Na Nna Sep'n Suk-khak Lianpi Nei Ahih Dan En-mah dih
By Nengsuanmang Phaipi

Kovel a teng mihingte atuam zil in I lung-geel tuam, i deih uh tuam, i ut-uh tuam, neek leh taak zonna leng tuam, nna sepna mun leh khosakna leng tuam chiat hi. Huchi ahih lai’n, i tenna uh kibang ‘Kovel’ a tengkhawm ihih dan-uh haih vual louh ahi. Huaiziak’n, i kampau, i gamtat, i nna sep leh silbawl khiat te’n I kim leh kiang a khosa midangte ana sukha lou-theilou, ana het-kha lou-theilou hong suak ahi. Tua ahih man’n, i nna sepkhiat leh bawl khiat in midangte adi’n ahoih lam atun hia, aselam atun hia chih bangleng ei-mah in et-kik zel poimoh petmah suak hi.

Hun sawt kuamtak paisa’n, khovel ateng mihing te’n sepna hoihtak aneih ua; huai sepna tung tawn a lohkhiat ki ningching hun-tawk amuhnaak uhleh ana lungkim mahmah uhi. Ahihhang’n, tuchiang in, sepna neih a, loh ki ningching muhvuak hun salou’n; nna sepna tungtawn a bukimna neih, khanzawk semna neih leh kipahna neih a, amau nna sep ziak a kuahiam khat in kipahna leh bukim kisakna aneih theih uh lung-gulh mi tamtak ana omta hi. Huan ah, tu chiang’n nna khatpeuh sepdek ahih hun in, bangziak a huai nna seem-ut na hiam? Chih kidot ahi ta a, aziak theih utna lungsim toh kihing abang simta ahi.
Na nna sepna in manphatna leh suk-khak lianpi nei ahih dan na theih poimoh ahi. Huai ding’n, nang leh nang dotna na kibawl khum-zel apoimoh. Ka nna sep in Kovel leh ka kim leh kiang a mite adi’n bangzahta manphatna tunkha hiam chih na kidot poimoh kha ding ahi. Hiai bang dotna ana kidong mah dih; Ka nna sep khiat in mi bangzah adi’n phatuamna atun a? Tha leh Zung ka sen’n bang zahta kikhekna leh lamdan na atun a? Hiai bangte na hihtheih intuh, atawp in na nna sep ziak a midangte hinkhua a manphatna tamtak natut khakte leh a selam na suk-khak bangzahta omhiam chih na musuah theiding ahi.

Etsakna:
Sinsaktu na hihleh, na teaching profession a thil hong kikhek om zeuhzeuhte ah na lungsim ngaihtuahna buaisak kei zaw in, huai naak sang’n niteng a klass luum na lut chiang’n Naupang tamtakte lungsim ahoihlam a pitheihna ding Hun lemtang mukha na hih dan phawk zaw in. Na tung a Nu-le-Pa leh Naupang tamtakte maban ding kinga kha ahih lam phawk in.

Financial adviser na hihleh, nang nna sep ziak’n mi bangzah in a sepna uapan tawldamna angah baih ua, mi bangzah in a ut leh deih mahmah uh inn alam zou ua, mi bangzah in a hinkhua ua dreams aneih uh atangtung sak zou ua chihte ngaih sun inla, nang tung a mitamtak kinga ahih dan thei gige kawm’n nna sep in.

Insurance professional na hihleh, na theih ding bel nang panpih ziak’n mi bangzah mawng-mawng in bit kisakna, panpih apoimoh hun ua panpihna muh-uh hiam chite ngaituah inla. Nang ziak a panpih ngaite’n panpihna mu-uh ahih dan theih kawm in chihtakna toh semzom zel in. Hiai bang na hih theihleh, midang sangmah in nang mahmah in kipahna nei ding hiteh.

Politician na hihleh, mipi mai a na genkhiat bangzah akisem a, gam leh nam adin bangzah pahtuamna natun a, na mi leh sa adi’n Heutu muanhuai na hitaktak nahiam chihte nang mahmah kidong zel inla, na nna sepsuah omsate enkik thak zel in. Na sep suahte nang tung a hong kisem khia hileh na pomsiam in nakipak na diam chihte ngaih sut in nei’n. Chihtakna mah toh semzom zel in, nang tung a mi tamtak ki-nga leh na septe mite adia manpha lua ahihdan phawk kawm’n, thil apai khelh chiang’n mitamtak hinkhua su-kha leh mi tamtakte khosa nawk-kha ahih dan theikawm in gin-omna mah toh sem in. Hiai bang na hih theih chiang’n, na sep khiak sate ziak in ki siamtanlouhna omkei ding a, lungkim leh kipak tak in na hinkhua na zang thei ding hi.

Nang ziak a thil tamtak sep-khiat leh bawl-khiat omte a manphat dan na theih chiang’n, huaite nangmah adi’n hanthawnna hongsuak maimah ding ahih kha. Huai in nang ah lungkimna leh bukim kisakna hon tut behlai ding a set tawk vawi..!! Tulai khovel ah Lungsim leh Kamchauh a nna sep in mite zou lawmlawm nawnlou hi. Kamzol luat sangmah in sep a sepkhiat thoh ahih chiang’n mite lungtang zou a, mite naakpi tak in khoih khazaw hi.Na sep a manphat dan mi tamtak in ana theitak pi uhi. Huaite lakah khenkhat- Mahatma Gandhi, Nelson Mandela leh Mother Teresa te ahi uhi.

I gen tup pipen bel I nna sep in manphatna leh suk-khak lianpi nei ahih lam ki theih poimoh chih ahi. Huchibang I neihtheih na ding un lungsim ngaihtuahna pen alianzaw leh uap-khak lianzaw neithei ding a ngaihtuanna pen khekzek angaihleh leng khek poisaklouh ding ahi. Hiai bang I hihtheih chiang’n ei mahmah in I nna sepna tungtawn in kipahna neithei phet liap ding hihang e..!!