Dah mah tel hang!!
By Sonlal Singson

'Politics is the struggle for power' Hans J Morgenthau
"contractor is the struggle for politics'
Manipur politicians

Amasa pen in,Dah mah tel hang!!

Luak suah huai jen in ADC election kum 20 nung ihmu a a om nung term nih na di I joh siang uh toh results le ki puang khin in a bouruak neu cik hon dai deuh ta abang a,thil dang kikup theih dek dek panta.
Tutung MDC tel na a zil ding tampi leh mi bang ci bang I hi ua cih I hih na uh hon dawk le law mai mah a,nuam khin tel lou e.. Mipi te tung ah thu neihna sang pen leh mahni deihtel theihna piak in I om a,I deihtel na uh a tam jo tham in I zangsiam nai kei hial uh,hiai in politics a I niam lai dan uh leh I perception uh ngeina kum 20/30 paisa sang in le a hoih lou lam ah I khantouh dan uh hon cian kil kel mai. Candidate bang a tam pha ngial a,I gup lam ciat uh hai cilh pih khop hial in gum in,I innsung khosak na sang in le hiai election adi I awlmoh jo tham uh abat na ciang om hi..dah mah tel hang!!

Mipi ten mahni deih pen candidate gup na jiak in cik mah a kisia leh ki hua lou I Candidate te uh I ki mel ma sak loh hial uhi. Candidate dia hon ki sa a ding te bel a ki khin pih,contestants dang te toh ki huat na hiam ahih kei leh ki siat na nei le hi lou pi,a mipi ten ei gup lam ciat gum a propaganda tuam tuam bol in melma lou di lai melma I makai te I suaksak a,hiai in a policy uh leh a ki contest na jiak uh liah khuh sak jou hil hel hi..dah mah tel hang.

Manipur gamsung a non-Naga singtangmite I din mun uh et in,koi ciang phak som a koilam manoh I hiam cih theih hak pi suak,Nampi a I ki luai khom na uh UPF&KNO in I suahtak na di uh lampi ngaih tuah in thil phut tuam tuak nei in Phualpi sawlkar toh hiam kham thukhun bol in pan la lel.Huci bang kal a tua I tel ching thak MDC ten kivaihawm na tuam 6th Schedule boh jui ding cin a manifesto uah by default in tuangsak nik nek sam uh...thil na mai jo ahi kei. Demand bel bol theih tham a,a tak tak suah na din phualpi sawlkar bilbuk a va huau siau siau ding in MP leh MLA ten sep theih luat a neih louh uh im se louh a theih din hoih sa ing..State dang MP 70/80 representatives neite issue sang in ei MP 2 couh thoh jou leh,I MP te uh Amau party ciat a high command lam te khut vik na a 'yes sirji' 'yes madamjii' cia putek hial bng hi ta ua,amai ua train sung a van juak a kun khiu kheu te mah bang a a boss te uh cih na lam lam ua puk te'n ei issue pen priority Lok Sabha ah hon tang kou pih di uh cu thu baih kei em mai..dah sawn sawn hang!!

Huci bang kom kal ah I politician te uh ngaihsut na jau tak leh next generation tan a nampi maban di mu khol di mi ki ta sam pet mah hi hang. Tua I neih lel te dem na hi lou in,I dem louh na di point 3/4 bek om leh le adan om sa ing. Politics kici ahi di bang tak in pai leh 'missionary' or 'saints' te nasep toh ki lamdang lou hial hi a moh puak na uh.Pu Gandhiji in,sahkhua toh politics bel ki khen thei lou leh thu khat a luang khom cin ana tang kou pih. Ei minam lak ah I politician te ka muh dan in,self-centered leh midang a ci pih khat amau sang a a sang jok ding lauh mah bang un ka mu hi.Nam changkang te lak a politician senior ten bel amau hat lai sung mah in amau tha kheng di a ci pih leh nam pih te uh ana sek tou ua political-gap om lou in a nampi uh interest pen hat jo sem in pai tou ngit nget thei hi.

Tu lel dinmun in National Parties te lak ah Congress ah Senior politician ei Paite kampau te a bik in Pu Phungzathang chouh ki nei a,ama tha khek a centre lam a high command te kia va tui tum jou di khat lel le ki nei lou,unau kuki ten bel senior Congress politician 2/3 bang nei sam lai ua; BJP en non ta leng,centre executive committee lak a influential di party member om tuan lou..A kua kua in State hin Union ah Government hon form le uh le state assembly ah Ministerial berth tang kha lou a sitting MLA a I om hun di uh sawt non lou hi ta..dah mah hang!!

India malsuah bial a khan touh na tun ding som in Centre Government in pan mun hon khoh thak ua hi mah leh gam buai leh lungkim lou tamna bial ban ah nuak hat ngen ten khom na cih mah tak development in deih bang in hon sun kha lou hi.

Koi hiam a ann nek khomna a tuanvai ten meh amin ma a bang jah hiam suah khen ut a ki pei he hu bang un India malsuah bial a le mahni ki vaihawm nadi deih a agam neucik sehkhen tum ngen omna gam ana hi a,kua te suk lungkim ah kua te ha-liit khum tuah di a cih centre government adin le lung ap huai pi suak in,phun hat leh thumoh bol cin I issue te uh le serious tak in hon na buai pih peih non lou lam ahi sim ta uh.
Huci bang kom kal ah,tunai a I MDC election uh saulou ki kum lai ni.Telching a om te kipah pih huai vek uh.A nung jui ten vuallelh dan leh vualjoh dan I siam uh poimoh pet mah..Na gup pa hiam or na gupnu cing kei leh le,nang constituency omna bial a cing pen in na hon sep cia ama vote cing te adi couh fund va la khia hi lou in a bial pumpi huap adi Government in scheme pia ahi,huai jiak in a cing pen pen na vote kei jong in nang a hi ve ve..na gupnu or gup pa na vote ching hang in nang leh a vote ching tu te adi couh a government in scheme bol lou a huai jiak in kua mah nawlkhin a ki neisak tuam thei na hi het kei. Vengcih a party workers ten le nou mau hamphat na di nava ki laih khiak tuam ua mi dang nou party hon vote lou te pen tuam bol a na nawlkhin theih vual uh hi tuan lou. Micih adia na ki sem pen a jar jou tu in micih a kua akua cih om lou in pom theih dan kisin ni..Tutung election hun a cing jou lou ten le I opponent tel ching a om pen kiang ah,"kei sang in mipin nang ah muanna hon nei(reposed) uh ahi,pang khom in na I sem di" cih theih na ciang tan bek hon ki sin ta un.Elected a om ten le,na ki khin pih nu or pa kiah,"mipi adia phatuam thei bang pen in na I sem ding ua,cinglou non sak na te uh hon advice jel un" cih dan hon kisin ta un.

Mipi ten makai I cih ei toh ki phu tawk I neih uh ahi.Makai bol tu te mipi te mah ahi a,makai hoih louh na neih leh kua mah ngoh ken nang a bol tu pa na phu bang bang makai nei na hi.

Dah mah tel hang ci non lou din I gam ah micih in mohpuak na I nei tek uh.