Election Huihkhi
MIPITE KI PILTA HI
By : Hauzel Gou
Tuma lam in imaban ua MDC Election ding toh kisai in, 'Selection Sang In Election Mah Awle !' chia thulu vuah in, igam-leh-nam in heutu hoih i poimohdan leh mipite theih dia poimoh tamlou i gelh uhi. Huai sunzom kawm lah hithou in, tutung in mipi lam nga deuh in 'Mipite Ki Pilta Hi' chih i thupi dia hon teel in thukhitna in neile ka chi hi. Mipite’ kingainiam in bangmah hilou dan in i kikoih kha sek ua, i gam a banghiam thil poimoh leh masawnna ding in makaite leh officer-te chauh hihtheih dingdan a ngaihsutna nei ibang mawk uhi. Theihdia poimoh bel officer-te leh makai i chihte mipi nasem ding, sorkal in mipite-a dia nahoih sepkhiak ding a chihte semkhe ding a mohpuakna piak a omte leh a kulna a mipi sik-leh-taang a ding leh nasem dingte hilel uhi. Mipite-le i poimoh ua, mipi omlou in kumpi, milian leh gam kivaihawm chih omthei ngeilou hi. Huaiziakin mipite’n thilhih theihna thupi tak i nei ua, huai tuh bangdang hilou in, vote manphatak i nei uhi. Huai vote manphatak i neih pen uh sum-leh-pai deihtakna hiam, tanau laina, beh-le-phung hihna ziak a zang ding idiam ahihke'h i gam leh mipi a dia sem taktak dingte a dia zang ding ihiam chih ei mimal khut ah kinga liuliau hi. Mipite bangle election om chianga ki ngaihtuah vengveng kawm a vote khiak kul petmah ana hi mawk dan ahi chih itheih gige ki phamoh kha ding hi.
Maban naichik ah MDC election hong om petmah dingin kilangta a, palai dia ut heutu hunkhop bang aguktak a kisa in, a diip bang uh kisai litlit om thamta dingin gintak-huai hi. Bangchi’n panmun khoh leng, hiai election a lohchinna ngahthei ding ka hia chihte khawng ngaihtuahna'n zaan ihmut mohna a nei pawl bang omthamta ding hi. Khenkhat taget lah aw ...aguktak a chingdi sa ka hi chi'a, lungmuang mahmah pawl bang om thepthup zel kha ding hihang !. I heutu muante panlakdan tuamtuam a panla in ki naksak mahmahta ahi uh chih social media tanpha a muhtheih dia hong omta ahihman in, gampua-a omte'n le thil tampi ana theitheita uhi. Kenleeng social media khawng apat in kana enzel a, igam-leh-nam liangvai takmai awlmohna neile om mang nawnlou a; mahni angma-sialna ngen a dimta ihi di uam aw i chihlai in, igam leh mipi nna semnuam a heutu hih ut leh hihsawm bang a hong phulkhe souhsouh kamuh chiang in kipah huai kasa hi. Himahleh, lamdang sakna riau khat chu kinei veve lai a, lawmte khat in chiamnuih a agen 'tutung MDC candidate-te' i et vengveng leh inam politiks dinmun diktak mai limlang a hon taak-khia ahi uh' achihleh dik kasasim vanglak hi. Bangteng hileh heutu dia ut a gam-leh-nam itna ziak a hong kipekhe sauhsauh ahihna uah i gam leh mipi a ding in khamuanhuai leh lungmuanhuai mahmah i chilou theikei a, kipahhuai i sa hi.
I muan dungzui in amaute' leeng hong ching ding ua, i gam dinmun lungkiat huaitakmai leh mangbat huaitakte lah haihlou hial ding ahihman un, pan naktak a honlak thak uh kisam mahmah ding hi. A huai ding mah a mipi a pilte’n vote ching ding i hihman un lungkiatna ding omlou hi. Term masa sangin tutung election tuh nuam tamzaw tham in kilang a, bangziak ahi de aw chih mipi pilvangten ngaihtuah leh suipen in nei mawk uhi. Gam-leh-nam itna toh mipite palai nna sem ut taktak le hi-ngiallou a MDC dinmun leh sum tam chia huai lunggulh a ki candidate sawm lel khawng a om leh mipite'n kinak theih mahmahta ding hi. Huaiziakin mipite ki pilgawpta a, i gam mangbat huaitak mai a om pen, a domkaangtu ding telkhiak kisawmta hi. Tungtung MDC hih ut a, heutu thak ding tamkhop hong kisaan mah bang un, tua i neihlel palaite' le chin nawn teitei sawm in aguktak a panla ahi uh chih muhtheih in om hi. Asep maban uh zohsiang louh tampite sunzom ut a, chin nawn teitei ut uh hi-ngei ding in i um a, kipah huai mahmah hi. Zohsianglouh tampite lak ah sutzop dia hoih mahmah golpi nih om a, huaite bel nikum a i malakna uh leh i delh uh 6th Schedule leh tuma zek a Churachandpur pen Lamka a khenkhiak ding chihte hiding hi. Huaiziakin tutung in, athak a hong ching uh hiam, a luite mah ahong ching nawn uh hiam, a ching peuhmah in hiai i maban ua phutdi golpi nihte a liangkou ua kinga ahi chih haih a om uh i gingta kei a, a thu chauh leh vailak zunthak mai hon batsaklou teitei uh mipite'n kilam-en tinten hi.
Mipi lam en nawn le tutung election om ding ah, a guk takin term masa sang in mipite le phur-chiat i bang uhi. Hiai in mipite' gam-leh-nam it-tu ding heutu hoih leh mipi ai-awh a, mipi nna hoihtak a sem ding heutu deih a mipite' dangtaak mahmah a om ihi uh chih hon musak sawnsawn hi. Candidate dia gintak bangzah hiam itheita ua, tanau naichik chik leh vengsung kibang hunkhop zong om ahi uh chih muhtheih in om hi. Tanau laina hiam, vengsung mi hihna hiam sang in, mipi nasem ding a kipiakzawhna leh mipi ai-awh a, i gam leh mipite buaina leh deihdante tangkou pih ngam leh phutou dingte mah mipi pilte’n deihzawta ihi uh chih kilang hi. Huaiziakin, hiai election ziak lel a tanau kal leh lawmta kalbang hong kise nawn peuhmah lou ding in gintak huai hi. Nikum lam khawng dan a, hiai election ziak lel a, mi piching mahmah lawmta kal kisia a tuni tanpha kihou ngei nawnlou bilbel chihte om nawnlou di'n i-um hi. Lawmta kal chihphet louh tanau kal kisia a ki kawmtuah thei nawnlou a, ana om kha ngeipen tutung in zaw a om nawnkei ding hi. Igupte a kua-kua a hong chin uh i deih chiat ding a, panpihtheihna i neih leh panpih ding mah ahi. Himahleh ahunchiang theidin ipilta ua, nikum lam dan a kisual a kina bolbol chihte zaw tu chiangchiang in gamgi khentheihna mipite’n kinei thei ta mahmah ding in lam-et huai hi. Mipite ipilta ua, hun paisa a mikhat lalna di lel a sisan-naisan kisuah a, luang kikham hial in ana om hial mahle hang, i gam leh mipite’n bangmah iphat tuampih sam kei uh chih itheikheta uhi. A hong ching penpen tuh nang-le-kei vote ziak a ching ahi uh chia kipahpih mai a 'nang huai ate' chih kampau khawng kizang nawnlou dia lam-et ahi. Mipite ki khanglou a, ki pilta hilel ihih chiang ua maw !!
Huaibanah mipite’ pilta i hihman un, a chingdi omsa chia vote khiak sawmlou a om mai sang a vote va khe siausiau chiat mai ding in le i kikoih theihta uhi. Igam-leh-nam banah, khua-le-tui itna ziak a i sik-le-taang a dingdia kua muanhuai ding hiam chihte le mipi lamin ki ngaihtuah detdet masa chiat ding in a gintakhuai hi. Mipite panpih ding in i media tuamtuam, adiak in local channel-te bang in, heutu hihsawmte toh mipite ki houlimna ding hunlem bawlsak in mipite hon navak saktuan mahmah uhi. Huaiziakin mipi nasem ut le hingellou, dinmun deihna lel leh sum-leh-pai etlahna ziak lel a candidate sawmte khawng zaw ki telching maimai nawnlou ding hi. Mipite'n i dinmun uh kithei kheta in, i khanglouta ua, sum-le-pai etlahna ziak lel a igam-inam zuaksawmte ziak a ki tuisa-buah nawnlou ding ihi uhi. Candidate-te'n non telching uh leh hiaite semding chi'n hon gen zungzung ding ua, a hong ching hial chiang ua, a phawkphak nawnkei ua leh, a phawksak a, sakawl banga kamkaih thei ding a mipite pilta i hi uh chihle makai hihsawmte’n a theih thak uh deihhuai hi.
Huaiziakin mipite’n tulaitak, i power neihlai tak uh ahihman in azatdan siamchiat a, ana mangngilh kha zualte bangle ana ki hilhthak ding ihihman un naknuai kam-kia a gam-leh-nam itte a ding in chin haksa mahmahta ding in gintak huai hi. 'Mipite' Pilta' i hihman in i thuneihna zanga Mosi bang a pitu hoih telkhiak sawmte ki hita ding in iki chial hi nawnlou in, i kikoih in i ki muangta hi. Toupa'n heutu hoih teelkhe theiding in, honvualzawl chiat henla, igam-inam mangbat huaitak mai hiai election in suahtakna hontun hen aw.