He u tuzan a kipat in nupi ka hi tai! Part V
By John Suantak

Zia laitak achun ka phone a hung ging kit a, no. hiatlo khat a hia, kenle, dip kuduk kuduk tikawm in, kinepna sangtak tawh la le la ziang pai ngamlo in, “Hello….” ka tita… Kinep chuh a bang puai…Bang pau a hile hiatlo khat in ei ho zialzial ah.

Nitak lam khua thim ding a hitai. Nunnem chuh ka call mai ding a diam le… Vak call ziang ding chule mi’n i message nasan le ei reply lo ah kati zel hi. Ki pawsal sak deu in ka um phenphan a, himaleh, phone ka chawi phat leh Nunnem no. chuh dial mai ding gual in ka um zing hi. Kisum zo mama talo in khawmui kuan in ka call khong hi. Hui ha….ring a chia a, himaleh call a pick-up puai. Call kit ding maw… kenle, “Bangti la tam…pawsal ei neisan ziang la tam?” ti’n ka message tai. Chawmkhat zaw in “ii” ti’n a hung reply hi. Pawsal a neilo chu ka hiatsa ahia, ka chung ah lung awilo ahi ti suklatna ahi ti ka hia, reply kamu chuh hosiatna hilehle ka kipak himhim. “Sorry D…zanitak akha ka lunggel a sang talua ziagual akha ka hun thawt khak a hi. Ei ngaithiam in…” ti’n ka thawt tai. Bangma reply kamu ziang pua, hun chawmkhat zaw in, “Ka hung hethiam hi. Kei sang ah hawizaw leh felzaw nang a dingin a tam mamai, ziate chuh teel mai in….” Banggual ah reply ding ka he puai. Nunnem in ei hethiam leh aw…

Tichun ka kikal ua meima khat um chuh a himai tai. Ka kiho ua, a tuithei taktak ta puai. Ka ki text ua, nidang gual in a chiazawm thei taktak ta puai. Bangziak pen tak a hi diam le…. Zia dinmun ah ki um chuh a inn ua va vak ding le ka ngam diak puai. Ziagual tiang ah ka vei hi ka ngaitua thak leh ka ngai takluat ziak vang chuh a hi. Keima ah kichapo sakna khat um pen chu a chang leh a hatzawk ziak ah zia tiang tung ka hilam uh ka he puai.

Ziagual ah lum lah lumlo, vawt lah vawtlo ah um chuh ningkitel um kasa sek mama hi. Thu kichian gen ziang ding lah kei zawk pawna zaw hiding ka hi. Ken ka genlo leh kuan a gen diak diam leh…. Tichun Christmas te hawle hung kichai in kumthak ki hungtung ta chuh, kumdang sang ah lawkzaw mat ding ti chuh lunggel ka nei sam hi. Insung khawsakna beplo, nungak-tangval kawng ahle pan thak lak chuh ka nuam hi. A kum thak maleh ka lungthim a thak ding chuh a hithei ziang sam puai. Kisiam thak a kipat thak ding lunggel khat nei maleng, ka thinlung ah mang theilo leh dam theilo khat chuh a um veve hi. Bangtik leh zia chuh sukdam a hita diam?

Khua a hung vak a, ka ngaituana masapen chuh Nunnem ma ahi. Nidang ah sep leh bawl thanuam tak ah ka sep sekte chuh nidang gual ah thatnawp ding dan a um ta puai. I bawl lam ta phawt chuh a kilawm mai a hi tai! Natna dang thawk sang in lungthim nat thawk chuh a haksa zaw mama hi. A gen ding dan le a um pua, paimang ziang theile lah hilo. Pawsal khat ziagual ah lungthim nuamlo tak ah hinkhua mat chuh mi hiat dingin le a kilawm zel pua!

“Nunnem, ka hun ngai a, ka thinlai in la chaamzing hi. Ahinlah, eigel kal lem thei talo ding ahileh ei genchian mai in…I ki ngai lim lai hinkhua mat kit ka nuam ngei!! Ka la sukhial hi ti ka hiai. Sukdik theina hun lemchang mukit thei ding ka kinem” ti’n ka message tai. Ka kinep gual in reply kamu ziang puai. Ka phone chuh ginglo pi’n le ka biltha ging gual ah ngai in ka en kawm ka en kawm zel ah, ka kinep gual in reply kamu puai. Nitak khua a hungthim ta, ann nezo innmai ah lunghel deu ah ka um leh, “Hun la nei leh walking dingin hung vak phei in…” ti message ka mu chuh dam huai hileng ka kilawm hi. “Awle” ti’n kindeu in ka kisa, Nunnem te innlam chuh ka zuan phei ngal hi.

Tichun awl in nidang ah walking ka chia sekna lam mau a chun ka chia ua, nungak-tangval kihethak, kingaithak gual in ki zachat thim gual in ka vaak ui. Nunnem in awl in ka khut chuh a hungtu, ka kitizawt hial hi. Ka lungguk chuh kipakna’n a dim hi. Bangma gen tamlo in ka vak ua, “He u, zia hun phat leh ka hun miss sek dan… ahinlah, la dinmun ka hung hethiam a, la hinkhua subuaitu hikhak ding ka lau sek” ti’n aw nem hiau cha’n ei gen hi. “Ka sukkhel lei ngaidam a, ka kipak hi. Ka ngaituana a chiasau thei talua, ka tuplo pi le a chang leh gendawk sek ka hi.” ti’n ka dawnhu hi. Bangma genlo in ka liang in a hung kinel a, tha vaak singseng te chun le hun kipakpi hileu kilawm in ei sal eng singsing ui.