Laigelhtu' Lungsung Pan:
" Zingkal Khat Ka Thiltuah Lamdang...!!" chih 'THUPI' pansan a 'THUPI LAWLOU ( khenkhat' ngaihdan a)' tamlou k'on gelhkhiat-te' lak ah, akimkhat(50%) phuahtawm pumlum ahi a akimkhat(50%) mah kei' tuahkhak pansan a k'on gelh ahi. Mun min a kigenkha-te leng, huaimun chetchet a thiltung ahi tuankei.
Banah, hiai thugelh saulou apan - Lamka Khawpi sung a lamlianpi deuh teng bek phuahphat a ngaihdan, Mahni tantawk a lungkim kizil mai a poimohdan, I Gam uh galmuang nawnlou ahihdan, Guta-lata in kiamlam sanga punlam manoh deuhdeuh ahihdan tel in, thildang tampi mahmah taklang(Indirect in) hi.
Tua ahihmanin; Nu leh Pa te, Saptuam-te, Politician-te, Khawsung makai te, Government Official-te, Dan leh Thupiak enkaitu te banah, aneupen apan alianpen tan a pankhom ngai lawta ahihdan hon muchiansak hi. Kigensetuah leh kisimmoh tuah ding om khang....'Job Card leh BPL Card Holder' chiat hi hang. Huaiziakin, dialdial in diamdiam lehang, vualzawlna I Gamlei uah Ni banga hong taang dingin gintaakna ka nei tinten hi.
1710 – KA KIPAK - 2015