“He u tuzan a kipat in nupi ka hi tai” Part VI
By John Suantak

Sutzawpna

Nunnem tawh ka kaal ua meima um chuh neukhat a dam deu tai. Tichun lungsiatna lampi chuh sukzan in a umkit ta, pangai gual in ki lungsiat hinkhua ka mang kit tau. Zi nei ding ah kiman ziang nailo maleng lungmuanna khat chuh ka nei himhim ta, ka kiman hunhun ah papi hiziang thei ding dinmun ka hi tai.

Ti chun hun chuh hiatlo kal in a chia hat mama a, Nunnem birthday le hungtung ding ziang dingin a um tai. A tangvalpa a kihisam leh birthday gift bang le piak hung kilawm ding a hia, nidang gual ah Birthday card vak piak ziang lawmlawm chule kati lungthim hi. Himaleh, tha lailung tak ahiziak in sum leh pai lam in ka giauchau mama a, aguktak in ka patau mama hi. A limlak a hungthawt khat chuh nal theitawp ding ah ka ginchak gual in ka edit a, google ah birthday wish hawi kasak pen khat chuh download in, whatsapp ah thawt mai ziang thei dingin ka kawi hi.

A birthday chuh a hung nai mama ta, zing leh tung ziang ding a hitai. Sum lah ka dawigual in ka nei pua, mi kiang ah bat ah lak ziang lawmlawm chula zachak um kasa kit ah. Zachak ziak ah um thim maithei ahitaklo ziak in lawite lak ah ei dawisak pen ah ka hiat Mimin kiangin ka chia a, kisuangla tak kawm in ka dawn khawng hi. Ei hethiam mama a, “Tu leh tu hin vang chuh kenle ka nei ziang pua, hung la hawl piak nangka, lungkham kin” ti’n keile lungthim nuamtak kawm in ka pawtdawk hi. Lawi leh pai dawisaktu nei ka hilam ka hechian ah, vangpha ka kisa mama hi. Haksat ziak leh pawimaw ziak ah sum kibat thei bang le malzawlna khat a hia, bat na di na tiang muzolo chuh haksa tawp khawk a hi tai.

Zingkal khua a hung vak a, Nunnem lim leh birthday wish ka bawl chuh ka thawt a, sun phat leh birthday treat dingin ka invite hi. Kenle ka lawipa sum hung piak chuh mang in birthday gift dingin T-shirt hawi kasak penpen khat chuh ka chaw, hawitak in ka pack sak hi. Sun lam dak 1 vel dingin Nunnem te inn lam ka zuan a, ka va puidawk hi. Tichun Lamka ah restaurant minthang mama Cozy World in ka lutpi a, table a kil lam khat in ka chutpi hi. “Happy birthday” ti’n chibai ka buk a, ka present ding chu ka pia’i. “He u, ka kipak taluai, ziagual ah sum seng ah bawl khelkhel ngailo eivei. Zia sang ah chun I kichen phat leh a dingin saving zaw ta” Kenle, “Sum chuh hung um zel na di kawm” ti’n ka lawipa sum ka bat ahilam ka kiman geuguau hi.

Nuamtak ah ka holim lai ua chun Nunnem phone a hung ging a, a en ah a pick-up puai. “Kua a hia maw?” ti’n kenle maksa thim in ka dawng hi. Ei dawnhu ziang pua, ziakal ahun a phone chuh a hung ging kit man hi. “La ziang ou, thu pawimaw hin ah” tia ka gen leh dingdawk in “Hello” ti kawm in a vak dawk hi. Holim lai ah igei ah phone pau kuaukuau ziangte pakcha beklo himaleng Nunnem in mi hopi ding ah ei dindaw san chuh ka hachang a thak thim hi. A hunglut kit phat a chun “Tangvalte hikit di kuau em maw, mi luck nungak ah ei khak le lunggim um” ti’n ka engho hi. “Ka pu chapa Khaipu kha a hi. Tha kit leh suty hung pawt gua ahi a hung gen ei. Ka buai laitak a hia, awl leh kiho thak hiti ka ti ei” ti’n maitai beklo in a hung gen hi. Gen ding ka he ziang puai.

Nunnem in ei them ngai in kahe pua, a innocent mama a, thudik taktak gensek dan in ka hia’i. Ahinlah, Khaipu in a call chuh gendaw sese da leh chuh ka lungthim a nuam zaw diam aw, hun pawimaw tak matlai ah ama khelkhel in a hung call chuh mood a su flop mama mai hi. “Thosi in a baw lehle a chal hida hen” ti la phuaktu pa hileng kilawm in kei chulah ka thikthuse mama ah. Ka nungaknu chuh mi’n a hopi leh lengdang sai ziang le hisamlo bangziak ah pawna ah vei khelkhel ka hi diam. Ka umdan ah lungkimlo ka hi a he mama a, “He u, mi’n ei call leh pick-up lo chuh kiletsak huai talua ka tia ka lak maimai a hi. Bangma dang ka gen puau” ti’n ka khut awl ah tukawm in ei gen hi. “Hi ngei di kawm, mi’n ei hopi leh kamthiam tak ah ho ding a hi” ti’n thanuam beklo sasa’n ka gen hi. Tichun bill pia’n ka pawtdawk tau.

Nitak lam anne zo Nunnem te inn ah chia dingin ka kisa. “Khawi chia gua get. La mawk vakvak sang un hospital ah la pu um bek chule va vetha tang” ti’n ka nu’n ei gen ah. Ka kisak zaw phat in Nunnem ka call a, hospital chiapi dingin ka ko leh kikhawm ah chia ding ahidan ei gen ziak in kenle lawite khat paa in ka chiapi hi. Ka pu chuh thingtang lam ah um a hia, mifeltak a hi. A ngaina a tam ua, a kiang a chun a ma ngainate a ding dim depdup ui. Nurse nu ka pu kap ding ah hung chun “La damlo uh la uplup guat uh hem, mi zia zatzat hi. Kitawl dawk deu un” ti’n a hung haanglut zauzau ah. Kuama’n nurse nu thugen chuh ngaisaklo hileu kilawm in a dak heuhou a, kei mi kisuangla hatpa chuh kiman in awl in innmai lam in ka lawipa chuh tawh ka chia phei ui. I chawndan ah mi kingainate ihiu a, damlo hun ah kive ah kikantha tuate ihiu. Ngainat ziak ah damlo va um lutlut bangle ala pha pen lo maithei. Damlo va ve ah damdawi nek ding suggestion va pe mawk, mithi gal ah va kichia ah a thingpi uh va dawndawn mawk! Ki ngainat na suklat dan hawizaw umlo ahi diam ahiloleh a he umlo? Mipil mithiam a ni ani kipung hulhul ah zia haw bang hile ngai pawimaw thei ding kineilo adiam?

Damlo vena ding ah ka nu’n a hung piak sum neukhat chuh ka pi kiangin ka pia, tuilum leh a pawimaw dangdang a um leh hung la un ti’n ka gen hi. Pawtdawk in Nunnem te innlam ah chia dingin lampi gei ah kuva ka thai malam ui. Ka lawipa chun chiana ding dang a nei ziak in ei taisan ta, ka chang in Nunnem te innlam zuan in ka chia tai.

Sutzawp naklai ding…..

[Zia thu kizik hi ziktu tuakkhak himaithei, hilo maithei. Kua a hem tawh a kituak khak leh tupmawng hilo ah kituak kha mawk hizaw a hi]
Dawisaktak ah ei simpiaktute chung ah kipakthu gen kawm in, ka zik zawm vatvat theilo ziak in la ngaidam uh ka hun dawn hi.