Our Role Model: Etton taak Heutu Hihna
By Sangpu tangpua

“ Khatvei ka laizil lai in ka sum hong bei; Nawt kuang bilna tawm phelkhap hial in ka hong chi’l ta hi”. chi’n off period hunlem a la in, ka heutupa un kou pawlte laisimna a kuhkal leh hahpan di’ng ahih daan. Amah hinkhua tungtawn apat zillai, kum tamtak paita a agen tuun ka lungsim a hong suak thak hi. Ahon gen leh kou leng thupi sa in laizilna ah hon chou mah mah hi.  Himah leh a tullel hinkhua et  a zuih touh di hi leh; Kei tel  in ka batch pih te zu leh sa ziak a tamtak sita di’n ka ki um hi, Abul apat dik himah leh Apoi mah mah khat hong suak hi. Hiai thu vual masa teng in I thupi gil tak a I lut ma in I gentup pen bangtan hiam I na man ta di’n ka gingta hi.

I society hi’n saptuam hitaleh public figure,heutu tamtak inei a. Kong khat ah kipah huai lua hi; Pawlpi leh society tamziak a gam  changkang bang hita leh Lamka te hon pha zou om di’n ka gingta khol kei hi. Zaan zek a ina pai khen taak uh,Adc election neuchik luut kiik thak zual ta leng, a boruak sousang mah mah lai a kampau nuih zaat huai sim lah khen khat adia kha vilvel tampi kana zaak khak om hi;Huai te “ Biakinn ale ana kikhawm non kei un; Huai Lanva lui naak a singkung suan I chih khawng forest department te suan di akei di maw, en suansuan in annhuan na di iki piak tuan ken I phuk phuk thou kei dia.Mla te nangawn in political development hiai tan kitun zou ham ham; Mdc power a chu kahsase himai” chih thuleng, tamtak zaak di om hi. Tuun bel aching di teng chingta; Dorca pawlte bangle thuum khawm thei non ta, Upa te bangle hunpai sa a thiltung maban a  mangilh a kingaihdam khin zel ta! chil lumtoh valh zouta, Aching lou lamte’n leng gendi haih tuan saam lou, The Fox say the Grape is sour chih pian a, selection selection chi’n a vuallelhna lungkim pih thei ta ua. Ahi a gen in tua daan I bat touh jel di uh leh! Selection, laidoh or lottery hiam a isai bang leng I chidam na en leh iki tuah na uh hong hipen mai dia aw ka chih hun ton tam mahmah hi.

Heutu I chih chiang in mohpuakna toh kizui ahih lam tamtak in I mangilh kha sek uhi, aheutu hih utna pen bel asia ahi zenzen kei, himahleh heutu I hong ching a, a dinmun tak tak  I hon let chiagin I mohpuakna “it’s causes and responsibility”  pen I paih sawm naak  sek chia I leadership career apat miten  agah muh di neilo uhi. Mipi te phunsiatna; nekguk taak guk a ngohna, lungkim louhna leh muanlahna I tan khak  veu ziak bang ahi dia? Hiai mohpuakna I sepkhiak louh chiangin tua te ek khuk a I khuk hong hi hi zaw ahi. Tua I teel chingte leng a hong ching gige di uh chihna a om kei, kum nga sunga a mohpuakna a hon manggilh ni ni uh a kiatni uh hong hi di’ng ahi. “Belam khat in sahang siing khat a makaih sa’ng in, Sahang khatin belam siing khat amakaih a laau huai zawtham I chih sek mah bang in. Heutu tam(quantity) hilou a heutu hoih leh etton taak( quality) hi ahi ipoimoh pen uh ka chi nuam hi. I heutu masa te hinkhua leh hon makaihna te uh khawng I suut kiik chiang in tu huntoh teh in thupi mah mah kasa hi. Ahoihna uh a ki gen tuah ua, pahtawi hun in aki pahtawi ua, taai angaih hun in kamdam aw nem in kua zaak louh in aki bawl dik gaih gaih uhi. Anei lou leh a tasam zaw deuh te ki ang vaan in, tanau laina leh asung te leng hisaam lou,himah leh laizilnna a poimoh ngaih ziak un kum tampi pi bang nek leh taak chawm in a om pih thei uhi. Na hoih a hon sep chiang unle mi theih di’ng laau hileh kilawm hial in aguk in asem tit tet uhi, thil hoih hih lam ah tua I heutu te uh toh kilamdanna mahmah nei in Behind the Scene ngen in a khosa uh hi. Huchi vek uh ahi bel I chi saam kei Himahleh atamzaw tham in nam leh ami asate uh ittna nei tham tham uhi.

Tuhun in ah huchi bang heutu quality nei hi a om non hetlou chi bel ihi saam kei; ahia avaang law mahmah hi. Khut kuaih di hileh khut meleng tan a hun mai di’n le ka ging. Ahoih loute mah en in,Tua te khawng mah khang thak ten hon enton ua, Heutu dukdak lou, sum leh thuneihna lungsim a dim gige te  nungzuih leh amau toh ki theih bangle  nuam tuam un kisaktheihpih hial uh hi. A gari ua,ana tuang kha chiang chiangte bang le Air Force one America president pa Bolero banga tuangkha a kingai in, Kiphatna leh kipilsakna banga ngaih kha ihi diam ah Khanvual leh tanau te natawm bang I nuai etsuk veuvau mai hi. Khang sawn te hon etton di, I singkung suan daan hih suan sawi mahmah in kamu.
Singkung a neulai in ut dan dan in a soisak theih a.kawi  sak,tansak theih ahi. Himahleh a hong khanlet chiangin a zung a thuuk lut mah mah ta a, va suk tan kiik chih a om thei non kei hi. Khangthak te adia I khaap nut siat ah iki veel thak petmah poimoh kasa hi. Tutung a khapet zena mitkia lele tawm manlo phial a vote zonga I phat pan mahmah bang in; tu khang sawnte ma khualna in huai lam a di’n I tha pe zaw le hang agah I loh diing atam zaw mai diam? chi ut huai hi. I bible in Sum in kha( wings) anei ikianga ahong len khiat leh tuk hun a om  achi hi. I sum te paper  leh plastic khawnga ki bawl ahi, kuang leh muat thei hileleng  Heutu etton taakna hinkhua pen Hiai leitung abei matan chikmah in amang thang kei diing. I Bible a I muh heutu muanhuai Mosi bangin Zogam Mosi ipoi moh daan laa a isakna bang le I aw aheu hial ta!himahleh Huai mosi pen kua ahi dia aw? I chi lai hi. Huai mosi I chih pen kua dang ahi kei, nang nahi. Na minam awlmoh na leh gam ittna hih na mosi hihna himai ahi, Zogam itt I chih chiangin tua I itt dan etin a leitang I itt a banga himahleh ei leh ei, I mi leh sa te iki iit kei hi. Zogam ki muhen laan kei chauh chauh teng leng chi nuam I bat na ton om kasa hi. Hi tak tak leh le’ng  nuam le isa kei di,ban ah I ut di’n kaging ta kei zaw mah hi.

Awle, Zogam Mosi I chih Bible a mosi bangin, Pathian anei, a mite a itt in akhual a, aneih louh tantan deihsak in pathian kianga  amite di’n anget sak zezel, a nunnemna a thupi in Bible a mosi in nunnempen  alaak mah bangin Zomi te laka nunnemna in Top1  ahi. Zu leh sa leh nungaak ah abual kei him him, amah adia a zomi pih te a itt sanga thupi zaw dang a khek thei di thil manpha leh thupi amukei. Ana sep na limlaak a muh di a omkei himahleh a mipi ten a sep a thei thou thou uh. Nam leh gam itt na khangthak te lungtang a amang thang theilou diin chi hoihtak  a tuh. Anasep tungtawn in Kong bang teng a muhtheih a ki khek na kin leh buang hilo in apoimoh bang zel in amuh theih. Dik nasa hia?