“He u tuzan a kipat in nupi ka hitai!!”
Sutzawpna…
By John Suantak

Nunnem mintak chuh Nunnemmawi ahia, insung achun chanu lianpen ahi dungzui in bawinu ti’n a kosek ui. Ken chuh Nun D ti’n a min chuh ka phone in ka save ah. D chun duatlai ahiloleh darling tina dan ah ka mat a hi. Ka ko phat ahileh chuh Nunnem ti’n ka ko sek a, ama’n ahileh chuh “He u” ti ngen in eiko sek hi. Zia chun ka ngaina a zual diak hi’n ka hia, I lungkham thim phat diakdiak leh tawngkam nem hiau cha “He u” tia a hung pat leh chuh lungmuan a um chuam mama ziang hi. I kiko dan teu haw hile a la pawimaw mama dan a hi.

Khatvei chuh ka nu’n “Bawi, nangle upa la hia, zi nei mai ta le chin la pa tawh ka gel uh eivei. Bang ngaidan la nei em?” ti’n awl in ei gen ah. Zi nei thei ding hun chuh kihita maleh zia lam chuh lunggel ah kinei kha nailo ahiziak in dawnhu ziang ding dan helo in ka phone la dawk in facebook ka khawi hi. Ka nu’n le, “a la kingaitua ou” ti’n innmai lam in ei pawtdaw san tai. Ka nu thugen chuh ka ngaitua a, Nunnem chuh ka nei mai ding a diam? ahinlah, zia ding a chunle sepna kitup tak ka nei nai pua…. zia chule a pawimaw pen kasa kit puai. “Pa” hi ah inkuan tungdawk dingin ka kiman tam? A hun tai ti ziak ah nei mai ding maw, mi sawlhat ziak ah nei ding? Insung in a pawimaw ziak ah nei ding ei diam? Khat chale ka dawnhu thei a um puai.

“Nunnem, kicheng mai ding I ta diam? Chanau te’nle ei gengen ua…” ti’n ka whatsapp tai. Smiley hung thawt in, anuai ah hahaha…..ti bep zik in a hung reply hi. Kenle “silent means yes maw” ka ti kit leh, “Hawitak in ngaitua inla, zia kipat a chun thupukna siam thak in….zi nei nuamta la hi taktak leh kei sang ah nungak felzaw ka hun dawisak hi...” ti’n ei reply kit hi. Kichen a nawp nailo ziak a diam, kisuangla ahi diam ahiloleh nungak dang ei dawisak taktak?? Kenle bangma genlo in smiley khat ka thawt hi.

Zia nitak ma a chun kikhawp ni a hilo ziak in Nunnem te innlam zuan ding ka hidan ka text leh a veng ua mithi umziak ah lengkhawm ding ahidan ei gen a, kenle la pel phat uleh hung hiatsak in ti’n kuva thai gua’n dukan lam ka zuan hi. Dukan mai a chun nidang ah ka lawi pha Minthang chun eiko in, kuva hung thai in, hung khelai ka a tia, kenle ka zuan phei hi. Minthang chuh mifel tak a hia, ka lawipha mama a hi. Ka holim ua, sepai pang ahidan leh zi leh cha 2 neita ahidan a hung hil hi. High School kai lai vel ka gen ua, lawite bangbang tiang tung a hiu em ti haw ka genkhawm ui. Lawite khenkhat chun vangsiatna ziak in eila mualliam san le a um tau a, a damsunte le khawsakna ding buaipi in mun chiat in a kikhen zak vek ta’u. Khawvel a hung chiachia leh school kailai ah gunda mama itite bang le Pathian nasemtu muan umtak ah pang le um ahidan eigen hi. Mihing in vang kuama masang ding I he lawk thei pua, kua kiletsak a simmaw chuam ding umlo ahi ti ka lungthim in ka ngaitua hi. Kimulona sawt ahitak ziak in gen ding ka hau mama’u a, ka phone ging ahiziak in ka et leh Nunnem in lengkhawp pel ahitak dan uh a hung gen hi. Kenle chiana ding pawimaw nei ka hi ti’n ka lawipa chuh ka taisan tai.

Nunnem te inn ka tun leh tangval 2 le a la um ua, nungak hel hi ngei dingin ka gingchai. Holim a thiam ua, a dur mama ziang ui. Ken chuh gen ding le ka he vak pua, ka pau bek puai. Nunnem in thingpi hung bawl in ka dawn ua, chawmlo kal in dak 10 lam a hung gi man hi. Keile ki lungpi kigel sak in chiata ding ka hi tia Nunnem ka vak signal leh a lu a pei a, um nalai in a tina hi’n ka lai. Lawite holimna nuamtak a chia zinglai achun ka ngaituana ah nidang lai ah thingtang lam nungak-tangval kihel dan a genteu ka geldawk hi. Tangval te’n zan sawtpipi nungak a chutpi ua, zingkal matak ah tho kit in, insung na zosia sem in leh sun phat leh lo a kuan kit sek nalai ui. Zia hun lai ah nungak, tu ah I nute’u hi a la felzo tak ahidan uh ka hedawk hi. Nungak a hi’u a kipat in insung na zosia a bawl ua, sun leh lo kuan kit nalai. In nusia in pawsal te a bel ua, nau nei na hun ahle a haksa pen a thuak kit nalai ua, nupa’n kal buai ziak in kikhen kha leu chate changlo ding hinalai!! Numeite haksa thuak dan hethiam ah lungsiat pawimaw a hiu ti ka ngaitua dan a hi.

Lawite le chiata himaleh zan sawtta a hiziak in keile chia dingin ka kisa tai. Nunnem in inn mailam ah hungzui pawt in ei thak a, “Tuni ka text kha gen kit di kitia kigen manlo…” “Hun a tam nai nidang leh gen nai ti…” ti’n ei dawnhu hi. A khut nem tak ka tuksak a, “I love you…take care..” ti’n mangpha thak in ka chia tai. In ka tun in chanau te a la lumzo kei tau a, ka room lam zuan in lupna chung ah ka kal ngal hi. “Inn ka tung tai…” ti’n ka thawt a, “Damtak ah inn la tun leh kipak a um hi… Zingkal bawl ding ka nei ziak in imu phawt hiti aw he u” ti’n mangpha kithawt kit in keile ka lum tai.

Hun hung chiazel in Nunnem tawh ka kingai na’u bang kum khat lam a la val man tai. Nisin hun matdan chuh Nunnem tawh ki chat….limlak kithawt tua…jokes ki share…pawtdaw khawm…tivel a hia, kuama hiat phaklo in nuam kasa mama ui. Nunnem le inn ah mawk um ziang chuh ti’n Bangalore lam ah company ah sem ding ah chia nuam a hidan a hung gen hi. Ken chuh, ka hun dawisak puai ka ti ngal a….inn lam ah nasep ding kihawl leh um mama ding a hi. Zia lam khelkhel ah va chia a ngai puai minsiat sak maimai ahi ka ti piak hi. Lamka ah vang chuh khanglai te a ding ah sep ding a vang a, ziaziak a chun tamtak te’n sep ding hawl in khawpi sung lam a zuan ui. Khat leh ni sukkhel ziak in a um zosia’n minsiatna a tuak khawlaw sek ui. Ka gen ziak a hidiam ah zia thu mawngmawng chuh a gendawk kha kit puai.

Keile sepna neucha khat nei sam ka hileh nidang gual lawmlawm in ka hopi man puai. A text hung thawt I reply pailo leh le a lungna man thim ziang sek hi. Zia haw bang kha a khawnung ah ka ngaitua leh Nunnem in eila ngai takzet a hi, a ma khel ei lungsiat um puana ka ti nuam hi. Ni khat chuh a pute’u in a chapa pa’u a ding ah va hel uh ahidan a hung gen hi. A min leh a sepna na tiang ei hil a, sepna hawitak nei leh mipiting mama a hidan a hung gen hi. Kenle ka dai a, “La luck e..nei ziang tang o…” ka ti leh a ki lungnat sak ah chawmkhat mawngmawng ei ho puai. “a tawt maimai a chulam….ken ka duatlai midang a dingin ka phal puai..” kati leh ka lu ei bet piak a, tukhel ziagual kha gen ta kin ti’n a nui heuhau hi.