MANIPUR SINGTANGMITE DINMUN
By Ding Khuptong, Zogam Writers’ Group Lamka chapter

Manipur state sung a teeng mite’ Outer Manipur leh Inner Manipur a kikhen tuam in, min tuam nambing a kichiziat hinapi in phaizang mi General category a om te’n ST a nget theih mawk uh lamdang kasa hi. Ahia, Outer Manipur a teng mite kuate hi uhiam chi’n kidong ta leng, a dawnna bel Manipur Zogam a teng Zomite/singtangmite ahi uh I chipah ding a, Inner Manipur a teeng kuate hiam chin kidong nawnta le Meitei te (phaizang a tengte) a hi uh I chih ngei lam-en ing.

Huchibang in, Inner Manipur a teng kuate hi uhiam chi’n kidong nawnleng Manipuri (Meitei) te a hi uh I chi chiat ding uhi. Awle! Huai aka hia I gennop. Manipuri kichi Meitei-te hita leh, Outer Manipur a tengte bel Meitei kichi thei ngeingei louding chi ou! Meitei-te’n leng Manipuri mi hon chi ding un ka um kei hi.

Tulel dinmun ah, Manipur singtangmite India Danbupi a 5th Schedule nuai a om ihih mahbang un, Manipur State Legislative Power nuai ah om in a thuneihna uh I kikoppih thei uhi. Manipur in MLA 60 a neithei a, huai lak ah Schedule Caste (SC) tel in ei’ singtangmite a ding in MLA 20 piakkhiak ahi. 5th Schedule Section 2na I etleh “India Constitution (Danbupi) khenpi 5na in a piak bang in State thuneihna, singtangmite khempeuh Manipur solkal in Singtangmite tung ah vaihawm theihna leh thuneihna” anei chihna ahi.

A diak in hiai 5th Schedule Section 2na pansan in ahi Unclassed forest tungtang, Manipur Hill House Tax bang, MLR & LR Act, 1960 Extension leh Lifting of liquor Prohibition in the Hill District of Manipur thute singtangmite laka hon thuneihkhum uh. A’ihhang in singtangmi MLA 20 te’n 5th Schedule nuai a Dan in a phal bang in Hill areas Committee (HAC)kibawl khethei ua, huai HAC nasep ding ahihleh “singtangmite toh kisai thute himhim khantouhna, leh huaibang mite hoihna ding himhim thilte ah thupuk theihna state solkal ah Governor in thuneihna a piak bang in neithei ding uhi….” Hiai bang singtangmite toh kisai Dante HAC dot leh phasak pihna tellou in Governor in bawl leh zat a phalkei ding.

I theihding ua ka deih bel Manipur Innpi a HAC te’n pha a sakpih man un ei’ singtangmite haksatna ding Dan tampi zatkhum chinuam ihi. Hiai in India Constitution Article 14 leh 15 na te kalh ahih ban ah, singtangmite’n palai state solkar a va neih in, I gam a vengbit kei a, singtangmite dinmun ding khualna leh bawlhoihna a om kei chih chiantak in kimu thei hi. Huaikia hilou in, India Danbupi nuai a Article 371C ah hichin kigelh hi:

371C.  Special provision with respect to the State of Manipur.—(1) Notwithstanding anything in this Constitution, the  President may,  by  order made with  respect  to  the  State  of Manipur,  provide  for  the  constitution  and  functions  of  a committee of the Legislative Assembly of the State consisting of members of that Assembly elected from the Hill Areas of that State, for  the modifications to be made  in  the rules of business of  the Government and  in  the rules of procedure of  the Legislative Assembly of the State and for any special responsibility of the Governor in order to secure the proper functioning of such committee.

(2) The Governor shall annually, or whenever so required by  the President, make a report  to  the President regarding the administration of the Hill Areas in the State of Manipur and the executive power of the Union shall extend to the giving of directions to the State as to the administration of the said areas.

Explanation.—In this article, the expression “Hill Areas” means such areas as the President may, by order, declare to be Hill areas.

Tulel dinmun a state solkar vaihawmna nuai a Manipur singtang mite lungtang nasak mahmah Bill 3 (Protection of Manipur People Bill, 2015; The Manipur Land Revenue and Land Reforms (Seventh Amendment) Bill, 2015 leh Manipur Shops and Establishment (Second Amendment) Bill 2015) apaisa August 31 in passed uh a, daltu omlouh ziak a passed a om hipen mai hi’n ka thei hi. Tua bill passed ahih hun a ei singtangmi MLA 20 te’n daal lou uh ahihman in mipi thangpai gawp ua, luang 8 hilhial a kikham nung in tu in buaitak in i khosa lel uh.

Tua kia hilou in, i palai te milim bête mai a kuun nuam zaw ahihman un, tulel a i kivaipuakna un singtanggam nakpitak in susia a, singtang gam ah siing(ginger) chiing(cane) leh thildangte lak bei vek in a om ta a, singtangmite kivakna ding a bei hulhul hi. Huaibel state solkar khut a kinga leng ahi a, I palaite (MLA) hon humbit louh ziak uleng ahi bok hi. Manipur solkar in palai I sawlsung teng zaw hotel ah gen leh sak a nei in, chiak chiak mah leng vailak zunthak bang phet ding hivaw.

Genta vanglak genlai leng, CCpur District in palai 6 bang I neithei ua, District dangte sang in en palai hauzaw hi hang, himahleh, I mihinpihte itna ziak a khatbek kitawp chih ka theih nailouh man in, poikasa hi. Mangkangte hunlai apan ei singtangmite gam leitang honna kepbit saksa uh kepbit a omtouh zelna ding in, Inner Line Permit kichi Mizoram, Arunachal, Nagaland, Tripura leh Meghalaya ah Inner Line Permit kichi zat in om a, himahleh tu in India a namsang General Category in zat hon sawmna pen uah a diktheilou leh thil hitheilou khat a hon sawk uhi.

Phaizang a Bill 3 passed a omte ki genkim sipsip man kei mahleh a thu i hon theih deuhdeuh chiang in,  Vaigam apan a hong lut vaite sang in Manipur singtanggam a teeng singtangmite huphulhna a hiai bang kiphinna nei uh hidan theih in om a, ei’ a neitu mahmah i kisak lai in,  Burma a hong kipan Myanmerese Kuki chih in Non-Naga  ST teng a hon chiamteh uh a, kum 1950 nunglam a teeng peuhmah hawlkhiak sawm in hong kisa uhi.

A bill 3 te ziak un, ST muchet kei mahle uh, singtang gam laihhek theihna dia kong liantak honsak in om uh a,  singtang a General-te’n gam a neih theihlouh lai un ST in inner (phaizang ah) gam a nei thei uh chih khawng bangle a zakdah pente uh lak a khat ahi hi. Tua omdan tak be lei singtangmi Schedule Tribes te’n Phaizang a gam i neihtheih bang un, amau leng singtang gam ah neithei le uh chih deih hi uh a, hiai thei gegu in, Assembly tutkhawmna ash singtangmi MLA 20 omlak ah khat lel in leng daal lou in a dai dide uhi.  

India gam simleivai (Politics) ah ki bulphuh taktak ni I chih leh, India solkar in ei singtangmite ading biik a hamphatna apiak tuam liuliau vaihawmna leh ki etkolna Sixth Schedule i chi hiam a tuam a kivaihawmna Autonomous Hill state i chi hiam khat zawkzawk  I muh ngeingei ding uh ahi. Tulel a I Politics dinmun uh ka et velvel chiang in ei deihbang in iki vengbit theikei ua, I lunglutna uh ei chihdan leh ei deihdan in I paipih theikei uhi. Hiai 6th Schedule in apiak hamphatna ahih leh, ei singtangmite kipumkhatna ding a kivaihawmtuam ding nek leh tak zonna chituam ding leh, amau lunglutna leh deihtelna paipih ding ban ah sum leh pai muhna a India phualpi toh kizopding ahi. Hiai Dan pen India state tuamtuam leh a diak in Tribal gam te ah amau leh amau a tuam a vaihawm theidia bawl leh zat ahi hi.

Adiktak in gen leng I District sunga MLA te Nam leh Gam ka it a, mipite khantouhna ding leh Gam leh Nam humbitna ding in nna kasem ut a, ka deihsak chi a, election hunchiang a a gengen sek uh taksan huailou bang hi. Manipur kumpi’n CCpur a Municipality a koih lai in, ei District sung apan telching a om Cabinet Minister khat in a deihlouh thu leh mipite lungkimlouh dan Assembly a naktak a atangkou pih chiang in Municipality phiatkik in hong om hi. Tuabang a MLA hiam I palaite hiam in, Dan tuamtuam passed a om te phiatna ding in adeihlouh dan uh naktak in gen uhenla, Meitei te ST status nget tungtang bang ahihkeileh, 6th Schedule I chi hiam AHS pe’n singtanggam humbitna leh kivaihawmna hoihzawkna dia koihding in naktak in phu le uh baihlam mahmah ding ahihdan chiantak in muhtheih in om hi.

Niteng a sun nitum a louna sem a, Inn leh lou mun deih nana nei aleng kum khat kham ding khoukhe zou ngeiloute ban ah mahni sepsuah sate tung na ngawn a leng thuneihkhum zouloute’n Inn mun lou gam a tuam biik nei in, om kei leng bangchi khosak mahmah ding ihi ua???? Lung in na gelngei kei maw????? Zogam luaibang a kivei den dia ngaihsun maw leh…… na ngaihsut leh nang leng na suakta tuankei ding hi. Ei Singtangmite’n MLA I neih sunsunte ulah mipi phatuamna ding leh venbitna ding ngaihkhawk zawk naksang in mahni masialna, nekgukna leh milim bete mai a kunnuam zaw leh ngaisang zaw in, state solkar ah tuitum kisa huntawk uhi. A thuneihna om sun utuh mite soisakna ding, nekgukding leh suankualna ding lel a zang uh bang hi. Genta vanglak genlai leng, 6th Schedule thu ah, cabinet in 3 vei hilhial recommendation bawlkhinta mah le uh, 2 ah “ with certain local adjustment and amendment ” kichi solkar thuneihna nuai ah 5th Schedule Dan khenpi 5 na zangsek ahih man un, MLR & LR Act, Hill House tax leh Un-class forest tungtang I gam ah 6th Schedule ki zangsuk kizang tou leh leng aphattuam na ding omlou khop a, local adjustment and amendment bawlsawm uh ahihdan chiang hi. Huaiziak in, amasapen in, Autonomy muhkhiak a Manipur state solkar toh kikhen phot ngai kasa hi.

Central solkar in state solkar kiang ah hiai “ with certain local adjustment and amendment” bang na chihna uhiam chi in 3 vei hilhial dawnna peding in noh mah le uh, tutan dawngkik nailou lai uhi. Tulaitak a I Autonomous District ulah, 6th Schedule Dan in apiak ah aki nga kei a, Manipur (Hill areas) District Council Act 1971 kichi India phualpi solkar in abawl ah akinga lianzaw hi.

Tulai khovel paidan i et vengveng chiang in , ei Zomite tuh i gam ah leng gaalmuang thei lou i bang hi. Himahleh, mi khenkhatte bel ei dou ding leh i lang a apan chiang un kipumkhat thei mawk uhi. Kum bangzah hiam paita in eite’n  leng bitna kulhpi lam sawm in pan nasa tak in i la ua, himahleh i sungkuan mi phengphi khenkhatte hang in i gam melmak singtan’ nawmvalh dek hilou hiam?

La phuaktu V. Siampu in “kua hiam ding ding kua hiam kuan ding igam a ding in, diktatna tawh Pasian a nei gamlei a it ding?”.. ana chi hi. I gen nop bel, i bitna dia ei pilna , siamna mah suang a, bangkim bawltu Pasian phawk lou i hih leh bel i gam ah bitna a tun a lam-et huai kei. 1997 lak vel in i biakinn te uh thuumna inn ahi ua, himah leh tu chiang in  bel a biakinn lam pung hulhul, Lalchhungkua saptuam a kipe lut vekta bang hial in Toupa sapna aw zaak ding ahi nawn kei. Laisimna ah, kaam zonna ah hitaleh religion chih fillup ding chiang a Christianity chih louh gelh ding theilou te ihi uhi. I christian-na uh bang le eimah thutum a heikawi ziahziah i bang phet uhi. Gingtu a, sahkhomi lah tawm deuhdeuh, ahih hang a saptuam chih lah biakinn bawl kisaan chiat, mi a kikhom lah tawm deuhdeuh bang lohta ding? Thu gen ta phot in lah, Kikhop taimate kia taitai kha lel, a za dia kilawm tata lah ka vaveh in ka phawnghalh ding chia lungsim puu khat leng om lou.

I lungluutna uh leh i ngaihtuahnate uh lah a huauhuau ngen hita. I lungsim leh innte lah thuumna inn hihsak naksang a, Sanjivani, Manvi leh Korean serial chihte khawng ngen in luahta. Diktatna toh i gam a dia sem a, siangthouna toh i gam i hum louh in zaw, Sodom leh Gommora bang a haal mang a i om ding hun uh a gamla hetkei ding. Huaiziak in, i gam a chidam a, i nam, i pawlpi leh i society a chidam a, bitna khuampi muanhuai i tun theihna ding in Toupa lam a i kiknawn bang le poimawh mahmah hi.

Atawpna pen ding in, eite’n leng amau direct a dou hetlou in kiphindan chikhat I neih a kuulta hi’n ka thei hi. Tua ding in JAC i chihiam khat dinkhiak a, singtang mite hihna kepbit sakna dia Dan tuamtuam omsate mah pansan in, apoimoh bang a dan bawl thak a om a, huai dia State Government in Drafting Committee khat singtang mi ngen kaikhawm a i thiltup te a passed theihna ding ua kiphinna neih hun mahmah hi. Huai a ding in, 1951 malam a teengte kia Manipur mi ahih ualeh, singtangmi hilou Meetei te’n leng  1951 nung a gam a neihteng uh, a neitu te kiang a a piakkhiak ding uh chihbang, Manipur singtang gam a MLR & LR Act, 1960 kizat nung a phaizangmite’n singtang gam a suhsak khak teng uh, singtang mite khut a a lut kik ding chihkhawng leh a dandang pansan in kiphin le sa-ik in nuam sa tuanlou ding un um ingh.

A theilou zaw om khang awlmoh thu hi. Rong ngou tuh a ngou mah ahi den ding.